Read Ninia Yali ULANGAN 10 Bible Online

ULANGAN 10 - Ninia Yali bible

ULANGAN 10

¹Airoho hweag-itihik mu, “At TUHAN en an Musa hweag-nutuk kwit, Helep sabea biren atam on anyo hagdoho, biren angge kahaloho inim, obale forukmu e on misig fam wirig angge inim walug, An nakit dom fam manu.

²Helep eta fam de An den nele baleg atam haren erap deberihin on anyo hagdoho bal-huruhukmu, helep etare haren e peti wirig ai fam kwelabe feiyug, ulug, hweag-nitsi

³Airoho hweag-nitsi mu an den peti anyo e banggwe fam wiri folug, helep kahaleg biren atam on etano hag on inim, walug dom fam laharihik.

⁴Walug laharihik mu helep biren etano fam de At TUHAN en wene melaleg numen atam on anyo hagdoho balsi. Wene melaleg aire atam hit dom indipmu kabog-duruhupmu At indok sahalimu en ele uruk kwit diroho diyug-airoho diyug ulug hit og-hesasi on anyo balsi. Mundoho bale fesireg de helep lisu baleg angge anyo an og-nitsi mu, an domman wambik waharihik.

⁵Aren hweag-nitsi hagdoho an den helep biren etano e peti wiroho anyo salim kwelabe ferihik angge anyore ketia huli en de helep lisu baleg biren angge etare etma wereg.” (

⁶ Airoho debelug it ap homi Israel on anyo ik bohwe ap homi o Yaakan on en wereg ma etmano en wilibik watlug o Morsea lebag. Eta lebagdeg duruk men at Harun anyo waratfag ma sale folug at amloho Eleazar anyo at obalma imam welamag ulug unduhuk febag.

⁷Etan de it anyo o Gudgod lebagdeg de o Yotbata ik neg humdoho wereg ma etmano aik lebag.

⁸ Dom fam etman[10] de At TUHAN en it Lewi enap de Allah wene numen baleg yohwareg wereg angge anyo hwaleheg, TUHAN il hanim ap homi enobahet deheg, Allah unuk yiko ap homi fanoapdoho feseheg, duruk kamag ulug Aren eneko unduhuk fesebag ma, ketia huli it eneyabuk ai on neg duruk.

⁹It airoho eneko fesebag ma re, enakni TUHAN Allah en hweag-esebag ale higitdoho it enunggul unuk amu on de enanggwenang fahet akni hiling atuk kweleg, it Lewi enap neg de At TUHAN ebe akniap hiling atfag.)

¹⁰ “Atam dirihik hagdoho an nenggik nukoho 40 en domma wereg latihik. Airoho wereg lit TUHAN hweag-itihik on anyo esanggo holsireg, Aren hit eke inim elehap henobahakuk fug boruk kahi isi.

¹¹Airoho hweag-nitsireg Aren mingming napuk kwit, it kwenang og-esahuk ulug it enombasi fam abug wene waroho hweag-esauihik on ai hwelahup en hat melal-enebik lakin ulug hweag-nitsi,” ulug, hweag-esebag.

¹²Airoho hweag-esebagdeg eke hweag-esauk kwit, “Nori nerekwi inim, ketiare At henakni TUHAN Allah en hit henobam heng uruk angge su furebeiyug. At mun along leho neg wereg boruk kwit, Aren diroho diyug suroho diyug ulug hweag-hesauk on anyo higitdoho duruk kamuk. At neg henenda hundig duruk kwit henebe henenda mundoho en At neg mot-duruk kamek.

¹³Hit henonggwareg henebe fano amuhup ale fahet an den yoho su salim wene melaleg hweag-hisihi on ai holoho neg duruk kamuk.

¹⁴Hit henakni TUHAN Allah ebere bohol lehoma onggwareg ahun, ne kwenang inim, kwenang emberimmu wereg angge inim at angge neg.

¹⁵Famen de Aren hit henombasi fam enda hundig enepsi on neg de mun humdeg, ai fam ap homi di enunggul unuk su enunggul unuk en hit neg de eneko momal-henepsimu, ketia huli en inim hit de At omaliki momaleg on welahep.

¹⁶Aireg ma ketia huli en hit de henakni TUHAN ele holoho neg duruk kamuk, ne henenda haro deg lit omamnerohore duk fug.

¹⁷ Hit henakni TUHAN Allah aire, amu on fahet allah hag ulug mot-duruk on inim, di along su along wereg on inim en mun emberimmu leho wereg ahun. Ne, At de Allah mun humon deg lit omamne ahun deg ma hiren ele holoho duruk kamag ulug wereg. At de eke on inim inibil aheg, enenggik apmane saburoho hweleheg duruk ale etma re At mun irik-erim deg.

¹⁸Aren it wetien on inim, homi sohwe on inim ap homi en katukdoho debeseruk kamag ulug along bal-enepuk. Aren neg ap homi bohon nit nenesahalimu wereg on hwal-enepuk kwit, enesiburu nowag ulug og-eseheg, enesum wan-dowag ulug og-eseheg, duruk.

¹⁹Aireg ma hit inim atam ap homi bohon hag o Mesir welatuhupmu, hiren oho ap homi bohon fam henenda hundig enepuk ale eneg deg ma hesowag ulug duruk kamuhup fano.

²⁰Hit henakni TUHAN Allah amu neg fam along leho wereg ahun boruk kwit, At fam neg anggiluk duruk kamuhup. Hiren At ele neg holoho duruk kwit, hombuk balduk kwit halug At unukdoho neg hombuk balduk kamuk.

²¹Hit henonggwareg hinil anggen famen Aren along on bolan aleroho hit fahet durukmu hauhupmu, At aire hit henakni Allah at deg ma At mun motdeg neg welamag.

²² Endam hit henombasi o Mesir lauk li re it enebe wenakore 70 en neg lausa, famen de hit henakni TUHAN Allah en hit henebe no sohwalanggen bohol fam wereg etma hagdoho henobahasi,” ulug hweag-esebag.