Read Ninia Yali LUKAS 13 Bible Online

LUKAS 13 - Ninia Yali bible

LUKAS 13

¹Ai salim, it ap homi foman, “Ap homi Galilea on Allah andomba waroho indok yalduk kweleg, ap Pilatus en enowatsi,” ulug, Yesus hweag-irik wahausa.

²Hweag-irik wahausa ma, at Yesus en, “Hiren boruk kwit, It ap Galilea on foma siag duruk eleg ma embeseheg, ne, it enowatsi ai, mun siag duruk katswa ma, enowareheg, disi behep?

³Eleg. Hit siag duruk kahep anyo henenda wenggele folug embeseruk eleg halug, hit oho airoho henepuk mu hahup, ulug, hweag-hesauk kahi.

⁴O Siloam o yaron wirig daloruruk kwit, it ap enebe 18 en sebel-enepsi ai, it ap homi hesangge Yerusalem wereg on ai, siag duruk eleg hag, ne, it sebel-enepsi ai, siag humon duswa ma, sebel-enepsi behep?

⁵Eleg. Hit siag duruk kahep anyo, henenda wenggele folug embeseruk eleg halug, hit oho airoho henepuk mu hahup, ulug, hweag-hesauk kahi,” ulug, hweag-esasi.

⁶Hweag-esasireg, wene su wal-heheg hweag-esauk kwit, “Ap eke eyabuk anggur yahoma e soluk hag ara eke yaho latsi. Yahoma anggen yihig balmin ulug ha laheg neg duruk katsi famen, yihig eleg ma neg hauk katsi.

⁷Yihig eleg ma neg ha lasireg, amingming angge anggur yahoma hwalduk on anyo hweag-utuk kwit, E ara su anggen yihig ane, ulug, ha waheg neg duruk men, li henahan dirihik famen, yihig eleg angge re, kwenang kamol kuk no, muko fein, ulug, hweag-itsi.

⁸Hweag-itsi mu, amingming angge anyo en, Nakni, an hohol yihikeg, indipmu mohot kwelabeheg, duhuk angge re, li su fam neg nangno-hahuk.

⁹Ne, li eke debelug, yihiruk halug, fano. Ne, anggen yihiruk eleg halug neg de, muko embesehun, ulug, isi,” ulug, Yesus en it ap homi hweag-esasi.

¹⁰Hweag-esasireg, fobik somban uruk salim hari Sabat eke fam at Yesus it Yahudi somban uruk obam en wene hweag-esauk mu,

¹¹hwe eke oukdeg kweleg, tahun 18 en disi mu, ambolowag konureg lit, inam fug angge welatsi.

¹²At Yesus en hwe anyo il hasireg, wol-disi mu, waha il lauk em, hweag-utuk kwit, “Hwele su yei! Ouk anyo hiling-habihi,” ulug,

¹³enggik owan senetuk eleg kweleg, hwe anyo ambolowag hwal atsi mu, Allah unuk mot-disi.

¹⁴ Ai disi mu, ap Yahudi somban uruk obam hwalduk on enowe anyo en, somban uruk salim Yesus en hwe fano hilinggisi mu hasireg, olok en ap homi hweag-esauk kwit, “Nukoho folfaligen am yabuk wurukwag ulug wereg ma, nukoho folfaligen ai fam ouk fano da waharuk kamuhup. Somban uruk salim ai fam de fug,” ulug, hweag-esasi.

¹⁵Ap homi airoho hweag-esasi mu, at Tuhan en ap anyo hweag-utuk kwit, “Hit ap homi henenda furebahat-dauk fug kweleg, henambilik famen hweag-esauk kahep su yei! Hit mundoho somban uruk salim henowam sapi ane, keledai ane, wam elma liligmu loloho ik na lowag ulug, og-eneplug lauk kahep anyo eleg a? Og-eneplug lauk kahep.

¹⁶Ai halug, Abraham omba hwe su, at Iblis en sabu hetdoho foroho kweleg, tahun 18 en disi mu, somban uruk salim loloho foruk ale su, siag behep?” ulug, hein og-enepsi.

¹⁷Airoho hein og-enepsi fam, at inim suahal uruk katswa anyo enenggali waroho fesesi. Ne, it ap homi mundoho at Yesus along dil lauk anyo fahet enahayeg boruk katswa.

¹⁸Airoho bousa ma, at Yesus en, “Allah apma fesehu ai nunggwangge hag? Nunggwangge fam wal-ha?” ulug,

¹⁹“Allah apma fesehu ai, sawi [21] anggen hag. Ap eke sawi anggen anyo oko eyabukmu foldil lasi mu, lahasireg, e eke hum-hamon doalsi mu, enggik fam di suwe su suwe ena wirik kuruk katswa,” ulug, hweag-esasi.

²⁰Ai hweag-esasireg, ekenim hweag-esauk kwit, “Allah apma feseruk mu nunggwangge fam wal-ha?

²¹Allah apma fesehu ai, roti fituk angge ragi anyo hag. Hwe eke en gandum muneneg 40 liter waldoho folug, anyo fam roti fituk angge dorangge oko belabe foruk halug, kwani-duruk mu, abirangge fituk,” ulug, hweag-esasi.

²²Ai hweag-esasireg, at Yesus en o Yerusalem kwe fene lauk kwit, o sili hummu kweheg, dotma kweheg, wene hweag-isil lauk katsi.

²³Lauk mu, ap eke en, “Nakni, ap homi humdoho enahap wendaruhu a, misigdeg enahap wendaruhu a?” ulug, hein wasi.

²⁴Hein wasi mu, at Yesus en, “Sok ele onggogdeg ma, kwik lamin ulug, leil watuk kamek. It ap homi humdoho kwik laul ulug, duhup famen, duk fug alereg hahup, ulug, hweag-hesauk kahi.

²⁵At o onggwareg ahun en inatlug, sok laruhu mu, hit dagma wereg lit, sok fam kweng-duruk kwit, Nakni, sok hut-nenebin abi! ulug, hweag-umuhup famen, aren, Hit keman wahep? Hit henebe an napeleg, ulug, hweag-hesahu halug,

²⁶hiren, at hweag-utuk kwit, Eleg. Soni ninim nauhuk anyo. Eleg. Nenobam oluluk wene hweag-nesauihin anyo, at hweag-umuhup famen,

²⁷ aren de, Hit keman wahep? Hit henebe an napeleg. Hit siag duruk kahep su, longgo iek, hweag-hesahu mu,

²⁸ hiren ap Abraham mel, Ishak mel, Yakub mel, ap nabi humdoho mel, Allah apma wereg ma esahupdeg, hit neg de dagma wilibi henobahaku mu, oba yareheg, henaeg kilit mareheg, duruk kamuhup.

²⁹It ap homi o yomu-yahamu en, lundi-lendi en, Allah apma feseruk mu enahayeg dukoho kabog-dik wamuhup.

³⁰ Kabog-dik wamuhup mu, it foma ketia fobik wereg on anyo, it dam aheg, ne, ketia it atam wereg anyo fobik aheg, atuk mu esahup,” ulug, hweag-esasi.

³¹Anyo owan hweag-esauk kweleg, it ap Farisi on foman Yesus akit wahausareg, “Ap Herodes howarikoho duruk mu, o suman folo-folo longgo iyug.”

³²Hweag-utswa ma, at Yesus en, “At ap ai olomene hag ai, wene su folo-folo hweag-irik lakiek. An ketia nim, sono nim, mungguat ap endama halug, lisoho wilibi feseheg, ouk halug, hiling-enebeheg, duhukdeg, hup biren noholug, hau henahaneg angge an duhuk ulug waharihik anyo ai, mun fotogdoho duhuk.

³³Airoho duhuk famen, ap Allah wene hweag-esauk on eke o Yerusalem embeselug amumu waram siag deg ma, yoho nim, sono nim, hau nim, lauk kam ale aha.

³⁴Yehei! Hit o Yerusalem on su yehei! Hiren Allah wene hweag-esauk on nabi binggi enowareheg, Allah en henekit yonggo mon-enebik waharuk on helep fam fuk-fak heheg enowareheg, duruk kahep ma, yehei! An suwe ayam isinga en omaliki ahwerabul apma sebel-enesug anyo hag, hit henomaliki hinim kabog-henobahale e, boruk katihik men, hiren, Nenerim, uruk kahep ma, yehei!

³⁵ Hit henobam su embesemin mu, o lin-binmu aruhu. Hiren, Tuhan unuk fam waha su, mot-dukohon, uhup salim owan horog aik waharuk eleg kweleg, hit hinil nea fug angge welamuhup, ulug, hweag-hesauk kahi,” ulug, hweag-esasi.