Read Ninia Yali ULANGAN 16 Bible Online

ULANGAN 16 - Ninia Yali bible

ULANGAN 16

¹ Airoho hweag-esebagdeg eke hweag-esauk kwit, “Nukoho Paskah fahet ebetuk kwit, henakni TUHAN Allah leho foruk kwit de bigalem Abib ai fam duruk kamuk. Bigalem ai fam de hit o hup angge o Mesir en loloho wilibi henobahaik wahasi anggere.

²Hiren henakni TUHAN Allah leho foruk kwit ulug nukoho Paskah ebetuk salim aire obale At henakni TUHAN en momaloho forukmu etmano lalug, henowam sapi, domba, kambing halug en misig eke nukoho Paskah fahet foruhuk on ulug watuk kamuhup.

³Wam nukoho Paskah fahet ulug watuk on aire roti fituk angge eleg on fam wirig angge inim nauk kamuhup. Hit o Mesir embeselug siag-biag wilibik waharuk kwit duruhup hagdoho roti fituk angge ragi eleg angge fam weraho on aire henenggik nukoho sabiren fam nauk kamuhup. Hit henebe henoluk wereg lit o Mesir hit anggin-fanggin hauk katuhupmu etmano embeselug wilibik waharuhup salim anyo fahet wenggel neg hauk kamuhup en de, roti unuk anggin-fanggin ai nauk kamuk.

⁴Nukoho sabiren eta fam de o hit welamuhup kwe etma mundoho en ap misig eke en fituk angge obam olma foroho laruhu hayog. Wam endetuk on nukoho keram on anyo fam watuk on halug de hup ai salim neg mundoho abirangge nauk kamuhup.

⁵Wam nukoho Paskah ai ebetuk kwit watuk on fahet halug de o kwenang hit henebe welamuhupmu ulug og-hesasimu etman de watuk kamuhup fug, we At henakni TUHAN Allah en obale momale fesimu etman neg watuk kamuhup. Wene ai on de hit o Mesir embeselug wilibik waharuk kwit duruhup hagdoho, hiren mo obuk ik lauk kweleg duruk kamuhup.

⁷Wam ino etmano osoho folug, obale At henakni TUHAN Allah en momaloho fesimu etmano en nalug de, hubet sekandoho henobam buhulduk kamuhup.

⁸Nukoho folfalik en ombolim on fam de hiren roti fituk angge fam wirig eleg on nalug, nukoho sabit anggere henakni TUHAN Allah apne wakoho kabog-duruk kamuhup, ne ai salim de yabuk eke duhup hayog,” ulug hweag-esebag.

⁹ Airoho hweag-esebagdeg wene eke hweag-esauk kwit, “Hit nukoho keram gandum anggen baluhup salim ai en de minggu sabiren wenahaiyug.

¹⁰Wenag halug de hiren henakni TUHAN Allah leho foruk kwit, nukoho anggen yihig balduk salim ulug ebetuk kamuk. Nukoho ai salim de hiren di angge su angge anggen yihig henenggikmu atuk aleroho henakni TUHAN obahet feik waharuk kamuk.

¹¹Hit henakni TUHAN Allah il hanim, obale Aren momaloho forukmu etmano lalug, hit henomaliki inim, henamingming angge inim, it ap homi Lewi on inim, ap homi bohon inim, omalik wetien on inim, homi sohwe hit henobam kota kwe etma wereg on inim, seberoho henahayeg duruk kamuk.

¹²At awene melaleg mundoho ai dipdoho fik-furoho duruk kwit de atam hit oho o Mesir enamingming angge welatuhup ale anyo henapeleg amuhup hayog,” ulug hweag-esebag.

¹³ Airoho hweag-esebagdeg eke hweag-esauk kwit, “Hiren gandum anggen etmano loloho kabog deheg, anggur ahalue mundoho bereloho hwenanggeheg, dulug Soni O Sabo fahet on ai henenggik nukoho sabirenam esetuk kamuhup.

¹⁴Airoho kabog-duruk kwit, hit henomaliki inim, henamingming angge inim, ap homi Lewi on inim, ap bohon inim, omalik wetien on inim, homi sohwe hit henobam kota fam wereg on inim, seberoho henahayeg duruk kamuhup.

¹⁵Nukoho sabiren ai hiren henakni TUHAN Allah leho foruk kwit, obale Aren momaloho forukmu etmano en soni ai esetuk kamuhup. Hiren, Nit nenakni TUHAN Allah en neneyabuk duruk on omano fanoap debeheg, nenanggwenang fanoap debeheg, deheik ulug henahayeg esetuk kamuk.

¹⁶Hit ap homi Israel on en ap on neg mundohore tahun misig fam enenggik henahanam obale At henakni TUHAN Allah en momaloho fesimu etmano At henakni TUHAN Allah mot-dul ulug waharuk kamuhup. Waharuk kamuhup ale aire, eke nukoho Paskah fahet anyo ebetuk li, eke Soni Anggen Baleg anyo ebetuk li, ne ekere Soni O Sabo anyo fahet ebetuk li, waharuk kwit, ap enebe hundomog en obahet foruk on ulug,

¹⁷At henakni TUHAN Allah en henenggik donma og-hesauk aleroho, ne hiren dehe halereg bolug neg walug waharuk kamuhup,” ulug hweag-esebag.

¹⁸Airoho hweag-esebagdeg eke hweag-esauk kwit, “Hit henobam o kota hundomog At henakni TUHAN Allah en og-hesasimu etma ap homi wene katukdoho bilingguruk kamag ulug, it ap wene katukdoho balduk enap inim, foma yabuk amu on fahet duruk on inim unduhuk fesehup.

¹⁹ Airoho unduhuk fesehupmu, iren we enendaman bolug neg wene kong-deheg, foma fil neg inibil atlug foma fil siaho feseheg duruk kamuhup fug. Ap homi en enenggik apmane hwelalug nauk on aire ap homi inil bug apdoho feserukmu, ap enenda wereg on inim, bekitdoho uruk on inim famen oho airoho hwelauk fam wene katukdoho kong-duruk fug anggere, enenggik apmane hwelauk kamuhup fug.

²⁰Hit henakni TUHAN Allah en o kwenang og-hesasimu etma henobam finik-fanoroho mun yugdoho welamuhup en de hiren katukdoho neg duruk kamuk.

²¹ Hiren henakni TUHAN Allah obahet waroho yaldukmu ulug obale wutuk kwit halug de enanggembu Asyera fahet e doung deg on fam enanggembu ilit deg angge anyo foma fil etma fouk fug,

²² Ne, At henakni TUHAN Allah en de airoho duruk on ai fahet endama erim borukmu, hiren kembu mot-durukmu ulug e unduhuk fouk fug.