Read Ninia Yali MARKUS 4 Bible Online

MARKUS 4 - Ninia Yali bible

MARKUS 4

¹ Fobik ekenim ik yenggeleg inggimu wene hweag-esauk katsi. Wene hweag-esauk kwit, wereg ma, di ap homi su ap homi humdoho at akit kabog-duswa ma, it ap homi ik inggimu humdoho kabogdeg wereg kweleg, at Yesus anyo perahu eke fam hweria aik kwisireg, perahu ikma etano hwerieg lit,

²di wene su wene foma wal-heheg hweag-esasi. Wene hweag-esauk kwit,

³“Henesanggo holeg lamek,” hweag-esasireg, “Ap a folduk on en, a folmin ulug lasi.

⁴Foldil lauk kwit, foma kwe fam wambil lasi. Kwe fam wambil lasi ai, suwe darulug waharuk kwit, nil lausa.

⁵Foma eke helep fal fam kwenang apuhuno dorangge weregma wambil lasi. Helep fal emberimmu wambil lasi anyo kwenang wilimdeg eleg ma, fehelsi famen,

⁶helep fal emberimmu deg ma omanggen furoho yaho eleg ma, mo en halo isireg bug atsi.

⁷Foma eke enggela alok on anggelegma wambil lasi. Enggela alok on anggelegma wambil lasi anyo, fehelsi famen, enggela alok on wilipuk kwit, anggelegma sal-kul disi mu, anggen yihuk fug angge welatsi.

⁸Foma eke kwenang hesilig on fam wambil lasi. Kwenang hesilig on fam wambil lasi anyo fehelsireg, sipukdoho wilipsireg, anggen yig-atuk kwit, indip foman deng misig yihikeg, indip foman deng biren yihikeg, indip foman deng ohwan yihikeg, yihil lasi,” ulug, hweag-esasi.

⁹Hweag-esasireg, “Henesanggo wereg halug ai, furoho neg holduk kamek,” ulug, hweag-esasi.

¹⁰Hweag-esasireg, amu wereg ma, at inim wereg anyo inim, it ap nesanggoen inim, it anyo en Yesus hein og-hauk kwit, “Hat wene wal-heheg hweag-nesehen anyo furoho hweag-nesakin,” hweag-utswa.

¹¹Hweag-utswa ma, at Yesus anyo en, “At Allah apma henobahaku wene anyo at endama heraho welatsi men fagdoho hweag-hesasi famen, it hesangge wereg on neg de, di wene su wene wal-heheg neg hweag-esauk kahi.

¹² It di siag su siag duruk anyo, Allah en apeleg apdoho embesehu en enendama wenggele folug embesouk no, it inil heheg, duruk famen, furebouk fug angge welaheg, enesanggo holeheg, duruk famen, enendama wa fug angge welaheg, duruk ulug, an den wene foma wal-heheg hweag-esauk kahi,” ulug, hweag-esasi.

¹³Hweag-esasireg, “Wene foma wal-heheg hweag-hisihi su, wa fug angge wereg lit, uruk kahep? Wa fug angge welahep halug, fobik wene wal-heheg hweag-hesahuk halug, nangginoho wahup behep?”

¹⁴Ulug, hweag-esasireg, “At ap a folduk on anyo en a foldil lasi anyo hag ai, Allah wene hweag-isil noruk ai.

¹⁵Ne, a kwe fam wambil lasi ai, it ap homi wene wauk famen, at Iblis watlug, wene enendama a foleg anyo henetlug wilipuk.

¹⁶Helep fal emberimmu wambil lasi anyo hag ai, it ap homi wene anyo holduk kwit enahayeg fam wauk famen,

¹⁷fobik en omanggen enendama yaho eleg ma, nukoho misiham welatlug, Allah wene wauk anyo fam enobam anggin-fanggin feseheg, siahap-biahap debeseheg, debeseruk halug, Wene su nenerim, ulug, folo-folo embeseruk anyo.

¹⁸Ne, enggela alok on anggelegma wambil lasi ai, it wene enesanggo holduk famen,

¹⁹nangginoho welamuhuk ulug, enenda anggindoho wenggeldil laheg, Dung apdoho fahat-dahuk, ulug, enenda wenggeldil laheg, di angge su angge eleg am on fahet enenda nil laheg, dil noruk fam ai, a foma anyo alok en sal-kul duruk hag, wene anyo baloho foruk mu, anggen yihiruk eleg on de ai.

²⁰Ne, kwenang hesilig on fam wambil lasi anyo ai, it wene hole folug wauk mu, anggen yihiruk kwit, foma anggen deng misig yihikeg, foma anggen deng biren yihikeg, foma anggen deng ohwan yihikeg, duruk,” ulug, hweag-esasi.

²¹ Hweag-esasireg, it hweag-esauk kwit, “Lampu fisako waruk apma herako feheg, nohorukmu apma folug, duk ale fano behep? Eleg. Enamegma leko fisako foruk no?

²² Di angge su angge heraho wereg ai, enam aheg, ne, di wene su wene endama heraho wereg ai, fag aheg, duhu en wereg.

²³Ai halug, henesanggo wereg halug ai, furoho neg holduk kamek.”

²⁴ Hweag-esasireg, “Hit henesanggo holduk kahep anyo, henenda fureberuk kamek. Ilirangge anyo fam wal-halug, ap homi og-esauk kahep anyo higitdoho wal-halug og-hesauk mu, hahup. Ai en, ekenim dopnoroho og-hesauk mu, hahup.

²⁵ Hit henengge wereg halug ai, ekenim dopnoroho og-heseheg, ne, henengge eleg halug ai, dotdeg wereg anyo deloho hweleheg, duruk mu, hahup,” hweag-esasi.

²⁶Hweag-esasireg, “Allah apma fesehu anyo, ap eke eyabukmu a foldil lasi anyo hag.

²⁷Ap anyo o hup atuk halug nohokeg, o sekan duruk halug di ale su ale deheg, dil lauk kweleg, enggela fehelduk katlug, indip hum atuk. Hum atuk anyo, nangginoho hum atuk, apeleg deg.

²⁸Kwenangma folegma amu en wilipuk. Wilipuk kwit, enggela biren wiliplug lahalug, anggen yihiruk.

²⁹ Ne, anggen yihig anyo, wirik atuk halug, balduk sali horog aik waharuk halug, aben karog fam baldil lauk anyo hag ai, at Allah apma fesehu wene re ai,” hweag-esasi.

³⁰Hweag-esasireg, “At Allah apma fesehu anyo ai nunggwangge higitdeg wal-ha e? At apma fesehu higitdeg wene wal-heheg ke hag hweag-hesa?” hweag-esasireg,

³¹“Eleg. Allah apma fesehu ai, sawi [8] anggen hag. Di a su a anggen humon hag, ne, sawi anggen ai re dotdeg famen, a yatuk halug,

³²di enggela su enggela laharuk ai dotdeg laharuk famen de, sawi anggen neg de dotdeg famen, laharuk kwit, indip hum atuk. Hum atlug, enggik doalduk halug, di suwe su suwe kunmu etma ena wirik kuruk hag ai, Allah apma fesehu wene higitdeg,” ulug, hweag-esasi.

³³It ap homi anyo di wene su wene hweag-esauk katsi anyo furebelug wausa halug, wene humdoho wal-heheg, hweag-esauk katsi.

³⁴Wene fagdoho hweag-esauk katsi fug. Ite, wene wal-heheg wene neg hweag-esauk katsi famen, it at ele wauk on anyo neg de, at inim enemumu wereg lit, di wene su wene hweag-esasi anyo, furoho hweag-esauk katsi.

³⁵Hweag-esasireg, o hup atuk kweleg, at Yesus en at ele wauk on anyo, “Ik foma fil nindig amukohon,” hweag-esasi.

³⁶Hweag-esasireg, ap homi humdoho kabogdeg anyo embeselug, it at ele wauk on anyo neg, at Yesus perahu fam wereg ma, akit kuswareg, at inim lausa. Ne, perahu foma inim lausa.

³⁷Lauk mu, hol sielu watil waharuk kwit, ik kwesaloho, perahu fam kweik-duruk kwit, perahu fam yenggelik kweheg neg duruk kweleg,

³⁸at Yesus anyo perahu anggulumu etma sum hembise fesireg nohoruk mu re, it anyo en elel-hauk kwit, “Nenowe Yesus yei. Ik sal-nenebikoho duruk kweleg, hat nunggwelug nenelaheg bouk fug angge welahen?”

³⁹Hweag-utswa ma, oluk atsireg, hol anyo, “Haplohok eleg amin!” hweag-itsireg, ik anyo, “Bok amin!” hweag-itsi mu, hol anyo aplohok eleg aheg, ne, ik anyo bok aheg, disi.

⁴⁰Disi mu, at Yesus en, “Hit nunggwelug henakol boruk kahep? Hit henenda an nobam dip-debelug demdoho bouk fug angge en uruk kahep a?” ulug, hweag-esasi.

⁴¹Hweag-esasi mu, it anyo enakol atswareg, eke en eke hweag-ereheg, eke en eke hweag-ereheg, uruk kwit, “Yehei u! Malik omare! Ap su, ik inim, hol inim, at ele holduk su re sa behep?” ulug, yanderuswa.