Read Ninia Yali LUKAS 23 Bible Online

LUKAS 23 - Ninia Yali bible

LUKAS 23

¹Uswareg, it ap kabogdeg anyo mundoho inatswareg, Yesus senetlug, Pilatus akit feik lausa.

²Feik lausareg, enele at obam foruk kwit, “Ap su, nit ap homi mundoho lal-nenepuk kwit, pemerintah fahet ap Kaisar og-om fug. Henowe unuk bogdeg raja Kristus an, il noruk mu hweaharuhuk.”

³Uswa ma, at Pilatus en, “Ap Yahudi enowe raja hat ane?” Hweag-itsi mu, at Yesus en, “Ehen ai.”

⁴Hweag-itsi mu, at Pilatus en it ap Allah il hanim duruk on imam enowesi mel, ap homi humdoho kabogdeg anyo mel, hweag-esauk kwit, “Ap su siag disi on eke an hihi fug.”

⁵Hweag-esasi famen, it enele omamne abiroho uruk kwit, “Eleg. Ap su, wene hweag-isil noruk kwit, ap homi o Yudea mundoho, Galilea en huli suma lal-enebil wahasi,” ulug, hweag-utswa.

⁶Hweag-utswa on at Pilatus holsireg, “At ap Galilea on ane?” ulug, ap homi hein og-esasireg,

⁷ap Herodes fahat-enesugmu etma on holsireg, ai salim at Herodes o Yerusalem wahasireg wereg ma, at akit monde fesi.

⁸Monde fesi mu, lauk mu, ap Herodes anyo Yesus duruk ale esanggo holsireg, “Nenoluk am on nenakol wereg on duruk mu, hele aho,” endaman boruk katsi mu, Yesus hasireg ahayeg hasi.

⁹Ahayeg hasireg, di wene su wene Yesus hein og-hasi men, Yesus en onggo hweag-om fug angge bok welatsi.

¹⁰Bok wereg kweleg, it Allah il hanim duruk on imam enowesi mel, it ap Allah wene melaleg hwalduk on guru agama mel, eta wereg lit, enele haperoho obam foruk katswa.

¹¹Ne, at Herodes autsi sehen foroho on mel, at Yesus busilik apdoho feheg, unda yako belabeheg, duruk kwit, sum fano on wande folug, ambol somban Pilatus obam monde feik wahasi.

¹²At Herodes Pilatus inim minggirig welatswa famen, ai salim seberusa.

¹³Yesus ambol somban monde feik wahasi mu, at Pilatus en it ap Allah il hanim duruk on imam enowesi mel, it Yahudi enowesi mel, it ap homi hesangge on mel, wol-enepsi mu, wahausa ma, hweag-esauk kwit,

¹⁴“Ap su, ap homi lal-enepuk, ulug, nakit feik wahep famen, henele obam fehep anyo hinil hanim bilinggihi men, siag disi eke mun hihi fug.

¹⁵Ne, Herodes anyo en ambol somban mondorik waha ma, at oho siag disi heheik fug neg. Siag duruk mu enowatuk on at mun disi fug, ulug, hweag-hesauk kahi.

¹⁶Aireg ma, enda wenggelukwag ulug, yeik neg waroho embesemin,” ulug, hweag-esasi.

¹⁷[Soni Paskah esetuk halug, ap sabu hetdeg on eke lol-esa ale atsi mu,]

¹⁸anyo hweag-esasi mu, it mundoho ambine enele bag uruk kwit, “Ap su fug. Ap Barabas lol-nesamihin,” uswa. (

¹⁹Ap Barabas ai, ap homi foma inim en, “Nenowesi enele holuhuk nenerim,” ulug, dog apuk kwit, ap eke watsi mu, hetdoho feserukmu welatsi mu, hweag-utswa.)

²⁰Uswa ma, at Pilatus en Yesus embesemin boruk kwit, ekenim it hweag-esasi men,

²¹enele bag uruk kwit, “E salib fam dopnoroho fein abi! E fam dopnoroho fein!”

²²Uswa ma, at Pilatus en henahanam hweag-esauk kwit, “At siag ke disi mu, ehep ahi! Siag duruk halug enowatuk on eke disi mu, an hihi fug mu, enda wenggelukwag ulug yeik neg waroho embesemin.”

²³Hweag-esasi men, e salib fam dopnoroho foukwag ulug, enele yererag-bererag uruk kwit, Pilatus ele sebele fousa.

²⁴Ele sebele fousa ma, at deboukwag ulug, hweag-utswa ale etano, at Pilatus en, “Fano,” isi.

²⁵Isi mu, at ap, Nowesi enele holuhuk nerim, isireg, ap watsi mu, hetdeg ma welatsi on anyo, lol-nesakin uswa on anyo, loloho wilibi fesi famen, at Yesus neg de, it bousa ale higitdoho dukwag ulug, og-esasi.

²⁶Og-esasi mu, walug lauk kwit, ap eke unuk Simon, obam Kirene on wongdoho dagman o sili etma kwik waharuk men, seneko e salib anyo Yesus ombolim walug lowag ulug um fam hare fousa.

²⁷It ap homi humdoho at ombolim lausa ma, it homi foman oba yareheg, enebe wat-deheg, dil lausa.

²⁸Dil lauk mu, at Yesus en alukwe endenoho fu esauk kwit, “Hit homi Yerusalem on su, an nobahet oba yag-nabuk fug. Ite, hit henonggwareg henomaliki hinim fahet oba yag-dakiek.

²⁹It ap homi en, Homi ibili on halug, enomaliki endag-dauk eleg on halug, enag omalik nauk eleg halug, enahayeg bohup, wene uhup salim waruhu, ulug, hweag-hesauk kahi.

³⁰ Ai salim, it ap homi en, Nenebe al berel-nenebik ma, ulug, dom humon hweag-ereheg, Ne, nenebe sale nenobahain, ulug, duk hweag-ereheg, duhup famen,

³¹ap homi en e olukdeg kweleg airoho uruk halug, bug atuk halug nanggoho uhup behep?” ulug, hweag-esasi.

³²Yesus senetlug lauk kwit, ap siag humon duruk on biren Yesus inim enowatul ulug, sen-eneplug lausa.

³³Sen-eneplug, o unuk Unggulowag etma lausareg, at Yesus e salib fam dopno-debousareg, it ap siag duruk on biren inim, e salib fam eke enggik bekit fil dopno-debeheg, eke enggik hware fil dopno-debeheg, debeseswa.

³⁴ Dopno-debeseswa ma, at Yesus en, “Nakni. It enepeleg lit napuk mu, hapeleg apdoho embeseiyug,” ulug, hweag-itsi. Ne, it ap homi anyo en asum “San hwelamisi haul,” ulug, helep anggen wal-halug, yohwan-dausa.[30]

³⁵ It ap homi anyo eta wereg lit, inil fureg kweleg, it ap Yahudi enowesi anyo en at siahap-biahapdoho foruk kwit, “At ap homi enahap wendat-enepsi mu, at Allah en eneko unduhuk febag on Mesias anyo demdoho halug, ahap wendat-dowag,” ulug, yig-utuk katswa.

³⁶ Ne, it ap sehen foroho on anyo mel, unda yako belapuk kwit, anggur ahalue asig on at og-irik wahausa.

³⁷Og-irik waharuk kwit, “Hat ap Yahudi enowe raja halug, honggwareg hahap wendat-dakin abi!” uruk katswa.

³⁸Ne, wene eke, “Yahudi enowe raja su,” ulug, lisu baloho e salib ambiangma dopno-debousa. Dopnore fousa ma, wereg lit, ap biren inim dopnoroho feseswa anyo eke en at Yesus siahap-biahapdoho bulip-duruk kwit, “Allah en eneko unduhuk hobahasi Mesias anyo hat fug? Hat halug, nit nenahap wendat-nenebeheg, hat hahap wendat-deheg, din!”

³⁹

⁴⁰Ulug, hweag-itsi famen, are anyo en bet-duruk kwit, “At obam foul behesa hag, hat hobam higitdoho fehesa ma, hat Allah hakol boruk kahen fug?

⁴¹Nit nenepuk su, duruhuk onggo higitdoho nenepuk mu, fano famen, at su neg de, siag mun disi fug.”

⁴²Hweag-itsireg, Yesus hweag-utuk kwit, “Yehei, Yesus, nowe. Hat raja wereg lit, waharuk halug, an ebet-neakiyug nu.”

⁴³Hweag-itsi mu, at Yesus en, “Ketia hat ninim waratlug lauk mu, o fanoma Firdaus etmano ninim wereg ma heamin, ulug, demdoho hweag-hirihi,” ulug, hweag-itsi.

⁴⁴ Wene ai uruk kweleg, o nukoho jam 12 hag welatsi famen, mo seleg mun eleg atsi mu, o etma mumdeg kweleg, hupmu jam 3 hag aik lasi mu, sum Allah obam wirigmu bul huliroho suknig anyo bulkwe dilipdoho wambisi.

⁴⁵

⁴⁶ Dilip-disi mu, at Yesus ele humon uruk kwit, “Nakni e! Naheime hat foroho laruhun en og-hirihi,” ulug, sat bok atuk kwit, waratsi.

⁴⁷At sehen foroho on enowe en duruk mu hasireg, at Allah unuk mot-duruk kwit, “Ap su wene obam wereg fug mu, demdoho hihi,” isi.

⁴⁸Ne, it ap homi duruk mu haul ulug, kabog-dik lausa anyo, duruk mu hausareg, enambol somban enobam waharuk kwit, enebe wat-dil wahausa.

⁴⁹ Ne, at Yesus ori mel, ap homi Galilea en at inim lausa anyo mel, balohoma etma unduhuk lit, deberuk ale inil hausa.

⁵⁰It ap Yahudi enobam unuk Arimatea on eke unuk Yusuf welatsi. Aren, Allah apma nobahaukwag, ulug, nangno-hauk kwit, obabut mun fano enda mun wenggeleg fam duruk on welatsi mu, it at ori wene bilingguruk on Mahkamah enap omano en, Yesus deberuk ale wene balduk kweleg, at inim welatsi famen, it bousa ale fano besi fug.

⁵¹

⁵²At Yusuf anyo Pilatus akit lasireg, “Yesus wareg ebe og-nimin,” ulug, heng-disi.

⁵³Heng-disi on, “Yu o,” isi mu, ebe wareg saroho belabik wahasireg, sum anggwe on kuron fam hulilipdoho helep owik sengdeg ap homi kwelap-enepuk elegma keram ai kwelapsi.

⁵⁴Sono somban salim hari Sabat, it Yahudi kel wat-dahuk ulug, fik-fouk duruk salim airoho disi.

⁵⁵Ne, it homi Yesus inim o Galilea en lausa anyo, Yusuf mutlug lausareg, owik inim, ne, Yesus ebe nangginoho owag wiroho foruk inim, inil hausa.

⁵⁶ Inil halug, enambol somban wahausareg, e anggen ahalue mel, ahalue ebene are deberuk on mel, fik-foukdoho fousa. Fousareg, at Allah en diroho diyug, airoho diyug, wene melalfag lisu baleg anyo higitdoho, kel wat-dauk salim hari Sabat anyo fam kel wat-dausa.