Read Ninia Yali LUKAS 9 Bible Online

LUKAS 9 - Ninia Yali bible

LUKAS 9

¹Fobik de, at Yesus en ap nesanggoen anyo kabog-dik wamag ulug wol-enepsireg, wahausa ma, at omamne fam di mungguat su mungguat mundoho ap homi enendaman lisoho wilibi feseheg, di ouk su ouk deg halug, hiling-enebeheg, dil lowag ulug, awene hilil-esasi.

²Awene hilil-esasireg, Allah apma fesehu wene hweag-isil laheg, ap homi hiling-enebil laheg, dil lauk kamag ulug, mon-enepsi.

³ Mon-enepuk kwit, “Hit lauk kwit, di angge su angge walug la fug. Henendomuk inim, og-hesauk halug yohwatuk asum inim, henesiburu inim, heneuang inim, henesum wan-dauk on biren inim ai, walug la fug.

⁴Hit o ekema lahup mu og-henepuk halug, hinim etma neg de welamuhupdeg, o amumu lahup halug, wilibuhup.

⁵ Di obam su obam lauk mu, dangdoho og-henepuk eleg halug, enobam en wilibik lauk kwit, mundoho o fotog-hesehe, ulug, heneyogma ololo angge horoho embeselug, amumu lakiyug,” ulug, hweag-esasi.

⁶Hweag-esasireg, mon-enepsi mu, lausareg, di sili su sili Fano Wene hweag-isil laheg, ap homi fano hiling-enebil laheg, dil lauk katswa.

⁷ Ai dil lauk anyo inil hausareg, it ap homi foman, “At Yohanes waratuk men, oluk atlug, inatsi,” eheg, ne, it foman, “At ap Elia enam atsi,” eheg, ne, eke foman, “Ap endam Allah wene hweag-esauk katfag on nabi omano eke oluk atlug, inatsi,” eheg, uruk mu, ap unuk bogdeg Herodes anyo esanggo holsireg, enda firig welatsi.

⁸

⁹Enda firig lit, “An den neg Yohanes anggolop kong-dirihik famen, dil lauk ale holduk kahi ai, san duruk ahi?” ulug, Yesus kumu hahuk ulug, duruk katsi.

¹⁰It ap mon-enepsi on anyo enambol somban wahausareg, dil noruk katswa ale anyo Yesus bilinggoho hweag-utswa. Hweag-utswa ma, at Yesus en enemu hondog-eneplug, o Betsaida aik lasi.

¹¹Aik lasi men, ap homi humdoho Yesus etma lasi enesanggo holswareg, mutlug lausa. Mutlug lausa ma, Yesus en dang-enepsireg, Allah apma fesehu wene anyo hweag-eseheg, enebe oukdeg halug, hiling-enebeheg, disi.

¹²Duruk kweleg, mo obuk ikoho ma, it ap nesanggoen anyo at akit wahausareg, “O leimu suma ap homi enobam mundoho eleg ma, it ap homi humdoho kabog-dik wahesa su, o sili wirig humon inim, o elan-elan inim, enesiburu onggo baloho nauk kwit nohoukwag ulug, monde fesein,” ulug, hweag-utswa.

¹³Hweag-utswa ma, at Yesus en, “Hiren enesiburu nauk on og-esakiek.” Hweag-esasi mu, iren, “Nit roti foaben, ikan biren neg wereg famen, ap homi humdoho su, enesiburu hun-enebik lowag ulug, uruk ane?”

¹⁴(Uswa ai, ap homi enebe 5.000 wereg en atlug uswa.) Uswa ma, at Yesus en at ele wauk on anyo hweag-esauk kwit, “It ap esan deng biren hag neg lohwal-heg hweria amlusa en, hweag-esakiek.”

¹⁵Hweag-esasi mu, airoho neg hwerie feseswa.

¹⁶Hwerie feseswa ma, at Yesus en roti foaben inim, ikan biren inim walug, alukwe boholma lahap-atsireg, Allah dang-debesireg, kutsi. Kuroho at ele wauk on en ap homi kabogdeg anyo yohwan-enebukwag ulug, og-esasi.

¹⁷Og-esasi mu, yohwan-enepswa ma, it mundoho nausareg, homo-debesesi. Homo-debesesi mu, dindik atsi on anyo waruk si yihig nesanggoen ele sopdoho yohwaroho fousa.

¹⁸Ai en, fobik nukoho eke salim, at Yesus amu somban uruk mu, at ele wauk on anyo akit wahausa ma, Yesus en it hein og-enepuk kwit, “It ap homi mundoho en an sa bolug, uruk?”

¹⁹ Ulug, hein og-enepsi mu, iren, “Ap foman Yohanes Pembaptis anyo eheg, foman, Elia eheg, ne, foman, ap omano eke oluk atlug, inatsi eheg, uruk.”

²⁰ Hweag-utswa ma, aren, “Hit en de? An sa bolug, uruk kahep?” Hweag-esasi mu, at Petrus en, “At Allah en eneko unduhuk hobahasi Mesias anyo hat!”

²¹Ulug, hweag-itsi mu, at Yesus en, “An nobahet eheik ai, walug ap homi hweag-isil la fug,” ulug, komo-enepsi.

²²Komo-enepsireg, hweag-esauk kwit, “An Ap endag-atihik anyo mun nobam anggin-fanggindoho nobahakup. It ap Yahudi enowesi inim, it Allah il hanim duruk on imam enowesi inim, it Allah wene melaleg hwalduk on guru agama inim en an nobahakupdeg, binggi nowaruhup mu, hup biren noholug, Allah en noluk apdoho unduhuk nobahaku.”

²³ Hweag-esasireg, it humdoho hweag-esauk kwit, “An ninim noruk kamuhuk boruk kahep halug, hit di angge su angge duhuk boruk kahep anyo henendama sebeloho embeselug, hupmu hubet henahan salib anyo harulug, an nombolim waharuk kamuhup.

²⁴ Nenebe ninili og-dahuk, boruk kahep halug, henebe eleg amuhup. Ne, an nunuk hum amag ulug, nenebe hundig wundetdoho fahat-dauk kamuhuk fug, boruk kahep halug, henebe henahap wendareg welamuhup.

²⁵Hit di o su o mundoho hwalduk kamuhupdeg henebe eleg amuhup halug, ai fam nanggin-dahuk ulug, il noruk kamuhup behep?

²⁶Hit an nebe inim, an nawene inim, anyo fam ap homi henenggali en an nili og-nabuk fug angge welamuhup halug, fobik an nim, Nakni nim, it boholma yonggo noruk on, Allah fahet eneg wereg anyo ninim, nenengge lik-louk debelug, wamuhukdeg, an Ap endag-atihik su, hit ap homi henenggali en hinili og-henebuhuk fug.

²⁷Hit foma suma welahep on Allah apma fesehu mu hinil ha fug angge waramuhup fug, ulug, demdoho hweag-hisihi,” ulug, hweag-esasi.

²⁸ Wene ai hweag-esasireg, hup liginen noholug, Yesus en Petrus mel, Yohanes mel, Yakobus mel, hondog-eneplug, somban ikoho lit dukmu lahasi.

²⁹Lahausareg, Yesus somban uruk mu, at orohole munin atsireg, asum mundoho ambogbag helag-felag angge disi.

³⁰Duruk katsi mu, ambogbag fam ap biren Musa Elia inim enebe enam atlug, Yesus o Yerusalem wararuhu dip-uhu wene anyo Yesus inim enele matuk katswa.

³¹

³²Matuk kweleg, ap Petrus ori nim mundoho noho inil enepsi famen, eneluk atswareg, Yesus ambogbag disi fam ap biren Yesus inim wereg ma esausa.

³³Esausareg, it ap biren Yesus embeselug, lakoho duruk kweleg, Petrus en Yesus hweag-utuk kwit, “Nowe ahwi. Nit suma welahe fanoreg ma, hit welamuhup en, o sabo henahan, eke hat, eke Musa, eke Elia wiri henobahaul,” ulug, hweag-itsi. Ai hweag-itsi anyo, enda we furebouk fug angge en hesangge hweag-itsi.

³⁴Anyo owan hweag-utuk kweleg, hena waharuk kwit sal-enepsi. Hena anggelegma sal-enebik waharuk kweleg, enekol humon bousa.

³⁵ Enekol boruk kweleg, hena anggelegman ele uruk kwit, “An namloho momaloho unduhuk ferihik anyo su. At ele holduk kamek.”

³⁶Isi mu, Yesus amu neg wereg ma hausareg, duruk mu hausa ai salim ap homi hweag-esa fug angge enehum apma bok atswa.

³⁷Likia at Yesus ele wauk on henahan inim dukmen wambik wahausa ma, ap homi humdoho at ha wahausa.

³⁸Ha wahausareg, ap homi humdoho kabog-dik wahausa on eke en fetagdoho hweag-utuk kwit, “Guru yei! Namloho ap omalik ilahambi misig ondoho ma, kumu hamihin ulug, hweag-hirihi, nowe.

³⁹Mungguat endama senerik waheg neg duruk kwit, ngarulug, ape moroho hag duruk kwit, kopita bil-hwal embeseheg, wasulahap holo-holo deheg, debelug, folo-folo embeselug, wilipmin ulug, boruk fug.

⁴⁰An den it hat hele wauk on mungguat lisoho wilibi foukwag ulug, hweag-esauihik famen, iren wilibe fouk fug alereg latswa.”

⁴¹Hweag-itsi mu, at Yesus en, “Yaho! Hit ap homi ketia welahep on su, henenda nobam dip-debelug, demdoho bouk fug angge wongdeg lit welahep. An nunggwenam ninim welatlug nobam lahuk e? Nukoho nunggwenam lombukdoho hit ninim welamuhuk e?” ulug, hweag-esasireg, ap amloho oukdeg on anyo hweag-utuk kwit, “Hamloho walug ma.”

⁴²Hweag-itsi mu, owan walug waharuk kweleg, mungguat anyo en nimi ebe kopita bil-hwal embeseruk hag deberuk kwit, hamboko kwenangma unggul belabeg fotog-esasi. Ai deberuk kweleg, at Yesus en mungguat namelmel on anyo bet-disireg, nimi anyo hilinggoho akni og-itsi.

⁴³Og-itsi mu, it ap homi en Allah omamne humdeg hausareg, “Yehei u!” ulug, yanderuswa. It ap homi mundoho Yesus di deheg su deheg mundoho dil lauk fam, “Yehei u!” ulug, yanderuruk kweleg, at Yesus en at ele wauk on hweag-esauk kwit,

⁴⁴“An wene hweag-hesauk kahi su, furoho holduk kamek. An Ap endag-atihik anyo nowarukwag ulug, nebe og-esauk mu, hahup,” ulug, hweag-esasi.

⁴⁵Hweag-esasi, it anyo enepelegdoho welatswa. Ne, furoho ha nolug, wene herako hag hweag-esasi famen, “Hweag-nesehen ai, nanggoho hweag-nesehen?” ulug, enakol en hein og-ha fug angge bok atswa.

⁴⁶ Ai en, fobik Yesus ele wauk on en, “An along, hat along,” uruk kwit, suahal uruk katswa.

⁴⁷Suahal uruk katswa man, at Yesus it enenda boruk ale enegdeg ma esasireg, omalik doron eke oko aluluk unduhuk folug,

⁴⁸ it hweag-esauk kwit, “At henenggelegma mun sebeleg ai, at ap humon deg ma, hit en an nobahet omalik su wauk halug de, an og-nabeheg, ne, hit an og-napuk halug, at mon-nabik wahasi on weheg, duruk kahep,” ulug, hweag-esasi.

⁴⁹Hweag-esasi mu, Yohanes en, “Nowe ao! Nit ap eke hat hunuk fam mungguat lisoho wilibi feseruk mu hehereg, at ninim noruk eleg ma, Duk fug, ulug, hweag-erehe.”

⁵⁰Hweag-itsi mu, at Yesus en, “Duk fug, ulug, hweag-om fug. It hinim minggirig eleg on ai, hiron,” ulug, hweag-esasi.

⁵¹Hweag-esasireg, ai en, fobik at Yesus boholma walug lahaku sali horog aik wahasi mu, Yesus o Yerusalem lahuk neg ulug enda mun wenggel-hasireg

⁵²yonggo atam mon-enepsi. Mon-enepsi on lausareg, at waruhu mu, obahet fik-fouk dukwag ulug, ap homi Samaria on enobam ekema kuswa.

⁵³Kuswa ma, at Yesus o Yerusalem mun lahuk ulug dasi mu, ap homi Samaria on en, “Yesus ninim welamuhuk nenerim,” bousa.

⁵⁴ Yesus ninim welamuhuk enerim boruk anyo, at ele wauk on Yakobus Yohanes mel esausareg, “Nenowe ahwi! Ap suma indok han nowag[12] ulug, boholman belabik watmisi en hweag-umuk ane?” ulug, hein og-hausa.

⁵⁵Yesus hein og-hausa ma, alukwe hebeloho fu-esauk kwit, bet-enepsireg,[13]

⁵⁶at ele wauk on inim o amumu eke lausa.

⁵⁷Lauk mu, ap eke en Yesus hweag-utuk kwit, “Hat kema kema lahun halug de, an hinim lahuk.”

⁵⁸Isi mu, at Yesus en, “Olomene enobam e indipmu omanggen elma wereg. Ne, suwe kolokwe daril noruk on ena wirig wereg famen, an Ap endag-atihik su neg de nohoruk kahi mu mun eleg abi,” ulug, hweag-itsi. Hweag-itsireg ap amu on eke hweag-utuk kwit, “Ninim lauk kamul.” Hweag-itsi famen, ap anyo en, “Yehei, Nowe. Atam nakni kwenangma sale folug, hinim lahuk en, Yuo, in.”

⁵⁹

⁶⁰Hweag-itsi mu, at Yesus en, “It ap homi waratuk on en enowe enaut waratuk halug, kwenangma sal-enepuk kamag. Hat neg de Allah apma fesehu wene di obam su obam hweag-isil lauk kamin abi!” ulug, hweag-itsi.

⁶¹ Hweag-itsi mu, amu on eke en at hweag-utuk kwit, “Nowe ahwi. Hat hinim lauk karuhuk berihik famen, lahuk ulug, atam nowe naut dang-esa lahuk en fano in.”

⁶²Hweag-itsi mu, at Yesus en, “It ap homi yabuk witmin ulug, duruk kwit, enambol sombandoho endenoho fu hauk halug, Allah apma feserukmu welam fug alereg abi!” ulug, hweag-esasi.