Read Ninia Yali LUKAS 20 Bible Online

LUKAS 20 - Ninia Yali bible

LUKAS 20

¹Fobik eke salim, at Yesus Allah obam wirigmu wene hweag-eseheg, Fano Wene hweag-eseheg, duruk mu, Allah il hanim duruk on imam enowesi mel, it Allah wene melaleg hwalduk on guru agama mel, enowesi mel, at akit wahausa.

²Akit wahausareg, “Hat di ale su ale duruk kahen anyo, sa ele fam duruk kahen? San hweag-hitsi fam duruk kahen? Hweag-nesakin,” ulug, hein og-hausa.

³Hein og-hausa ma, at Yesus en, “An den oho wene eke hein og-hesa.

⁴At Yohanes ikma belap-enepuk katsi ai, boholman hweag-utswa fam belap-enepuk katsi a, ap homi en hweag-utswa fam belap-enepuk katsi a? Hiren hweag-nemek abi!”

⁵Hweag-esasi anyo, it inim wene balduk kwit, “Boholman hweag-utswa fam uruk mu nesalug, aren, Ne, ai halug, hit nunggwelug henenda at fam dip-debouk fug angge welahep, hweag-nesamisi.

⁶Ne, ap homi en hweag-utswa fam uruk halug, yehei. It ap homi mundoho at Yohanes en Allah wene hweag-esauk on demdoho welatsi boruk mu, helep fam nenowatlusa ahi!”

⁷Uswareg, “Sa ele fam belap-enepuk katsi nit nenepeleg,” ulug, hweag-utswa.

⁸Hweag-utswa ma, at Yesus en, “Ne, ai halug, an oho duruk kahi ale san hweag-nitsi mu duruk kahi ai, hweag-hesamin fug,” ulug, hweag-esasi.

⁹ Ai hweag-esasireg, wene su wal-heheg it ap homi humdoho hweag-esauk kwit, “Ap eke en anggur a yarik lasi. Yarik lasi mu, at eyabuk yahoma hwalduk kamag ulug, kwelaboho feselug, O yatma welatlug waruhuk, ulug, lasi.

¹⁰Lasireg, etma wereg lit, eyabuk yahoma kwelaboho on anyo fam anggur anggen yihig mun wirik atsi mu, akit mondorik wamag ulug, amingming angge eke enekit mondorik wahasi. Mondorik wahasi mu, wahasi men, it eyabuk kwelaboho on anyo en amingming angge anyo yeik ware fousareg, anggen yihig bal-om fug angge we monde fousa.

¹¹We monde fousa ma, obam lasi mu, amingming angge eke amu on mondorik wahasi mu, wahasi men, at oho yeik ware fousareg, anggen yihig bal-om fug angge, enggali waroho, we monde fousa.

¹²Monde fousa ma, obam lasi mu, amingming angge henahaneg on eke mondorik wahasi. Wahasi men, at anyo oho yeik waroho muko wilibi fousa.

¹³Ap mon-enebik waharuk on airoho neg duruk en, ap yabuk onggwareg on anyo en, An nangginmin? ulug, An namloho nenda hundig on anyo mondotuk halug, at anggilugdoho wauk mu esamin ane, ulug, mondorik wahasi.

¹⁴Mondorik wahasi men, it ap yabuk yahoma kwelaboho on anyo en at amloho anyo waharuk mu hausareg, it neg wene balduk kwit, Amloho abinggi angge at neg hwela no, nit hwelahuk en amloho su mundoho warukohon, ulug,

¹⁵nimi anyo wahasi mu, ebe yabuk yahoman dag fil muko wilibi folug, mun binggi watswa. Ai duswa anyo at yabuk onggwareg on en it ap ai nanggin-enebuhu behep?

¹⁶Eleg. Waruhureg, it ap yabuk kwelaboho on ai ware feselug, enobalma amu on hwalduk kamag ulug hweag-esahu,” ulug, hweag-esasi. Hweag-esasi on holswareg, “A! Ousa!”

¹⁷ Uswa famen, at Yesus en it fu esasireg, wene hweag-esauk kwit, “Ap eke en helep o wutuk on anyo en o wutuk kwit helep embeseswa on anyo, helep oboule doal-atsi, ulug, Allah wene lisu balfag ai, ke fahet balfag behep?

¹⁸It ap homi helep su fam ying-aik waharuk halug, enebe luluhun-lalahandoho wambuhup. Ne, helep su, it ap homi enobam daloroho ying-aik waharuk halug neg de, enebe mundoho al bereloho fesehu,” ulug, hweag-esasi.

¹⁹It ap Allah wene melaleg hwalduk on guru agama mel, it Allah il hanim duruk on imam enowesi mel en, “Wene foma wal-heheg eheik su, nit fahet eheik,” ulug, furoho hausareg, nukoho ai salim Yesus senetul ulug duswa famen, ap homi enakol en embeseswa.

²⁰Embeseswa famen, enautsi ling-long mon-enepuk kwit, “Yesus wene keroho uhu fam obam hekip halug, ebe seneko at ap homi fahat-enesug on gubernur anyo en awene bilinggukwag ulug feik lahuk en, hiren, Nit ap ebe on boukwag, bolug, henapenen henele fanoroho il lauk kwit, hinil wag lakiek,” ulug, mon-enepswa.

²¹Mon-enepswa anyo Yesus akit wahausareg, hein wauk kwit, “Guru ahwi! Hat wene uruk kahen inim, hweag-nesauk kahen inim, ai demdoho neg uruk kwit, ap eke along, ne, ap eke sebeleg, ai bouk fug angge nit duruk kahe fam Allah uruk wene demdoho hweag-nesauk kahen nenelukdeg ma,

²²ap kain on Kaisar obahet fohuk a, ousa a?” ulug, hein og-hausa.

²³Hein og-hausa ma, at Yesus en it at lalduk ale enegdeg ma esasireg,

²⁴“Uang owag eke unug-neakiek,” hweag-esasimu, unug-hausa ma, “Sa orohole ilitdeg unuk nim lisu baleg behep?” Ulug, hein og-esasi mu, iren, “Ai Kaisar abi!”

²⁵Ulug, hweag-utswa ma, at Yesus en, “Ai halug, Kaisar angge halug, Kaisar at og-ereheg, ne, Allah angge halug, Allah og-ereheg, duruk kamek,” ulug, hweag-esasi.

²⁶At wene hweag-esasi fam ap homi inil hanim wene eke hekipdoho obam fouk fug alereg en, Yehei u, ulug, enele eleg angge bok atswa.

²⁷ Ai en, fobik ap Saduki on ap homi eneluk atlug inamuhup eleg uruk on omano foma at Yesus akit wahausareg,

²⁸ at hein og-hauk kwit, “Guru ahwi! At Musa en, Ap eke hwe wahu famen, omaliki endag-enebuk fug angge waratuk halug, owe obalma omaliki endag-enebukwag ulug, aut en hwe anyo hwelowag, ulug, lisu balfag ma,

²⁹ap eke omaliki sabiren endag-enepsi. At wandeba on anyo hwe wasireg, omalik enderuk fug angge waratsi.

³⁰Waratsi mu, aut wandeba ombolim on anyo mel,

³¹ai en henahaneg on, ai en it enebe sabiren ondoho anyo mundoho airoho neg hwe anyo weheg, enomaliki endag-enebuk fug angge warail laheg, dil lausa.

³²Waratswa ma, fobik hwe anyo oho waratsi.

³³It ap enebe sabiren ai, hwe anyo weheg waraheg neg dil lausa ma, fobik ap homi waratlug, eneluk atlug inamuhup li em, hwe ai, sa ohwe aruhu behen?” ulug, hein og-hausa.

³⁴Hein og-hausa ma, at Yesus en, “It ap homi ketia wereg on en ap en homi og-enebeheg, homi en ap og-enebeheg, duruk famen,

³⁵At Allah en, It ap su fano deg ma, ninim welamag ulug, waratlug laukmu enoluk apdoho unduhuk fesehuk, boruk anyo neg de, Allah en unduhuk feserukmu inim wereg lit, ap en homi og-enebeheg, homi en ap og-enebeheg, duruk kamuhup fug.

³⁶Allah en it ap anyo waratlug lauk men, eneluk apdoho fesehu mu, Allah omaliki neg wereg lit, boholma yonggo noruk on malaikat anyo hag atuk angge re, fobik waram fug alereg.

³⁷ It ap homi waratlug lauk men, eneluk atlug inatuk anyo ai, at Musa en neg de e alok on fam indok nauk kweleg, uruk on holfag wene anyo bilinggoho lisu balduk kwit, At Tuhan ai, Abraham mel, Ishak mel, Yakub mel, Enakni Allah at, ulug, lisu balfag anyo fam, it ap homi waratfag anyo, Allah en demdoho enoluk apdoho unduhuk feseruk hehe.

³⁸At Allah en it ap homi mundoho eneluk wereg esauk mu, at ai, it ap homi waratlug eleg atuk on Enakni fug. Ite, it eneluk wereg on Enakni Allah,” ulug, hweag-esasi.

³⁹Hweag-esasimu, it ap Allah wene melaleg hwalduk on guru agama anyo wene ekenim hein og-ha ale enakol atsi mu, we, “Yu o, guru. Fano ehen abi,” ulug, uswa.

⁴⁰

⁴¹At ekenim hein og-ha ale enekol bousa famen, at Yesus en, “At Allah en eneko unduhuk fohu Mesias anyo, Daud omba, uruk ai, nanggoho uruk behep?

⁴² At Daud onggwareg en buku Mazmur lisu balduk kwit, At Nenakni Tuhan en, Nakni Tuhan hweag-utuk kwit,

⁴³It hinim seleiroho wereg on, heyog apma al bereloho feseik waruhuk en, nenggik bekit fil[27] dia huraik ma, hweag-itsi, ulug, lisu balfag ai,

⁴⁴at Daud onggwareg en, Nakni Tuhan, ebag anyo famen, Mesias nangginoho at Daud omba uruk behep? Hit en iek!” ulug, hweag-esasi.

⁴⁵Airoho hweag-esasireg, ap homi humdoho holduk kweleg, at ele wauk on anyo hweag-esauk kwit,

⁴⁶“It Allah wene melaleg hwalduk on guru agama anyo en, enesum bekit song wan-debelug laheg, di angge su angge hundutukmu etma, ap homi en nit neg dang-nenebukwag, beil laheg, it Yahudi somban uruk obam inim, soni esetukmu inim, ap leho on huratukmu huraheg, duhuk enenda boruk mu, lal-henebuk no, henenda kahaleg lamek.

⁴⁷It ap ai, homi sohwe on enengge mundoho weheg, ap homi en along boukwag ulug, somban yatdoho eheg, duruk mu, it ap amu on siag onggo dorangge enobam fesehu famen, it ap ai siag onggo alongdoho enobam fesehu,” ulug, hweag-esasi.