Read Ninia Yali LUKAS 24 Bible Online

LUKAS 24 - Ninia Yali bible

LUKAS 24

¹Hubet hari Minggu salim, o sekan duruk kweleg, it homi en ahalue foukdoho fousa anyo walug owikmu lausa.

²Lausareg, helep sok lareg anyo, domako elanma wereg ma hausareg,

³kwik lausa famen, Tuhan Yesus ebe wareg inil hweahausa fug.

⁴Ebe eleg en, “Su nanggoho aha abi?” boruk kweleg, ap biren enesum kuron ambogbag humon wandeg angge enekit inaik waharuk mu esausa.

⁵Esausareg, enekol en wambo uswa ma, it anyo en homi etano hweag-esauk kwit, “Hit nunggwelug at oluk wereg on it waratuk on inim wereg, ulug, heraruruk kahep?

⁶ Ebe suma eleg, at fahe oluk atlug, inaha. At Galilea wereg lit, An Ap endag-atihik anyo nowarukwag ulug, nebe it ap siag on og-esakohoreg ma, e salib fam dopnoroho nobaharuk halug, noho birenam noholug, henahaneg salim noluk atlug, inaruhuk, ulug, wene hweag-hesasi anyo eberiek.”

⁷

⁸Hweag-esausa ma, at isi ale anyo ebetswa.

⁹Ebetswareg, owikmen sombandoho wahausareg, hausa ale anyo it ap nanggoloben mel, enori amu on mel, mundoho bilinggoho hweag-esausa.

¹⁰It homi en ap Yesus en eneko mon-enepsi anyo bilinggoho hweag-esausa ai, hwe Maria obam Magdalena on mel, hwe Yohana mel, Yakobus isinga Maria mel, it homi amu on mel, en bilinggoho hweag-esausa.

¹¹Hweag-esausa famen, “Su we seiale il wahesa,” ulug, enele demdoho bousa fug.

¹²Enele demdoho bousa fug famen, at Petrus neg de inatlug, buroho owikmu etano lasireg, konuroho kwelap-hasi mu, sum kuron anyo neg horeg angge hasi. Hasireg, “Su nanggin aha,” ulug, enda wenggeldil obam wahasi.[31]

¹³Nukoho ai salim, at Yesus ele wauk on biren o Yerusalem en o Emaus yatma 11 kilometer hag deg ma lauk kwit,

¹⁴duruk mu, hausa ale anyo mundoho bilinggil lausa.

¹⁵Bilinggil lauk kwit, wene matil lauk mu, Yesus neg eneluluk lasireg, inim lausa.

¹⁶Inim lausa famen, at furoho nea nolug, inil mum debesesi.

¹⁷Debesesi famen, at Yesus en it hweag-esauk kwit, “Hit lauk kwit, wene ke il lauk kahep?” Hweag-esasi mu, enelahegdoho bok atswa.

¹⁸Bok atswa ma, it biren anyo eke unuk Kleopas en, “It ap bohon o Yerusalem wahausa on ketia duswa ale mundoho eneluk famen, hat neg hapelegdoho wahen a?”

¹⁹Hein og-esasi mu, at Yesus en, “Nanggoho duswa abi?” Hein og-esasi mu, iren, “Ap Yesus obam Nazaret on anyo. At Allah wene hweag-esauk on nabi wereg lit, wene hweag-esauk katsi nim, duruk katsi nim, ai at Allah mel, nit ap homi mel, mun along dil lauk mu, hauk katuhuk.

²⁰Ai famen, it ap Allah il hanim duruk on imam enowesi mel, nit Yahudi nenowesi mel en waruhuk melale folug, e salib fam dopnoroho foukwag ulug, og-esausa.

²¹Nit ap homi Israel wundetdoho nenobahaik waruhu anyo at boruhuk mu, yehei. Airoho famen, debousa ma, birenam noholug yoho henahaneg salim.

²²Ne, eke homi nit nenisingasi on en fahe youk wilip-nenebehesa.

²³It homi owikmu lahesareg, ebe wareg anyo eleg ma hehesa. Ebe eleg en wahesareg, hweag-nesauk kwit, Boholma yonggo noruk on malaikat en, Eleg, at oluk wereg, ulug, nena og-hauk hag hweag-nesauk mu, hehe, ulug, nit hweag-nesa wahesa.

²⁴Hweag-nesa wahesa ma, it foma ninim welahe on en owikmu ha lahesareg, homi hweag-nesehesa hagdoho hehesa famen, at ebe neg de eleg ma hehesa,” ulug, Yesus bilinggoho hweag-utswa.

²⁵Hweag-utswa ma, at Yesus en, “Hit henenda sohoureg lit, it ap nabi en wene hweag-esauk katfag ale folo-folo demdoho bouk fouk angge welahep, nunggwelug?

²⁶At Allah en eneko fesi Mesias anyo anggin-fanggin obam fohup ebag anyo, obam foruk eleg kweleg, leho fohu behep? Eleg. Obam fouk ale atsi mu, fousa,” ulug, hweag-esasireg,

²⁷Kristus waharuk halug, dik waruhu wene Musa en lisu balfag anyo huli en, it ap nabi en balfag anyo mundoho furoho biling-esasi.

²⁸Furoho biling-esauk kweleg, o sili laul bousama, etmano horog aik lausa. Lausareg, at bekit lamin ulug, duruk men,

²⁹alele wauk kwit, “Mo mun obuk ik laha ma, o hup aha angge re, ninim welamul,” ulug, alele wausa ma, inim welamag ulug, olma kwik lausa.

³⁰Kwik lalug, inim siburu nakoho, hweria atlug, siburu enggikmu wasireg, Allah dang-dulug, kuroho yohwan-enepsi.

³¹Yohwan-enepuk kweleg, inil fenggen atswareg, “Yehei! Anyo su hauk kahe!” bolug, furoho hausa man, inil hanim eleg atsi.

³²Eleg atsi mu, inim enele matuk kwit, “Ao. Waharuk kwit, at wene hweag-neseheg, Allah wene biling-neseheg, dil waharuk kweleg, nenenda ahanhan nenepuk mu hehe anyo eleg a?” uswa.

³³Uswareg, eta li inatlug, enambol somban o Yerusalem wahausareg, it ap nanggoloben inim, ap homi we on inim, kabogdeg lit, “Tuhan demdoho oluk atlug inahareg, ebe Simon ha waha,” ulug, bilingguruk kweleg, enekit wahausa.

³⁴

³⁵Enekit wahausareg, kwe lauk kwit duswa ale mel, siburu kuroho yohwan-enepuk kweleg, at ebe furoho hausa ale mel, bilinggoho hweag-esausa.

³⁶Biling-esauk mu, at Yesus neg enenggelegma inaik kuruk kwit, “Henenda hambuk debeiyek.”[32]

³⁷Hweag-esasi mu, youk humon lauk kwit, “Su mungguat ane?” ulug, enekol humon bousa.

³⁸Enekol humon bousa ma, Yesus en it hweag-esauk kwit, “Nunggwe fahet henenda firig lit, henenda biren ahepdeg, duruk kahep?

³⁹Hit an nealuhup en, nenggik neyog hakiek. An nino nowag neehep hag, it mungguat aireg fug mu, an sen-napuk kwit, an nebe beiyek.”

⁴⁰Hweag-esasireg, enggik eyog[33] unug-esasi.

⁴¹Unug-esasi mu, enahayeg en demdoho bouk fug angge wereg lit, “Su nanggoho abi?” ulug, owan boruk kweleg, it hweag-esauk kwit, “Siburu wereg a, eleg a?”

⁴²Hein og-esasi mu, ikan osoho angge eke welatsi mu, og-utswa ma,

⁴³oko inil hanim nasi.

⁴⁴Nasireg, hweag-esauk kwit, “Ninim wereg lit, an duhuk wene anyo ap Musa en Allah wene melaleg lisu balduk kwit, balfag inim, it ap nabi en lisu balfag inim, buku Mazmur fam lisu baleg anyo inim, mundoho dip-uhu ulug, hweag-hesauk katihik anyo su higit atsi.”

⁴⁵Hweag-esasireg, Allah wene lisu baleg enameg ma howag ulug enenda selehe fesesi.

⁴⁶Enenda selehe feseruk kwit, “At Allah en eneko unduhuk fesi anyo anggin-fanggin obam foruk halug, noho birenam noholug, henahaneg salim waratuk men, oluk aruhureg, inaruhu.

⁴⁷Ne, eke, Hit siag duruk katuhup anyo henenda wenggele folug, embeseruk halug, Allah en henesiag elehapdoho henobahaku, ulug, wene at unuk yiko, uruk kwit, atam o Yerusalem en di obam su obam mundoho hweag-isil wilibik lauk kamuhup, ulug, Allah wene lisu balfag anyo fam su napswa.

⁴⁸Napuk mu, neauhup su, fagdoho hweag-isil noruk kamuhup on hit deg ma, henesanggo holiek.

⁴⁹Nakni en og-hesahuk ulug, abug hweag-hesasi anyo, an den henobam belap-hesa waruhuk. Belap-hesa waruhuk mu, Allah omamne leiman lik-louk henobahaik waharuk eleg kweleg, o sili suma nangno-hauk kwit, wereg nu,” ulug, hweag-esasi.

⁵⁰Hweag-esasireg, Yerusalem en hondog-eneplug wilibik watlug, o Betania horogma wahasireg, enggik lahabe foruk kwit, Allah en fanoap enebukwag ulug, ahayeg enobam fesesi.

⁵¹Ahayeg enobam feseruk kweleg, walug boholma lahasi[34] mu, hausa.

⁵²Laharuk mu hausareg, enahayeg humon hauk kwit, Allah unuk mot-dil, enambol somban o Yerusalem lausa.

⁵³Lausareg, Allah obam wirigmu neg wereg lit, Allah unuk leho foruk katswa.