Read Ninia Yali MARKUS 8 Bible Online

MARKUS 8 - Ninia Yali bible

MARKUS 8

¹Ai dil lasireg, etma wereg ma, ap homi humdoho at akit kabog-dik wahausa. Kabog-dik wahausa anyo enesiburu nauk on eleg en, at ele wauk on anyo wol-enepsireg, wahausa ma, it anyo hweag-esauk kwit,

²“Ap homi humdoho kabogdeg su ninim wereg lit, hup henahanam nohokesa ma, enesiburu eleg atsi mu, enelaheg.

³It foma enobam yatman wahausa ma enobam mon-enepmin halug, lauk kwit, enaeg foruk kwit, enowag sa imisi behi.”

⁴Hweag-esasi mu, at ele wauk on anyo en, “O leimu ap homi enobam wirig eleg ma, it ap homi humdoho su, siburu keman og-esaul mu, higitdoho nalusa behen?”

⁵Uswa ma, at Yesus en, “Hit roti osoho nunggwen foroho welahep,” Ulug, hein og-enepsi mu, “Eleg, we sabiren foroho welahe,” hweag-utswa.

⁶Hweag-utswa ma, at Yesus anyo en ap homi humdoho kabogdeg anyo hweria amag ulug hweag-esasireg, roti sabiren anyo enggikmu walug, Allah dang-debelug, kuroho ap homi yohwan-enebukwag ulug, at ele wauk on anyo og-esasi mu, yohwan-enepswa.

⁷Yohwan-enepswa ma, ikan dorangge wereg ma, Allah dang-debelug, “Ikan su inim yohwan-enebiek,” ulug, og-esasi.

⁸Og-esasi mu, nausareg homo-debeseswa. Homo-debeseswa ma, siburu kurig foma dindikdoho fousa anyo, si yihig sabiren ele sopdoho yonggwaroho fousa.

⁹It nausa anyo, di ap su ap humdoho 4.000 hag nausa ma, enobam monde feselug,

¹⁰at Yesus at ele wauk on anyo inim perahu fam kuswareg o Dalmanuta nindig-atswa.

¹¹O Dalmanuta nindig-atswa ma, it Farisi enap at akit wahausareg, inim suahal uruk kwit, “Heneluk am on, boholma on eke duruk mu heak,” ulug, at duruk ale abut baldul ulug hweag-utswa.

¹² Hweag-utswa ma, at Yesus en, “Yehei,” ulug, hweag-esauk kwit, “Hit ap homi su, nunggwelug neneluk am on eke duruk mu heak neg hweag-nutuk kahep? Neneluk am on eke duruk mu neahup mun eleg,” ulug, “Demdoho hweag-hesauk kahi,” hweag-esasi.

¹³Hweag-esasireg, it anyo lin-esalug perahu fam kwisireg, nindig-amukoho,

¹⁴inim perahu fam waharuk kwit, roti osoho anyo enapeleg atlug, we misig walug waharuk mu,

¹⁵ Yesus en, “Yaho yei. It Farisi on inim, at Herodes inim, enele ai, roti fituk angge ragi hag deg ma, wehep ha no, henenda kahaleg welamek,” ulug, komo-enepsi.

¹⁶Komo-enepuk kwit hweag-esasi anyo, it it wene matuk kwit, “Roti walug wahe fug mu atlug, eheik hehe.” Uruk ale at Yesus enegdeg ma esasireg,

¹⁷“Hit keroho roti eleg wene uruk kahep? Hit owan furebouk fug angge wongdeg lit uruk kahep? An hweag-hesauihik anyo henenda eleg en uruk kahep?

¹⁸ Hinil wereg famen, ha fug angge uruk kahep? Henesanggo wereg famen, holuk fug angge uruk kahep?

¹⁹Roti foaben fam it di ap su ap 5.000 kut-enepihik anyo henenda wenggeluk fug angge uruk kahep? Roti kurig dindikdoho foruhup on anyo andogdoho si yihig nunggwe en ele sopdoho yohwatuhup?” Hweag-esasi mu, it anyo en, “Eleg. Si yihig nesanggoen yohwatuhuk.”

²⁰Uswa ma, “Ai en, it di ap su ap 4.000 roti nowag ulug kuroho og-esauihik, kurig dindikdoho fousa anyo, hit si yihig nunggwe en ele sopdoho yohwatuhup?” Isi mu, it anyo en, “Si yihig sabiren yohwatuhuk.”

²¹Uswa ma, aren, “Deg kweleg, yoho nim hit owan furebouk fug angge welahep a?” ulug, hein og-esasi.

²²Hein og-esasireg, ai en, o Betsaida ilig-aik wahasi. Wahasi mu, it ap homi etma on en, ap il bug deg ma at akit walug wahausareg, Yesus en at obam enggik sebele foukwag ulug enorohole enelaheg debousareg wereg lit, Yesus hweag-utswa.

²³Hweag-utswa ma, at Yesus en ap anyo olulukmu etman enggik seneko dag fil walug wilibik lasi. Wilipsireg, wasulubag il fam dag-debesi. Ebe enggik dag-debesireg, “Ketia di angge su angge hil hauk kahen a?”

²⁴Ulug, hein og-hasi mu, at il fenggen atmin ulug duruk kweleg, “Ap homi hag nil esauk kahi famen, e hag noruk isihi.”

²⁵Isi mu, ai en, at enggik en ilmu mapnoreg ma ap anyo il obam lareg lit, demdoho fenggen atsi mu, di angge su angge mundoho selegma il hasi.

²⁶Il fano debesireg, “O sili etma kuk fug,” ulug, obam mondotsi.

²⁷Monde fesireg, Yesus at ele wauk on inim o etman o Kaisarea Filipi o sili domog etma noruk katswa. Kwe fam lauk kwit, aren, “It ap homi en an sa bolug, uruk?”

²⁸ Ulug, at ele wauk on anyo hein og-enepsi mu, it anyo en, “It foman hat Yohanes ikma belap-enepuk katsi on anyo eheg, ne, it foman hat Elia eheg, ne, it foman, nabi anyo on eke eheg, uruk,” ulug, hweag-utswa.

²⁹ Hweag-utswa ma, aren, “Hit neg de an sa bolug, uruk kahep?” hein og-esasi mu, at Petrus en, “Eleg. Hat Allah en eneko unduhuk hobahasi Kristus hat.” Hweag-itsi.

³⁰Hweag-itsi mu, “An nabug ai ap homi eke fagdoho hweag-esa fug,” ulug, komo-enepsi.

³¹Komo-enepsireg, wene hweag-esauk kwit, “An Ap endag-atihik anyo mundoho an nobam anggin-fanggindoho nobahakup. It ap enowesi inim, it Allah il hanim ap homi enobahet duruk on imam enowesi inim, it ap Allah wene melaleg hwalduk on guru agama inim enerimdoho nowaruhup mu, hup biren noholug noluk aruhuk,” ulug,

³²wene fagdoho hweag-esasi. Fagdoho hweag-esasi mu, at Petrus en Yesus enggik lisoho walug lasireg, “Airoho uk fug,” ulug, komo-dimin ulug duruk kweleg,

³³at Yesus en at ele wauk on anyo alukwe hebeloho kumu esasireg, Petrus bet-duruk kwit, “Hat Iblis su, Allah enda boruk on duk fug angge, ap homi enenda boruk on duruk kahen ma, mundoho lag!” ulug, bet-disi.

³⁴ Bet-disireg, it ap homi andogdeg wereg anyo inim, at ele wauk on inim, “Manik,” ulug, wol-enepsireg, wahausa ma hweag-esauk kwit, “Ap eke en an nele wahuk ulug, an ninim noruk kamuhuk boruk halug, onggwareg en duhuk enda boruk anyo, sebele fahat-dauk kwit embeselug, ahan salib ahan harulug, an nombolim mug-naplug noruk kamag.”

³⁵ Ulug, “Ap eke ili hwelahuk boruk halug de, ebe wararuhu. An nunuk inim, Wene Fano Wene inim hum amag ulug ebe mun wundetdoho dobahat-dahuk boruk halug, ebe ili oho welaruhu.

³⁶Ap eke di o su o hwalduk on aruhureg ebe wararuhu halug, ai fam nunggwangge dahuk ulug il noruk karuhu behep?

³⁷Ebe wararuhu halug, obalma nunggwangge fahat-dahu?” isi.

³⁸Isireg, “It ap homi mundoho su, Allah embeselug siag neg dil noruk on su hinim wereg lit, ap homi enakol en, nonggwareg nawene ninim embeselug, an nili og-nabuk fug angge welamuhup halug, an Ap endag-atihik su fobik an nakni angge lik-louk debelug, it bohol kwe Allah yonggo mon-enepuk on malaikat ninim wamuhukdeg, an den ap homi nakol en inili og-enebuhuk fug,” ulug, hweag-esasi.