Read Ninia Yali LUKAS 5 Bible Online

LUKAS 5 - Ninia Yali bible

LUKAS 5

¹ Fobik, eke salim, at Yesus ik Galilea yenggeleg elanma lema fil unduhuk lit wereg ma, it ap homi Allah wene holdul ulug Yesus akit hembit-hembit kabog-dik lausa.

²Kabog-dik lauk kweleg, at Yesus it ap ikan wauk on en perahu biren ik inggimu embeselug, enesum ahe ikan wauk on anyo ik omatuk kweleg, perahu biren etano wereg ma hasi.

³Hasireg, perahu eke Simon en on anyo fam kwisireg, “Ik inggimen dorangge lohon hekipdoho fat-ha ma,” ulug, Simon hweag-itsi. Hweag-itsireg, perahu fam hwerieg lit, ap homi humdoho wene hweag-esauk katsi.

⁴Mundoho hweag-esauk katsireg, Simon hweag-utuk kwit, “Ik il yatma atlukum aik lauldeg, ikan waluhup en henesum ahe belabiek!”

⁵ Hweag-itsi mu, at Simon anyo en, “Nowe abi! O hupmu en ikan waul ulug fahenet angge belapuk kahe man, wa fug angge wereg kweleg, o sekan deheik famen, hweag-nerehen ma, sum anyo belabik lakohon,” ulug,

⁶ belabik lausareg, ikan mun alongdoho wausa ma, anggin en sum anyo dilip-duk ale disi.

⁷Sum dilip-duk ale disi mu, enori perahu eke anyo fam wereg on let-enebik wamag ulug, enenggik map-duswa. Map-duswa ma, wahausareg, ikan oko perahu birenet elesopdoho kwelapswa ma, perahu birenet ikma wendalik wambuk hag disi.

⁸Simon Petrus en perahu birenet ikma wendalik wambuk ale duruk mu hasireg, Yesus apma alukwe belabeg sahaun-disireg, “Nowe! An ap siag on deg ma, an nobahalug lag abi!” ulug, hweag-itsi.

⁹Hweag-itsi ale ai, ikan humdoho wausa anyo fam at ori nim enakol humon atsi mu airoho isi.

¹⁰At Petrus ori ap Zebedeus omaliki Yakobus Yohanes mel etano oho enakol boruk mu, Yesus en Simon hweag-utuk kwit, “Hakol bouk fug. Ikan wauk kahen hag, ketian ap homi og-enebil lauk karuhun,” ulug, hweag-itsi.

¹¹Hweag-itsi mu, perahu anyo ik inggimu eta lisoho feik wahausareg, munangge manangge nim embeselug, Yesus inim lausa.

¹²Ai en, fobik nukoho eke salim, at Yesus o ekema wereg ma, ap eke yebil aik baleg on[5] ahap koloreg ma eke welatsi fug. Ap anyo en Yesus il hasireg apma sebe ulug, ele abiroho hweag-utuk kwit, “Yehei Nowe. Haren fano hiling-napmin boruk kahen halug, hiling-nabehen halereg” ulug, hweag-itsi.

¹³Hweag-itsi mu, at Yesus enggik langdoho senetuk kwit, “Hiling-hapmin behi mu, fanoapdoho hobahaki,” owan hweag-utuk kweleg, yebil anyo eleg atsi.

¹⁴ Eleg atsi mu, at Yesus en, “Ap homi hweag-esa la fug,” ulug, hweag-itsireg, “At Allah il hanim duruk on imam anyo il heowag ulug akit lag. Hiling-habihi mu, haouk eleg atsi ulug, Allah fahet airoho fohup, at Musa en ebag anyo higitdoho, ap homi demdoho fano aha bolusa en, sali baloho feik lag,” ulug komoroho monde fesi.

¹⁵Komoroho monde fesi famen, at Yesus duruk katsi wene anyo ekenim saha uruk katsi mu, di ap homi su ap homi at ele holeheg, ouk on hiling-enebeheg, dukwag ulug, at akit kabog-dik waheg neg, duruk katswa.

¹⁶Airoho duruk katswa man, at Yesus ap homi elegma leimu amumu herag-aik lasireg, somban uruk katsi.

¹⁷Eke salim Yesus wene hweag-esauk mu, it ap Farisi on mel, it ap guru agama mel, enobam o Galilea en, o Yudea en, o kota Yerusalem en, wahausareg, we hesangge hwerieg lit, Yesus ele holduk katswa. Ap homi ouk fano hiling-enebukwag ulug, Tuhan omamne at Yesus fam deberuk kweleg, hiling-enepuk katsi.

¹⁸Etma wereg ma, ap eke enggik eyog dipni-dopnoreg ma ap en bearulug, Yesus akit feik kul ulug, duswa famen,

¹⁹ap homi hoporeg ma, kuk fug alereg en, bearulug, o dummu lahausareg, onggwa meiyaloho, bearangge aldoroho ap homi enenggelegma Yesus aluluk belabik wambuswa.

²⁰Belabe fousa ma, at Yesus en it ap enenda at obam dip-debelug demdoho boruk anyo enegdeg ma esasireg, ap ouk on anyo fam, “Ao. Hat hasiag elehapdoho hobahaki,” ulug, hweag-itsi.

²¹Hweag-itsi mu, it ap Allah wene melaleg hwalduk on guru agama mel, ap Farisi on mel, enendaman, “Ap Allah siahapdoho foruk su, sa behep? Nit siag duruk kahe ale at Allah en neg elehapdoho nenobahauk alereg anyo eleg a?” ulug, bousa.

²²Boruk ale, Yesus en enegdeg ma esasireg, hweag-esauk kwit, “Hit nunggwe fahet henenda airoho boruk kahep?

²³Hasiag elehapdoho hobahaki, hweag-utuk ale ai, along a? Inatlug, hobam lag, uruk ale ai, along a? Hweag-om alereg on ke? Hiren iek!”

²⁴Hweag-esasireg, “An Ap endag-atihikdeg, kwenangma suma wereg lit, ap homi enesiag elehapdoho feseruk on Allah en an at unduhuk nobahasi anyo, hit heneluk amluhup en, ikohon,” ulug, hweag-esasi. Airoho hweag-esasireg, at enggik eyog dipni-dopnoreg on anyo hweag-utuk kwit, “Inatlug, halit doaloho nohoruk kahen on hwelalug, hobam lag, ulug, hweag-hirihi,” ulug hweag-itsi.

²⁵Owan hweag-utuk kweleg, ap anyo, it mundoho inil hanim inatlug, alit doaloho yinggig latsi on anyo hwelalug obam lasi. Lauk kwit, Allah unuk mot-dil lasi.

²⁶Lauk kweleg, it hausa on anyo enenda eleg atuk kwit, Allah unuk mot-duruk kwit, “Ketia ninil hauk kahe fug on, nenakol wereg on duruk mu, hehe angge, yehei u!” ulug, yanderuswa.

²⁷Ai debelug, at Yesus dagma wilibik lasireg, ap pemerintah enobahet pajak andog-duruk on eke unuk Lewi pajak andog-durukmu hwerieg ma hasi. Hasireg, “Nombolim ma!”

²⁸ulug, hweag-itsi mu, di angge su angge embeselug, inatlug, Yesus ombolim lasi.

²⁹Ai en, ap Lewi anyo obam Yesus bobag humon esetsi. Esetsi mu, ap homi kabogdeg on humdoho ap pemerintah enobahet pajak andog-duruk on inim, ap homi hesangge on inim, osoho nakoho, Yesus Lewi inim ambieg hwerieg ma,

³⁰ it ap Farisi on mel, Allah wene melaleg hwalduk on guru agama mel en Yesus ele wauk on enerim enepuk kwit, “Hit nunggwelug it ap pemerintah enobahet duruk on mel, it ap siag duruk on mel, hinim siburu nauk kahep?” ulug, hein og-enepswa.

³¹Hein og-enepswa ma, at Yesus en it hweag-esauk kwit, “It ap ouk eleg halug ai, dokter ha laul uruk eleg. Oukdeg halug neg ha laul boruk.

³²An ap homi enenda wenggeleg on enayonggo femin ulug waharihik fug. Ite, siag duruk on en it siag duruk anyo enenda wenggele folug, embesoukwag ulug, eneyonggo waharihik,” ulug, hweag-esasi.

³³Hweag-esasi mu, it ap Farisi on anyo en Yesus hweag-utuk kwit, “It ap Yohanes ele wauk on ai, hundig-hundig siburu na fug angge enambilik hweang hag wereg lit, somban uruk. Ne, nit ap Farisi on nenele wauk on airoho duruk famen, hat hele wauk on neg de, siburu we hesangge nenggeg, ik hesangge nenggeg, duruk.”

³⁴Hweag-utswa ma, at Yesus en, “Ap ohwe hwelaroho owe aut inim soni esetuk kwit, Hit henambilik hweang welamek, ulug, owe aut hweag-esa ale fano behep?

³⁵Owe aut wereg kweleg, ahun neg walug lahu salim horog aik waharuk anyo fam neg de siburu na fug angge enambilik hweang hag bok welamuhup,” ulug, hweag-esasi.

³⁶Hweag-esasireg, wene foma wal-heheg hweag-esauk kwit, “Sum ket yihig on foma dilipdoho oko sum mining on fam dopnoroho seleben-dimin ulug, duruk halug, sum ket yihig on anyo siag aheg, ne, sum ket yihig on dilipdoho wauk on anyo sum mining on fam higit am fug angge aheg, duruk mu, sum ket yihig on dilipdoho oko, sum mining on anyo fam dopnoroho seleben-duruk eleg.

³⁷E anggur anggen ahalue keron ikwag wam ahap endam buhun-duswa on fam hwenangguruk halug, ahalue keron en ikwag endam on sogdoho wilipuk kwit, ahalue eleg aheg, ikwag anyo siag aheg, duruk mu, e anggur anggen ahalue keron ikwag wam ahap atam buhun-duswa on fam hwenangguruk eleg.

³⁸Anggur ahalue keron ai, ikwag wam ahap ket buhundeg fam hwenangguruk.

³⁹Ne, anggur ahalue endam on nalug, keron, Og-nimin, uruk fug. Endam on ai, Unduk fano, uruk,” ulug, hweag-esasi.