Read Ninia Yali LUKAS 10 Bible Online

LUKAS 10 - Ninia Yali bible

LUKAS 10

¹Ai en fobik Nenowe Tuhan en ap amu on enebe 70 en[14] eneko unduhuk fesesireg, di obam su obam o sili domog at onggwareg lahuk besimu etmano it dam lowag ulug biren heg mon-enepsi.

² Mon-enepuk kwit, “Ebe yihig humdoho wirik atsi famen, ap balik lauk on enebe dorangge deg ma, ap yabuk onggwareg anyo en ap yihig balduk on mon-enebukwag ulug hweag-emek.

³ Hit neg lauk kamek. An den hit domba hag su, ap homi olomene hag wereg ma, enekit mon-henepuk kahi.

⁴ Henauang hetdeg angge inim, og-hesauk halug yohwatuk asum inim, henesepatu inim, ai walug la fug. Ne, kwe lauk kwit, ap homi esalug dang-enepmin ulug, bok am fug.

⁵Ap homi enobam ekema kuhupdeg, atam dang-enepuk kwit, Henahayeg, hweag-esakiyug.

⁶Hweag-esahupdeg it ap homi etma henehayeg hweag-esahup anyo wahuk boruk halug, henahayeg enobam welaruhu. Ne, wahuk fug boruk halug henahayeg anyo hit fam sombandoho waruhu.

⁷ It ap homi og-henepul boruk anyo enobam hinim etma wereg nu. Hinim wereg lit, ap yabuk wutuk enap yabuk onggo wauk ale fanoreg ma, henesiburu di angge su angge og-hesauk halug ai, at nauk nu. Da nohokeg, ya nohokeg, dil lauk kam fug.

⁸Hit o sili ekema kwik lahup mu, dangdoho og-henepuk halug, enesiburu og-hesauk ai nauk nu.

⁹It ap homi etma ouk on wereg halug, fano hiling-enepuk kwit, Allah apma fesehu wene henekit horog aik waha, ulug, hweag-esauk kamek.

¹⁰ O sili ekema kwik lahup mu, it ap homi dangdoho og-henepuk eleg halug neg de, o bumbukmu kwe humon yahoma wilibik lahupdeg, hweag-esauk kwit,

¹¹Nit henobam wereg lit, ololo neneyog fam dopno-eheik anyo henobam waroho horoho henobaharuk kahe. Allah apma henobahaku anyo horog aha ma, fureberuk kamek, hweag-esakiyug.

¹² Fobik ayo wiroho en-henebuhu li em, Allah en it ap homi Sodom on ai seroho enahap wendaruk alereg famen, it ap homi o sili ai on neg de alongdeg ma enahap wendaruk fug alereg, ulug, hweag-hesauk kahi,” ulug, hweag-esasi.

¹³ Hweag-esasireg, “Hit ap homi Korazim on su, henelaheg! Hit ap homi Betsaida on su, henelaheg! Duk fug on henobam duruk mu hauhup anyo, o Tirus inim, Sidon inim, etma duruk kalep man, o endam iren hwerieg lit, Nenenda wenggele folug, nenesiag embesehe, ulug, sum orohole singon wan-deheg, enebene ul lahabeheg, debelug, enesiag embeselep.

¹⁴Fobik ayo wiroho en-henebuhu li em, Allah en it ap homi Tirus Sidon on ai, seroho enahap wendaruk alereg famen, hit neg de mun alongdeg ma henahap wendaruk fug alereg.

¹⁵ Hit ap homi Kapernaum on su, hit boholma lehoma lendi leho fahat-dahuk, ulug, uruk kahep? Mun eleg. It waratlug laukmu erahamu belap-nenebuhu, boruk kamek” ulug, hweag-esasi.

¹⁶ Hweag-esasireg, at ele wauk on hweag-esauk kwit, “It ap homi hit henele holduk ai, an nele neg holeheg, iren, Nenerim, ulug, hit embeseruk halug ai, iren an neg embeseheg, ne, an embeseruk halug ai, at mon-nabik wahasi anyo embeseheg, duruk” ulug, hweag-esasireg, mon-enepsi.

¹⁷Mon-enepsi ai en, fobik it ap 70 en[15] anyo enahayeg beil enembol somban waharuk kwit, “Nenowe ahwi! Mungguat mel hat hunuk yiko hweag-esauk halug, nenele holduk mu esauhuk abi!”

¹⁸Hweag-utswa ma, at Yesus en, “An Iblis oeal lepeng-dik waharuk anyo hag boholman bule wambik waharuk mu hauihik.

¹⁹ Kisu olok on mel, ebeiyug mel, heneyog fam al bereleheg, heneselei on omamne sebeloho feheg, duhup ulug, an nawene hilil-hesauihik. Nawene hilili hesauihik mu, siag eke henobam aruhu fug.

²⁰Ai famen de, mungguat henele holduk anyo fahet henahayeg bouk fug. Ite, henunuk boholma lema baleg on ai fahet henahayeg boruk kamek,” ulug, hweag-esasi.

²¹Hweag-esasireg, nukoho ai salim Allah Aheime[16] Yesus endama wereg ma, Allah dang-duruk kwit, “Bohol kwenang honggwareg, hat Nakni dang-hapuk kahi. Hat duhun su anyo it ap enenda wereg on inim, enenda enggat on inim, eneluk am no ulug, heraho feselug, dot-doron hag on enapeleg on fagdoho hweag-esauihin mu, dang-habihi. Hahayeg bolug, dirihin mu, Nakni, ulug, dang-hapuk kahi,” ulug, dang-disi.

²² Dang-disireg, it hweag-esauk kwit, “An Nakni en di angge su angge mundoho an hwalduk karuhuk ulug og-nitsi. Allah Amloho ai sa? ulug, it ap homi enapeleg, Nakni amu neg olukdeg. Ne, Nakni ai sa? Ai, at Amloho namu neg nolukdeg lahi. Amloho an den it ap homi Nakni eneluk amag ulug, fagdoho hweag-esa ale napuk halug, it mel eneluk atuk,” ulug, hweag-esasi.

²³Hweag-esasireg, alukwe endenoho at ele wauk on il fu-esalug, enemumu it neg hweag-esauk kwit, “Hit hinil hauk kahep anyo, it ap homi inil hauk halug enahayeg hahup.

²⁴Hinil hauk kahep anyo, it nabi anyo inim, it enenuk bogdeg raja inim, it humdoho en, Hela e, boruk katfag famen, ha fug angge welatfag. Ne, hit holduhup anyo, iren, Hola e, boruk kweleg, holuk fug angge welatfag, ulug, hweag-hisihi,” ulug, hweag-esasi.

²⁵ Ai hweag-esasi mu, fobik eke salim, ap Allah wene melaleg hwalduk on guru agama eke en eke salim Yesus abut balmin ulug akit wahasireg, “Guru ahwi. An mundoho noluk welaruhuk en nangginmin?” ulug, hein og-hasi.

²⁶Hein og-hasi mu, at Yesus en, “Allah wene melalfag nanggoho baleg wereg e? Hat nangginoho kumu hauk kahen?” ulug, hein og-hasi.

²⁷ Hein og-hasi mu, ap anyo en, “Henenda, henebe, henomamne abirangge fam Henakni Tuhan Allah neg henenda hundig boruk kamek. Ne, eke, Hit henebe henenda hundig dauk kahep anyo hag, it hinim welahep on airoho henenda hundig enebiek,” ulug, hweag-itsi.

²⁸ Hweag-itsi mu, at Yesus en, “Fano ehen. Ehen ai higitdoho duruk halug, holuk mundoho welaruhun.”

²⁹Hweag-itsi mu, ap anyo, An fano ihi boukwag, ulug, Yesus hweag-utuk kwit, “Ne, nenda hundig enepuk katmin en, ninim wereg on ai sa mel abi?” ulug, hein og-hasi.

³⁰Hein og-hasi mu, at Yesus en, “Ap eke o Yerusalem en o Yerikho lamin ulug, wirig aik lasi. Wirig aik lauk kweleg, at wongdeg man, it ap yoholi angge wauk on anyo en feiyaloho inatuk kwit, angge abirangge inim, asum dilipdoho hwelalug, ebe ware fousareg, eta waramag ulug, embeselug longgo uswa.

³¹Longgo uruk kweleg, fobik ap Allah il hanim duruk on imam eke kwe ai fam wongdoho waharuk men, ap wareg angge kwema hasireg en, ebe embeselug, ohwaloho bekit lasi.

³²Lasi mu, fobik ap Lewi on eke airoho kwe ai fam wongdoho waharuk men, ap wareg angge ebe hasireg en, ohwal-dalug, bekit lasi.

³³ Lasi mu, fobik ap Samaria on eke kwe ai fam waharuk mu, ap wareg anyo hasi. Hasireg elaheg boruk kwit akit lasireg,

³⁴ahap hwisil-hwasaldeg latsi anyo anggur ahalue inim, ahalue amu on inim, are debelug, het-debeheg, at ebe oko at owam keledai fam hwerie feheg, disireg, ap homi nohorukmu eke feik kwisireg etma hwalduk katsi.

³⁵Welatsireg, likia, at uang perak biren oko ap nohorukmu onggwareg ahun anyo og-utuk kwit, Ap su foroho lamin. Foroho lit, og-hirihi anyo eleg atuk halug, hat hangge ekenim dopnoroho hundutuk karuhun halug, an waruhukdeg obalma og-huruhuk, hweag-itsi,” ulug, Yesus en ap Allah wene melaleg hwalduk on anyo hweag-itsi.

³⁶Hweag-itsireg, “Ap henahan anyo, it ap homi inim wereg lit enenda hundig boruk hag, sa mel en ap yoholi angge wauk on en watswa anyo enda hundig besi behen?” ulug, hein og-hasi.

³⁷Hein og-hasi mu, ap anyo en, “At ap elaheg besireg fano debesi on at.” Hweag-itsi mu, at Yesus en, “Hat airoho dil lag,” ulug, hweag-itsi.

³⁸ Hweag-itsireg, fobik Yesus at ele wauk on inim lauk kwit, o sili ekema kwik lausa ma, hwe eke unuk Marta en Yesus at obam kwik wamag ulug, hweag-itsi.

³⁹Hwe Marta ehe unuk Maria anyo Yesus apma hwerieg lit, ele holduk kweleg,

⁴⁰Marta neg de Yesus fahet yabuk humon asingsingdoho esetuk katsi. Duruk kwit, Yesus akit wahasireg, “Nowe. An namu hat hobahet dukwag ulug nehe embeseheik su fano behen a? Let-neowag ulug hweag-imin abi!”

⁴¹Hweag-itsi mu, at Yesus en, “Marta, Marta hweli. Hat di deheg su deheg dimin ulug, henda firig lit hobam anggin-fanggin dauk mu hiihi.

⁴²Misig neg momaloho duk fano. Ne, hehe Maria duk on ai momal-deheik ma, momal-deheik on ai, ap en wa fug alereg,” ulug, hweag-itsi.