Read Ninia Yali LUKAS 12 Bible Online

LUKAS 12 - Ninia Yali bible

LUKAS 12

¹ Wene ai hweag-esauk mu, it ap homi di on su on humdoho enebe ribu-ribu angge kabog-debelug, enebe en sahambit enepswa ma, Yesus en at ele wauk on it dam hweag-esauk kwit, “It ap Farisi on anyo en enenda enonggwareg furebahat-da fug angge wereg kweleg, wene hweag-hesauk mu, roti fituk angge ragi hag enewene il noruk anyo henendama wehep ha no en, henenda kahaleg lamek.

² Di duruk su duruk sebeleg wereg halug, fag aheg, ne, herako wereg halug, enam aheg, duhu.

³Aireg ma, hit o mumdegma wereg lit, uruhup anyo o seleg fam holduk mu esahup. Ne, olma wereg lit, ling-long ale uruhup on etano o enamegman hum ngai fam fag atuk mu hahup,” ulug, hweag-esasi.

⁴Hweag-esasireg, “Nori yei! An den wene eke hweag-hesa. Ap homi en henebe neg henowaruhup ai fahet henekol bouk fug. Henowatlug nanggine henobahakup no?

⁵Hit henekol boruk kamuhup on husumbi hweag-hesa. At henebe ware henobahalug indok ambulbul ulog durukmu mon-enepuk onggwareg on ai neg de henekol boruk kamek. At mundoho henekol boruk kamek, ulug, hweag-hesauk kahi.

⁶Uang owag biren fam suwe ulue enebe foaben seberoho hundutuk anyo eleg? Airoho hundutuk famen, at Allah en misig eke apeleg atuk kwit embesehu fug.

⁷Heneruk oho mundoho at Allah en wenaho lit wereg. Suwe doron humdoho ai at enda hundig eleg hag famen, hit neg de, at enda hundig humon deg ma, henekol boruk kam fug,” ulug, hweag-esasi.

⁸Hweag-esasireg, ekenim hweag-esauk kwit, “Hit ap homi inil hanim, Yesus de nit Nenowe, ulug, fag-duruk halug, an Ap endag-atihik anyo en it boholma yonggo Allah en mon-enebik waharuk on malaikat etmano inil hanim hit fahet, It ap homi su re, an nautsi, ulug, fag-duhuk.

⁹Ne, it ap homi suma inil hanim, Yesus ai, nit nenepeleg, uruk halug neg de, an den oho it boholma yonggo Allah en mon-enebik waharuk on inil hanim, hit fahet, It ap homi ai an napeleg, ulug, uruk mu neahup, ulug, hweag-hesauk kahi.

¹⁰ Hit an Ap endag-atihik on henele siahap-biahapdoho nobaharuk kahep halug, henesiag ai, Allah en apeleg apdoho fohu famen, Allah Aheime siahap-biahapdoho foruk kahep halug de, henesiag ai, Allah en apeleg apdoho fohu fug.

¹¹ It ap homi Yahudi somban uruk obam wereg on inim, it ap enunuk bogdeg inim, ap enowesi humon inim, enekit og-heneplug henobahaik lauk halug, henenda firig lit, Along bal-daul ulug wene ke ul e, ulug, wenggeluk fug.

¹²Ai salim, wene hweag-esowag ulug, Allah Aheime en hweag-hesauk mu hahup,” ulug, hweag-esasi.

¹³Hweag-esasi mu, it ap homi humdoho kabogdeg anyo eke en Yesus hweag-utuk kwit, “Guru ahwi! An nowe en nakni abinggi angge foma yohwan-nomag ulug hweag-imin abi.”

¹⁴Hweag-itsi mu, at Yesus en, “Henewene bilingge folug, finggi-angge yohwan-hesowag ulug an unduhuk nobahasi behen?” ulug, hein og-hasi.

¹⁵Hein og-hasireg, at Yesus ap homi hweag-esauk kwit, “Henangge humdoho wereg ai fam heneluk welamuhup fug angge re, henenda nauk kwit suahi behep ha no, henenda kahaleg lit, fureberuk kamek,” ulug, hweag-esasi.

¹⁶Hweag-esasireg, wene wal-heheg hweag-esauk kwit, “Ap enggik wereg on eke enggela a kwenang hesilig on fam yatsi mu, anggen yihig esan atsi.

¹⁷Esan atsi mu, enda wenggelduk kwit, Yatihik on esan atsi mu, baloho forukmu eleg ma, nangginik? isireg,

¹⁸Airoho dimin, Forukmu meiyale folug, humon neg wuruhukdeg, nangge nim, anggen a yatihik angge ai nim, etma feik kuruk karuhuk.

¹⁹Feik kuhukdeg, nangge humdoho kabogdeg kweleg, di tahun su tahun duhuk angge re, ketia kel-dauk kwit, siburu nenggeg, ahalue nenggeg unda fano yareheg, duruk katmin, ulug, nendaman hweag-nutlug duhuk, isi.

²⁰Isi famen, at Allah en, Hat ap morueroho behen su ao! Yoho hup anggo hat haheime wag watmisi angge re, fik-fouk deberihin angge etmano sa foroho laruhu behen? ulug,

²¹hweag-uruhu mu, Allah en it ap homi boholma enenggik wereg esauk fug men, kwenangma angge fam neg enenggik wereg dauk anyo re, ap ai higitdeg,” ulug, hweag-esasi.

²²Hweag-esasireg, at ele wauk on hweag-esauk kwit, “Neneluk welamul en nenesiburu nunggwangge naul, nenebe nenesum nunggwangge wan-daul? ebetuk kwit, henenda firuk fug, ulug, hweag-hisihi.

²³Nauk kahep ai, maben hag famen, heneluk welamuhup ai, along. Ne, wan-dauk kahep ai, maben famen, henebe anyo, along.

²⁴Suwe homale duruk ale furebeiyek ahi. A yareheg, anggen baleheg, duruk eleg, ne, anggen baloho forukmu mel foruk fug famen, at Allah en enesiburu og-esauk. Suwe at enda hundig dotdeg famen, hit neg de at enda hundig humon hauk kahep?

²⁵Hit eke waratuk salim horog aik waharuk kweleg de, an noluk ekenim welatlug wararuhuk, ulug, henenda wenggeldil lauk kahep famen, heneluk eke nim welahep halereg[19] a? Eleg.

²⁶Ai halug, dorangge duruk on dehep ha fug alereg ma, foma mundoho duruk on ai, Nangginoho duhuk, ulug, henenda firig welahep?

²⁷ Owil angge laharuk anyo furebeiyek. Ap Salomo ap humon leho on neg halug, ap homi en, Yehei u, ulug, yanderuruk katfag famen, ai maben hag. Owil angge anyo neg de, yabuk wireheg, hekel soaleheg, duruk eleg famen, Allah en hwal-enepuk kweleg, anggen mun fano yihiruk mu, ulug, hweag-hisihi.

²⁸Enggelangge dagma yoho oluk lahakeg, ne, likia harep fisatuk halug nenggeg, duruk famen, at Allah en orohole fano buhundoho foruk mu, aren enggelangge anyo sebeleg hag debeseheg, ne, hit ap henenda Allah obam dip-debelug, furoho demdoho bouk fug angge welahep on su, hit along hag wan-henobahakeg, duhu fug, behep?

²⁹Henesiburu henahaik nunggwe naul ulug, wenggeldil noruk kwit, henenda firuk fug.

³⁰It ap homi dagma on ai on neg, heraril noruk famen, hit neg, Nit de ai on wereg fug, ulug, henenda boruk kahep ai, Henakni olukdeg lit wereg.

³¹Allah apma henobahaku ale dam, Yehei, ulug, mutlug lauk halug, ai on humdoho obam dopnoroho og-hesauk mu hahup,” ulug, hweag-esasi.

³²Hweag-esasireg, “Nomaliki! Allah en hit at apma henobahakuk ulug ahayeg besi mu, henekol bouk fug.

³³Henengge fam onggo uang hun-dahupdeg, it enenggik eleg on esalug, og-esauk kamek. It ap yoholi angge wauk on herahaik kweheg, nobulong en nenggeg, duruk elegma boholma etma henengge demdoho eleg am fug alereg on anyo on kabogdoho welamag ulug, sum mining atuk eleg on fahat-dauk kamek.

³⁴Henengge henenda hundig on weregma, henenda inim etma welaruhu,” ulug, hweag-esasi.

³⁵ “Henesum henembahaluk bug-bagdoho wandeg lit, eral henenggikmu fisaho lit, fik-foukdoho welamek.

³⁶ Ap amingming angge enakni hwe hwelaroho soni esetuk mu, sok kweng-dik wam no ulug, folo-folo sok husul ulug, nangno-hauk hag welamek.

³⁷Enakni en amingming angge enepe enggatdoho nangnoruruk kweleg, waharuk halug, enahayeg bohup. Nangnoruruk kwit, wereg ma, waruhureg, enakni en asum nonggoloho folug, at autsi enembobag osoho nowag ulug, misigmu hwerie feselug, enobahet duruk karuhu abi, ulug, demdoho hweag-hisihi.

³⁸Hup andundu ane, o sekan dikoho ma a, waruhureg, amingming angge airoho duruk mu ahayeg enobam fesehu.

³⁹ At ap o onggwareg en o ai salim yoholi angge herahaik waruhu oluk welalep man, sok husoho angge herahaik kuk no ulug, obam embeselep fug. Ite, ape enggatdoho wereg lit, kahaleg welalep.

⁴⁰An Ap endag-atihik anyo di salim waruhu henepeleg kweleg waruhuk mu, hit mel mun fik-fouk debelug welamek,” ulug, hweag-esasi.

⁴¹Hweag-esasi mu, at Petrus en Yesus hweag-utuk kwit, “Nowe ahwi! Wene wal-heheg hweag-nesehen su, nit fahet neg hweag-nesehen ane, ap homi mundoho fahet ehen a?” ulug, hein og-hasi.

⁴²Hein og-hasi mu, at Tuhan en, “Ai halug, ap eke en eyog indip kwe wereg on fahat-enesug wereg lit enesiburu nauk on higitdoho og-esauk kamag ulug, amingming angge unduhuk fohu on eke enda wereg lit, fik-furoho duruk on de sa?

⁴³Akni en amingming angge airoho duruk mu ha waruhureg amingming angge anyo ahayeg bohu.

⁴⁴Akni en amingming angge airoho duruk mu ha waruhureg, angge mundoho at hwalduk kamag ulug unduhuk fohu, ulug, demdoho hweag-esahuk kahi.

⁴⁵Ne, ai famen de, amingming angge anyo endaman, An nakni dot lohon welatlug waruhu, bolug, at akni amingming angge homi mel, ap mel yeik enowareheg, di angge su angge hesangge nil laheg, ahalue wenenebo enepuk on nauk kwit, wenenebo dil laheg, duruk halug neg de,

⁴⁶amingming angge anyo en, Nakni ai salim waruhu, bouk fug angge, ne, Mo ai fam waruhu, apeleg deg lit wereg kweleg, akni waruhu mu, waruhureg amingming angge ebe libil-labaldoho it ap enenda at obam dip-debelug demdoho boruk eleg on feserukmu etmano monde fohu.[20]

⁴⁷Ap amingming angge eke akni duhuk besi anyo olukdeg lit en, fik-foukdoho duruk eleg halug, yeik fam fuk ahe watuk mu hahup.

⁴⁸Ne, amingming angge eke akni duhuk besi apeleg lit en, amu disi famen, yeik fuk ahe waruk famen, dorangge watuk mu hahup. Hum angge og-esauk halug, fobik, Hum angge og-nemek, uruk mu hahup. Ne, hwalduk kamag ulug hum angge og-esauk halug ai fobik, Ebenaheg humdoho og-nemek, uruk mu hahup,” ulug, hweag-esasi.

⁴⁹Hweag-esasireg, “An o su mundoho indok yaluhuk ulug waharihik mu, indok yaluk ale napuk mu, yehei, boruk kahi.

⁵⁰ Ap homi ikma belap-enepuk hag an eke nabukwag ulug wereg famen, napuk eleg ma nenda mun hesil-napuk.

⁵¹It ap homi kwenangma suma wereg on inim sebe debesehuk ulug wambik waharihik behep? Eleg. Minggiroho feseikoho waharihik, ulug hweag-hesauk kahi.

⁵²Ketian ap eke omaliki foaben halug, inim minggirig lit, henahan en biren inim minggirig lit, biren en henahan inim minggirig esahup.

⁵³ Inim minggirig lit, akni en amloho wareheg, amloho en akni wareheg, isingan ahaloho wareheg, ahaloho en isinga wareheg, eyamalhwe en eyamalhwe wat-wat aheg, duruk mu esahup,” ulug, hweag-esasi.

⁵⁴Hweag-esasireg, ap homi humdoho hweag-esauk kwit, “Anggulog mo obuk ik laukmu barat fil en lahaik waharuk mu hauk kwit, Yu o. Ai osit waikoho duruk, uruk kahep ma, waharuk.

⁵⁵Ne, sielu selatan fil en warik waharuk halug, Fobik mo olokdoho yatmisi, uruk kahep higitdoho mo yarik waharuk.

⁵⁶Hit henenda furebahat-dauk kahep fug kweleg, henambilik famen uruk kahep su yaho! Kwenang bohol orohole furebelug, Airoho duhu hehe, uruk kahep famen, ketia su salim duhu anyo hit nunggwelug furebelug, Airoho duhuk, uk fug angge welahep?” ulug, hweag-esasi.

⁵⁷Hweag-esasireg, ekenim hweag-esauk kwit, “Fano duhuk on su hihi, ulug, henemu domog furebouk ale fano famen, nunggwelug furebouk fug angge welahep?

⁵⁸Ap hinim minggirig on ap bilingguruk on hambiek ha lauk kahep halug, ap hinim minggirig on en lit-heneplug, ap biling-enepuk on akit henobahaik laheg, ai en ap bilingguruk on en ap polisi enekit henobahaik laheg, ai en ap polisi anyo en ap sabu hetdoho kwelap-enepukmu kwelap-henebeheg, henebuk no, owan kwema lauk kwit, folo-folo seberul ulug, diyug.

⁵⁹Sabu hetdoho kwelap-henepuk halug, at ombaleg angge wereg on anyo og-om fug angge, etman wilibik lahup fug, ulug, hweag-hesauk kahi,” ulug, hweag-esasi.