Read Ninia Yali ULANGAN 1 Bible Online

ULANGAN 1 - Ninia Yali bible

ULANGAN 1

¹Buku baleg su mundoho re at Musa en ap homi Israel on inim o leimu ap homi elegma ik Yordan donggoma etma wereg lit ele hweag-esebag on fahet baleg wereg. Donggo aire Ik Yordan foma fil mo lahaik waharuk on higitdoho kota Paran foma fil ne kota Tofel inim Laban inim Hazerot inim, Di-Zahab fil inim dulug, bul kota Suf horogdoho etma. (

²O Dom Sinai fam etma en de o Kades-Barnea etma wamul ulug Edom unggul kwe etma waharuk kwit de nukoho nanggolop en fam waharuk.)

³It ap homi Israel on o Mesir en wilibik watfag hwili en de tahun 40 fam bigalem it enenggik wenaharuk kwit 11 wenaharuk on tanggal 1 fam at Musa en TUHAN en diroho diyug airoho diyug ulug ap homi Israel on hweag-esowag ulug hweag-etfag on etmano abirangge hweag-esebag.

⁴ Ai hweag-esebag ale re at Musa[1] en de hun Sihon ap homi ununggul unuk Amori on enobahet raja wereg lit o kota unuk Hesybon welatfag on ai mel, hun Og ap homi Basan on enobahet raja wereg lit o kota Asytarot mel, Edrei mel melal-enepuk katfag on mel enalong elehapdoho fesebagdeg wene etma hweag-esebag.

⁵Musa en wene airoho hweag-esebag aire Ik Yordan foma fil mo lahaik waharuk fil, ap homi Moab on enobam wereg higitdoho etma wereg lit wene at TUHAN en diroho diyug airoho diyug ulug ebag on mel wene melaleg mel, hweag-esebag wene anyo indipmu en bilinggoho hweag-esamin ulug debag.

⁶Airoho uruk kwit de, “Nit Dom Sinai apma etano wereg ma nenakni TUHAN en hweag-nesauk kwit de, Hit dom indipmu suma henenggik anunuroho welahep.

⁷Anggere ketia henobam sum on etma meiyaloho walug de ap homi ununggul unuk Amori on enobam domma etma inim, o etma aluluk kwe di kwe su kwe mundoho, o Yordan donggoma inim, dom unggul kwe inim sohweik kwe inim, o ik ambut fil inim, o ik Laut Tengah elan kwe inim, lakiyug. Lalug de o Kanaan inim, o dom Libanon unggul kwe en bekit de ik humon Efrat huli hwelag kwik lakiyug.

⁸An henakni TUHAN en henombasi Abraham inim, Ishak inim, Yakub inim hweag-esauk kwit, o etma mundoho hit inim hiren ondohoma on inim og-hesahuk ulug mundoho abug og-esauihik mu anggere o etma sebelik kwiyug ulug hweag-nesasi,” ulug hweag-esebag.

⁹Airoho hweag-esebagdeg at Musa en it ap homi anyo hweag-esauk kwit, “Nit nenebe Dom Sinai fam wereg lit etano, an den hit melal-henebukwag ulug de mun anggin hum deg ma, an namu en dihi ha fug alereg ulug hweag-hesauihik anyo.

¹⁰Hit henakni TUHAN Allah en hit henebe sohwalanggen bohol fam wereg etma hagdoho mun hum hamdoho henobahasi.

¹¹Mu re Aren wene abug hweag-hesasi hagdoho hit henebe hum-hamdoho dopno henobahakeg, hit hununggul unuk on de henangge di angge su angge mun wereg negdoho henobahakeg duruk kamag.

¹²Aireg famen de an namu en keroho hit henawene wereg on bilinggoho elehap duruk kahi halereg?

¹³Ite an den it henowesi melal-henepuk on unduhuk feseikohon de, hit hununggul unuk domog en ap neg enenda enggat on halug inim, airoho melal-enepuk katswa ale enoluk deg on halug inim, enenda wenggeloho duk alereg on inim neg nunggwe en hagdoho momal-enebiek.

¹⁴Ulug hweag-hesauihik mu, an den airoho diek irihik on anyo hiren fano bolug duruhup.

¹⁵Ai fam hiren henowesi melal-henepuk kamag ulug hiren ap enebe nunggwe en hagdoho enenda enggat on mel, it melal-enepuk katswa ale enoluk deg ma ulug momal-enepuhup on mel, etano re foma re it enebe 1.000 en on enowesi wereg lit melal-henepuk kamag ulug unduhuk feseheg, foma 100 en on enowesi wereg lit melal-henepuk kamag ulug unduhuk feseheg, foma it 50 en on enowesi wereg lit melal henepuk kamag ulug unduhuk feseheg, foma it 10 en on enowesi wereg lit melal-henepuk kamag ulug an den hit hununggul unuk domog fahet unduhuk feserihik. Airoho unduhuk feserihik deg it foma hununggul unuk dotdoho wereg on omano domog melal-henepuk kamag ulug unduhuk feserihik.

¹⁶Etano airoho unduhuk feseruk kwit de diroho dirihik: Hit henesahalimu en wene minggit-manggat atuk ale ai furebeiyug. Furebelug de wene hit-hit fam atuk ale halug oho, ne it ap homi bohon hit henesahalimu wereg on inim fam et atuk ale fahet oho wene katukdoho kong-duruk kamuk irihik.

¹⁷Wene kong-duruk kwit de, ap homi enebe abirangge fam higitdoho neg ayo wiroho kong diyug, eke fil anggin debeheg eke fil serebeheg, duk fug. Ne, ap ai sa ulug orohole fubiruk fug. Wene hiren ayo wiroho kong-duhup on aire Allah en urukmu hweag-hesauk karuhu mu, ap misig fahat ulug oho at obam henekol duk fug. Ne, wene ai lahe hiren kong-duk ale anggin atuk halug de an den ayo wiroho kong-dukwag ulug nakit walug waharuk kamuk.

¹⁸Etano li em de wene duruk kamuhup ale fahet ulug inim, hiren di on su on duruk kamuhup ale fahet ulug inim mun milil-melaldoho hweag-hesauihik anyo,” ulug hweag-esebag.

¹⁹Airoho hweag-esebagdeg eke hweag-esauk kwit, “Ai en at nenakni TUHAN Allah en melale nenobahasi higitdoho, nit o Dom Sinai fam etmano embeselug o lei mun hum-hamon deg lit yaron wereg kwe en waharuhuk deg o domma ap homi Amori on wereg kwe en waharuhuk. Etano li re waharuhuk deg o Kades-Barnea hwili aik waharuhuk deg,

²⁰an den diroho irihik anyo: Ketiare it ap homi Amori on enobam wereg ma dom kwe kwenang nit nenakni TUHAN Allah inim it nenombasi mel enakni Allah anyo en og-nesasimu etmano aik wahep ai. Anggere, henalukwema kwenang donggo mun ape eleg deg angge hinil fu hakiek ahi. Henenda nong-hong ulug duruk kwit henakol duk fug, ite TUHAN en hweag-hesasi higitdoho lahupdeg kwenang etma hwelag lakiyug ulug hweag-hesauihik.

²¹

²²Airoho hweag-hesauihikmen hiren an nakit waharuhup deg hweag-nutuk kwit, Niren o kota etma keroho kwik lahuk, ne kobokwe kemane lahuk ulug it atam inil loatlug nit hweag-nesa wamagdoho re ap nunggwe en hagdoho inil hwalik lowag ulug mon-enepul, ulug hweag-nutuhup.

²³Airoho hweag-nutuhupmu, hiren uruhup ale anyo an den fano berihik deg hit hununggul unuk domog en de ap misig heg an den ap enebe 12 en momal-enepihik.

²⁴Momal-enepihik mu iren dom kwe etma lausareg o Eskol donggo kwe etma hwili inil loatil lausa.

²⁵Inil lowatswareg it etmano nikangge enambol somban nit nenekit waharuk kwit, e anggen o etma en dahanswa angge inim walug wahausareg o TUHAN Allah en nit og-nesahumu etma deg ale fahet mun hesilig ulug hweag-nesa wahausa anyo.

²⁶ Airoho hweag-nesa wahausa famen de hiren TUHAN en diroho diyug ulug melaleg on anyo sahale foruhupdeg kwik lahuk nenerim ulug duruhup.

²⁷Hiren henele mul-mul ale diroho uruk katuhup: TUHAN en nit fam olok nenepuk kwit nit ap homi Amori on en nenowarukwag ulug o Mesir en og-neneplug wilibik wahasireg it enenggikmu nenebahaik wahasi.

²⁸Ap niren o etma mon-enepuhuk on etma en nenekolap kwelapuk kwit, ap homi o etma wereg on etma re enomamne humdeg lit enalong deg, ne nit de mun mabendoho nenomamne eleg deg. Ne enobam de o bumbuk elehet asiagle re bohol hwili fam deg on ohoma wereg, ulug hweag-nesa wahausa. Iren ap homi enowag yatdeg-batdeg on wereg ma esausa ma nit de nunggwelug o etma kwik lahuk? ulug uruhup.

²⁹Airoho uruhupmen an den uruk kwit, ap homi etma fam henekol duk fug.

³⁰O Mesir en durukmu hinil hauhup hagdoho henakni TUHAN Allah en hit henobahet omamne doho duruk kwit og-heneplug lauk karuhu.

³¹ O lei kwe famen ohore ap enaknisi en enomaliki mako bugdoho og-enepuk ale anyo hagdoho, TUHAN Allah hit henakni anyo en kwe fam etmano henahap wendaroho neg og-heneplug waharuk men neg o suma hwili aik waharuhup ale anyo hiren oho hinil hauhup.

³² An den airoho ulug hweag-hesauihik famen ohore hiren henakni TUHAN Allah obam henenda owan dip-debouk fug angge welatuhup.

³³Hit o sabo kea saloho noholusa ulug at henalukwema lauk kwit obale hweaho feil waharuk katsi. Aren hit kobokwe lowag ulug hup angge indok anggelegma ne nukoho hena anggulog fam kobokwe unug-hisil waharuk katsi,” ulug hweag-esebag.

³⁴ Airoho hweag-esebagdeg eke hweag-esauk kwit “Hiren henele fam anggin ale neg urukmu at TUHAN esanggo holsireg at olok hum atsireg ele hombuk baloho uruk kwit,

³⁵O kwenang mun hesiligmu it ap homi su enombasi fam og-hesahuk ulug abug hweag-esauihik mu etma it ap homi mun enolok neg deg on su re ap misig ulug oho eke kwik lahup fug.

³⁶We at hun Yefune amloho Kaleb neg de an nobam nele hole folug higitdoho neg duruk katsi mu, at neg de kwik lahu. At Kaleb inim ahain elekwe on inim neg de kwenang inil hwaldil lasi kwe ai og-uruhuk isi.

³⁷Ne, hiren dil ale fam TUHAN en an nobam olok besireg an hweag-nutuk kwit, Musa hat de ininim o etma kwik lahun fug.

³⁸Famen de at let-hapuk on hun Nun amloho Yosua ai aren neg ap homi Israel on og-eneplug kwenang etma hwelag kuhupmu re enda hambuge fein ulug hweag-nitsi.

³⁹Ai en At TUHAN en nit nenebe abirangge fam ele hweag-nesauk kwit, Hit henomaliki enebe mun dotdeg lit siag fano inim aham duk fug alereg boruk kahep on mel, it henomaliki hiren boruk kwit de it neneselei on en del-dahup boruk kahep on mel, etma fam neg de kwenang ai og-esahukmu iren hwelag kuhupdeg welamuhup.

⁴⁰Famen hit de o leimu nikangge Teluk Akaba unggut duruk kwe en kobokwe lauk on fam lakiek, ulug hweag-nesasi.

⁴¹Airoho hweag-nesasimu hiren uruk kwit, Musa nit de mundoho TUHAN fam siag dehe. Famen de ketiare nenakni TUHAN Allah en hweag-neseheik higitdoho weim yabik kul, ulug uruhupdeg hiren boruk kwit de o dom kwe weim yabik kuruk ale aire we hareg hag ulug boruhup deg, hit henemu domog hit henesahali kwe en fik-fouk duruhup anyo.

⁴²Famen de TUHAN en an hweag-nutuk kwit, An it inim lauk karuhuk fug mu it eneselei on en enomamne elehapdoho fesouk no re, it weim yabik lowag ulug haren fotog-esa fug, ulug hweag-nitsi.

⁴³Airoho TUHAN en an hweag-nitsi ale anyo hweag-hesauihik famen de hiren nele hole foruhup fug. Hiren TUHAN awene melaleg anyo sahaloho embeselug henawonog fam o domma lauhup anyo.

⁴⁴Airoho lauhupmu it ap homi Amori on dom kwe etma wereg enap wilip atuk kwit hit inim weim yapuhup. It enebe esan de kin ami foruruk kwit wilipuk etmano hag deg lit, iren hit mug-heneplug o Horma hwili henobahaik wahausareg it Edom on wereg kwe dom fam etmano en hit henalong elehapdoho henobahausa.

⁴⁵Airoho henobahausa ma hit henambol sombandoho waharuhup deg TUHAN fam nit let-nenebin ulug hweag-utuhup famen de Aren hit fu henobahakeg, henele esanggo holeheg disi fug anyo,” ulug hweag-esebag.

⁴⁶Airoho hweag-esebagdeg eke hweag-esauk kwit, “Airoho duruhupmu nit o Kades anunuroho welatuhuk.