Read Ninia Yali ULANGAN 11 Bible Online

ULANGAN 11 - Ninia Yali bible

ULANGAN 11

¹Airoho hweag-esebagdeg, eke hweag-esauk kwit, “Henakni TUHAN Allah fam henenda hundig duruk kwit Aren awene melaleg hweag-hesauk aleroho neg holoho duruk kamek.

²Hit henomaliki re atuk katsi ale fahet it enapeleg deg famen de, hit neg de At TUHAN en duruk katsi ale etmano hauk katuhupmu, ai fam TUHAN ebe su ulug henoluk deg ale anyo wenggel-hakiyug. Henakni TUHAN Allah At anggiluk wereg ale inim, omamne humon deg ale inim, along humon wereg ale fahet inim de hit hinil en neg hauk katuhup.

³ Aren neg along on humdoho duruk kwit, at raja Mesir ahun anyo inim ap homi aren hwal-enepuk etmano fam inim debesi alere hit henemu domog en hauhup.

⁴ At TUHAN en it Mesir enap sehen foroho lit dog yapuk enap inim, enowam kuda en kereta lisulug laukmu iren emberimmu lahalug lauk katfag angge inim mun fundoho elehap debesi ale anyo esauhup. It enebe hit mug-heneplug waharuk men it enebe abirangge ik Laut Gelagah.[11]

⁵Hit henebe o suma aik wam fug mu, hit henobahet o leimu en At TUHAN en henobahet disi ale anyo hiroho heneluk deg.

⁶ At henakni TUHAN en at Eliab ap Ruben on omaliki Datan inim Abiram inim fam debesesi ale anyo ebet hakiyug. Hit henebe mundoho hinil wereg kweleg kwenang ele heal atsireg it etano enohwesi enomaliki inim, enobam sabo saleg inim, it enamingming angge inim, enowam inim kwenang elekwe bil-esasi.

⁷We hit hinil en neg At TUHAN en along duruk katsi ale anyo hauk katuhup,” ulug hweag-esebag.

⁸Airoho hweag-esebagdeg, eke hweag-esauk kwit, “Hiren lahe wene melaleg an den yoho hweag-hisihi on su hole folug duruk halug de hit ik baloho o horog ketia hwelahup en duruk kahepma sebelik kuhup.

⁹Ne, hit henebe henoluk yatdoho o kwenang mun hesiligmu At TUHAN en hit inim, hiren ondohoma on inim og-hesahuk ulug abug wene waroho hweag-esebag ma etma welamuhup.

¹⁰O kwenang hit welamuhupmu etma re atam welatuhupmu Mesir kwenang etmano hag de fug. Etman de hit heneyabukmu a yaho folug de henenggik omamne doho ik hwaloho kwelapuk katuhup.

¹¹Famen de o hit kwik lahupmu etma re dom mel donggo mel deg ma, kwenang de osit en ik hwaloho kwelapuk karuhu.

¹²At henakni TUHAN Allah en o etma hwalduk kwit, tahun hoporoho kahaleg welaruhu.

¹³ Aireg ma re wene melaleg an den yoho hweag-hesauk kahi on aire holoho neg duruk kamuk. Henakni TUHAN Allah fam neg henenda hundig duruk kwit, at neg henebe henenda mundoho en apne wauk kamuk.

¹⁴Hiren airoho duruk kamuhup halug de At henakni TUHAN en osit li hit anggen mundoho balduk mu inim, a ket yatuk li inim henanggwenang fam belap-hesa waharuk karuhu. Airoho henepukmu, hit henebe fahet gandum inim, anggur inim, e zaitun ahalue inim, ne henowam enggelangge nauk on fahet inim higitdoho neg deg laruhu.

¹⁵Di on su on hiren nauk on ai nenenda boruk angge anyo mundoho fouk deg neg welaruhu.

¹⁶Hiren amu on fahet allah-ap debelug apne wauk on etma fam mutlug lauk kwit obahet dik lauk fam TUHAN en yat apdoho henobahaku i.

¹⁷Hiren wene melaleg ai sahaloho fohup halug de At henakni TUHAN en olok hit henobam fohureg, hit fahet osit belap-henesa waruhu fug mu, henanggwenang de mun kelog haro siag atuk karuhu. Airoho atuk mu, a yaho angge anggen yig-henebuk fug alereg laruhu. Airoho duruk kwit nukoho il misig fam neg hit kwenang mun hesilig on At TUHAN en og-hesasi on anyo fam waramuhup.

¹⁸ Wene melaleg aire furebelug wenggeleg lamuk. Henendama wenggelohore Henenggikmu ilili feheg, henelahama bug debeheg diyug.

¹⁹Hit henomaliki fam olman nim, dag kwe en inim, kel wat-dauk kwit inim, yabuk duruk kwit inim dindil eseheg, hweag-eseheg duruk kamuk.

²⁰Hit henobam sokole fam inim, elehet oho on fam sokolma inim baloho feiyug.

²¹Hiren airoho duruk halug de o kwenang At henakni TUHAN Allah en og-hesahuk ulug it henombasi fam abug wene og-esasimu etma hit henebe inim hit henomaliki inim henoluk yatdoho eke inim welamuhup. Bohol etlendi kwenang emberim fam en eleg atuk fug kweleg ai hit mundoho henoluk airoho welamuhup

²²An den hit henobam wene melaleg hweag-hesauk kahi on ai hiren holoho neg duruk kamuk. Hiren henakni TUHAN Allah ai fam henenda hundig neg duruk kwit, Aren diroho diek ulug melal-henepuk ale deheg, At obam dipdoho welaheg duruk kamuk.

²³Hiren airoho duruk halug At henakni TUHAN en it enunggul unuk enap mundoho etmano hit hinil hanim muko wilibi feserukmu, hit henebe it ap homi enunggul unuk hit hag fug, we enebe humdeg lit enomamne deg enap ai enanggwenang fam etmano welamuhup.

²⁴ O di kwe au kwe hiren heneyog sobotil lahup kwe etma re hit henengge aruhu. Ne, hit henobam welamuhup on hulire o lei il apma fil dakdeg ma etma huli en de il emberim fil de Dom Libanon fam en de mo lahaik waharuk fil de ik Efrat ikma etma en de o mo obuk uruk fil de ik humon yenggeleg on Laut Tengah wereg huli etma hwelahup.

²⁵O bumbuk etma abirangge fam de At henakni TUHAN Allah en airoho duhuk ulug abug wat-hesasi hagdoho enakolap kwelabe fesehumu ap misig en oho eke kwe bal-henebuk fug alereg laruhu.

²⁶Yoho su salim de hiren neg nit nenobam fanoap nenobaharuk karuhu, eheg nit hururung nenobam welaruhu eheg, momal-dakiek.

²⁷Hiren lahe an den wene melaleg yoho hweag-hesauk kahi on su hole folug duruk halug de henobam fanoap henepuk karuhu.

²⁸Famen de At henakni TUHAN Allah en wene melaleg hweag-hesauk on anyo sahaloho embeselug henenda ahamdoho amu on fahet allah-ap debelug apne wauk on ai atam hiren mel apne wauk katuhup fug on etmano fam mutlug lauk halug henobam hururung henobahaku.

²⁹ Hit henakni TUHAN Allah en henebe mundoho o kwenang hit welamuhupmu etmano og-heneplug kwik lauk halug de, fanoap nenebukwag ulug aire Dom Gerizim famen henele fam iyug ne hururung aire Dom Ebal famen iyug. (

³⁰Dom biren angge etare Ik Yordan ikma en mo obuk uruk fil it ap homi o Kanaan on o Yordan donggoma weregman o kota Gilgal en horogma o More e ousahan wilibig on etano fam en de horogdoho alukwe mo obuk uruk fil wereg eta.)

³¹We horog ketia eiya kwenang At henakni TUHAN Allah en og-hesasimu etmano sebelik kulug welamuhup en Ik Yordan baloho hwelag kukoho lahep ai.

³²Anggere an den wene melaleg mundoho yoho hweag-hesauk kahi on aire mundoho holoho neg duruk kamuk,” ulug hweag-esebag.