Read Ninia Yali LUKAS 15 Bible Online

LUKAS 15 - Ninia Yali bible

LUKAS 15

¹ It ap pemerintah enobahet pajak andog-duruk on mel, siag duruk on mel, mundoho Yesus ele holdul ulug wahausa.

²Wahausa ma, it Farisi on mel, it Allah wene melaleg hwalduk on guru agama mel, enolok en enerim boruk kwit, “Ap su ap homi siag duruk on og-eneplug, inim siburu nauk su aho!”

³Uswa ma, at Yesus wene wal-heheg it hweag-esauk kwit,

⁴“Hit eke henowam domba 100 en wereg famen, misig longgo uruk halug, 99 en wereg kweleg, enggelangge nil lauk mu feselug, misig longgoreg anyo heraril lahakeg wambeheg, dil lalug, hweaharuk kahep anyo eleg?

⁵Ne, hweaho folug, henummu maserulug ahayeg dil,

⁶henobam walug watlug, henori mel, henowe henaut kabog-debeselug, Nowam longgo isi anyo hweahaki angge re, hit nim nenahayeg dukohon, uruk kahep anyo eleg? Uruk kahep.

⁷Ne, ai halug, anyo hag, it ap 99 enendaman, An siag ke embesehuk? ulug, enenda wenggeluk fug angge wereg halug, it boholma wereg on enahayeg bohup fug. Ite, it ap siag duruk on misig eke siag duruk katsi on enda wenggele folug embeseruk halug neg de, it boholma wereg on enahayeg bohup, ulug, hweag-hisihi,” ulug, hweag-esasi.

⁸Ai hweag-esasireg, “Hwe eke auang owag numen foroho latsi men, misig longgo uruk halug, eral fisaho folug, ololo horoho wilipuk kwit, bok am fug angge hera-bera duruk kwit, hweaharuk anyo eleg?

⁹Ne, hweaho folug, owe aut inim, inim wereg on inim, kabog-debeselug, Nauang longgo isi anyo hweahaki mu, hit nim nenahayeg dul, uruk anyo eleg?

¹⁰Ne, ai halug, anyo hag, it ap siag duruk on eke misig en siag disi anyo enda wenggele folug, embeseruk halug, it boholma Allah en yonggo mon-enebik waharuk on malaikat omano enahayeg duhup, ulug, hweag-hesauk kahi,” ulug, hweag-esasi.

¹¹Hweag-esasireg, wene eke uruk kwit, “Ap eke omaliki biren welatswa.

¹²Ombolim on anyo en, Nakni yei. Habinggi angge an og-nuruhuk berihin etano og-nimin abi, hweag-itsi mu, akni en angge abinggi angge etano minggiroho omaliki anyo yohwan-enepsi.

¹³Yohwan-enepsi mu, nukoho dorangge welatlug, aut anyo angge kabog-debesireg, onggo bal-dalug, auang hwelalug o yatma lasi. Lauk kwit, enda furebouk fug angge, enda nauk halug neg dil lasi mu, auang etano hesangge elehe fahat-dasi.

¹⁴Auang elehe fahat-dasireg wereg ma, o etma siburu obok humon lahasi mu, at siburu obokdeg latsi.

¹⁵Aireg latsi mu, ap obam onggwareg on eke eyabuk witmin ulug ha lasi. Ha lasi mu, at owam dagma etma wereg ma endetuk kamag ulug monde fesi.

¹⁶Monde fesi mu, lauk kwit, Nahum wereg amag ulug, ahap angge wam nauk on nauk kale e, besi famen, enowam enonggwareg on en at og-om fug angge welatswa.

¹⁷Airoho wereg lit, enda wenggele besireg, A! An nakni amingming angge onggo hwelauk on anyo enebe humdoho famen, siburu homoroho nauk kwit, dindikdoho foruk famen, an neg de, siburu obok en waratmin hihi.

¹⁸An suman embeselug, nakni ha lahukdeg, Nakni, at boholma on inim, hat inim, siahap henobaharihik.

¹⁹Siahap henobaharihik mu, Su an namloho, hweag-nom fug. Ite, hamingming angge onggo hwelauk on su hag nabin, ulug, hweag-irik lahuk, besi.

²⁰Besireg, o ai embeselug, akni ha lasi. Ha lasireg, owan horog aik lauk kweleg, akni en ebe yatma hasireg, elaheg en buroho lalug mako bug-duruk kwit, dang-disi. Dang-duruk kweleg, amloho en akni hweag-utuk kwit, Nakni. At boholma on mel, hat mel, siahap henobaharihik. Siahap henobaharihik mu, Su an namloho, hweag-nitmihin fug.

²²Hweag-itsi famen, akni en amingming angge hweag-esauk kwit, Sum mun fano on oko wan-debeheg, helep sehene enggik sehelet fam wan-debeheg, eyog sepatu wan-debeheg, folo-folo diek!

²³Debelug, wam sapi omalik sei wereg on wag lalug, waroho bobag esetul.

²⁴An namloho su waratsi hag famen, oluk aha. Longgo isi famen hweahake, ulug, enahayeg duswa.

²⁵Enahayeg duruk kweleg, owe anyo yabukmen waharuk kwit, obam horogma aik wahasi mu, yunggulduk kwit suni humon uruk mu holsi.

²⁶Holsireg, akni amingming angge eke wol-disi mu, wahasi mu, Ai nunggwe fahet duruk, ulug,

²⁷hein og-hasi mu, amingming angge anyo en, Eleg. Haut waha ma duruk. Ne, ebe fano angge waha ma, hakni owam sapi sei wereg on eke wareheik.

²⁸Hweag-itsi mu, owe anyo olok atsireg, obam kuruk ale erim atsi mu, wereg ma, akni akit wilibik wahasireg ele abiroho, Kwik ma abi, ulug, hweag-itsi.

²⁹Hweag-itsi mu, owe anyo en akni hweag-utuk kwit, Furin. An den di tahun su tahun humdoho su, hobahet yabuk wutuk kahi. Ne, wutuk kwit, hat diroho diyug, airoho diyug hweag-nutuk kahen anyo, an nerim uk fug angge mundoho duruk kahi famen, wam omalik misig eke an nori nim nahayeg wereg lit nowag ulug, eke og-nutuk kahen fug.

³⁰Ai famen de, hat hamloho su neg de, homi hesangge enebil lauk kwit, hangge og-itihin anyo elehapdoho feil lasi anyo waha ma neg de, wam sapi sei wereg on waroho eserehen.

³¹Hweag-itsi mu, akni en, Namloho. Hat nimim hundig-hundig welahen ma, namunangge-manangge ai, hat hangge.

³²Ne, haut su waratsi hag famen, oluk aha, ne, longgo isi famen, hweahake ma, soni su nenenda nenahayeg wereg lit, eserehe fano, ulug, hweag-itsi,” ulug, at Yesus en wene wal-heheg it ap homi hweag-esasi.