Read Ninia Yali LUKAS 8 Bible Online

LUKAS 8 - Ninia Yali bible

LUKAS 8

¹Ai en, fobik at Yesus fano wene Allah apma feserukmu wene anyo o sili hummu inim, dotma inim, hweag-isil noruk katsi. Noruk kwit, at ele wauk on nesanggoen inim,

² it homi foma mungguat enendama kuswa halug, ouk enepsi on halug, at Yesus en hiling-enepsi ai, hwe Maria unuk eke Magdalena uruk katswa on anyo endaman mungguat sabiren wilibi fesesi anyo mel,

³hwe Yohana Herodes amingming angge unuk Khuza ohwe anyo mel, hwe Susana mel, ne, homi amu on humdoho enengge fam Yesus at ori inim enobahet duruk katswa anyo mel, Yesus inim lausa.

⁴It ap homi humdoho di obam su obam en at akit kabog-dik waharuk kweleg, at wene wal-heheg eke hweag-esauk kwit,

⁵“Ap a folduk on onggwareg en a folmin ulug lasi. Lasireg, foldil lauk kweleg, foma kwema wambil lasi. Kwema wambil lasi anyo, ap homi eneyog en sobitil lausa ma, suwe daroho waharuk kwit, nil wahausa.

⁶Foma helep falma emberimmu wambil lasi. Helep emberimmu wambil lasi anyo, fehelsi men, ik ahalue eleg en, bug atsi.

⁷Foma enggela alok on sahali kwe wambil lasi. Wambil lasi anyo enggela inim laharuk kwit, hel mako waratil lasi.

⁸Ne, foma kwenang singon hesilig on fam wambil lasi. Wambil lasireg, feheloho ful-fuldoho laharuk kwit, indip misig en anggen deng humdoho yihikeg, eke deng humdoho yihikeg, disi,” hweag-esasi. Wene ai hweag-esasireg, ele humon uruk kwit, “Yaho! Henesanggo wereg halug, furoho holduk kamek,” hweag-esasi.

⁹Wene airoho hweag-esasi mu, at ele wauk on anyo en Yesus hein wauk kwit, “Hat wene wal-heheg hweag-nesehen anyo indip ke fahet hweag-nesehen?” ulug, hein og-hausa.

¹⁰ Hein og-hausa ma, at Yesus en, “Allah apma fesehuk ulug, wene endama heraho welatfag wene anyo, hit de fureberuk kamuhup en ename henobahakuk besi famen, it foma neg de inil hauk kwit, furebouk fug angge welaheg, enesanggo holduk kwit, enendama furoho wa fug angge welaheg, duhup en, wene wal-heheg neg hweag-esauk kahi,” ulug, hweag-esasi.

¹¹Ai hweag-esasireg, “Wene foma wal-heheg hweag-hisihi anyo su. A foldil lasi ai re, Allah wene.

¹²Kwe fam wambil lasi ai re, ap homi Allah wene hole folug wauk anyo. Wauk halug, Iblis en watlug, wene enendama wausa anyo demdoho bousa fam enahap wendat-da no ulug, enendaman deloho walug lauk.

¹³Ne, helep falma emberimmu wambil lasi ai re, it ap homi Allah wene hole folug, enahayegdeg lit, Allah wene wauk anyo. Enahayeg wereg lit, wauk famen, it omanggen yaho eleg hag deg ma, il misiham demdoho boruk famen, fobik enenda abut balduk li em embeseruk anyo.

¹⁴Enggela alok on anggeleg kwe wambil lasi ai re, it ap homi wene enesanggo holduk famen, fobik de, Yehei, ulug, enenda firig welaheg, nenenggik wereg amuhuk ulug neg enenda ebetil laheg, kwenangma ahayeg hauk on neg enenda nil laheg, duruk kwit, wene anyo enendama sebele foruk anyo. Anggen ebe on yihuk fug angge wereg.

¹⁵Ne, kwenang singon fam wambil lasi ai re, it ap homi Allah wene hole folug, enenda fano fam bug-bagdoho senetlug, amurururoho neg duruk kwit, anggen yig-dauk anyo,” ulug, hweag-esasi.

¹⁶ Hweag-esasireg, “Lampu hundi folug, waruk fam sebele feheg, nohorukmu apma feheg, duruk eleg. Ite, hundi folug, it ap homi kuruk on en selegdeg ma howag ulug, ulog doho obalma hwerie foruk.

¹⁷ Di angge su angge herako wereg halug ai, enam aheg, ne, wene enendama sebeleg wereg halug ai, hummen fag aheg, duhu.

¹⁸ Airoho deg ma, wene nanggoho holduk kahep ai, henenda furebeiyek. It ap enengge wereg halug ai, ekenim dopnoroho og-eseheg, ne, enengge eleg halug ai, dorangge, Su an nangge, boruk kweleg, hweleheg, duruk mu, hahup,” ulug, hweag-esasi.

¹⁹Hweag-esauk mu, Yesus isinga autsi inim at akit wahausareg, ap homi humdoho kabogdeg ma, at akit horogdoho wam fug alereg latsi.

²⁰Deg latsi mu, ap homi en Yesus hweag-utuk kwit, “Hisinga hautsi heaul ulug wahesareg dagma wereg,” ulug, hweag-utswa.

²¹Hweag-utswa ma, aren, “Nisinga nautsi ai, it ap homi Allah wene hole folug duruk on su re,” ulug, hweag-esasi.

²²Fobik, nukoho eke salim Yesus at ele wauk on inim perahu fam kuswareg, hweag-esauk kwit, “Ik yenggeleg foma fil nindig-aik lakohon,” ulug, hweag-esasi mu, nindig-atswa.

²³Nindig-atuk kwit, at Yesus nohosi. Nohoruk kweleg, ik yenggelegma sielu humon firil waharuk kwit, perahu fam ik yenggelik kuruk kweleg, sebeldil wambuk hag disi.

²⁴Sebeldil wambuk hag disi mu, Yesus akit lausareg elelduk kwit, “Guru nakni! Guru nakni! Ik sebel-nenebikoho duruk,” ulug, hweag-utswa. Hweag-utswa ma, at oluk atlug, o sielu inim, ik funag-lenggag angge duruk inim, bet-disi mu, bok atlug, ik yenggeleg aplohok eleg hambuk atsi.

²⁵Hambuk atsi mu, Yesus en, “Nunggwelug henenda nobam dip-debelug demdoho bouk fug angge welahep?” ulug, hein og-enepsi. Hein og-enepsi mu, enekol en enele matuk kwit, “Yaho! O sielu inim, ik inim at ele holduk su sa behep? Yehei u!” ulug, yanderuswa.

²⁶Yanderuswareg, Galilea etlema fil o Gerasa[9] wilibik lausa.

²⁷Wilibik lausareg, at Yesus perahu famen ik inggimu wilibik lasi mu, ap eke o sili etma on mungguat endama kuswa anyo o endam en angge, olma welam fug angge sum wan-da fug angge, owikmu ap homi waratuk halug feserukmu etano wereg latsi on wahasireg, Yesus inim ambi atsi.

²⁸Ambi atuk kwit, aren Yesus il hasireg, apma ying-aik wahasireg, ele humon uruk kwit, “Yesus ao! Hat Allah mun leho wereg on amloho su, an nanggin-napmin ulug, wahen? An nowaruk fug, ulug, hweag-hirihi,” ulug, hweag-itsi.

²⁹Ai hweag-itsi ai, at Yesus en mungguat namelmel on ap endaman wilibik lowag ulug hweag-utuk mu, ap ai en Yesus hweag-itsi. O endam en angge mungguat en ap anyo senerik waheg neg duruk kwit, enggik eyog bosie sabu fam het-debelug foroho laheg, duruk katswa famen, sabu dekik-dakakdoho embeselug, mungguat en ap anyo leimu ap homi elegma muko feik lauk katsi.

³⁰Mungguat anyo en Yesus hweag-itsi mu, at Yesus en, “Hat hunuk sa?” ulug, hein og-hasi mu, mungguat enebe humdoho ap anyo endama kuswa ma, “An nunuk Legiun,” ulug,

³¹“Ap su endaman wilibik lalug ap siag on bohwe elma[10] belapukmu etano mon-nenebuk fug,” ulug, enele abiroho Yesus hweag-utswa.

³²Duk aldukmu etma wam humdoho misigmu enambiang wil noruk mu, it mungguat en, “Wam enendama kwik laul en, mon-nenebin,” ulug, enele abiroho hweag-utswa ma, Yesus en, “Yuo. Lakiek!” ulug, hweag-esasi.

³³Hweag-esasi mu, mungguat anyo ap endaman wilibil lauk kwit, wam enendama kwik lausa ma, wam humdoho alduk kwe bulema bururum dil ik yenggelegma kwik lausa ma, ikma obuk uruk kwit, waratswa.

³⁴It wam hwalduk katswa on en, wam ikma obuk uruk kwit, waratuk mu, hausareg, buroho longgo uswa. Longgo uruk kwit, wam ikma obuk uswa wene anyo o sili hummu etma hweag-eseheg, o elankwe elankwe hweag-eseheg, dil lausa.

³⁵Dil lausa ma, disi ale, it ap homi ha laul ulug, enobam en wiliplug Yesus akit wahausareg, ap mungguat endaman wilibil lausa anyo enda wereg atsireg, asum wan-debelug, Yesus apma hwerieg ma ha wahausa. Ha wahausareg, enekol bousa.

³⁶Enekol bousa ma, it ap homi mungguat ap endama kuswa on Yesus fano debesi mu hausa on en it wahausa on anyo hweag-esausa. Hweag-esausa ma, it ap homi o Gerasa di obam su obam etma mundoho enekol humon enepsi mu, Yesus enobamen wilibik lowag ulug hweag-utswa. Hweag-utswa ma, at Yesus perahu fam kulug, ambol somban wahasi.

³⁷

³⁸Waharuk mu, at ap mungguat endaman wilibil lausa anyo en, “Ninim lakohon,” ulug, ele abiroho Yesus hweag-itsi famen, Yesus en monde foruk kwit,

³⁹“Hambol somban hobam lamihindeg, Allah en habeheik ale bilinggoho hweag-esa lag,” ulug, hweag-itsi. Hweag-itsi mu, lasireg, at obam etma mundoho, “Yesus en airoho hiling-nabeheik,” ulug, hweag-isil lasi.

⁴⁰It ap homi humdoho neg Yesus waruhu en, nangno-hauk mu, ambol somban wahasi mu, dangdoho wausa.

⁴¹Dangdoho wausa ma, it Yahudi somban uruk obam hwalduk on enowe ap eke unuk Yairus, at ahaloho ilahambi hwele duhum on ondoho kweleg tahun nesanggoen disi anyo, mun waraikoho duruk en, Yesus akit wahasireg, apma sebe ulug, “An nobam ninim laul,” ulug, ele abiroho Yesus hweag-itsi. Hweag-itsi mu, Yesus lauk kweleg, it ap homi humdoho inim hwililip-dulug lausa.

⁴²

⁴³Lauk mu, hwe eke amep lauk kweleg, tahun nesanggo en disi mu, fano amag ulug, angge mundoho[11] dokter og-esauk katsi famen, fano am fug angge welatsi.

⁴⁴Hwe anyo Yesus ambolma wahasireg, asum atog enggik sen-hauk kweleg, amep anyo eleg atsi.

⁴⁵Eleg atsi mu, at Yesus en, “San sen-neeheik?” ulug, hein og-esasi. Hein og-esasi mu, it humdoho deg ma ilik-eleg uruk kweleg, Petrus en, “Nowe. It ap homi humdoho su hwililip-haplug waharuk mu, hoporoho hobahakesa hihi.”

⁴⁶Isi mu, at Yesus en, “Eleg. An nomamne eke wilipuk mu, furebehi angge re, at eke en sen-neeheik an noluk.”

⁴⁷Isi mu, hwe anyo, “Enegdeg ma neeheik hihi,” besireg, akol en owag elek duruk kwit, Yesus apma sebe ulug, ap homi humdoho inil hanim, indip ke fam Yesus asum sen-hasi inim, ne, owan sen-hauk kweleg, ebe fano atsi anyo inim, bilinggoho hweag-itsi.

⁴⁸Hweag-itsi mu, at Yesus en, “Nahaloho. Hat henda an nobam dip-debelug demdoho behen fam fano ahen ma, henda hambukdoho lag,” ulug, hweag-itsi.

⁴⁹Owan hweag-utuk kweleg, ap eke it Yahudi somban uruk obam hwalduk on enowe obam en wahasireg, ap Yairus hweag-utuk kwit, “Hahaloho fahe waraha ma, nenowe guru anyo kwe eyog alemaroho hondoholug la fug.”

⁵⁰Hweag-itsi on at Yesus esanggo hole folug, Yairus hweag-utuk kwit, “Hakol bouk fug. Henda nobam dip-debelug demdoho boruk halug, hahaloho fano atmisi,” ulug, ap anyo obam lausa.

⁵¹Lausareg, it ap homi mundoho fam, “Hit ninim kwik laul fug,” ulug, hweag-esasireg, Petrus mel, Yohanes mel, Yakobus mel, hwele akni isinga mel, anyo neg hondog-eneplug, obam kwik lasi.

⁵²Kwik lasireg, ap homi humdoho oba yareheg, enebe wat-deheg, duruk mu esasireg, “Oba yaruk fug. Hwele su waraha fug. Ite, we nohoruk angge re, oba yaruk fug.”

⁵³Hweag-esasi mu, hwele mundoho waratsi enelukdeg ma, at unda yako belapswa.

⁵⁴Unda yatuk kweleg, at Yesus de hwele enggik senetuk kwit, “Hwele su, inamin!”

⁵⁵Hweag-itsi mu, hwele enda kwik wahasireg, inatsi. Inatsi mu, Yesus en, “Hwele su siburu nowag ulug, og-emek,”

⁵⁶hweag-esasi mu, hwele akni isingan, “Yehei u!” ulug, yanderuswa famen, Yesus en, “Duruk mu neehep anyo ap homi hweag-esa la fug,” ulug, komo-enepsi.