Read Ninia Yali LUKAS 14 Bible Online

LUKAS 14 - Ninia Yali bible

LUKAS 14

¹Fobik eke salim, at Yesus en Yahudi somban uruk salim, siburu naroho ap Farisi on enowe eke obam kwisi mu, it ap homi en inil en walug noruk katswa.

²Inil en walug noruk kweleg, ap eke enggik eyog nim firig on Yesus alukwe kwe wereg ma,

³at Yesus en ap Farisi on mel, Allah wene melaleg hwalduk on guru agama mel, hweag-esauk kwit, “Somban uruk salim ap homi hiling-enepuk fano a, ousa a?” ulug, hein og-enepsi.

⁴Hein og-enepsi mu, it mundoho enele mun eleg angge bok atswa ma, at Yesus en ap anyo enggik seneko fano hilinggi fesireg, monde fesi.

⁵ Monde fesi mu, lauk kweleg, at Yesus en, “Hit henemloho ane, henowam sapi ane, kwenang habuligmu, ik yenggelegma wamburuk halug, somban uruk salim seneko lahabik wahep ha ale fano a, eleg a?” ulug, hein og-enepsi.

⁶Hein og-enepsi mu, enele onggo hweag-om fug ale atuk en, bok atswa.

⁷Bok atswa ma, at Yesus en it ap homi siburu nakoho eneyonggo fousa anyo ap humon huratukmu neg huraik waharuk mu esasi mu, wene wal-heheg hweag-esauk kwit,

⁸ “Ap hwe hwelaroho soni osoho nowag ulug, heneyonggo foruk halug, lahupdeg, ap humon huratukmu huram fug. Hit mun dotdeg ma, ne, ap eke mun humon ayonggo on waharuk halug,

⁹at hinim heneyonggo fohu on anyo en hit hweag-hesa waharuk kwit, Yaho, ap su hit henobalma huramag, hweag-hesauk halug, hit henenggali beil ap hesangge on huratukmu huraik la ale am no, ap humon huratukmu huram fug.

¹⁰Heneyonggo foruk halug, lahupdeg, ap hesangge on huratukmu etma huratuk nu. Hwerieg ma, at heneyonggo fohu on anyo en, hit hweag-hesa waharuk kwit, Nori, hit ap humon huratukmu dia huraik manik, hweag-hesauk halug, ai en it ap homi humdoho siburu nakoho hinim hwerieg anyo inil hanim, hit leho hesahup mu, ap hesangge huratukmu etma huramuhup.

¹¹ Hit henenda leho fahat-dauk halug, sebele henebahakeg, ne, henenda sebele fahat-dauk halug, leho henobahakeg, duruk mu hahup, ulug,” ulug, hweag-esasi.

¹²Hweag-esasireg, at Yesus en ap at ayonggo fesi on anyo hweag-utuk kwit, “Hat soni esetuk kwit halug, ap hinim henenda hundig inim, hori inim, howe haut inim, enenggik wereg on hat hinim welahep on hinim, it fobik esetuk kwit, onggo hat hayonggo fouk ulug, it neg eneyonggo fouk fug.

¹³Soni esetuk halug, enenggik eleg halug, eyog foma eleg foma neg wereg halug, enelenggen siag on halug, inil hupnig on halug, eneyonggo fohun halug,

¹⁴hahayeg humon hahun. Onggo og-hum fug alereg ma, ap homi enenda wenggeleg on eneluk inamuhup salim, onggo og-hutuk mu hahun,” ulug, hweag-itsi.

¹⁵Hweag-itsi anyo, ap eke siburu nakoho inim hwerieg latsi on anyo esanggo holsireg, at Yesus hweag-utuk kwit, “It Allah apma feseruk mu wereg lit, siburu nahup on ai enahayeg boruk kamuhup.”

¹⁶Hweag-itsi mu, at Yesus en, “Ap eke soni humon esetmin ulug, ap homi humdoho eneyonggo fesi.

¹⁷Eneyonggo fesireg, osoho folug, amingming angge eke hweag-utuk kwit, Soni osoho su mun yahaluk ale aha ma, ap eneyonggo fesehi on anyo na wamag ulug, hweag-isil lag, ulug, monde fesi.

¹⁸Monde fesi mu, hweag-isil lauk mu, it ambine nirik-nerim uruk kwit, at eke en, An yabuk yaho onggo ferihik on ha lamin angge re, soni na lahi ha fug ale aha, nare, eheg,

¹⁹eke en, An nowam sapi enebe numen hundutihik angge re, ha lamin angge re, soni na lahi ha fug ale aha, nare, eheg,

²⁰eke en, An nohwe ketia hwelihi angge re, soni na lahi ha fug ale aha, nare, hweag-ereheg neg, duswa.

²¹Duswa anyo, amingming angge en akni bilinggoho hweag-irik wahasi mu, akni anyo olok en amingming angge anyo hweag-utuk kwit, Folo-folo o sili hummu su lamihin deg, ap enenggik eleg on mel, enggik eyog foma wereg foma eleg on mel, inil hupnig on mel, enelenggen siag on mel, kwe uluhun-uluhun etma lamihindeg, og-eneplug manu, hweag-itsi.

²²Hweag-itsi ale, higitdoho og-enepil lasireg, akni hweag-utuk kwit, Hweag-nerehen anyo og-eneplug wahi famen, foma koloreg su hakin, hweag-itsi mu,

²³akni anyo en, Ai halug, ap homi kwe uluhun-uluhun dagma humdoho wereg anyo, an nobam hoporik kwik wamag ulug, hele omamne fam hweag-isil lag.

²⁴It ap soni osoho nowag ulug atam eneyonggo fehi on mun na fug ale aha, ulug, isi,” ulug, Yesus en hweag-itsi.

²⁵Ap homi humdoho Yesus inim noruk mu, at Yesus en alukwe endenoho fu-esauk kwit,

²⁶ “Hit heneknisi henisingasi nim, henohwesi henomaliki nim, henowesi henautsi nim, henebe neg anyo nim, Su nenerim, boruk eleg kweleg, an nakit waharuk halug, an nele wauk on ahep ha fug alereg.

²⁷ Hit henahan salib dopno-henobahakup anyo hwelalug, ninim lahuk boruk eleg kweleg, an nele wauk on ahep ha fug alereg.

²⁸Hit eke o humon wuruhuk ulug melalduk halug, onggo foruk on wenahauk fug angge en wutuk kahep behep?

²⁹Eleg. Wenahauk fug angge wutuk halug, o lun angge oho folug anduli belabe folug, o ebe owan witil laharuk kweleg, onggo foruk on eleg en embeseruk halug, ap foman inil hesahupdeg, hit o wuruhuk ulug wene melalduhup anyo unda yag-henepuk kwit,

³⁰at ap su o wuruhuk ulug, wene melalsi famen, mundoho wuruk fug ale atsi, uhup eleg behep? Uhup litdeg.

³¹Ap andohalem on eke en ap andohalem on ekenim dog yabik laroho melalduk halug, atam hweriatlug, An nautsi 10 ribu en selei on enebe 20 ribu inim higit yabuk alereg a, maben a? ulug, wal-ha fug angge sinalik lahu behep? Atam wal-hahu litdeg.

³²Wal-halug, mabendeg halug, it inim seleireg on fam, Weim eleg ulug seiye fehe, ulug, yonggo hweag-esa lahu anyo.

³³Airoho duruk kahep ma, hit eke henengge embeseruk eleg kweleg, an nele wauk on amuhup fug abi,” ulug, hweag-esasi.

³⁴Hweag-esasireg, “Mayu fano wereg famen olok elegdoho weraho halug, nangginoho olok aruhu?

³⁵Eleg, mayu olok eleg anyo siburu yahoma ane, kwenang mohot forukmu ane, fouk fug alereg neg deg ma embesehup. Henesanggo wereg halug, holduk kamek,” ulug, hweag-esasi.