Read Ninia Yali LUKAS 7 Bible Online

LUKAS 7 - Ninia Yali bible

LUKAS 7

¹At Yesus ap homi inil hanim wene mun hweag-esasireg, o Kapernaum kwik wahasi.

²Kwik wahasireg wereg ma, it ap sehen hwalduk on enowe eke amingming angge enda hundig on ouk disireg, mun waram hag duruk katsi.

³Ap anyo Yesus dil lauk anyo esanggo holsireg, “An namingming angge hilinggik watmihin ik lakiek,” ulug, ap Yahudi enowesi Yesus akit yonggo mon-enepsi.

⁴Mon-enepsi mu, Yesus akit wahausareg, enele abiroho hweag-utuk kwit, “At ap ai, ap homi niron nenenda hundig nenebeheg, ne, at neg somban urukmu o wiri nenobahakeg, disi mu, amingming angge hilinggik lamihin ai fano,” ulug, hweag-utswa.

⁵

⁶Hweag-utswa ma, Yesus inim lausareg, ap anyo obam owan hop-debeik lauk kweleg, ap sehen hwalduk ahun anyo en ori yonggo Yesus akit mon-enebik wahasi. Mon-enebik wahasi on Yesus akit wahausareg, “Nenowe yei! Ap nenere sehen hwalduk ahun en, Eyog alemaroho wam no, an ap dotdeg ma, aren an nobam kwik wam siagdeg.

⁷Ne, at akit la ale mel, siag neg behi. Ele neg imisi halug ai, namingming angge fano atmisi.

⁸An mel nowesi enapma wereg lit, enele holeheg, ne, an nautsi sehen hwalduk on napma wereg lit, an nele holeheg, duruk famen, eke, Lag, uruk nealug ai, laheg neg duruk. Eke, Ma, uruk nealug ai, waheg, ne, namingming angge eke fam, Su din, hweag-utuk nealug, deheg neg, duruk, ulug, hweag-homag ulug, mon-nenebik waha ma, hweag-herehe,” ulug, hweag-utswa.

⁹Hweag-utswa ma, Yesus esanggo holsireg, “Yehei u!” ulug, yanderisi. Yanderisireg, ap homi ombolim lauk on anyo alukwe endenoho fu-esauk kwit, “It ap homi Israel on anyo mel ap enenda nobam dip-debelug demdoho boruk su hag on, eke ha fug angge welahi, ulug, hweag-hisihi.”

¹⁰Hweag-esasi mu, yonggo lausa on anyo enambol sombandoho enobam wahausareg, amingming angge oukdeg on anyo fano atsi mu hausa.

¹¹Ai en, fobik[7] Yesus o sili eke unuk Nain lauk mu, at ele wauk on inim, ap homi humdoho inim, lausa.

¹²O sili kwe sok kurukmu horog aik lauk kwit, hwe sohwe on eke, amloho ilahambi ondoho on waratsi mu, ebe bearulug ap homi humdoho o silimu etma wereg on, isinga inim waharuk mu esausa.

¹³Tuhan en hwe anyo hasireg, elaheg humon boruk kwit, “Oba yatuk eleg abi!”

¹⁴Hweag-itsireg, ap beareg ma horog aik lasireg, bearangge enggik en senetsi. Enggik senetsi mu, ap homi e bearulug lauk on bok atswa ma, at Yesus en, “Namloho! Inatmihin, ulug, hweag-hutuk kahi!”

¹⁵Hweag-itsi mu, ap waratsi anyo inatsireg ele isi. Ele isi mu, Yesus en nimi anyo isinga og-itsi.

¹⁶Og-itsi mu, it ap homi humdoho enakol hum atlug, Allah unuk mot-duruk kwit, “Ap Allah wene hweag-esauk on humon eke nenenggelegman inaha,” eheg, ne, eke, “At Allah en at omaliki ninili og-nenebik waha,” eheg, uswa.

¹⁷At Yesus disi wene anyo o Yudea maseroho mundoho saha isi.

¹⁸Wene il lauk anyo, at Yohanes ele wauk on en Yohanes hweag-utswa.

¹⁹Hweag-utswa ma, at Yohanes en at ele wauk on biren wol-enepsireg, wahausa ma, hweag-esauk kwit, “At waruhu anyo hat ane, amu on eke nangnoruruk kamuhuk a? ulug, at Yesus anyo hein og-ha lakiek,” ulug, Tuhan akit mon-enepsi.

²⁰Mon-enepsi anyo Yesus akit wahausareg, “At Yohanes Pembaptis en, Waruhu anyo hat ane, amu on eke nangnoruruk kamuhuk a? ulug, hein og-heowag ulug, yonggo mon-nenebik waha,” ulug, hweag-utswa.

²¹Ai salim at Yesus en it humdoho ouk on inim, yebil aik baleg on[8] inim, mungguat namelmel on enendama kuswa on inim, fano hiling-enebeheg, inil hupnig on fano fenggen enebeheg, duruk kweleg, Yohanes ele wauk on Yesus akit lausa.

²² Airoho duruk kweleg lausareg, wene anyo Yesus hein og-hausa ma, at Yesus en, “Duruk mu hinil hauk kahep inim, henesanggo holduk kahep inim ai, Yohanes hweag-irik lakiek. Inil hupnig on fenggen aheg, enelenggen siag on kwe fano laheg, yebil angge on fano aheg, enesanggo dahom on huse feseheg, waratswa on eneluk apdoho unduhuk feseheg, ne, ap enengge eleg on holukwag ulug Fano Wene hweag-eseheg, duruk kahi anyo hweag-irik lakiek.

²³Hit an duruk kahi fam henerim napuk kahep fug halug ai, henahayeg welamuhup,” ulug, hweag-esasi.

²⁴Hweag-esasi mu, it Yohanes en yonggo mon-enebik wahasi anyo enobam lauk kweleg, Yesus en Yohanes abug ap homi hweag-esauk kwit, “Hit nunggwangge on haul ulug, leimu ap homi elegma lauhup? Enggelangge hol en firuruk mu, mulilik la, mulilik wam, duruk mu, haul ulug lauhup a?

²⁵Nunggwangge on haul ulug lauhup? Ap eke sum orohole mun fano wandeg ma, haul ulug, lauhup a? Yaho! Sum fano wan-deheg, fano neg wereg laheg, duruk ai, ap unuk bogdeg enobam etano neg wereg.

²⁶Nunggwangge haul ulug lauhup? Ap Allah wene hweag-esauk on nabi eke haul ulug lauhup a? Yaho! At Allah wene hweag-esauk on famen, at mun leho neg, ulug, hweag-hesauk kahi.

²⁷ At Allah en, Hat lahun kwe yarukwag ulug, an den yonggo mondotuk mu neahun, ulug, hweag-netfag wene lisu balfag ai, at Yohanes fahet, ulug, hweag-netfag.

²⁸At Yohanes unuk leho on neg endag-atsi anyo hag, it homi enomaliki airoho eke endag-enepuk fug famen, Allah apma feserukmu, it sebeleg wereg anyo, Yohanes leho wereg anyo emberimmu welamuhup, ulug, hweag-hisihi.”

²⁹ Hweag-esasi anyo, it ap homi mundoho ap pemerintah enobahet pajak kabog-duruk on inim holswareg, at Yohanes en it ikma belap-enepsi mu, Allah en duruk ai mun fano neg, ulug, uswa.

³⁰Ai famen de, it ap Farisi on inim, it Allah wene melaleg hwalduk on guru agama inim anyo neg de, Yohanes en it ikma belap-enepsi fug mu, Allah en it duruk kamag ulug wenggeloho febag wene anyo embeseswa.

³¹At Yesus en, “It ap homi o ketia wereg su nunggwangge hag wal-haul behep? It ke hag duruk?

³²Omalik doron siburu yerumingga onggo hundutukmu hwerieg inim, wene onggo-onggo uruk kwit, Nit kelem yig-hesehe famen, hit onggo kelem yig-nesehep fug. Oba suni wilip-hesehe famen, hit oba yatuk kahep fug, uruk anyo hag hit hisihi.

³³Yohanes Pembaptis anyo wahasireg, siburu inim, e anggur anggen ahalue inim, na fug angge welatsi mu, hiren, Mungguat endama kwisi, uruk kahep.

³⁴Ne, an Ap endag-atihik anyo siburu inim, ahalue inim hesangge nil waharihik nealug, hiren, Yaho! Siburu inim anggur ahalue inim, al andung on sahaldil neg nil lauk kwit, it ap pemerintah enobahet pajak kabog-duruk on inim, ap siag duruk on mundoho inim ombalisi wat-enebil lauk su hakiek!

³⁵ulug, airoho hweag-nutuk kahep famen, Allah enda wereg en wenggeldil lauk ai, it furebelug duruk on mundoho duruk fam fano hauk kamuhup,” ulug, hweag-esasi.

³⁶Hweag-esasi mu, ap Farisi on eke unuk Simon, Yesus inim siburu nakoho, Ma, ulug, hweag-itsi. Hweag-itsi mu, Yesus en at Farisi on obam kwisireg, siburu namin ulug huratsi.

³⁷ Huratsireg wereg man, hwe o sili etma on siag dil noruk on eke, Yesus ap Farisi on obam wereg lit, siburu nauk uruk mu, esanggo holsireg, ahalue amben fano on helep ikwag buhundeg ma hwenanggeg walug wahasi.

³⁸Walug wahasireg, Yesus eyogma ambol fil huraik wahasireg, oba yatuk kwit, ilue depdoho wambisi fam Yesus eyog kulu isi mu, ai en, oruk fam ho-debesi. Ho-debesireg, eyogma ambilik dop-disireg, ahalue anyo eyog fam are debesi.

³⁹At Farisi on Yesus inim siburu naul ulug hweag-itsi anyo en hwe anyo duruk ale il hasireg, endaman, “Hwe su, siag duruk on deg ma, ap su anyo Allah wene hweag-esauk on nabi anyo demdoho welalep man, Hwe su siag dil noruk on en neg sen-napuk, hihi, ulug, ebe furebelug enegdeg ma helep,” besi.

⁴⁰Boruk kweleg, at Yesus en ap Farisi on anyo hweag-utuk kwit, “Simon ao! An wene eke hweag-hitmin behi mu, hweag-hirik.” Hweag-itsi mu, ap anyo en, “Hweag-nimin, Nowe.”

⁴¹Hweag-itsi mu, at Yesus en, “Ap biren en ap eke ombaleg angge baleg latswa. Eke uang 500, ne, eke 50 baleg latswa.

⁴²Inim ombaleg angge onggo og-om fug alereg ma, Onggoleg, mundoho og-hesauihik, ulug, embesesi. Embesesi mu, it ap biren su anyo san at onggoleg we og-itsi mu, enda hundig humon besi, behen?”

⁴³Hweag-itsi mu, Simon en, “Eleg. Ap onggoleg humon elaheg en embesesi anyo en enda hundig humon besi, behi,” hweag-itsi mu, Yesus en, “Higitdoho ehen.”

⁴⁴Hweag-itsireg, Yesus en hwe anyo alukwe endenoho fu hauk kwit, “Simon ahwi. Hwe su furebehen a, eleg ane? An den hobam kwik wahi mu, neyog horukwag ulug, haren ik og-nerehen fug. At neg de, ilue fam neyog kulu reheg, oruk fam ho-nabeheg, nabeheik.

⁴⁵Haren hambilik fam an dop-napuk kwit dang-nabehen fug famen, at neg de, an kwik wahi li en ketia hwili bok am fug angge neyog fam ambilik dop-napuk kwit wereg.

⁴⁶Haren ahalue nunggul fam hilili nobahaken fug famen, at neg de, ahalue amben fano on neyog fam are nobahakeik.

⁴⁷Ai famen, hwe su, siag alongdoho duruk katsi famen, enda hundig humon nabeheik ma, elaheg en asiag elehapdoho fehi. It enesiag dotdeg eleg apdoho feseruk ai, enenda we dotdeg hag hundig boruk.”

⁴⁸Hweag-itsireg, hwe anyo hweag-utuk kwit, “Hasiag elehapdoho hobahaki,” hweag-itsi.

⁴⁹Hweag-itsi anyo, it siburu naul ulug inim hwerieg latswa anyo enele matuk kwit, “It ap homi enesiag elehapdoho feseruk anyo su sa behep?”

⁵⁰Uruk kweleg, at Yesus en hwe anyo hweag-utuk kwit, “Hat henda nobam dip-debelug demdoho behen fam, hahap wendat-dehen ma, henda hambukdoho lag,” ulug, hweag-itsi.