Read Ninia Yali LUKAS 18 Bible Online

LUKAS 18 - Ninia Yali bible

LUKAS 18

¹Ai hweag-esasireg, ap homi enenda firuk fug angge somban neg uruk kamag ulug, Yesus wene su wal-heheg at ele wauk on hweag-esasi.

²“O sili ekema ap wene bilingguruk on eke welatsi. Ap ai Allah akol bouk fug angge nim, ap homi enalong bouk fug angge inim, welatsi.

³Hwe sohwe on eke etma welatsi. Hwe anyo hundig ap bilingguruk on hweag-irik laheg neg duruk kwit, At ninim minggirig on anyo, an nonggwareg en hesangge neg dil lauk katmin en, hat en kwe bale folug welamin, hweag-utuk katsi.

⁴Hweag-utuk katsi anyo, ap ai atam erim boruk katsi men, fobik enda wenggele folug, An Allah nakol mel, ap homi enalong mel, boruk kahi fug men,

⁵hwe sohwe su hundig hweag-nutuk mu, nenda siahap-nabuk no, nele kwe bale folug welatmin, wenggelsi,” ulug, Yesus en hweag-esasi.

⁶Hweag-esasireg, at Nenowe Tuhan en, “Ap bilingguruk on enda kwasikdeg on en besi ale ai holiek.

⁷At Allah en at omaliki momal-enepsi on enele hupmu hubet hundig hweag-utuk halug, enewene eberoho biling-enebuhu eleg behep? Ne, enewene biling-enebuk fug angge welaruhu behep?

⁸Eleg. Folo-folo biling-enebuhu, ulug, hweag-hisihi. Airoho duhu famen, an Ap endag-atihik on waharuk nealug, it ap homi kwenangma suma enenda nobam dip-nobahalug demdoho boruk mu esahuk a, eleg ane?” ulug, hweag-esasi.

⁹Hweag-esasireg, it ap homi foma enendan, “Ap homi foma ai siag, ne, nit neg de fano,” boruk katswa ma, Yesus en wene su wal-heheg hweag-esauk kwit,

¹⁰“Ap biren somban ukoho lit, Allah obam wirigmu kuswa. Eke ai, Farisi on, eke ai, ap pemerintah enobahet pajak andog-duruk on welatswa.

¹¹Allah obam wirigmu kwik lausareg, ap Farisi on anyo en unduhuk lit, endaman somban uruk[25] kwit, Yehei Nakni Allah. It ap homi laloho enengge hesangge wauk on nim, siag duruk on nim, homi balduk on nim, ap pemerintah enobahet pajak andog-duruk on su oho nim, an airoho on fug deg ma, dang-hapuk kahi.

¹²An somban misig uruk mu, nukoho birenam nambilik hweang siburu na fug angge welahi. Nangge mundoho walug, foma minggiroho numen on, hat Allah hobahet foruk kahi, hweag-itsi.

¹³Hweag-itsi famen, ap pemerintah enobahet pajak andog-duruk on anyo, balohoma unduhuk lit, alukwe boholma lahap-am fug angge, amig bou dauk kwit, Yehei Nakni Allah. An siag duruk nahun deg ma, nelaheg bein, ulug, enda wat-dauk kwit, hweag-itsi.

¹⁴ Inim somban airoho uswa famen, atam isi on anyo eleg. Ite, fobik isi on anyo neg Allah en enda fano debesi mu, obam lasi. Ap eke onggwareg en enda leho fahat-dauk halug, sebel aruhu. Ne, ap eke enda sebele fahat-dauk halug, leg aruhu, ulug, hweag-hisihi,” ulug, hweag-esasi.

¹⁵Ai en, fobik ap homi en enomaliki doron mel Yesus enggik enunggul sebel-enebukwag ulug, akit og-eneplug wahausa. Og-eneplug waharuk mu, at ele wauk on en esausareg bet-enepswa.

¹⁶Bet-enepswa ma, at Yesus en, enomaliki doron wamag ulug, wol-enepsireg, waharuk kweleg, at ele wauk on hweag-esauk kwit, “It enomaliki doron an nakit wamag ulug, embeseiyug. Allah apma welamuhup on de it diroho on deg ma, kwe bal-enebuk fug.

¹⁷It enomaliki doron Allah apma feseruk ale wauk hag, hit airoho wauk eleg halug, at apma kwik lahup fug, ulug, demdoho hweag-hisihi,” ulug, hweag-esasi.

¹⁸Ai hweag-esasi mu, it ap Yahudi enowe eke en Yesus hweag-utuk kwit, “Guru ahwi! Hat fano neg welahen su, an noluk mundoho welaruhuk en nangginik?” ulug, hein og-hasi.

¹⁹Hein og-hasi mu, at Yesus en, “Di ap su ap eleg, at Allah neg fano wereg ma, hat nunggwelug an fano hweag-nerehen?” ulug, hein og-hasi.

²⁰ Hein og-hasireg, “Wene diroho diyug, airoho diyug melal-henepuk kwit, Hwe baluk fug, ap binggi waruk fug, ap enengge yoholi angge wa fug, seiale wene enobam dopno esa fug, henisinga henakni enele holduk kamek, ulug, melalfag wene anyo hat holukdeg abi,” ulug, hweag-itsi.

²¹Hweag-itsi mu, ap anyo en, “An wene su nebe dotdeg man angge furoho duruk kahi abi.”

²²Hweag-itsi on at Yesus holsireg, “Duruk kahen famen, misig eke owan duruk eleg ma hiihi ai, hweag-hirik. Hat hangge mundoho onggo baloho, ap enengge eleg on yohwan-enebik lag. Yohwan-enebik lamihin halug, hangge boholma on hwelahun. Ai dimihindeg, ninim lauk kamul en manu,” ulug, hweag-itsi.

²³Ap anyo hweag-itsi on holsireg, angge humdoho wereg ma, enda mun hesilsi.

²⁴At Yesus en ap enda hesilduk mu hasireg, “Ap enggik wereg on Allah apma feseruk mu kwik la siagdeg hihi.

²⁵Wam unta hein ele foreg kwe kwik la alereg famen, ap enggik wereg on Allah apma feseruk mu kwik la siagdeg hihi,” ulug, hweag-esasi.

²⁶Hweag-esasi mu, it holswa on anyo en Yesus hweag-utuk kwit, “Ne, ai halug, sa mel enahap wendaruhup e?” ulug, hein og-hausa.

²⁷Hein og-hausa ma, at Yesus en, “It ap homi en duk fug alereg anyo, at Allah en neg de duk ale fanoreg,” hweag-esasi.

²⁸Hweag-esasi mu, at Petrus en, “Nit nenangge mundoho embeselug, hat hombolim noruk kamuhuk en waharuhuk anyo re!”

²⁹Hweag-itsi mu, at Yesus en, “Ap eke Allah apma welaruhuk, ulug, obam wirig mel, ohwe mel, owe aut mel, isinga akni mel, omaliki mel, mundoho embeseruk halug,

³⁰ketia obalma humdoho og-uruhu, ne, fobik ahae fotog salim ai fam mundoho oluk welaruhu, ulug, demdoho hweag-hisihi,” hweag-esasi.

³¹Hweag-esasireg, ai en ap nesanggoen anyo og-eneplug enemumu lasireg, “Yaho yei! Nit o Yerusalem lauk kahe. Lauk men, it ap nabi etmano en an Ap endag-atihik anyo nabuhup ale lisu balfag anyo mundoho dip-uruk mu hahup.

³²An Ap endag-atihik anyo nowarukwag ulug, nebe ap dagma on og-esahu. Og-esahu mu, siahap-biahapdoho nobahakeg, wasubag nobam sup nobahakeg, duhup.

³³Ai debelug, yeik fam nowaruhupdeg, binggi nowaruhup. Nowaruhup mu, hup biren noholug, henahaneg salim noluk atlug inaruhuk,” ulug, hweag-esasi.

³⁴Hweag-esasi on it mundoho furebouk fug angge welatswa. Wene indip heraho ma hweag-esauk on it furoho ha fug angge welatswa.

³⁵At Yesus o Yerikho hop-debeik lasi mu, ap eke il hupnig mu, kwema hwerieg lit, ap la wam duruk on fam heng-enepuk katsi.

³⁶Ap su en it ap homi enele il waharuk mu holsireg, “Su nunggwe il waharuk ahi?” ulug, hein og-esasi.

³⁷Hein og-esasi mu, it ap homi en, “Eleg. At Yesus obam Nazaret on kobokwe su fam waharuk.”

³⁸Hweag-utswa ma, ap anyo en ele humon en, “Yesus Daud omba su! Nelaheg bein!”

³⁹Ulug, hweag-itsi mu, it atam lauk katswa on omano en ap anyo ele eleg angge welamag ulug bet-duswa famen, ebenaheg ele humon uruk kwit, “Daud omba ahwi! Nelaheg bein abi!”

⁴⁰Hweag-ereheg neg uruk katsi mu, at Yesus bok atsireg, ap anyo at akit walug wamag ulug hweag-esasi. Hweag-esasireg, walug wahausa ma, at Yesus en ap anyo hweag-utuk kwit,

⁴¹“An nanggin-hapmin ulug uruk kahen?” Ulug, hein og-hasi mu, ap anyo en, “Nowe abi. Nil fano hiling-nabukwag ulug uruk kahi.”

⁴²Ulug, hweag-itsi mu, at Yesus en, “Hat henda nobam dip-debelug demdoho behen fam fano ahen ma, hil fano amag,” ulug, hweag-itsi.

⁴³Anyo owan hweag-utuk kweleg, at il fano atsi. Fano atsi mu, Yesus inim noruk kwit, Allah unuk mot-dil lauk katsi. Ne, it ap homi mundoho disi ale hausareg, Allah mot-duswa.