Read Ninia Yali LUKAS 19 Bible Online

LUKAS 19 - Ninia Yali bible

LUKAS 19

¹At Yesus o Yerikho kwik lasireg, bekit lauk mu,

²ap eke unuk Zakheus pemerintah enobahet pajak andog-duruk on enowe mun enggik wereg on welatsi.

³At anyo en Yesus fu hamin ulug disi famen, ap homi humdoho en owag horogdeg ma, fu ha fug alereg latsi.

⁴Aireg ma hasireg, Yesus kwe su fam waharuk hihi ulug, at dag buroho lasireg, e eke fam lahasi.

⁵Lahasireg wereg ma, at Yesus wahasireg, alukwe lahap-hauk kwit, “Zakheus ahwi! Hat hobam nambieg nohweik laul angge re, folo-folo wambik ma.”

⁶Hweag-itsi mu, Zakheus anyo folo-folo wambik wahasireg, Yesus ahayegdoho hondoholug, obam lasi.

⁷Yesus inim lauk mu, ap homi en esausareg, mul-mul ale uruk kwit, “Ap siag duruk on nim obam nohoukoho lauk su aho!”

⁸Uswa ma, at Zakheus en it humdoho inil hanim Yesus hweag-utuk kwit, “Nowe ahwi! An namunangge-manangge minggiroho ap enenggik eleg on og-esamin. Ne, ap homi laloho enengge hwelauihik halug, obalma ohwanam onggo og-esamin.”

⁹Isi mu, at Yesus en, “Hat inim Abraham omba deg ma, hat homaliki inim, yoho henahap wendarahep.

¹⁰ An Ap endag-atihik anyo ap homi longgo uswa on hweako, enahap wendat-enebuhuk ulug, wambik waharihik,” ulug, hweag-esasi.

¹¹ It ap homi anyo en enesanggo holdil lauk kweleg, at Yesus en wene hweag-isil, inim o Yerusalem horog aik lausareg, it ap homi en, Allah en ap homi folo-folo at apma nenobahaku, ulug, boruk ale enegdeg ma esasireg, wene eke wal-heheg hweag-esauk kwit,

¹²“Ap kain on amloho eke en, O yatma etma, nunuk bogdeg unduhuk nobaharuk halug, waruhuk, ulug, besi.

¹³Lamin ulug duruk kwit, at amingming angge enebe numen wol-enepsi mu, wahausa ma, auang bosie emas on numen enebe hundomog og-esauk kwit, An waharuk eleg kweleg, nauang su fam di angge su angge hundutil lauk kwit, saharuruk kamek, ulug, hweag-esasireg, lasi.

¹⁴Lauk kweleg, at ahainelekwe etmano on en at ebe enerim neg bousa ma, Hat suma raja fahat-nenesug laruhun nenerim, ukwag ulug, yonggo mon-enepswa.

¹⁵Mon-enepswa famen, deg kweleg, unuk bogdeg unduhuk fousa ma, ap anyo obam wahasireg, amingming angge auang og-esasi anyo, Nauang fam nangginoho saharil lauk katswa hamin e, ulug, wol-enepsi.

¹⁶Wol-enepsi mu, amingming angge atam wahasi on anyo en, Nakni. Hauang og-nitihin anyo fam numen eke dopnoroho wauihik.

¹⁷Hweag-itsi mu, akni anyo en, Namloho, namingming angge fano on hat, mun fano neg dirihin. Dot ale duk on famen, furoho dil lauk katihin mu, ketia o sili numen hat hwalduk karuhun, ulug, unduhuk hobahaki.

¹⁸Hweag-itsi mu, eke ombolim wahasireg, Nakni, Hauang og-nitihin anyo fam foaben eke dopnoroho wauihik.

¹⁹Hweag-itsi mu, akni anyo en, Hat o foaben hwalduk nu.

²⁰Hweag-itsi mu, eke ombolim wahasireg, Nakni, yei. Hat hobabut hapereg lahen ma, ne, hapereg lit, haren fouk fug angge welatlug hweleheg, ne, a foluk fug angge welatlug, anggen yihig bal-deheg, duruk kahen ma, nakol en hauang og-nitihin anyo sum fam hetdoho foroho welatihik anyo su, ulug, hweag-itsi.

²¹

²²Hweag-itsi mu, akni anyo en amingming angge hweag-utuk kwit, Siag dirihin namingming angge hat. Hat hele ehen fam henggali ware hobahaki. Nenda hapereg lit, fouk fug angge welatlug hweleheg, a foluk fug angge welatlug anggen yihig bal-deheg, duruk kahi ale hat holukdeg famen,

²³an waharuk halug, nauang nim, dopnoroho wauk angge onggo nim, an wag wale famen, it ap homi nauang saha-dowag ulug og-esa fug angge nunggwe fahet welatihin?

²⁴Hein wasireg, ap homi at inim wereg on anyo hweag-esauk kwit, Nauang eke at foroho on anyo deloho, ap numen dopnoroho wasi on anyo og-emek.

²⁵Hweag-esasi mu, iren, Nakni yei. At auang numen foroho ai re?

²⁶ Uswa ma, aren, It ap homi enengge wereg halug ekenim seberoho og-eseheg, ne, enengge eleg we dorangge foroho wereg anyo deleheg, duruk mu hahup.

²⁷Ne, it ninim selei on an enowe nunuk bogdeg fahat-enesug laruhuk, Nenerim, uswa anyo neg de, og-enebik laluhupdeg, dia an nil hanim enowariyug, ulug, hweag-esasi,” ulug, at Yesus en ap homi anyo hweag-esasi.

²⁸Yesus en wene ai hweag-esasireg, at dam o Yerusalem ilig-atsi.

²⁹Ilig-atuk kwit, duk unuk Zaitun aldukmu, o sili Betfage nim, Betania nim, horog aik wahausareg, at ele wauk on biren mon-enepuk kwit,

³⁰“O sili lundima lakiek. Owan kwik lauk kwit, wam keledai owan on ap homi ambolowag fam huratuk eleg on lilig mu hweahaluhupdeg, ai at loloho walug manu.

³¹It ap homi etman, Keledai nunggwelug lolduk kahep, hweag-hesauk halug, hiren, Tuhan[26] keledai eleg en wag lakiek, ulug, hweag-neseheik ma, wag wahe, ulug, hweag-esakiyug,” ulug, mon-enepsi.

³²It mon-enepsi anyo wahausareg, hweag-esasi anyo higitdoho hausa.

³³Hausareg, keledai lolduk mu, it ap enonggwareg anyo en, “Keledai nunggwelug lolduk kahep?” ulug, hein og-enepswa.

³⁴Hein og-enepswa ma, iren, “Nit nenowe keledai eleg en wag lakiek hweag-neseheik ma, wag wahe,” uswareg,

³⁵walug, Yesus akit feik wahausa. Feik wahausareg enesum dagma on nonggoloho keledai ambolowag fam doale folug, Yesus ambolowag fam hwerie fousa.

³⁶Hwerie fousareg, Yesus lauk kweleg, ap homi enesum wiriloho kwe humon fene doale feil lausa.

³⁷O Yerusalem horog aik lauk kweleg, kwe Duk Zaitun wambik lauk mu etma, ap homi at ele wauk on mundoho, duk fug on duruk mu hausa ma, enahayeg en ngaik-ngog dil lauk kwit, Allah unuk mot-dil lausa.

³⁸ Ngaik-ngog dil lauk kwit, “Tuhan Allah en Raja mondorik wahasi su, unuk mot-dukohon. Ne, it boholma wereg on enenda hambukdoho welamag. Bohol emberimmu neg wereg on Allah at neg leho foruk kamul,” il lausa.

³⁹Il lauk mu, it Farisi on foman ap homi humdoho kabog-dil wahausa on enenggelegma wereg lit, “Guru ahwi! Hele wauk on su enele embesoukwag ulug bet-enebin.”

⁴⁰Uswa ma, Yesus en, “It ap su enele eleg angge welalep man, helep su enele elep, ulug, hweag-hisihi,” ulug, hweag-esasi.

⁴¹Hweag-esasireg, o sili Yerusalem horog aik lasireg, il hauk kwit oba yatsi.

⁴²Oba yatuk kwit, “Hit ap homi Yerusalem on su, ketia su li hit nanggoho henenda hambuge henobaharuk anyo heneluk aha fug mu, Yehei, boruk kahi famen, ketia hinil ha no heraho wereg.

⁴³Allah su salim nenesa wahasi, ulug, enegdeg ma hehep fug mu, henobam en wilibik lahep ha nolug, it hinim selei on en elehet oho henobahakeg, mase henobahakeg, lendi yahandi en, lundi lendi en luluhun henebukoho horog aik wamuhupdeg,

⁴⁴henobam helep obam louk heheg wirig su eke embesouk fug angge mundoho moluk-duruk kwit, henomaliki hinim elehapdoho henobahakeg, duhu sali horog aik wahasi,” ulug, hweag-esasi.

⁴⁵Ai hweag-esasireg, Allah obam wirigmu kwik lasireg, it ap homi di angge su angge onggo hun-dauk anyo muko wilibi feseruk kwit,

⁴⁶ “An nobam wirig su, somban uruk obam welaruhu, lisu balfag famen, hit neg de ap yoholi angge walug, herahaik waharukmu deberuhup,” ulug, hweag-esasi.

⁴⁷ Yesus likia hupmu Allah obam wirigmu wene hweag-esauk katsi. Hweag-esauk katsi famen, it ap Allah il hanim duruk on imam enowesi mel, it Allah wene melaleg hwalduk on guru agama mel, it ap Yahudi enowesi mel, at Yesus elehapdoho foul ulug, duswa famen,

⁴⁸ap homi en Yesus ele holdul, ulug, inil at neg kumururuk mu hausareg, Nanggoho deboul, ulug, duk fug angge welatswa.