Read Ninia Yali LUKAS 22 Bible Online

LUKAS 22 - Ninia Yali bible

LUKAS 22

¹ Roti fituk eleg on nauk salim, soni unuk Paskah esetuk li horog atsi mu,

²it Allah il hanim duruk on imam enowesi mel, it ap Allah wene melaleg hwalduk on guru agama mel en, ap homi enekol en, “Yesus nangginoho waruk?” ulug, wenggeldil lauk katswa.

³Wenggeldil lauk mu, at Iblis en it ap nesanggoen on eke unuk Yudas Iskariot endama kwisi.

⁴Kwisi mu, it Allah il hanim duruk on imam nim, it Allah obam wirig kahaleg latswa on enowesi nim, “Yesus warukwag ulug, nanggoho og-hesahuk?” ulug, inim wene balik lasi.

⁵Inim wene balik lasi mu, it enahayeg humon hauk kwit, “Onggo uang og-humuhuk,” ulug, hweag-utswa ma,

⁶at Yudas en, “Yu o,” isireg, warukwag ulug, ap homi elegma, o ke salim amumu atuk mu seneko og-esahuk hahuk? ulug, nangno-hauk katsi.

⁷Nangnoruruk mu, roti fituk eleg on esetuk kwit, atag domba waroho soni Paskah esetuk salim higit atsi mu,

⁸at Yesus en Petrus Yohanes nim, mon-enepuk kwit, “Domba waroho Paskah osoho nit naul en, fik-foukdoho feik lauk kamek.”

⁹Hweag-esasi mu, iren, “Nit kema fik-foukdoho feik lauk kamul?”

¹⁰Uswa ma, at Yesus en, “Hit o sili etma kwik laluhupdeg, ap eke ikwag dangge fam buhundeg on fam ik hwenanggulug lauk mu, hinim sal-kwal uluhup deg, at olma kwik lauk halug, hinim kwik lakiyug.

¹¹Hinim kulug, ap o onggwareg anyo hweag-utuk kwit, At Nenowe guru en, An nele wauk on nim domba waroho soni Paskah osoho naul mu, o ambe baleg eke wereg on ke? hweag-umug, hweag-neseheik ma, hweag-hutuk kahe, uluhup.

¹²Uluhup mu, ambolma ambe baleg eke hum on fik-foukdoho wereg hweag-hesauk halug, etma osoko foruk nu,” ulug, mon-enepsi.

¹³Mon-enepsi mu, Petrus Yohanes inim lausareg, hweag-esasi higitdoho hausareg, etma re domba waroho Paskah osoko fousa.

¹⁴Osoko fousa anyo nakoho horog atsi mu, Yesus en mon-enebuhuk ulug eneko fesesi anyo inim, huratswa.

¹⁵Huratswareg, “An nobam anggin-fanggin nobaharuk eleg kweleg, domba Paskah osoho su ninim nahuk, yehei, boruk katihik.

¹⁶Fobik, Allah apma feseruk mu, wereg lit, Indip su fahet nauk katuhuk hehe, ulug, enameg ma hahup sali higit aik lauk eleg kweleg, an nahuk fug mu, ketia ninim nahuk ulug, yehei, boruk katihik, ulug, demdoho hweag-hisihi,” ulug, hweag-esasi.

¹⁷Hweag-esasireg, ikwag enggikmu oko wasireg, Allah dang-disireg, “An ketia huli famen bekit fobik Allah apma henobahaku huli, anggur anggen ahalue su na fug angge welaruhuk mu, oko yohwan-dakiek, ulug, hweag-hisihi,” ulug, hweag-esasi.

¹⁸

¹⁹Hweag-esasireg, roti enggikmu oko wasireg, Allah dang-dulug, kuroho yohwan-enepuk kwit, “An nebe hit henobahet fouk deg anyo su. [Ai deg ma, an nobam ebet-napuk kwit, nauk kamuhup.”

²⁰ Ai en, fobik siburu mundoho nausa ma, ahalue hwenanggeg airoho neg yohwan-esauk kwit, “Allah hinim sebe-henebuhuk en, wene keron abug hweag-hesauk kahi anyo, hit demdoho bohup ulug, namep hililig de su,]” ulug, yohwan-esasi.

²¹ Yohwan-esasireg, “Yaho. Henesanggo holiek. Nowarukwag ulug at hweag-esa lamisi anyo ninim siburu nauk kwit, suma wereg.

²²An Ap endag-atihik anyo, nabuhup ulug Allah en wenggeleg ale higitdoho naplusa famen, at nowarukwag ulug ap homi hweag-esamisi anyo neg de, Allah en siahap duhu mu, elaheg e!”

²³Hweag-esasi mu, “San dimisi en eheik e?” ulug, it neg hein og-og atswa.

²⁴ Hein og-og atswareg, ai en, An along, hat along, uruk kwit, suahal uruk katswa.

²⁵ Suahal uruk katswa ma, at Yesus en it hweag-esauk kwit, “It ap homi dagma on enowesi enunuk bogdeg en enele omamne fam enomaliki melal-enebeheg, ne, it ap enomaliki fahat-enesug on anyo en, “Nenaknisi en hweag-nesowag,” beheg, duruk famen,

²⁶ hit neg de airoho uruk kamuhup fug. Ap humon henenggelegma wereg halug, at omalik doron hag amag. Ne, at wene melal-henepuk anyo henamingming angge hag amag.

²⁷ San ap humon wereg behep? At siburu nauk ai along a, at yohwan-enepuk on ai along ane? Eleg. At nauk on along anyo eleg? Airoho famen, an henenggelegma wereg lit, henamingming angge hag duruk kahi.

²⁸Anggin-fanggin nobam atsi men, hiren an fotog-neauhup fug. Munmu ninim waharuhup mu,

²⁹an Nakni en an ap homi fahat-enesug laruhu ulug, unduhuk nobahasi anyo hag,

³⁰ hit an napma feseruk mu wereg lit, ninim siburu nenggeg, ik nenggeg, ap homi wene melal-enepuk mu leho wereg lit, ap homi Israel enunggul unuk nesanggoen ayo wiroho en-enebeheg, duruk kamuhup ulug, unduhuk henobahaki,” ulug, hweag-esasi.

³¹Hweag-esasireg, “Simon, nare, ahwi. Hesanggo holin. Gandum ebe en-amag ulug, asinahap enetuk hag, at Iblis en hat airoho habukwag ulug Allah hweag-itsi mu, Yu o, isi famen,

³²hat henda nobam dip-debelug, demdoho boruk on anyo eleg am no, an hobahet somban ihi. Hambol sombandoho nombolim waharuk halug neg de, hautsi su enomamne debeseruk karuhun,” ulug, hweag-itsi.

³³Hweag-itsi mu, at Simon en, “Nowe, sabu hetdoho kwelap-habeheg, mundoho howareheg, duruk mu, an nambieg nenebuhup fano boruk kahi.”

³⁴Ulug, hweag-itsi mu, at Yesus en, “Petrus ahwi! Yoho suwe ayam yohombuk ele owan uruk eleg kweleg, henahanam, Yesus ai an napeleg, imihin,” ulug, hweag-itsi.

³⁵ Wene airoho hweag-itsireg, at Yesus en it abirangge hweag-esauk kwit, “An den heneuang hetdeg mel, og-hesauk on yohwatuk sum mel, heneyog sum hetdeg mel, eleg kweleg, mon-henepihik mu, hit henengge eke eleg halug, yehei, boruk katuhup a, eleg a?” Hweag-esasi mu, iren, “Misig eke, yehei, boruhuk fug.”

³⁶Uswa ma, at Yesus en, “Ketia neg de, hit eke heneuang hetdeg halug weheg, og-hesauk on yohwatuk sum wereg halug, weheg, hit eke karog yaron eleg halug, henesum dagma on fam hun-deheg duruk kamek.

³⁷ An duhuk ulug, lisu balfag anyo higit atmisi mu, Allah en, At ap siag on et seberoho wereg bolug wenag-enepswa, ulug, lisu balfag anyo, an dimin fam dip-imisi halug, hweag-hesauk kahi,” ulug, hweag-esasi.

³⁸Hweag-esasi mu, iren, “Karog yaron biren su re, Nenowe.” Uswa ma, at Yesus en, “Mundoho ehe,”[28] hweag-esasi.

³⁹Hweag-esalug, etman wilipsireg, Duk Zaitun fam laharuk katsi higitdoho ai salim lahasi. Lauk mu, at ele wauk on inim lausa.

⁴⁰At lamin besimu etano lasireg, it anyo hweag-esauk kwit, “Siag duruk on henendama kahalik wam no, somban neg uruk kamek.”

⁴¹Ulug, helep hwik-ha lauk hag, at il misig yatdoho lasireg, elenggen dimiroho hweriatlug, somban uruk katsi.

⁴²Somban uruk kwit, “Yehei, Nakni. An ai naplusa ikwag hwenanggeg hag su, hat wamin behen halug, wakin. Ne, eleg halug, an boruk kahi ale embeselug, hat boruk kahen ale anyo neg dimin.”

⁴³Hweag-itsi mu, yonggo boholma noruk on malaikat enam aik wahasireg, enda hambuk debeik wahasi.

⁴⁴Hambuk debesi mu, at enda hesilduk kwit, elahegdeg lit, somban uruk kweleg, lisag fuluk uruk kwit, amep anggen hililig hag, kwenangma dep-depdoho wambil lasi.

⁴⁵Somban ulug, inatsireg, at ele wauk on enekit waharuk men, enenda mun hesilduk en nohoruk mu esasi.

⁴⁶Nohoruk mu esasireg, “Hit nunggwe fahet nohoruk kahep? Siag duruk on henendama kahalik wam no, inatlug, somban neg uruk kamek,” ulug, hweag-esasi.

⁴⁷Owan hweag-esauk kweleg, ap nesanggoen on anyo eke unuk Yudas atam waharuk kweleg, ap esan inim waharuk mu, esasi. It waharuk kweleg, at Yudas atam mako bugdoho dang-dimin ulug, akit horogdoho wahasi.

⁴⁸Waharuk kweleg, at Yesus en, “Yudas yei! Hat mako bug-napmihin ai fam an Ap endag-atihik ap homi en nowarukwag ulug, og-esamin behen a?”

⁴⁹Ulug, hein og-hasi mu, it at inim welatswa on anyo en dukoho wahausa anyo enegdeg ma esausareg, “Nenowe. Karog yaron su fam enowaruk ane?”

⁵⁰uruk kweleg, it eke en ap imam agung anyo amingming angge esanggo bekit fil fiogdoho bo fesi.

⁵¹Fiog debesi mu, at Yesus en, “Embeseiyek,” isireg, nimi at esanggo oko fano debesi.

⁵²Fano debesireg, at Yesus en it at senerukoho wahausa anyo, imam enowesi mel, it Allah obam wirig kahaleg latswa on enowesi mel, anyo hweag-esauk kwit, “Ap yoholi angge wauk on sen-enebik lauk hag, an airoho sen-nabukoho karog yaron nim, enowatuk angge buhundeg nim, walug wahep?

⁵³ Hupmu hubet Allah obam wirigmu ninim wereg lit, sen-napuhup fug famen, at o mum hwalduk on hinim napluhup li ketia su deg ma, nabiek,” ulug, hweag-esasi.

⁵⁴Hweag-esasi mu, senetswareg, ap imam agung anyo obam feik lausa. Feik lauk kweleg, at Petrus anyo en ombolim ik-am heg-am lasi.

⁵⁵Imam agung obam feik lausareg, obam bumbukmu indok nonggwale folug hwerieg ma, Petrus enenggelegma inim huraik lasi.

⁵⁶Hweria aik lasireg wereg ma, hwele eke en indok ambogbag fam Petrus ebe inim hweriegma hasireg, il loureg lit, “Ap su mel inim wereg ma hauihik.”

⁵⁷Isi mu, at Petrus en awea hwelauk kwit, “Hweli! Ap ai an napeleg,” ulug, hweag-itsi.

⁵⁸Hweag-itsi mu, fobik ap amu on eke en Petrus hasireg, “Ao! Hat oho it on hiihi.” Hweag-itsi mu, at Petrus en, “Ao! An eleg abi!” hweag-itsi.

⁵⁹Hweag-itsi mu, fobik jam misig hag debelug, ap amu on eke en ele omamneroho hweag-esauk kwit, “Ap su Galilea on deg ma, at oho inim welatswa ma, demdoho hihi.”

⁶⁰Hweag-esasi famen, at Petrus en, “Ao! Hat ehen ai an mun napeleg abi!”

⁶¹Owan hweag-utuk kweleg, suwe ayam yohombuk ele isi. Ele isi mu, Tuhan alukwe endenoho Petrus fu hasi mu, Petrus anyo, Yesus en, “Yoho suwe ayam yohombuk ele owan uruk kweleg, henahanam, Yesus an napeleg, imihin,” ulug, hweag-itsi anyo ebetsireg,

⁶²dagma wilibik lalug, enda hesilduk kwit, oba yatsi.

⁶³It ap Yesus foroho latswa on anyo en Yesus orohole sum fam mapnu debelug, unda yako belabeheg, yeik fam wareheg duruk kwit, “San howareheik behen? In abi!”

⁶⁴

⁶⁵ulug, enele humdoho airoho uruk kwit, at siahap-biahapdoho enggali watuk katswa.

⁶⁶Ne, o sekan disi mu, it Yahudi enowesi inim, it ap imam enowesi mel, it Allah wene melaleg hwalduk on guru agama mel, kabog-duswa. Kabog-dulug, it wene balduk mu, Yesus enekit walug lausareg, at hweag-utuk kwit,

⁶⁷“Allah eneko unduhuk hobahasi Mesias hat halug, hweag-nesakin abi!” Hweag-utswa ma, at Yesus en, “An hweag-hesauk halug, demdoho boluhup fug mu,

⁶⁸an den hit hein og-hesauk halug, hiren onggo hweag-numluhup fug mu, nanggoho hweag-hesa?

⁶⁹Ketian neg de an Ap endag-atihik anyo Allah omamne humon wereg anyo enggik bekit fil[29] hwerieg ma neahup.”

⁷⁰Hweag-esasi mu, it mundoho en, “Ne, ai halug, hat Allah amloho ane?” Uswa ma, aren, “Ai hiren neg ehep.”

⁷¹Hweag-esasi mu, iren, “At onggwareg en eheik on nit mundoho holehe ma, nunggwe fahet it eke wene hweag-nesowag ulug, hein og-esaul?” uswa.