Read Ninia Yali LUKAS 6 Bible Online

LUKAS 6 - Ninia Yali bible

LUKAS 6

¹ Fobik, eke salim, it Yahudi somban uruk salim, at Yesus ele wauk on inim gandum yahoma kwe lauk kwit, at ele wauk on en gandum dahanlug asinahap enenggik fam buhundoho hwik-hauk kwit, nil lausa.

²Nil lauk mu, it Farisi on foman, “Somban uruk salim airoho duhup ousa wereg famen, hit nunggwe fahet dil lauk kahep?” ulug, hein og-enepswa.

³ Hein og-enepswa ma, at Yesus en it hweag-esauk kwit, “At Daud inim lebag on siburu obok enepfag ma,

⁴ Allah obam wirigmu kwebagdeg, siburu roti Allah fahet foruk on, ap hesangge na fug hag, ap Allah il hanim duruk on imam neg na fano famen, oko nebagdeg foma at inim lebag on og-esebag anyo, hit lisu baleg fam kumu hauk kahep fug a?” ulug, hein og-enepsi.

⁵Hein og-enepsireg, Yesus en uruk kwit, “Somban uruk salim duruk on de, an nonggwareg Ap endag-atihik de nebe an,” ulug, hweag-esasi.

⁶Ai en, fobik eke salim, it ap Yahudi somban uruk salim, Yesus it somban uruk obam kwisireg, wene hweag-esasi. Hweag-esauk mu, ap eke enggik bekit fil waratsi on eke welatsi.

⁷Yesus hweag-esauk kweleg, it ap Allah wene melaleg hwalduk on guru agama mel, ap Farisi on mel en, “Somban uruk salim at Yesus en ap hilingguruk mu haul ane?” ulug, eke duruk halug, enele at fam foul angge ulug, inil fik-furoho kumururuk katswa.

⁸Fik-furoho kumururuk katswa ma, it boruk ale Yesus enegdeg ma esasireg, ap enggik wareg on anyo hweag-utuk kwit, “Inatlug bul dia ma,” ulug, hweag-utuk kweleg, ap anyo bulmu inaik lasi.

⁹Lasi mu, ap Yesus en it hweag-esauk kwit, “Somban uruk salim fano hiling-enepuk ai, fano a? Siahap-enepuk ai, fano a? Ap homi enebe inili og-enepuk ai, fano a? Enowatuk ai, fano a? Hiren iek ahi!” ulug, at il kumu isil lauk katsireg, ap anyo hweag-utuk kwit,[6]

¹⁰“Henggik bil-hakin abi!” Hweag-itsi mu, bil-hasireg, enggik fano atsi.

¹¹Enggik fano atsi famen, it neg de, enolok duruk kwit, “Yesus nangginoho debehuk?” ulug, wene balswa.

¹²Eta li em Yesus somban imin ulug dukmu lahasi. Lahasireg, hup anggo Allah hweag-utuk men neg, o sekan disi.

¹³O sekan disi mu, at ele wauk on akit wamag ulug, wol-enepsi. Wol-enepsi mu, akit wahausa ma, enebe nesanggoen momaloho eneko feselug enunggul unuk, “Mon-enepuk on rasul” ulug, soal-enepsi.

¹⁴Eneko fesesi ai re, eke unuk Simon unuk eke Petrus soalswa on anyo inim, Simon aut Andreas inim, Yakobus Yohanes inim, Filipus Bartolomeus inim,

¹⁵Matius Tomas inim, Alfeus amloho Yakobus inim, Simon ap Yahudi duruk ale fahet enda ngetdoho dil noruk mu, Patriot uruk katswa anyo inim,

¹⁶Yakobus amloho Yudas mel, ne, Yudas Iskariot Yesus onggo balsi on anyo mel, momaloho eneko fesesi.

¹⁷At Yesus eneko fesesi on nim dukmen wambik wahausareg, donggoma etma bok atswa. Bok atswa ma, at ele wauk on humdoho inim, ap homi humdoho o Yudea en inim, o kota Yerusalem en inim, o Tirus Sidon inim di sili su sili ik laut fil wereg on en at Yesus ele holeheg, ouk on fano hiling-enebeheg, dukwag ulug, at akit kabog-dik wahausa.

¹⁸It ap homi mungguat enemelmel on enendama kweheg neg, duruk katswa anyo inim, fano hiling-enepsi.

¹⁹At omamne endama wereg anyo wilibik lauk kwit, ap homi fanoap enebil lauk mu, ap homi en Yesus senetul ulug, duswa.

²⁰Airoho duruk mu, at Yesus en at ele wauk on il fu-esasireg hweag-esauk kwit, “Hit ap henengge eleg su, Allah apma henobahaku angge re, henahayeg boruk kamek.

²¹Hit ketia obokdeg lahep su, homo-henobahaku angge re, henahayeg hauk kamek. Hit ketia oba yatuk kahep su, unda yaruk ale henebuhu angge re, henahayeg boruk kamek.

²² Ne, it ap homi su, enombasi en it ap nabi debeseruk katfag hag, an Ap endag-atihik anyo nele wauhup fam enerim heneplug, eneko henobaharuk kwit, enele fam siahap-biahapdoho bulipdoho henobahakeg, Ap su siag, ulug, henunuk embeseheg, duruk halug, henahayeg boruk nu. Henobahet boholma kabogdeg laruhu angge ai, henobaharuk li eta henahayeg en siruruk kamuhup.

²³

²⁴Ai famen de, hit henenggik humdoho wereg su neg de, ketia neg de henenda mun sereg welahep ma, henelaheg!

²⁵Hit ketia homo-henobaharuk ai, fobik obok henebuhu mu, henelaheg! Ne, hit ketia unda yatuk kahep ai, henenda hesilduk kwit oba yaruhup mu, henelaheg!

²⁶It ap homi su, enombasi en Allah wene fug, ite, seiale hweag-esauk kweleg, Fano uruk kahep, hweag-esauk katfag anyo hag, it ap mundoho en, Hit fano, ulug, henunuk leho henobaharuk halug de, henelaheg!” ulug, hweag-esasi.

²⁷Hweag-esasireg, ekenim hweag-esauk kwit, “Hit an nele holduk kahep su, hweag-hesa. It hinim minggirig lahep on hinim henenda hundig enebeheg, enerim henepuk anyo fanoe debeseheg,

²⁸enolok en hururung henepuk anyo henahayeg enobam feseheg, it siahap henobaharuk anyo enobahet somban eheg, duruk kamek.

²⁹Henelahaunde foma henowatuk halug, foma nim og-esakiyug. Henesum hol sum hwelauk halug, henesum henebe wan-duruk on inim og-esakiyug.

³⁰Heng-henepuk halug, og-esakiyug. Henengge we hwelauk halug, Og-nimin, uk fug.

³¹ Hit en, Ap homi en airoho neneplep e, boruk kahep anyo higitdoho debeseruk nu.

³²It ap enenda hundig henepuk anyo neg de, hit henenda hundig enepuk halug, ai fahet mot-henebuhup behep? It ap siag duruk ai, airoho duruk mu re.

³³It ap homi fano henepuk anyo neg de, fano debeseruk kahep halug, ai fahet mot-henebuhup behep? It ap siag duruk ai, airoho duruk mu re.

³⁴Fobik og-nesahup, boruk kwit, og-esauk kahep halug, ai fahet mot-henebuhup behep? It ap siag duruk anyo mel, Fobik higitdoho og-numuhup, ulug, enori og-esauk mu re.

³⁵Hiren airoho duhup fug. Ite, at Allah leho neg wereg on en it ap enenda kibureg lit, dang-duruk eleg on enda fano en enepuk mu, hiren it hinim minggirig on henenda hundig enepuk kwit, fano debeseheg, Fobik og-numuhup, bouk fug angge, hesangge og-eseheg, duruk halug, hit Allah omaliki wereg lit, henobahet wereg angge along on hwelauk kamuhup.

³⁶Henakni en ap homi enelaheg en fanoe feseruk hag, hit higitdoho enelaheg en fanoe feseruk nu,” ulug, hweag-esasi.

³⁷Hweag-esasireg, “Hiren ap homi fam, Hit siag, ulug, fetagdoho hweag-esa fug. Hit siag, ulug, fetagdoho hweag-esauk eleg halug, Allah en, Hit siag, ulug, hit hweag-hesahu fug neg. Hiren ap homi enenggali wat-enebuk fug. Enenggali wat-enepuk eleg halug, Allah en hit henenggali wat-henebuhu fug neg. Hiren it ap homi siahap-henepuk anyo henepeleg apdoho embeseruk kamek. Henepeleg apdoho embeseruk halug, Allah en hit henesiag apeleg apdoho henobahaku.

³⁸Hesangge og-esauk halug, Allah en hesangge og-hesauk mu hahup. Waruk ele sopdoho yonggware folug, min-mondoho sebeloho belabe folug, bulel-heg wamburuk kweleg, henapma dak-esauk hag, og-hesauk mu hahup. Ilirangge anyo fam ilit-halug ap homi og-esauk kahep anyo hag, Allah en hit fahet higitdoho wal-heheg og-hesauk mu hahup,” ulug, hweag-esasi.

³⁹ Hweag-esasireg, wene eke foma wal-heheg hweag-esauk kwit, “Ap il hupnig on en are il hupnig on enggik senetlug kwe fano la alereg behep? It birenet ikalogma bule wambuhup fug behep a?

⁴⁰ It wene hweag-esauk on sebeleg kweleg, wauk on leho welamuhup eleg. It wauk on anyo mun hwelahupdeg neg de, enowe hweag-esauk on hag it amuhup.

⁴¹E kong baleg hit hinilmu wereg anyo ha fug angge wereg lit, hit henere il mug-mug nunggwelug kumu hauk kahep?

⁴²Ne, e kong baleg hit hinilmu hauk eleg lit, henere fam, Hil mug-mug og-hea, ai nanggoho hweag-umluhup behep? Ap henonggwareg furebahat-dauk kahep fug on hit! E kong baleg hinilmu wereg anyo atam og-hahupdeg henere il mug-mug og-ha ale selegdeg ma hahup,” ulug, hweag-esasi.

⁴³“E fano on en anggen siag on yihiruk eleg. Ne, e siag on en anggen fano on yihiruk eleg at.

⁴⁴ Di e su e ebe anggen yihiruk fam eneluk atuk. Hit e banggi alok on fam e soluk hag ara anyo anggen dahanduk kahep fug. Ne, sabu sohon fam anggur anggen dahanduk eleg at.

⁴⁵ Enendaman bulel-heg wilipuk kwit enambilikmu uruk mu, ap ebe on endama yihig ebe on anyo fam fano uruk. Ne, ap siag on endama yihig siag on anyo fam siag on neg uruk,” ulug, hweag-esasi.

⁴⁶Hweag-esasireg, “Hit an den hweag-hesauk kahi ale duk fug angge wereg lit, Yehei Nowe! Yehei Nowe! ulug, nunggwelug hweag-nutuk kahep?

⁴⁷It ap homi an nakit watlug, an nele hole folug dil lauk ai, it anyo hag, hweag-hesa.

⁴⁸Ap o wutuk on anyo hag it. Ap eke o lun angge furoho oho folug, helep apma doaleg fam neg, o anduli hwerie fesi. Hwerie fesi mu, fobik ik fu waharuk kwit, o wirig meiyalmin ulug disi famen, omamne humon wirig mu, lang uk fug angge welatsi.

⁴⁹Ai lang uk fug angge welatsi famen, it ap an nele hole folug duruk eleg on neg de, ap eke on en anduli apma belabuk fug angge, kwenang emberimmu witsi mu, ik fu waharuk kwit, meiyalug lauk kwit, alongdoho lilibuk-lalabag dil lasi anyo hag de it,” ulug, hweag-esasi.