Read Ninia Yali LUKAS 1 Bible Online

LUKAS 1 - Ninia Yali bible

LUKAS 1

¹Teofilus nakni. Nit foma nenenggelegma debeil noruk katsi ale anyo re, atam en debeil noruk kweleg, it foma inil hauk katswa. Inil hauk katswareg, ai en wene Fano Wene ai re, nit wowag ulug fagdoho hweag-nisil wahausa anyo higitdoho, it foma humdoho en dindiloho lisu baluhuk ulug duswa anyo holuk. Ne, atam en debeil noruk katsi ale mundoho re, an den oho fik-furoho furebelug, hweaho ferihik angge re, hat de di wene su wene hweag-hutswa anyo, Su demdoho, bohun en, dindiloho lisu higit-hagatdoho bal-huruhuk berihikdeg, balduk kahi su, nakni.

⁴

⁵ Ap Herodes o Yudea[1] raja wereg kweleg, ap Allah il hanim ap homi enobahet duruk on imam eke unuk Zakharia unggul unuk Abia on welatsi. Ne, ohwe re Harun ombawi on eke unuk Elisabet welatsi.

⁶It biren et Tuhan Allah en, “Diroho diyug, airoho diyug,” uruk on inim, melal-enepuk wene inim, dahandoho duruk katswa fug, higitdoho duruk katswa ma, Allah en enenda mundoho wenggeleg ma esauk katsi.

⁷Enenda wenggeleg ma esauk katsi famen, hwe Elisabet anyo ibilireg latsi mu, omalik enderuk fug angge inim sobal atswa.

⁸It ap Allah il hanim duruk on imam anyo en, “Allah obam wirigmu amben fano angge yalik kukwag ulug sa mel esaul e?” ulug, helep anggen wal-hauk katswa angge re, eke salim it ap Zakharia unggul unuk on Allah il hanim duruk on eneyabuk duruk kwit, ap Zakharia Allah il hanim eyabuk duruk kweleg, helep ahut wal-hausareg, Zakharia obam atsi mu, at unduhuk fousa.

⁹

¹⁰Unduhuk fousa ma, ap Zakharia en amben fano angge indok yalmin ulug kwisireg yalduk kweleg, ap homi humdoho anyo yaldukmu etano dagma somban uruk katswa.

¹¹Amben fano angge anyo yalduk kweleg, it boholma yonggo Allah en mon-enebik waharuk on malaikat eke hendali amben fano angge yaldukmu e doaleg ambiang bekit fil etma enam aik wahasireg, unduhuk wereg ma, hasi.

¹²Hasireg, youk bag isireg, akol humon disi mu, at yonggo malaikat anyo en,

¹³“Zakharia ahwi! Hakol bouk fug. Hat somban uruk katihin anyo, Allah esanggo mun holsi mu, hohwe Elisabet anyo hamloho endag-huruhu. Endetuk halug, at unuk Yohanes soaliyug.

¹⁴Hat hahayeg hauk kwit, dang humon dang-duruk karuhun, ne, at endag-aruhu fam ap homi humdoho enahayeg hauk kamuhup.

¹⁵ At Tuhan Allah il hanim at ap humon welaruhu. Ne, anggur ahalue inim, ahalue olok on wenenebo duruk on at na fug angge welaruhu. At owan isinga ahummen mundoho Allah Aheime endama wereg angge endag-aruhu.

¹⁶Aren ap homi Israel on humdoho somban debeselug Enakni Tuhan Allah akit ha wamag ulug, debeseruk karuhu.

¹⁷ Allah Aheime ap Elia obam atfag ma, alongdeg lit, omamne fam dil lauk katfag anyo hag, at Yohanes obam aruhu mu, enomaliki enaknisi inim sebe-enebeheg, it ap homi Allah wene sahalduk on anyo, enenda wenggeleg on higitdoho welamag ulug, debeseheg, ne, Tuhan owan waharuk eleg kweleg, autsi welamag ulug, obahet enenda fik-foukdoho feseheg, atam enebil lauk karuhu,” ulug, hweag-itsi.

¹⁸Ai hweag-itsi mu, at Zakharia en, “An mun sobal on. Ne, nohwe oho ai deg ma, hweag-nerehen anyo demdoho aruhu ulug, nangginduk fam noluk aruhuk?”

¹⁹ Hweag-itsi mu, yonggo anyo en, “Allah il hanim obahet duruk kahi on Gabriel an. Wene fano wene su hweag-homag ulug yonggo mon-nabik waha ma, hweag-hirik wahi.

²⁰Angge re, an den wene hweag-hutuk on ebe duruk salim higitdoho duhu famen, hat demdoho behen fug mu, ebe duhu sali horog aik waharuk eleg kweleg, hele mun eleg angge wene maruk fug alereg ma hamihin,” ulug, hweag-itsi.

²¹Ai hweag-utuk kweleg, ap homi dagma Zakharia nangno-hauk kwit, welatswa on en, “Allah obam wirigmen wilibik waharuk eleg su nanggin aha?” ulug, “Yehei!” uruk mu,

²²Zakharia wilibik wahasi mu, ele hweag-esa fug alereg ma hausareg, Allah obam wirigmu wereg lit, a og-hasi bousa ma, at anyo ele eleg angge enggik dum fam neg diroho ulug, duruk katsi.

²³Zakharia anyo yabuk airoho dukwag ulug, unduhuk fousa ma, anyo mun debesireg, obam wahasi.

²⁴Obam wahasireg wereg man, ohwe Elisabet anyo omalik ahummu atsi. Ahummu atsireg, “Tuhan en nelaheg boruk kwit, nomalik endag-da fug angge ibilireg wereg lit, nenggali beil noruk kahi anyo eleg amag ulug, ketia napsi,” ulug, olman wilibuk fug angge bok atlug wereg kweleg, bigalem foaben enam atsi.

²⁵

²⁶Hwe Elisabet omalik ahummureg kweleg, bigalem folfaligen enam atsi mu, at boholma yonggo Allah en mondorik waharuk on Malaikat Gabriel anyo o Galilea sili eke unuk Nazaret mondorik wahasi.

²⁷ Hwe duhum eke ap ahap apeleg on unuk Maria, Daud omba unuk Yusuf en momalsi on weregma mondorik wahasi.

²⁸At yonggo anyo hwele akit wahasireg, “Maria hweli! Tuhan Allah hinim wereg lit, ahayeg humon hobam fesi mu, dang-habihi!”

²⁹Hweag-utuk on hwe Maria anyo enda anggin atlug, wenggelduk kwit, “Nunggwelug airoho hweag-nereheik?”

³⁰Boruk katsi mu, at yonggo malaikat anyo en, “Maria hweli. Allah en helaheg besi mu, hakol duk fug.

³¹ Hahummu aruhundeg, ap omalik enderuhun. Ondoho folug, at unuk Yesus soaliyug.

³² At ap humon welaruhu. Ap homi en, Allah mun leho neg wereg on amloho su re, uruk kamuhup. At omba Daud raja wereg lit, ap homi fahat-enesug latfag hag, obalma Tuhan Allah en at unduhuk fohu.

³³At Yakub ombasi enowe raja wereg lit, mundoho fahat-enesug laruhu. At apma feseruk ale anyo eleg aruhu fug.”

³⁴Hweag-itsi mu, at Maria anyo en yonggo anyo hweag-utuk kwit, “An nahun hwela fug angge we welahi mu, hweag-nerehen anyo nangginoho nabuhu?” ulug, hein og-hasi.

³⁵Hein og-hasi mu, yonggo anyo en, “Allah Aheime hobam wambik waharuk kwit, at mun leho neg wereg on omamne mapnu-habik waruhu. Airoho habuhu mu, mun demdoho Allah obahet eneg on enderuhun anyo, ap homi en uruk kwit, Su Allah Amloho, uruk kamuhup.

³⁶Ne, howe Elisabet anyo oho mun sobal on deg kweleg, at oho omalik ahummu atsi. Hwe ibili, uruk katswa famen, omalik ahummu deg kweleg, bigalem folfaligen enam dasi mu, hweag-hirihi.

³⁷ Allah en eke duk fug alereg ai mun eleg,” ulug, hweag-itsi.

³⁸Hweag-itsi mu, at Maria en, “Yu o. Tuhan Allah amingming angge an deg ma, hweag-nerehen ai, higitdoho nabukwag,” ulug, hweag-itsi mu, yonggo anyo hwele Maria embeselug lasi.

³⁹Lasi mu, fobik en hwe Maria obam en lasireg, o Yudea dom honggoleg kwe sili eke etma folo-folo lahasi.

⁴⁰Lahasireg, Zakharia obam kulug, Maria en hwe Elisabet dang-debesi mu re,

⁴¹hwe Elisabet en Maria ele esanggo holduk kweleg, omalik de ahummen leberisi. Leberisi mu, at Allah Aheime hwe Elisabet endama kwisireg wereg ma,

⁴²ele humon uruk kwit, “It homi humdoho wereg kweleg, Allah ahayeg de hat neg hobam fesi. Ne, homalik hahummu atsi anyo inim ahayeg humon obam wereg.

⁴³An sa ulug, Tuhan isinga en nea wahen?

⁴⁴Dang-napuk on hele nesanggo holduk kweleg, nomalik nahummen ahayeg boruk kwit, lebereheik.

⁴⁵Tuhan Allah hweag-hitsi anyo higit aruhu demdoho berihin mu, hahayeg humdoho hahun hweag-hirihi,” ulug, hweag-itsi.

⁴⁶ Hweag-itsi mu, at hwe Maria en, “An nendaman Tuhan leho foruk kahi.

⁴⁷Nahap wendat-napuk on Allah en napsi halug, nahayeg humon boruk kahi.

⁴⁸ An at amingming angge sebeleg on famen, at mun omamne wereg on en fu nobahalug, fanoapdoho nobahasi mu, it ap homi mundoho ketia hwili en bekit fobik enahayeg napuk kamuhup. At unuk mun eneg wereg.

⁴⁹

⁵⁰It ap homi atam ondoho on nim, fobik ondoho on nim, at enakol boruk esalug, enelaheg en fanoap debeseil wilibik waharuk karuhu.

⁵¹At enggik omamne fam debeseil lauk kwit, it ap homi enenda leho fahat-daul ulug, wenggelduk on anyo muko del-fol eseheg,

⁵² it ap en raja fahat-enesug wereg on anyo, sebele feseheg, it enenda sebeleg on anyo leho feseheg,

⁵³it obokdoho wereg anyo, ebe on kabogdoho homo-debeseheg, it enenggik wereg on anyo, enenggik eleg angge monde feseheg, duhu.

⁵⁴ Ne, wene endam nenombasi Abraham ombasi inim mundoho enelaheg en fanoap debesehuk ebag anyo, ebetuk kwit, at amingming angge Israel nenap let-nesa wahasi,” ulug, mot-disi.

⁵⁵

⁵⁶Mot-disireg, hwe Maria anyo Elisabet inim wereg kweleg, bigalem henahan enam dasi mu, nikangge obam lasi.

⁵⁷Ai en, hwe Elisabet omalik endetuk li higit atsireg, omalik ap angge endetsi.

⁵⁸Endetsi mu, at obam etmano inim wereg on mel, owe aut mel, Tuhan Allah en elaheg en fano neg debesi ale holswareg, at inim enahayeg duruk katswa.

⁵⁹ Duswareg, endetsi mu, hup sabiren noholug, liginen on fam ahap anyo balukwag ulug, akit wahausa. Wahausareg, unuk ai akni Zakharia unuk hag soaldul ulug duswa famen,

⁶⁰isingan, “Eleg. At unuk de Yohanes soaldul,” ulug, hweag-esasi.

⁶¹Hweag-esasi mu, iren, “Howe haut enunuk eke airoho soaleg eleg ma, unuk Yohanes ai nunggwelug soaldul ehen?”

⁶²Uswareg, enenggik fam mapdoho akni hein og-hauk kwit, “Unuk sa soaldul behen?” ulug, hein og-hausa.

⁶³Hein og-hausa ma, Zakharia en helep balduk on eke heng-enepsireg og-utswa ma, “At unuk Yohanes,” ulug, balsi. Balsi mu, ap homi humdoho en, “Yehei u,” ulug, yanderuswa.

⁶⁴Owan yanderuruk kweleg, ele husisireg, ele uruk kwit, Allah unuk mot-disi.

⁶⁵Ai disi fam, it inim wereg on enakol humdoho atsi mu, dil wahasi ale anyo o Yudea dom honggoleg kwe etma mundoho, wene bilinggoho saha il lausa.

⁶⁶Wene saha il lausa anyo holswareg, enenda furebelug, Tuhan Allah enggik en hwalduk mu, hausareg, “Omalik su sauwe aruhureg, nangginig on welaruhu?” ulug, uruk katswa.

⁶⁷At Yohanes akni Zakharia Allah Aheime endama kwisireg hweag-utuk kweleg, Allah wene uruk kwit,

⁶⁸“Nit ap homi Israel Nenakni Tuhan Allah en nesa wahasireg, wundetdoho nenobahasi mu, mot-duruk kaik.

⁶⁹Nenahap wendat-nenebukwag ulug, at amingming angge Daud ombasi ambiangma eke along on unduhuk fesi.

⁷⁰Ai disi anyo endam atam at Allah en de at obahet eneg Allah wene hweag-esauk katfag on nabi anyo hweag-esauk kweleg, iren ap homi hweag-esauk kwit,

⁷¹It ninim selei on enapman nenahap wendareheg, it ap homi enerim neg nenepuk on enenggikmen deloho nenobahakeg, duhu, uruk katfag anyo higitdoho disi.

⁷²Aren nenombasi enelaheg en fano debesehuk ulug, abug hweag-esebag anyo debeseheg, ne, wene abug amu eneg aren at unuk hombuk bale folug nenomba Abraham hweag-etfag anyo, dip-ukwag ulug ebereheg, duhuk ulug, disi.

⁷³

⁷⁴Ai disi ai, it ninim selei on enenggikmen deloho nenobahalug, nenakol bouk fug angge, neneluk wereg lit, at obahet amu deheg, ne, Allah il hanim nit siag duk fug angge at obahet amu eneg, nenenda mun wenggeleg welaheg, dukwag ulug, disi.

⁷⁵

⁷⁶ Ne, hat namloho su yei! Tuhan lahu kwe yatil lauk kamag ulug, hat dam lauk kwit, ap homi enesiag hapeleg apdoho feseruk halug, enahap wendat-enebuhu wene anyo eneluk amag ulug, hweag-isil lahun fam, hunuk, At Leho Neg Wereg awene hweag-esauk on su, ulug, hweag-hutuk kamuhup.

⁷⁷

⁷⁸Nenakni Allah en enda sako fam nenelaheg humon neg boruk kwit, fanoap nenepuk mu, o hil yinggiruk hag, seleg lendi en nenobam mon-nesa waharuk kwit,

⁷⁹ nit o mummu wereg lit, Waramuhuk nenakol e, boruk kahe anyo selehap nenobahakeg, ne, Kwe su fam lauk kamuhup halug, seleiroho welam fug angge, henenda seroho welamuhup, ulug, hweag-nesauk kwit, hwal-nenebeheg, duhu, ulug, hweag-hirihi,” ulug, Allah wene isi.

⁸⁰Ne, nimi anyo sauwe atuk kwit, enda mun wirik atsi. Aren ap homi Israel on inil ha no, ulug, enam am fug angge wereg lit, leimu ap homi wereg eleg ma etma neg welatsi.