Read Ninia Yali ULANGAN 13 Bible Online

ULANGAN 13 - Ninia Yali bible

ULANGAN 13

¹Ap nabi en ane, ite a hauk on[12] en ane duk fug on eke aruhu ulug, hiren kembu henapeleg on amingming angge atlug mot-dukwag ulug boruk kwit hweag-hesahu on ai, ebe demdoho aruhu famen de hiren wene ai demdoho eheik ulug furebouk fug. It airoho duhup on aire henakni TUHAN Allah en it enendama demdoho en nobam hundig wereg a, ite enembilik famen neg uruk a, ulug henobabut balmin ulug de it ai enayonggo forukmu airoho hweag-hesahup ai.

⁴It ap homi enobabut mun siag airoho neg duruk on ai en At henakni TUHAN Allah o Mesir hit ap homi enamingming angge hagdoho wereg ma og-heneplug wilibik wahasi on anyo hiren nenerim ulug embeselug kwe amu on fam lowag ulug lal-henepuk anggere it enobabut siag airoho neg duruk on ai mundoho eleg amag ulug enebe mundoho enowaruhup. Famen de hit neg de henakni TUHAN Allah obam dipdeg lit ombolim lauk kamuk. Lauk kwit de At along wereg ulug leho feheg, Aren diroho diyug suroho diyug ulug hweag-hesauk ale anyo ele holoho deheg, At obam neg dipdeg lit At obahet neg deheg, duruk kamuk.

⁶Hit airoho duruk kwit wereg ma henori-henerekwi en oho, henomaliki ap en oho hwelani angge en oho, henori henenda hundig on en oho, ap homi eke henombali roho hinim hundig on en oho, henenda kahaloho ap homi enobam horog kwe wereg on mel, yat kwe wereg on mel enanggembu mot-duruk on ai hit oho henapeleg at, ne it henombasi oho enapeleg at deg famen hiren mot-dukwag ulug henenda kahalduk halug de,

⁸enele holuk fug. Ne, hit henendama airoho kahalduk kweleg bok welam fug. It de hiren henenda hundig enebeheg, enalong baloho feseheg, duk fug.

⁹It henenda airoho kahalduk kamuhup on aire helep en fukdoho mun binggi enowariyug. Enowatuk kwit de ap hit henahain elekwe on deg kweleg ap at helep atam obam fohou deberuk halug de ap homi abirangge en mundoho waruhup neg. It ap homi ai en henakni TUHAN Allah ap homi o Mesir on en enamingming anggeap henesug lit weregman og-heneplug wilibik wahasi on anyo embeselug wilibukwag ulug henebuhup anggere enebe embesouk fug angge mun enowariyug.

¹¹Airoho enowaruhupmu de ap homi Israel on mundoho enesanggo holug enakol aheg, it eke en airoho duk eleg angge welaheg, duhup.

¹²Fobik hit lahe o kwenang At henakni TUHAN Allah en og-hesahumu etmano wereg lit, hol-hauk men,

¹³ap homi hit henunggul unuk on en kwasikdoho duruk on etmano en ap homi o kota wereg on etmano fam amu on fahet allah-ap debelug mot-duruk on hiren oho mun henapeleg on anyo mot-dukwag ulug yoma-debesehup ane?

¹⁴Airoho urukmu enele en ulug-walug uruk on holuhup deg de, indip fik-furoho bilinggiyug. Bilingguruk men lahe kwasik on ai demdoho atsi halug,

¹⁵ap homi o bumbuk kota ai fam wereg on enebe inim enowam inim mundoho enowariyug. Ne, it enobam bumbuk inim elehapdoho feiyug.

¹⁶Ap homi mundoho etmano enenggere mundoho kabog-debelug obale healegma saliyug. Ne, sale folug de o kota inim, enangge di angge su angge inim mundohore At TUHAN Allah fahet waroho yal-utuk angge on debelug yal-umuk. Airoho debelug abirangge aire o olundoho embesehupmu welaruhu, ne o eke nikangge wiruhup hayog.

¹⁷Di angge su angge mun homan deg on aire hit henonggwareg fahet ulug eke fahat-da fug, abirangge mun elehapdoho embesehupmu, At henakni TUHAN ahummu het hit henobam welaruhu on anyo se atuk kwit, hit henobam enda hundig henebeheg, enda sako fam henebeheg, Aren hit henombasi fam henunggul unuk humap henebuhuk ulug abug wene wat-esasi on anyo hagdoho henunggul unuk humap henebeheg, duhu.

¹⁸Airoho henebuhu famen de hiren an den wene melaleg yoho hweag-hisihi on su fam holoho deheg, At enda boruk ale neg deheg duruk halug neg airoho henebuhu,” ulug hweag-esebag.