Read Ninia Yali LUKAS 16 Bible Online

LUKAS 16 - Ninia Yali bible

LUKAS 16

¹Ai en, fobik at Yesus en at ele wauk on hweag-esauk kwit, “Ap enggik wereg on eke amingming angge o hwalduk katsi. Hwalduk kwit wereg ma, ap homi en, Hamingming angge en hangge omano elehap-dil lauk, ulug, hweag-utswa.

²Hweag-utswa ma, amingming angge anyo wol-disi mu, waha il lauk em, hweag-utuk kwit, Hat dil lauk kahen holdihik anyo, nanggoho dil lauk kahen? Hat ketia nobam hwalduk karuhun fug mu, wereg lit, duruk katihin ale bilinggoho hweag-nitmihin.

³Hweag-itsi mu, amingming angge anyo en endama wenggelduk kwit, Nakni en o hwalduk karuhun fug eheik ma, an nangginik e? Yabuk wituk ale nomamne eleg en dihi ha fug alereg. Ne, ap enobam heng-enebil noruk ale oho re nakol.

⁴Dagma sebele nobaharuk halug, ap homi en og-nabukwag ulug wenggelihi, ulug,

⁵at en it ap homi at akni ombaleg angge baleg on anyo misigdoho wamag ulug wol-enepsi mu, eke atam wahasi halug, hein og-hauk kwit, an nakni ombaleg angge nunggwe en baleg welahen?

⁶Hein og-hasi mu, ap anyo en, Ahalue hwenanggeg ikwag 100 en hwenanggeg baleg wereg, hweag-itsi mu, amingming angge anyo en, Baleg angge lisu baleg su oko obalma lisu 50 en hwenanggeg neg balin.

⁷Hweag-itsireg, at eke anyo hein og-hauk kwit, Hat de, hakni ombaleg angge nunggwe en baleg lahen? Hein og-hasi mu, ap anyo en, Gandum sum 100 en yohwareg baleg wereg, hweag-itsi mu, amingming angge anyo en, Baleg angge lisu baleg su oko obalma lisu 80 en balin, hweag-itsi.

⁸Ai disi anyo akni holsireg, amingming angge at lalsi famen, enda along wenggelsi mu, yanderisi. Ap homi wongdoho kwenangma ketia wereg anyo mel duruk kwit, enenda enggat on fam alongdoho hag wenggelduk famen, it Allah omaliki enendama selehap enepsi anyo, enenda eleg lit siag hag wenggelduk mu, isihi.

⁹Kwenangma on ap homi enenggik wereg dauk anyo fam ap homi let-enebil lauk kwit, eleg atuk halug, Allah en femdoho wereg obam etma dangdoho og-henebuhu en, kwenangma on anyo fam henombalisi wat-isil noruk kamek, ulug, hweag-hesauk kahi,” ulug, hweag-esasi.

¹⁰Ai hweag-esasireg, ekenim hweag-esauk kwit, “Ap eke dot ale duruk kwit, furoho duruk halug, hum ale oho duruk kwit, higitdoho furoho duruk karuhu. Ne, ap eke dot ale duruk kwit, we hwenaroho hag duruk halug, hum ale oho duruk kwit, we hwenaroho hag neg duruk karuhu.

¹¹Ai halug, di angge su angge kwenangma on furoho hwalduk eleg halug, san ebe on hwalduk kamuhup ulug, og-hesahu behep? Eleg.

¹²Hiren ap eke angge furoho hwalduk eleg halug, hit henengge hwalduk kamuhup ulug, san og-hesahu behep? Og-hesa fug alereg.

¹³ Ap misig en aknisi biren enamingming angge atlug, enobahet duk fug alereg. Ambine enobahet dil lauk kwit, eke erim beheg, eke enda hundig deheg, duhu. Ne, eke en duruk ale hweag-utuk anyo furoho deheg, eke en duruk ale hweag-utuk anyo erim beheg duhu. At Allah inim, kwenangma enenggik wereg dauk on inim, ambine mutlug la fug alereg abi,” ulug, hweag-esasi.

¹⁴Hweag-esasi mu, it ap Farisi on anyo Yesus ele holswareg, uang enendareg ma Yesus bulip-duruk kwit unda yako belapswa.

¹⁵Unda yako belapswa man, at Yesus en, “Hiren ap homi en hit fano boukwag ulug, along baldil noruk kahep famen, Allah en henenda olukdeg. It ap homi en, Yehei u, ulug, yande-henepuk anyo at Allah mun erim boruk.

¹⁶ Ap Yohanes Pembaptis wam fug mu, Allah melalfag wene lisu baleg anyo inim, it Allah wene hweag-esauk on nabi en hweag-esauk katfag wene anyo inim, dil lauk katfag. Ne, ap Yohanes Pembaptis wahasi hwili en neg de, Allah apma fesehu wene Fano Wene hweag-isil noruk mu, it ap humdoho leil watuk kwit, kwik waharuk.

¹⁷ Ai duruk famen, bohol inim, kwenang inim, eleg aruhu fano famen, Allah melalfag wene lisu baleg anyo neg de, foma dit-dorangge baleg eke eleg aruhu ai, mun eleg.

¹⁸ Ap eke ohwe embeselug amu on wauk halug ai hambena duruk. Ne, ap eke hwe embeseruk on anyo wauk halug, at oho hambena duruk,” ulug, hweag-esasi.

¹⁹Hweag-esasireg, wene eke hweag-esauk kwit, “Ap eke enggik wereg on sum orohole fano on onggo humon neg wan-duruk katsi. At hupmu hubet siburu fanoroho neg nauk kwit, ahayeg neg welatsi.

²⁰Ne, ap amu on eke unuk Lazarus enggik eleg on anyo, ebe fam yebil humdoho wereg ma, heng-heng angge uruk katsi on anyo, ap enggik wereg on asokolma yinggig latsi.

²¹Ap anyo ap enggik wereg on asiburu nauk kweleg, apuhuno wamburuk on, Nele e, boruk katsi. Ne, mene watlug at ayebil enembilik meldang-heg nauk katswa.

²²Eke salim, ap heng-heng angge on anyo waratsi mu, boholma yonggo noruk on malaikat omano en walug Abraham akit feik lausa. Ai en, ap enggik wereg on anyo oho waratsi mu, autsi en kwenangma sale fousa.

²³Waratlug lauk mu etma lasireg nenek duruk kwit, alukwe lahap-atsireg, o yatma etma ap Lazarus Abraham inim wereg ma esasi.

²⁴Esasireg, ele humon uruk kwit, Nakni Abraham yei! An indok ambulbulmu suma nenek duruk kahi mu, nelaheg boruk kwit, ap Lazarus enggik dum ik yuhul-halug, nambilik anggen sako ukwag ulug, mondorik ma abi!

²⁵Hweag-itsi famen, Abraham en, Namloho, hat holuk wereg lit, fano neg welatihin. Ne, Lazarus anyo neg de nong-hongdoho welatsi anyo henda eberin. Ketia Lazarus suma wereg lit, enda se atsi famen, hat neg de nenek duruk kahen ai.

²⁶Ne, ai amu fug. Eke it ap suman hat hakit laheg, etman nit nenekit waheg, dul boruk anyo, duk fug alereg lamag ulug, bul etma bule humon fesi.

²⁷Hweag-itsi mu, ap enggik wereg on anyo en, Ai halug, nakni yei. An nobam nori foaben wereg ma, it o nenek durukmu suma wam nolug, ap Lazarus an naknisi enobam husumbi hweag-esa lowag ulug mondorin, ulug, hweag-hutuk kahi abi, nakni.

²⁹Hweag-itsi mu, ap Abraham en, Musa wene inim, it nabi enewene inim, foroho wereg ma, ai neg holduk kamag.

³⁰Hweag-itsi mu, ap anyo en, Duk fug alereg, nakni Abraham. Ap eke waratlug lauk men hweag-esa lauk eleg halug, it siag duruk anyo embesouk fug alereg abi!

³¹Hweag-itsi mu, at Abraham en, It hori anyo Musa wene inim, it nabi enele holduk eleg halug, ap eke waratuk men oluk atlug, hweag-esa la on de, it enenda demdoho bohup fug neg, ulug, isi,” ulug, hweag-esasi.