Read Ninia Yali ULANGAN 15 Bible Online

ULANGAN 15 - Ninia Yali bible

ULANGAN 15

¹Airoho hweag-esebagdeg eke diroho hweag-esebag, “Tahun sabit on ahae fotog fam de hiren baleg angge wereg on etmano mundoho elehap duruk kamuhup.

²Baleg angge elehap duruk kwit duruk kamuhup alere diroho. It ap homi Israel on en it henori Israel on fam neg henauang fobik nikangge og-nuruhun en ulug og-esalug halug de, At TUHAN amu en ele katukdoho uruk kwit de baleg-angge aire elehap debehup ulug isimu re, hiren og-nimin ulug mingming duhup fug, we elehapdoho embesehup fano.

³Hiren it ap homi bohon enobam fobik og-nuruhun en ulug og-esauhup deg halug neg de nikangge nombaleg angge og-nimin ulug mingming enebuhup fano famen de, it henori hit henunggul unuk on fam halug de mingming enebuk fug.

⁴Hit henakni TUHAN Allah en o kwenang og-hesahumu etma kwik lahupmu henobam fanoap deberukmu re, ap homi hiron sahalimu en ap enggik eleg on eke welamuhup fug lit deg,

⁵famen de hiren At henakni TUHAN Allah ele holoho deheg, An den diroho diyug- airoho diyug ulug yoho wene hweag-hesauk kahi on ai fik-furebelug duruk halug de airoho henobaharuk karuhu.

⁶At henakni TUHAN Allah en fanoap debeseruk karuhuk ulug abug wene hweag-hesasi hagdoho, fanoap henobaharukmu hiren henauang humdoho ap homi enunggul unuk amu on fam baleg angge hagdoho og-esauk kamuhup famen de, hiren it enobam baleg angge hagdoho eke og-nesakiek ulug uruk kamuhup fug. Hiren ap homi enunggul unuk humdoho hit henomamne apma welamuhup famen de, hit ap homi amu on enomamne apma eke welamuhup fug.

⁷ Hit henebe o kwenang At henakni TUHAN Allah en og-hesahumu etmano mundoho kwik lahupdeg wereg man, o kota misig fam etmano en ap hit henunggul unuk on eke enggik elegdoho wereg halug de, hiren henonggwareg fahet neg leho fahat-dauk kwit at anyo let-duk fug angge embesehup hayog.

⁸Ite hiren henenda fano atlug aren anggolo deg angge etano higitdoho ombaleg angge hagdoho og-umuhup fano.

⁹Hit wenggelduk siag on ai henendama kuhumu tahun baleg angge elehap duruk on anyo mun horog aik wahama ulug ombaleg angge og-utuk ale embesehup aire fug. Hiren henangge ombaleg angge apdoho og-umuhup fug halug de ap ai en henakni TUHAN fam airoho dehesa ulug olukap duhumu, hit ap homi su kwasikdoho duruk on bohup.

¹⁰Hiren ap anyo fam henenda fano en, og-itmin fano bolug og-utuk halug de At henakni TUHAN Allah en hiren di on su on durukmu fanoap henobaharuk karuhu.

¹¹ Hit ap homi Israel on henesahalimu re ap homi enangge eleg on fomane lamuhup mu, an den hit henenda sako on atlug let-enepuk kamuk ulug melal-henebihi,” ulug hweag-esebag.

¹² Airoho hweag-esebagdeg eke hweag-esauk kwit, “Ap homi hiron en eke ap en halug oho, hwelani en halug oho, enamingming angge welatmin ulug ebe onggo bal-dauk halug[14] de, at ai ebe tahun folfalik en etare hat heyabuk wutuk karuhu, famen de tahun sabit angge halug de loloho wilibi fesehup.

¹³At henamingming angge loloho wilibi foruk on anyore we enggik abie lowag ulug fotog-esauk kamuhup fug.

¹⁴We henenda sako fam At henakni TUHAN Allah en hit og-hesauk angge, kambing, domba, halug oho, anggur, gandum halug oho eke og-umuk.

¹⁵Hit ohore atam o Mesir ap homi enamingming angge weregman At henakni TUHAN Allah en loloho wilibi henobahaik wahasi anyo ebet hakiyug. Ai fam de an den wene melaleg su hit henobam hweag-hesauk kahi.

¹⁶Famen de at henamingming angge anyo hat inim, hat heyog indip kwe on inim enda hundig boruk kwit lauk ale erim en hinim welatmin boruk halug de,

¹⁷at anyo walug o sokolma lalug de esanggo folole fohupmu, at anyo hit henamingming angge mundoho-mundoho hinim welaruhu. Ai higitdoho henamingming angge hwelani on halug oho airoho debeseruk kamuhup.

¹⁸Ne, hiren henamingming angge misig loloho wilibi feseruk kwit halug de at mundoho tahun folfalik en hinim wereg lit onggo we minggiroho neg og-utuk kweleg[15] yabuk henepuk katsi mu re henenda wat-da fug. Wene melaleg su neg duruk kamek, ne airoho duruk halug de At henakni TUHAN Allah en henobam fanoap henepuk karuhu,” ulug hweag-esebag.

¹⁹ Ai ebagdeg hweag-esauk kwit, “Wam sapi, domba, kambing, omalik yohombuk on keram endetuk on aire At henakni TUHAN Allah obahet foruk kamuk. Sapi aire kwenang habulukwag ulug anduhunmu habulduk angge berele folug duruk on ai fahet duk fug, ne domba ai mel de oruk baluk fug.

²⁰Di tahun su tahun hundig-hundig de hit inim it henomaliki inim, wam ai ino At henakni TUHAN Allah en obale momaloho fesimu etmano en nauk kamuhup fano.

²¹Ai famen de wam anyo lahe ahapmale deg lit, eyog holuroho, il hupnoho, ite ahapmale amu on famen humon deg halug de, wam ai At henakni TUHAN Allah fahet ulug walug feik waharuk kamuhup fug.

²²No rusa inim kijang inim nauk kahep hagdoho ap homi fano on mel, emereg on mel no omano henobam en nauk kamuhup fano.

²³ Amep neg de nauk kamuhup fug famen de ik hagdoho kwenangma hilil-esahup fano,” ulug hweag-esebag.