Read Ninia Yali ULANGAN 14 Bible Online

ULANGAN 14 - Ninia Yali bible

ULANGAN 14

¹ Eke hweag-esauk kwit, “Hit de henakni TUHAN Allah omaliki deg lahep. Aireg ma ap homi waratuk mu hiren fong watuk kwit halug de ap homi enunggul unuk amu on en duruk hagdoho henahap fam bale fahat deheg, henoruk henorohole fil on fili feheg, duruk kamuhup fug.

² Hit de henakni TUHAN Allah onggwareg angge on deg lahep. Ne, ap homi di enunggul unuk su enunggul unuk mundoho kwenang emberimmu wereg on oman de At Allah en hit neg At omaliki amag ulug en-henepsi,” ulug hweag-esebag.

³Airoho hweag-esebagdeg eke hweag-esauk kwit, “At henakni TUHAN en aire ousareg on uruk kweleg hiren na fug.

⁴Ne, hiren henowam nauk kamuhup on unuk de su: sapi, domba, kambing,

⁵rusa, domba enggelama on, kambing enggelama on inim, kijang inim, di wam su wam eyog ahap belang deg on inim, nauk angge luko sahalug nauk on inim ai neg de nauk kamuhup.

⁶Di angge su angge etman hiren nauk kamuhup fug on de su: bak wam eyog sehelet dokwa deg on inim, nauk angge nalug en luko sahalduk on inim aire nauk kamuhup.

⁷Hit de bak wam eyog sehelet dokwa deg eleg on inim nauk angge nalug en luko sahalduk fug on nim aire nauk kamuhup fug. Unta inim, kelinci inim, bak marmot inim, bak etare nauk angge nalug en luko nauk on famen de eneyog ahap belang deg fug mu re ousareg on welaruhu.

⁸Wam de nauk kamuhup fug. Wam eyog ahap belang deg famen de nauk angge luko sahalug nauk fug mu re nauk kamuhup fug. Ebe oho nahup fug, wareg filik fam oho bal-hahup fug.

⁹Hiren ikan amurul wereg on inim, abunggu wereg on inim etma nauk kamuhup fano.

¹⁰Di angge su angge ik fam wereg famen amurul inim, abunggu inim eleg halug de ousa on deg ma, nauk kamuhup hayog.

¹¹Di suwe su suwe ousa deg eleg on halug de hit nauk kamuhup.

¹²Famen de suwe foma nauk kamuhup fug on de unuk su: Sue findi hag on unuk ikwesahop ai mel, siyo-mayo mel, suwe findi-findi unuk amu-amu on mel, suwe nasar mel, suwe gagak mel, suwe unta mel, camar mel, blekok mel, suwe walu unuk amu-amu on mel, suwe undan mel, kasa mel, suwe kwindik[13] mel, aire mundoho nauk kamuhup fug.

¹⁹Oluk-oluk angge ahwerabul wilibig angge aire ousa on deg ma re nauk kamuhup fug.

²⁰Di angge su angge ahwerabul wilibig on de sali baleg on deg ma re nauk kamuhup fano.

²¹ Hit de At henakni TUHAN Allah obahet mun eneg on welahepma, suwe, bak, di angge su angge amu waratuk on aire hit nauk kamuhup fug, famen de it ap bohon hit henesahalimu wereg on nowag ulug og-esauk kamuhup oho, ite it bohon enobam onggo hun-dauk kamuhup ale oho fano neg. Wam domba omalik halug inim kambing omalik halug inim de onggwareg isinga ahowe fam de mun esetuk kamuhup fug,” ulug hweag-esebag.

²² Airoho hweag-esebagdeg, eke hweag-esauk kwit, “Di tahun su tahun hundig-hundig hit henanggwenang famen anggen yig-henepuk angge anyo en soho en anyo hit fahat dalug num on halug de eneko foruk kamuhup.

²³Airoho folug At henakni TUHAN Allah il hanim obale At obahet durukmu ulug momaloho forukmu etmano en henangge gandum anggen mel, anggur ahalue mel, zaitun ahalue mel, henowam sapi, domba, kambing famen omalik keram endetuk on mel en numen on ulug eneko foruk on anyo nauk kamuhup fano. Hiren airoho duruk fam de henakni TUHAN Allah along deg boruk kwit leho foruk kwit neg welamuhup en de airoho neg duruk kamuk.

²⁴Obale At henakni TUHAN en momaloho forukmu ai lahe hit henobam welamuhupmu en yat deg ma, hit henanggwenang famen anggen yihig At henakni TUHAN Allah en og-hesasi on etmano en numen on ulug foruhup on anyo, etma walug la fug alereg halug de,

²⁵hit henanggwenang famen anggen yihig ai foma onggo hundutlug de we uang neg obale At henakni TUHAN Allah en momaloho fesimu etma walug lakiyug.

²⁶Walug lalug, etman hena uang anyo fam hit di angge nenenda ulug boruk ale higitdoho, sapi, domba, kambing halug oho, anggur ahalue halug oho, ahalue asig omamne on halug oho, onggo bal-dalug, etma At henakni TUHAN Allah il hanim etman hit inim, henomaliki inim, seberoho nauk kwit henahayeg duruk kamuhup.

²⁷It ap homi Lewi on aire it enanggwenang enemu eke wereg fug anyore wenggel-esakiyug. It ai hit henobam kota henesahali kwe wereg anyo nonge fesehup hayog.

²⁸Tahun biren debelug henahaneg on ambiangma re hiren henanggwenang famen anggen yihig balduk on numen angge ulug foruk kamuhup on etmano hit henobam kota etmano kabog-dik waharuk kamuhup.

²⁹Kabog dik waharukmu, nauk angge aire it ap homi Lewi on it enanggwenang elegma it fahet inim, ap homi bohon fahet inim, omalik wetien on inim, homi sohwe hit henobam kota etma wereg on fahet inim feserukmu, iren enenda boruk angge higitdoho hwelag waharuk kamuhup. Ne, hiren airoho duruk halug de At henakni TUHAN Allah en hiren di on su on durukmu Aren fanoap henepuk karuhu,” ulug hweag-esebag.