Read Ninia Yali ULANGAN 17 Bible Online

ULANGAN 17 - Ninia Yali bible

ULANGAN 17

¹Wam sapi, domba oho ahapmale wereg on aire At henakni TUHAN Allah mun endama erim deg anggere At obahet ulug feik wamuhup fug.

²Hit henesanggo hol-hauk men lahe o kota misig fam eke, ap eke en wene abug wene katukdoho wareg on anyo inim sahaloho feheg,

³ At awene melaleg anyo inim sahaloho feheg, disireg amu on fahet allah-ap debelug apne weheg, obahet deheg disi halug inim, mo, bigalem, sohwalanggen inim, mot-disi halug inim de,

⁴hiren fik-furoho ayo wiruhup. Airoho ayo wiruhupmen lahe kwasik on ai hit ap homi Israel on henesahalimu en atsi halug,

⁵ap kwasikdoho disi on aire o kota dag fil walug wilibik lalug, helep hwik helep binggi wariyug.

⁶ Airoho duhup famen de we at duhu ale ai ap biren on en oho alongdoho en oho inil hausa halug neg wariyug. Ap misig en an nil diroho hauihik ulug uruk on fam de ap eke waruk fug alereg.

⁷ Watuk kwit de at il hauk ahun ai en dag helep keram aren opnag deberukmu, it ap homi mundoho etmano en fobik at ombolim watuk kamuhup. Hiren airoho duruk fam kwasik on enam atuk on anyo elehapdoho foruk kamuhup ai.

⁸Wene unggum eke enam atuk mu it ap wene katukdoho kong-duruk enap etmano en kong-duk ale anggin atuk halug, ne wene ai lahe ap fetagdoho watsi on fahet ane, abug bale folug watsi on fahet ane, enengge fahet nili-hili uruk halug ane, enahap bal-bal atuk halug ane, hit At henakni TUHAN Allah en obale momaloho fesimu etmano lalug,

⁹henawene ai it Lewi enap Allah il hanim duruk on etmano fam inim, etali em ap wene katukdoho balduk on yabuk duruk kwit wereg on anyo fam inim henawene walug kwelabik lalug, iren kong-nesowag ulug embeseiyug.

¹⁰Wene ebere iren kong-hesaukmu re hit de iren diroho duluhup ulug hweag-hesauk ale anyo neg fubiroho duruk kamuk.

¹¹Iren we dorale fahet et diroho ulug hweag-hesauk ale ai walug duruk kamuk.

¹²Ap sa en eke it imam on etmano oho, at wene katukdoho balduk ahun yabuk duruk kwit wereg on anyo oho enele sahalduk halug de, ap ai obam unggum folug binggi wariyug. Airoho duhup ai fam de kwasikdoho duruk on ai hit Israel henobam eleg aruhu.

¹³Airoho duswa urukmu ap homi mundoho en enesanggo holug it enakol aruhu mu, ap eke en airoho ambong seroho eke duk fug alereg laruhu,” ulug hweag-esebag.

¹⁴ Airoho hweag-esebagdeg eke hweag-esauk kwit, “Hit lahe kwenang henakni TUHAN Allah en og-hesasimu etma sebelik kuhupdeg wereg lit, ap homi enunggul unuk hit welamuhup kwe etman maseroho wereg on etma enowesi raja wereg hagdoho hiroho airoho nenenda bohup ane?

¹⁵Airoho henenda boruk kwit halug de ap hiren henowe raja ulug unduhuk fohup on aire at ebe henakni TUHAN Allah en momalsi halug, at aire hit henunggul unuk on famen halug, unduhuk fohup en de wene melaleg ai fik-furebeiyug. Ap bohon nenowe raja welamag ulug unduhuk fouk fug.

¹⁶ At raja halug de autsi sehen foroho on tentara fahet wam kuda dog yapuk on ulug humdoho foroho laruhu fug. At henakni TUHAN Allah en de ap homi An nomaliki su o Mesir enambol somban lahup fug isimu re ne ap homi su o Mesir kuda [16] onggo balik lakiek ulug mon-enebuhu fug.

¹⁷ At raja welaruhu halug de aren TUHAN ambolma ap debelug duruk kam no ohwesi humdoho oho laruhu fug. At ohore angge emas, perak inim fam enggik dungap dauk karuhu fug.

¹⁸Ap misig eke raja welamag ulug unduhuk folug halug de, ap ai buku Allah awene melaleg diroho diyug suroho diyug ulug buku keram on famen oko baleg on it imam duruk on Lewi enap etmano en foroho wereg on anyo misig eke og-utuk kamuhup.

¹⁹Airoho og-utuk mu aren buku anyo aluluk wereg ma, aren akni TUHAN Allah anyo along wereg ulug leho feheg, awene melaleg buku ai ilonggoma baleg wereg on anyo dipdoho deheg, duruk ale mamul-dauk karuhu en de at ebe oluk welaruhu huli ai buku ai hindik-hundig kumu duruk karuhu.

²⁰Aren asugun kaindoho kumu duruk halug de aren an neg fano it ap homi etma sebeleg hag beheg, TUHAN awene melaleg wereg on anyo obabut nangginoho ulug mel ohore sahaloho fouk eleg angge deheg, duruk karuhu. Airoho duruk kwit at ebe inim aren ondohoma on inim it enunggul unuk on anyo hwal-enepuk kwit neg welamuhup,” ulug hweag-esebag.