Read Ninia Yali LUKAS 21 Bible Online

LUKAS 21 - Ninia Yali bible

LUKAS 21

¹Ai hweag-esasireg, alukwe endenoho fu esauk kwit, ap enenggik wereg on en enangge Allah fahet foruk on belapukmu etma belapuk mu esasi.

²Belapuk mu, hwe sohwe on eke angge eleg famen, wahasireg, uang anggen biren belapuk mu hasi.

³Hasireg, hweag-esauk kwit, “It ap homi foruk su, enangge dindikdoho wereg kweleg, fehesa ma, dorangge fehesa. Ne, hwe sohwe on angge eleg on su neg de, asiburu onggo foruk on abirangge feheik ma, at humdoho feheik, ulug, hweag-hisihi,” ulug, hweag-esasi.

⁵Hweag-esasireg, it ap homi foma Allah obam wirig, helep fano on mel, di angge su angge fano on Allah fahet foruk on mel anyo fam, “Orohole mun fano debousa,” il lauk mu,

⁶at Yesus en, “Hit hinil hauk kahep ai, helep eke obam louk heheg wirig welaruhu fug. Mundoho meiyaloho hwik-esahup sali horog aik waruhu,” ulug, hweag-esasi.

⁷Hweag-esasi mu, it anyo en at hein og-hauk kwit, “Guru ahwi! Hat hweag-nesehen ai, nangginig li em duhu? Duhu sali horog aik waharuk halug, neneluk atuk on nunggwe ale duruk mu hahuk?” ulug, hein og-hausa.

⁸Hein og-hausa ma, at Yesus en, “Ap homi en laloho henobahauk no en, henenda kahaleg lamek. It ap homi humdoho an nunuk uruk kwit, Anyo an, ne, eke en, At waruhu salim mun horog aik waha, il wamuhup famen, enele hole folug inim la fug.

⁹Eleg. Dog abeheg, muko wilibi fesoukoho weim hulireheg, uruk on henesanggo holug, henenda firuk fug. Ai on duhu anyo, atam dil waruhu famen, o ahae fotogdoho duhu salim, mun horog aik waharuk kwit, duruk, ulug, bouk fug,” ulug, hweag-esasi.

¹⁰Hweag-esasireg, “Ap homi enunggul unuk domog dog abeheg, dima suma mun seberebelug, weim yabeheg,

¹¹o meik alongdoho lang-deheg, di o su o siburu obok lahakeg, ouk siag on enobam saha eheg, hit heneluk amag ulug boholman henoluk am on duk fug ale on nikale on deheg, duruk mu, hahup men,

¹²duruk eleg kweleg, ap homi en sene henobahalug henowareheg, it ap Yahudi somban uruk obam henobahaik laheg, sabu hetdoho kwelap-enepukmu, kwelap-henebeheg, ne, an nele wauhup fam it ap enunuk bogdeg inim, it ap humon inim, enekit henobahaik laheg, duhup.

¹³Airoho henepuk halug, duruk mu neauk katuhup anyo, Hweag-esauk ale iyale enam aha, ulug, hweag-esahup.

¹⁴ Hit henenda wereg famen, wene fano on it hinim minggirig on hwaloho hweag-esahup fam, it enele onggo hweag-heseheg, henele sahaleheg, duk fug alereg wene anyo hweag-hesahuk mu, Nalong baloho airoho hweag-esamin, ulug, wene henendama wenggeluk fug angge hesangge welamag ulug, dakiyug.

¹⁶Henisinga henakni mel, henowe henaut mel, henori hinim hundig welahep on mel, it oho en og-heneplug, ap wene biling-hesauk on weregma henobahaik laheg, hit foma henowareheg, duhup.

¹⁷Ne, an nele wauhup mu, ap homi en enerim neg henebuhup famen,

¹⁸heneruk misig heneg ai, longgo uhu fug mu,

¹⁹henenda hambukdoho we bok welamuhup fam henahap wendat-dahup,” ulug, hweag-esasi.

²⁰At Yesus en airoho hweag-esasireg, ekenim hweag-esauk kwit, “It ap enesehen wereg on humdoho o Yerusalem masereg lit, wereg ma, esahupdeg halug, o Yerusalem elehapdoho fohup anyo horog aik waha bohup.

²¹ Ai sali horog aik waharuk halug, Allah wene di duhu su duhu lisu baleg mundoho dip-ukwag ulug, ap homi siag duruk on onggo enobam fesoukwag ulug, ai li em deg ma, hit o Yudea wereg on halug, dukmu longgo eheg, o Yerusalem wereg on halug, o etman embeselug, longgo eheg, diyug. Ne, o sili dag fil wereg on halug, kuk fug.

²³Ai salim Allah en o kwenangma suma anggin-fanggin mun nik on debeseruk kwit, it ap homi su, olok debesehu mu, enomalik enehummu deg on mel, enomalik ag mon-enepuk on mel, enelaheg.

²⁴Foma karog yaron fam enowatuk mu waraheg, foma sabu hetdoho di o su o feseik laheg, duhup. Ne, at Allah en, It ap dagma on hwalduk kweleg, li airoho duruk kamuhup, bebag anyo owan dip-atuk eleg kweleg, o Yerusalem eneyog al bereldil lauk kamuhup,” ulug, hweag-esasi.

²⁵ Isireg, ekenim hweag-esauk kwit, “Heneluk amuhup ulug, mo mel, bigalem mel, sohwalanggen mel, ai amu nik on duruk mu hahup. Ne, kwenangma suma ik laut yenggeleg anyo ele furil waharuk mu, mun funag-lenggag angge dil waharuk mu, it ap homi enenggul unuk domog, Su nanggindil waharuk? Yehei!, ulug, enenda mun eleg amuhup.

²⁶It boholma enomamne wereg on enowag elek duruk mu, it ap mundoho en di ale su ale kwenangma aik waruhu anyo, Su re atil waha, hehe, ulug, it enekol en enepe eleg aheg duhup.

²⁷ Ai duruk kweleg, an Ap endag-atihik anyo nangge lik-louk debelug, nalong wereg lit, anggulog anggelegma waharuk mu neahup.

²⁸Ai on indip duruk halug, henahap wendatuk on enam aik waharuk mu, henunggul leko henelukwe lahabeg wereg nu,” ulug, hweag-esasi.

²⁹Hweag-esasireg, wene wal-heheg hweag-esauk kwit, “E mundoho, e ara nim duruk ale furebeiyek.

³⁰Alit sobalmin ulug duruk mu, hinil halug, Mo somban dikoho lit deheik, ulug, hweag-hesauk eleg kweleg, henoluk atlug, uruk kahep.

³¹Anyo hag, Airoho duhu, ulug, hweag-hisihi anyo duruk mu, hinil hahupdeg, at Allah apma henobahaku anyo horog aha, ulug, bohup.

³²Hit ketia welahep su, eleg am fug mu, duhu higit atuk mu hahup, ulug, demdoho hweag-hesauk kahi.

³³Bohol kwenang ai eleg aruhu famen, an nele ai eleg aruhu mun eleg,” ulug, hweag-esasi.

³⁴“Di angge su angge henehum sog-duk hag nil laheg, ahalue wenenebo duruk on nil laheg, nangge nanggoho hwelahuk ulug, wenggeldil laheg, dil lauk kwit, henenda mun eleg amuhup men, sapna eke fam bak al berelduk anyo hag, wene hweag-hisihi anyo hit ap homi kwenangma on misiham hit wongdeg man, henekit wam no, henenda kahaleg lamek.

³⁶Henomamne eleg am fug angge henenda hambukdoho wereg lit, su henebuhu anyo fano wauk kamuhupdeg, an Ap endag-atihik on nil hanim inamuhup en, somban uruk kwit, kahaleg lamek,” ulug, hweag-esasi.

³⁷ At Yesus en o nukoho Allah obam wirigmu wene hweag-eseheg, o hup anggo halug, wilip-atlug Duk Zaitun etma nohweik laheg, duruk katsi mu,

³⁸o hubetdoho, at ele holdul ulug, ap homi humdoho at akit Allah obam wirigmu kabog-dik lauk katswa.