Read Ninia Yali LUKAS 3 Bible Online

LUKAS 3 - Ninia Yali bible

LUKAS 3

¹Ap kain on Kaisar Tiberius ap homi fahat-enesug lit, 15 tahun duruk kweleg, ap Pontius Pilatus o propinsi Yudea gubernur welaheg, ne, ap Herodes o Galilea hwaleheg, ap Herodes aut Filipus o Iturea mel, Trakhonitis mel, hwaleheg, ap Lisanias o Abilene hwaleheg, duruk katswa.

²Ai duruk kweleg, it Hanas Kayafas[3] inim imam agung wereg kweleg, ap Zakharia amloho Yohanes leimu ap homi wereg elegma wereg ma, Allah en wene eke at endama kwelabik wahasi.

³Kwelabik wahasi mu, Yohanes en, “Henesiag elehapdoho henobahaukwag ulug, siag duruk kahep anyo, henenda wenggele folug, embeseiyek. Ai duruk halug, ikma belap-henepmin,” ulug, wene ai Ik Yordan foma-foma hweag-isil noruk katsi.

⁴ Ap Allah wene hweag-esauk katfag on Nabi Yesaya en at Yohanes anyo fahet lisu balduk kwit, “Ap eke leimu ap homi elegma hwiruruk kwit, Tuhan waruhu kwe fik-foukdoho yareheg, ne, at lauk karuhu kwe bekitdoho yaho feheg, duruk kamek!

⁵Fanggongma halug, abit-aheg, dom inim duk inim feleroho doal-aheg, kwe kwasikdeg on bekit aheg, lahaik-wambuk deg halug, donggo aheg, atuk mu hahup.

⁶Allah en ap homi enahap wendatuk on mondorik waruhu anyo hit ap homi mundoho hinil hahup!” ulug, lisu balfag anyo higitdoho hweag-isil noruk katsi.

⁷ Hweag-isil lauk mu, it ap homi humdoho, “Ikma belap-nenebukwag,” ulug, at Yohanes akit kabog-dik lausa ma, aren it hweag-esauk kwit, “Kisu olok on enomaliki kabogdeg hag hit. Allah olok henobahaik waharuk anyo henebuk no, sa mel en husumbi hweag-hesasi?

⁸ Hit siag duruk kahep anyo, henenda wenggele folug, embesehep halug, demdoho embesehep ma hesahup en anggen fano yihil lauk anyo hag, duruk kamek. Hit henendaman, Nenomba re Abraham, ai neg boruk kam fug. At Allah en helep su oko Abraham ombasi buhundoho fesouk alereg ma, atlug, hweag-hesauk kahi.

⁹ E muko femin en, yaha e indipmu mun wepdoho fesi mu, di e su e anggen fano on yihig eleg halug, omanggen et muko indok naukmu yaluhu,” ulug, hweag-esasi.

¹⁰Hweag-esasi mu, ap homi humdoho en, “Airoho halug, nit nangginuk?” ulug, hein og-hausa.

¹¹Og-hausa ma, aren hweag-esauk kwit, “Hit henesum emberimmu wan-duruk kahep on biren wereg halug, at asum eleg on eke og-emek. Ne, henasiburu wereg halug, airoho diek,” hweag-esasi.

¹² Hweag-esasi mu, it pemerintah enobahet pajak kabog-duruk on omano, “Ikma belap-nenebukwag,” ulug, at akit kabog-dik wahausareg, hein og-hauk kwit, “Guru ahwi! Nit de nangginuk?”

¹³Hein og-hausa ma, at Yohanes en, “Uang airoho kabog-duruk kamek, ulug, hweag-hesauk on ai higitdoho duruk kwit, eke dopnoroho kabog-duk fug,” ulug, hweag-esasi.

¹⁴Hweag-esasi mu, it sehen foroho on tentara omano oho en hein og-hauk kwit, “Nit neg de nangginuk e?” hein og-hausa ma, at Yohanes en, “Ap homi enengge henomamne fam deloho weheg, seiale enobam dopno-esauk kwit hweleheg, duk fug. Ne, henowesi en onggo og-hesahuk bousa on, henendaman boruk kwit, Higitdoho neg og-nesehesa, ulug, wauk kamek,” ulug, hweag-esasi.

¹⁵Ai hweag-esasi ai, it ap homi humdoho en, “Nangginmisi?” ulug, nangno-hauk katswa anyo en, “Allah en eneko unduhuk fohuk ebag anyo, Yohanes su ane?” boruk mu, at Yohanes en it humdoho hweag-esauk kwit,

¹⁶“An den ikma belap-henepuk kahi famen, at eke waruhu ai en de, Allah Aheime nim, indok nim, henobam belabe henobahaik waruhu mu, at mun humon. Ne, an dotdeg ma, at eyog hetdeg on lolihi ha fug alereg.

¹⁷Gandum enetuk mu mundoho ene folug, ebe halug, eneko ambolma feheg, ne, asinahap halug, indok nahul-atuk elegma yaleheg, duhu en, enetuk angge e sengdeg at enggikmu foroho lit wereg,” ulug, hweag-esasi.

¹⁸Wene Fano Wene it ap homi mundoho hweag-esauk kwit, airoho wene foma humdoho komo-enepuk katsi.

¹⁹ Komo-enebil lauk kwit, ap unuk bogdeg gubernur o Galilea hwalduk katsi on Herodes en at aut ohwe Herodias bal-deheg, di siag su siag humdoho dil laheg, duruk en, at Yohanes en at inim bet-disi mu,

²⁰Herodes en Yohanes ebe o sabu hetdoho kwelap-enepukmu kwelapsi ai, siag humon disi ai.

²¹At Yohanes en ap homi mundoho ikma belap-enepuk katsireg, Yesus inim belapuk mu, Yesus somban owan uruk kweleg, bohol healsi.

²² Bohol healsireg, Allah Aheime suwe bel orohole hag da-da at Yesus obam wambik wahasi. Wambik wahasi mu, ele boholman uruk kwit, “Namloho nenda hundig de hat. Hat halug, nenda nahayeg humon napuk,” hweag-utuk mu hasi.

²³At Yesus duhuk ulug, wahasi anyo 30 tahun hag debelug, indip disi. It ap homi en Yesus ai Yusuf amloho bousa. Ne, Yusuf at akni Eli.

²⁴Eli akni Matat, Matat akni Lewi, Lewi akni Malkhi, Malkhi akni Yanai,

²⁵Yanai akni Yusuf, Yusuf akni Matica, Matica akni Amos, Amos akni Nahum, Nahum akni Hesli, Hesli akni Nagai.

²⁶Nagai akni Maat, Maat akni Matica, Matica akni Simei, Simei akni Yosekh, Yosekh akni Yoda.

²⁷Yoda akni Yohanan, Yohanan akni Resa, Resa akni Zerubabel, Zerubabel akni Sealtiel, Sealtiel akni Neri.

²⁸Neri akni Malkhi, Malkhi akni Adi, Adi akni Kosam, Kosam akni Elmadam, Elmadam akni Er.

²⁹Er akni Yesua, Yesua akni Eliezer, Eliezer akni Yorim, Yorim akni Matat, Matat akni Lewi.

³⁰Lewi akni Simeon, Simeon akni Yehuda, Yehuda akni Yusuf, Yusuf akni Yonam, Yonam akni Elyakim.

³¹Elyakim akni Melea, Melea akni Mina, Mina akni Matata, Matata akni Natan, Natan akni Daud.

³²Daud akni Isai, Isai akni Obed, Obed akni Boas, Boas akni Salmon, Salmon akni Nahason.

³³Nahason akni Aminadab, Aminadab akni Admin, Admin akni Arni, Arni akni Hezron, Hezron akni Peres, Peres akni Yehuda.

³⁴Yehuda akni Yakub, Yakub akni Ishak, Ishak akni Abraham, Abraham akni Terah, Terah akni Nahor.

³⁵Nahor akni Serug, Serug akni Rehu, Rehu akni Peleg, Peleg akni Eber, Eber akni Salmon.

³⁶Salmon akni Kenan, Kenan akni Arpakhsad, Arpakhsad akni Sem, Sem akni Nuh, Nuh akni Lamekh.

³⁷Lamekh akni Metusalah, Metusalah akni Henokh, Henokh akni Yared, Yared akni Mahalaleel, Mahalaleel akni Kenan.

³⁸Kenan akni Enos, Enos akni Set, Set akni Adam, Adam akni re Allah.