Read Ninia Yali ULANGAN 12 Bible Online

ULANGAN 12 - Ninia Yali bible

ULANGAN 12

¹Airoho hweag-esebagdeg, wene eke diroho hweag-esebag, “It henombasi enakni TUHAN Allah anyo en o hit og-hesahumu etma mundoho wereg lit At ele neg holoho duruk kamuhup alere ebe su.

²Hit o etma mundoho kwik lahupdeg halug de, ap homi enunggul unuk hundomog etma en amu on fahet su allah hag ulug apne wauk kwit dom yaron fene inim, duk-duk kwe inim, e humon wilibig on apmane inim, etma re mundoho langgik-langgo debelug elehapdoho feiyug.

³ Airoho duruk kwit iren amu on fahet allah-ap debelug fobik eke apne wauk kamuhup fug anggere, obahet waroho yal-utuk mu ulug wirig angge etma inim, helep on unduhuk folug kembu ulug mot-duruk on etma inim, moluluk esalug de Asyera ahan doung deg on mel indok han yale feheg, enanggembu kanggog wirig on ai molulukdoho embeseheg, dil lakiyug.

⁴Hiren nenakni TUHAN Allah mot-dul ulug halug de it ap homi etman amu on fahet allah-ap debelug mot-duruk kwit dauk hagdoho apne wauk kam fug.

⁵O nit ap homi Israel on henunggul unuk domog welamuhup kwe etma en de At nenakni TUHAN Allah apne wakoho kabog-dik lauk kamuhupmu Aren obale eke momaloho fohu.

⁶Airoho foruk halug de hiren wam di angge-su angge Allah obahet waroho yal-utuk kamuhup angge inim, At fahet eke eneko foruk kamuhup angge henenggik wenako numon anyo inim, hiren an de su huli Allah og-utuk karuhuk ulug wenako foruk kamuhup on ai inim, henendaman an de At fahet femin ulug foruk kamuhup on ai inim, henowam sapi, kambing, domba omalik kirim-keram endag-atuk karuhu on ai inim, o etma neg walug lauk kamuk.

⁷Ne, at henakni TUHAN Allah en hit henebe fanoap henobahakeg, henasiburu di angge su angge fanoap debeheg, durukmu hiren di angge su angge mundoho durukmu higitdoho neg atuk karuhu ai en de hit henebe henomaliki hinim seberoho o etma neg henakni TUHAN Allah il hanim kabog-dik lalug, henendama en henahayeg fam henangge di angge su angge etmano nauk kamuhup.

⁸Ketia re o henakni TUHAN Allah en og-hesahumu fano welamuhupmu etma owan kwik la fug angge welahepma re, suman Allah obahet dul ulug de we henendan bolug neg duruk kahep ai hagdoho o etma mundoho lalug mun airoho duruk kamuhup fug.

⁹

¹⁰Hit Ik Yordan baloho nindig-atuk mu re At henakni TUHAN Allah en hit o etma sebelik kulug fano welamag ulug let-henesahu. Let-hesahureg hit henaselei on en henowaruk no ulug fahat hinusug wereg ma henobam henakol eleg angge we mun finik-fanoroho neg welamuhup.

¹¹Ne, At henakni TUHAN Allah en de hiren At apne wauk kamuhupmu obale misigmu eke momaloho fohu. Airoho momaloho foruk halug de an den di angge su angge At og-utuk kamuhup on ulug hweag-hisihi on ai mundoho etman og-irik lauk kamuk. Ai ebere hit henowam waroho yal-utuk kamuhup ihi on ai mel, di angge su angge wenako numon halug ihi on ai mel, an den di huli Allah fahet og-utuk karuhuk ulug foruk kamuhup ulug ihi on ai mel, mundoho walug etma neg og-irik lauk nu.

¹²O hit welamuhupmu etma re it ap homi Lewi on de eke akni amuhup fug anggere, it enebe hit henobam kota domog welamuhup on mel, hit henebe inim, henomaliki mel, henamingming angge mel, hinim seberoho neg henakni TUHAN Allah il hanim henahayegdoho duruk kamuk.

¹³Hiren henendaman bolug obale amumu momale folug, di angge su angge Allah obahet foruk kamuhup hayog.

¹⁴We At henakni TUHAN Allah en obale ai hit henunggul unuk eke henobam welamuhupmu etman momaloho fohumu etma neg foruk kamuk. An den hit diroho-suroho duruk kamuk ulug hweag-hisihi hagdoho hiren obale etma neg wam di angge su angge Allah enda ahayeg howag ulug obahet waroho og-ereheg, amu on eke inim deheg, duruk kamuk.

¹⁵Airoho duruk kamuhup famen de henowam hesangge wat-dalug naul bolug halug de o kema en e, we hit henebe welamuhup kwe etman waroho nauk kamuhup halug de fano neg. Airoho nauk kwit de henakni TUHAN Allah en og-hesauk ale higitdoho nauk kamuhup halug de fano neg. No kijang mel, rusa mel, hesangge nauk kahep ai hagdoho ap homi eke enebe emereg on mel, emereg eleg on mel we hesangge-besangge nauk kamuhup fano.

¹⁶ Airoho nauk kamuhup fano neg famen de amep neg mun nauk kamuhup hayog. We ik hagdoho hililoho kwenangma belabe feseruk kamuk.

¹⁷Hit henobam welamuhupmu etman de, gandum anggen yihiruk halug mel, anggur anggen baluhup on mel, zaitun ahalue keraluhup on mel, wenako soho en halug de hit fahat dauk kwit misig numon ai Allah fahet on deg ma feseheg, ne henowam kambing, sapi, domba, omalik wandeba on endetuk halug eke feseheg, ne hiren de an den Allah fahet huli su fam og-utuk karuhuk ulug henele uruk aleroho higitdoho feseheg, henendan di angge su angge fesemin boruk angge ai feseheg, dulug de hiren Allah obahet ulug fesehup angge ai henobam olekwe domog en nauk kamuhup hayog.

¹⁸We hit henebe inim, henomaliki inim, henamingming angge inim, ap homi enunggul unuk Lewi on henobam kota domog welamuhup on inim, henebe seberoho de wam di angge su angge Allah obahet foruk kamuhup angge ai henakni TUHAN Allah il hanim obale At henakni Allah en momaloho foruk karuhu mu etman neg nauk kamuhup. Hiren airoho dul ulug debelug nauk kamuhup on ai fahet de henenda henahayeg duruk kamuk.

¹⁹Hit o etma lalug wereg lit de ap homi Lewi on ai enobahet wenggel-esa fug angge embesehep ha nore hinil og-enepuk kamuk.

²⁰Henakni TUHAN Allah en de, o hit welamuhupmu etma re obale yatdoho logap debehuk ulug abug wene wat-hesasi hagdoho logap debeil lahumu wereg lit, henendaman wam di on nahuk ulug bohup ale nahup halug de fano neg.

²¹Di angge su angge henakni TUHAN Allah obahet foruk kamuhupmu fahet obale Aren momaloho fohumu ai lahe hit henobam welamuhupmu en yatdeg halug de, henowam sapi, domba, kambing Aren og-hesahu angge ai henobam etman neg ware folug senggeloho an den hweag-hisihi hag, hit henendama en an de su on nenda ulug boruk ale higitdoho nauk kamuk.

²²No kijang on mel, rusa on mel, hesangge nauk kahep ai hag it ap homi foma enebe emereg on mel, emereg eleg on mel wam waruhup on etma we hesangge-besangge nauk kamuhup.

²³ Airoho nauk kamuhup famen de di angge su angge de mep en neg oluk wereg ai en de wam wareg on fam mep wereg ma, mep nahup hayog. Ne, obam mep labulig angge halug de mep ai en neg oluk wereg ma re nauk kamuhup hayog.

²⁴Wam mep aire mundoho nauk kamuhup fug, we ik hagdoho kwenangma hilil-esauk kamuhup.

²⁵An den diroho duruk kamuhup ulug hweag-hisihi ale ai hiren holoho duruk kamuhup halug de henakni TUHAN endama ahayeg haukmu, hit henebe inim, hiren ondohoma on inim, hinim henobam finik-fanoroho welamuhup.

²⁶Wam di angge su angge TUHAN obahet fesoul ulug abug mundoho og-umuhup angge ai obale Aren momaloho fohumu etma walug lauk kamuk.

²⁷Wam Allah obahet folug waroho yal-umuhup on mel, ap homi nahup on mel, walug lalug de wam di angge su angge TUHAN obahet waroho yal-utuk kamuhupmu etmano folug de amep de obale mezbah ai fam kwesal-esahup fano.

²⁸An den hit diroho-suroho duruk kamuk ulug wene hweag-hisihi on ai holoho duruk kwit, mun fanoroho neg duruk kamuk. Airoho neg duruk halug de hit henakni TUHAN Allah endama fano atlug, hit henebe inim, hiren ondohoma on inim, mun fanoroho neg welamuhup,” ulug hweag-esebag.

²⁹Airoho hweag-esebagdeg eke diroho hweag-esebag: “Henakni TUHAN Allah en de ap homi enunggul unuk amu on eke o etma wereg on ai elehap debesehumu re hit higitdoho sebelik kulug welamuhup.

³⁰Ap homi ai lahe mundoho elehap debeseruk halug de iren amu on fahet allah-ap debelug apne wauk hagdoho hiren inim apne wauk men ouk mun siag on indip henobam aik waruhu anggere ai on apne wauk kam fug. Ne, hiren airoho apne waul ulug ohore iren keroho apne wauk katswa ulug hein og-enebik la fug.

³¹It ap homi etman de amu on fahet de allah hag ulug apne wauk kwit siag mun Allah erim boruk on neg duruk kwit enakni ai fahet di angge su angge waroho yal-utuk mu etmano enonggwareg enomalik inim waroho yal-utuk. Aireg ma re hiren henakni TUHAN Allah apne wauk kwit halug de it enobabut ai hagdoho oho folug duruk kamuhup hayog.

³² Wene an den diroho duruk kamuhup ulug mundoho hweag-hisihi on ai hiren wene amu on eke obam dopno deheg, eke foma elehap debeheg, duhup hayog.