Read Ninia Yali MARKUS 6 Bible Online

MARKUS 6 - Ninia Yali bible

MARKUS 6

¹O etman Yesus at ele wauk on anyo inim, at obam indipmu lausa.

²Lausareg, ap Yahudi somban ul ulug, kel wat-dauk salim hari Sabat anyo fam, it Yahudi somban uruk obam kuswareg, wene hweag-esasi. Wene owan hweag-esauk kweleg, it at ele holswa anyo en, “At su wene keman wasi fam uruk behep? Ap enenda wereg on enele hag uruk su, wene nunggwe wene wasi fam uruk? Duk fug on duruk su, keroho duruk behep? Yehei u!” ulug, yanderuswa.

³Yanderuswareg, “At hwe Maria omalik o wutuk on tukang kayu su, autsi Yakobus inim, Yoses inim, Yudas inim, Simon inim, at autsi hwelani ninim welahe anyo su no?” ulug, at Yesus enerim bousa.

⁴ Enerim bousa ma, at Yesus en, “Ap Allah wene hweag-esauk on nabi ai, di o su o en leho bolug, holduk famen, at obam indipmu on inim, owe aut inim, inim wereg on inim en leho bouk fug angge holduk fug,” hweag-esasi.

⁵Hweag-esasireg, duk fug on etman duk fug alereg kweleg, we it misigdeg oukdeg ma, enenggul sebele feselug hiling-enepsi.

⁶Ne, it enenda at demdoho boruk eleg en, Yesus en, “Nakol e!” boruk katsi. O sili hundomog etma wene hweag-isil, da kweheg, ya kweheg, dil lasireg,

⁷ai en, autsi nesanggoen wamag ulug wol-enepsi, wahausa ma, mungguat along on lisoho wilibi feseheg, dil noruk kamag ulug, omamne enobam fesesireg, biren domog mon-enepsi.

⁸ Mon-enepuk kwit, “Siburu inim, og-hesauk halug, yohwatuk asum inim, uang inim, henemunangge manangge walug la fug. We hit henandomuk neg walug lakiyug.

⁹Henesepatu wan-dauk kahep ai fano famen, henebe fam sum biren sapli angge wan-da fug,” ulug, melal-enepsi.

¹⁰Melal-enepsireg, hweag-esauk kwit, “O ekema lahup mu, og-henepuk halug, hinim etma welatlug lakiyug.

¹¹ O ekema og-henepuk fug halug, henele inim holuk fug angge duruk halug, enobam waroho, Nit mundoho fotog-hesehe, ulug, inil hanim heneyog ololo apuhuno hag horoho folug, o etman wilibik lakiyug,” ulug, mon-enepsi.

¹²Mon-enepsi mu, lausareg, “Hit siag duruk katuhup anyo henenda wenggele folug, embeseiyek,” ulug, hweag-isil noruk katswa.

¹³ Noruk kwit, ap homi hum deg ma mungguat lisoho wilibi feheg, oukdeg halug, ahalue enobam hilili folug hiling-enebeheg, enebil noruk katswa.

¹⁴ Enebil noruk katswa anyo fam, at Yesus unuk di o su o enesanggo holswa ma, at Raja Herodes[10] anyo inim esanggo holsi. Enesanggo holswareg, it foman, “At Yohanes ikma belap-enepuk katsi on anyo waratukmen, oluk atlug inatsi anyo fam duk fug on dil noruk hehe,” uswa famen,

¹⁵it foman, “Eleg. Elia re at,” eheg, ne it foman, “It endam Allah wene hweag-esauk katfag on nabi hag atlug, ketia hweag-esauk,” eheg, uruk katswa.

¹⁶Uruk anyo, at Herodes esanggo hole fesireg, “Yaho! At Yohanes anggolop baldihik anyo oluk atlug, inatsi hihi,” isi.

¹⁷ Isi ai, atam at Herodes en, hwe Herodias aut Filipus ohwe famen, deg kweleg, at Herodes en wasi mu, at Yohanes en Herodes hweag-utuk kwit, “Hat haut ohwe wa fug on wauihin mu, hinim welam siag,” ulug, hweag-ereheg neg, duruk katsi mu, Herodes anyo en Yohanes sabu het-dukwag ulug monde fesesi mu, lausareg, sabu het-debelug kwelap-enepukmu kwelabe fousa.

¹⁸

¹⁹Kwelabe fousa ma, at hwe Herodias anyo ahumkwe het-bet uruk kwit, “Watmin,” besi famen, at Herodes anyo en, “Yohanes siag duk fug angge, enda wenggeleg wereg neg hihi,” ulug, at Yohanes wene hweag-utuk on esanggo holduk kwit, enda anggin atuk kweleg, holduk ale ahayeg boruk katsi mu, akol boruk kwit, “Waruk no,” ulug, foroho welatsi mu waruk fug ale atsi.

²⁰

²¹Foroho welatsi men, at Herodes endag-atsi sali higit aik wahasi mu, at autsi unduhuk fesesi on inim, it sehen foroho on enowesi inim, it ap Galilea on enowesi enunuk bogdeg inim, soni osoho na wamag ulug eneyonggo fesesi. Fesesi mu, hwe Herodias anyo en, “Yu, yoho neg de iyale kabog-dehesa hihi,” ulug, besi. Boruk kweleg,

²²at Herodes ahaloho hwele Herodias[11] anyo kwisireg, si-sa esauk en, at Herodes ori enayonggo mon-enepsi mu, wahausa on anyo inim en, “Hwele su yunggulduk angge su ambi!” ulug, yanderuswa ma, at Herodes anyo en hwele duhum on anyo hweag-utuk kwit, “Hat nunggwangge on henda bolug heng-napuk halug, og-hitmin neg.”

²³Hweag-itsireg, “Hat an nunggwangge og-hitmin behen? O suma an kain wereg lit, hwalduk kahi mu, haren di angge su angge nenda imihin halug de, heriroho bulkwe minggiroho foma og-hitmin,” ulug, hombuk balduk kwit, hweag-itsi.

²⁴Hweag-itsi mu, wilibik lasireg, hwele anyo isinga hein og-hauk kwit, “An nunggwangge on heng-dimin?” isi mu, isinga anyo en, “At Yohanes Pembaptis ikma belap-enepuk on anyo unggul kong-homag ulug, hweag-irik lakin,” hweag-itsi.

²⁵Hweag-itsi mu, at hwele anyo buroho, ap raja weregma kwik lasireg, “Nakni. Ketia Yohanes Pembaptis anyo anggolop baloho unggul elemesag fam ologdoho og-nirik watmihin,” ulug, hweag-itsi.

²⁶Hweag-itsi mu, ap raja anyo enda siag atsi famen, enda boruk kwit, “It ap wol-enebihi on inil hanim hombuk balduk kwit, Og-hitmin, hweag-irihi mu, keroho embesemin?” ulug, enda boruk katsireg,

²⁷ap sehen foroho on eke Yohanes anggolop baloho unggul walug wamag ulug, monde fesi mu, lasireg, sabu hetdoho kwelabe feserukmu kwisireg, anggolop baloho,

²⁸unggul elemesag fam ologdoho walug wahasi. Walug wahasireg, hwele duhum on anyo og-itsi mu, aren isinga og-irik lasi.

²⁹It Yohanes ele wauk on anyo holduk men de, Yohanes anyo watswa ma wareg wereg ulug uruk mu holswareg de, ebe wareg anyo wag lalug, owikmu ap wareg on kwelabe feserukmu kwelabe feik lausa. Kwelabe feik lausareg wereg ma, at Herodes en Yesus abug holsireg, “At Yohanes anyo oluk atsireg noruk,” besi.

³⁰At Yesus en mon-enepsi on anyo, enambol sombandoho at Yesus akit kabog-dik wahausareg, it dil noruk katswa ale inim, hweag-isil noruk katswa ale inim, wene bilinggoho hweag-irik wahausa.

³¹Bilinggoho hweag-irik wahausa ma, ap homi humdoho at ha laheg, ha waheg, duruk mu, siburu na fug ale atsi mu, at Yesus anyo en, “Kel wat-daul en nenemu ap homi elegma laul en, manik,”

³²hweag-esasi mu, it anyo perahu fam kuswareg enemu ap homi elegma etma lausa.

³³Yesus ori inim lauk mu, ap homi humdoho esausareg, o sili hundomog en it laul bousa on enegdeg ma esausareg, it kwenang kwe busan esalug, it dam aik lausareg kahal-enesug welatswa.

³⁴ At Yesus anyo perahu famen ik aegma wilibik lauk kwit, ap homi humdoho kabogdeg wereg anyo il esasireg, “It domba fahat-enesug eleg on hag, it su ai deg isihi,” besireg, “Enelaheg,” bolug di wene su wene humdoho hweag-esauk katsi.

³⁵Wene hweag-esauk kweleg, o mundoho hup atsi mu, at ele wauk on anyo akit wahausareg, “O hup atmin ulug, duruk kweleg, o suma ap homi wereg eleg ma,

³⁶ap homi su enesiburu onggo hun-da lowag ulug, o sili hummu inim, o dapog yapog wirig etma inim, mon-enebin,” hweag-utswa.

³⁷Hweag-utswa ma, at Yesus en, “Hiren enesiburu og-esakiek,” hweag-esasi mu, iren, “Nukoho misiham yabuk wutuk mu, uang bosie perak [12] owag og-esauk on 200 en oko re, ai fam siburu hunduko og-esowag ulug ehen a? Airoho duk fug alereg.”

³⁸Uswa ma, at Yesus en, “Hit henesiburu nunggwe en wereg? Kumu hakiek.” Hweag-esasi mu, kumu hausareg, “Siburu roti we foaben, ne, ikan de we biren wereg,” hweag-utswa.

³⁹Hweag-utswa ma, at Yesus en it hweag-esauk kwit, “Ap henautsi hundomog enggela salkwe eta youwa ilonggo wiroho kabogdoho hweria ail lakiek,” hweag-esasi.

⁴⁰Hweag-esasi mu, it ap homi lohwaleg anyo foma deng ohwan ekema hweria aheg, deng biren ekema hweria aheg, duswa.

⁴¹Hweria ail lausa ma, at Yesus anyo en roti foaben inim, ikan biren inim wasireg, alukwe boholma lahabe fesireg, Allah dang-disi. Dang-disireg, roti kuroho, ap homi yohwan-esowag ulug at ele wauk on og-esasi. Og-esasireg, ikan biren oko mundoho nowag ulug, og-esasi.

⁴²Yohwan-enepsi mu, it mundoho nausareg homo-debesesi.

⁴³Homo-debesesi mu, roti inim, ikan inim foma dindik atsi mu, fousa anyo, si yihig nesanggoen fam ele sopdoho yonggwaroho fousa.

⁴⁴It roti nausa ai, di ap su ap mangnoroho enebe 5.000 en nausa.

⁴⁵Roti nausa ma, at Yesus en it ap homi o etman enobam mon-enepmin ulug duruk kwit, at ele wauk on anyo perahu fam kulug, it dam o Betsaida ik foma fil nindig-amag ulug, at ele omamne fam hweag-esasi.

⁴⁶Hweag-esasireg, it lauk kweleg, domma etma somban ik lahasi.

⁴⁷Etman somban uruk kweleg, o hup atsi mu, perahu anyo ik yenggeleg bulmu aik wahasi mu, at Yesus anyo amu kwenangma welatsi.

⁴⁸Yesus kwenangma etma wereg lit, o hol misig fil en waharuk kwit, perahu anyo ambiang hebelug waheg neg duruk kweleg lauk mu esasi. Airoho lauk mu esalug de, o hup andundu deg kweleg, at Yesus ik emberim fene eyog sobitil enekit wahasi. Wahasireg, it perahu fam wereg kweleg, bekit lamin ulug[13] disi famen,

⁴⁹iren ik emberim fene eyog sobitil lauk mu inil hausareg, enendaman mungguat bousareg, ngaruswa.

⁵⁰It mundoho at waharuk mu inil hausareg, enowag eleg atsi mu, “Ha nautsi. Youk la fug,” hweag-esasireg, “An nebe waharuk kahi mu, henakol duk fug,” hweag-esasi.

⁵¹Hweag-esasireg, perahu fam esa kwisi mu, hol anyo aplohok eleg atsi. Hol anyo eleg atsi mu, it at ele wauk on anyo, “Yehei u” ulug, enakol hum atsireg, yanderuswa.

⁵²Yesus en roti kuroho og-esauk mu inil hausa famen, enendama wenggeluk fug angge wongdoho welatswa.

⁵³O Genesaret wilibik wahausareg, perahu ik aegma etano ililoho folug,

⁵⁴dagma wilibik lausa ma, it ap homi etma on en at Yesus enegdeg ma hausa. Wilibik lauk mu enegdeg ma hausareg,

⁵⁵o sili domog yonggo buroho lausareg, Yesus etma wereg ulug enesanggo holswama etano, ouk on enelit fam bea-eneplug, Yesus akit kabog-dik lauk katswa.

⁵⁶O sili hummu inim, dotdeg ma inim, o dapog yapog etma inim, noruk kweleg, it ouk on anyo siburu onggo hundutukmu feseik wahausa anyo en, we asum atog sen-dowag ulug heng-debelug, bal-hauk halug, aren mundoho hiling-enepuk katsi.