Read Ninia Yali ULANGAN 18 Bible Online

ULANGAN 18 - Ninia Yali bible

ULANGAN 18

¹Airoho hweag-esebagdeg eke hweag-esauk kwit, “It ap homi Lewi enap mundoho aire yabuk imam on kamag ulug unduhuk fesesimu, ite kwenang ap homi Israel on en foma etma hwelahup fug. It aire Allah fahet ulug og-irik waharuk angge inim, waroho feik waharuk angge etmano inim, nauk kwit enoluk welamuhup.

² It enakni TUHAN it fam wene abug hweag-esasi higitdoho, it fahet de enakni TUHAN Allah ebe akniap atswa ma, it enori foma enanggwenang enonggwareg en on wereg hagdoho welaruhu fug.

³Ap misig eke wam sapi, domba oho eke waroho Allah fahet foruk halug de, wam enggik inim, oroholanggen inim, ahum inim, aire it imam on anyo enengge amag ulug og-esauk kamuhup.

⁴Gandum anggen balduk on en atam dam on inim, anggur ahalue inim, zaitun ahalue inim, domba oruk inim, atam dam on aire it enobahet foruk kamuhup.

⁵Hit ap homi henunggul unuk Israel on etmano henesahalimu en de it Lewi enap aire imam mundoho-mundoho duruk kamag ulug henakni TUHAN Allah en momal-enepsi.

⁶Hit ap homi Israel on welamuhupmu o kota etman eke ap Lewi on misig eke obale At TUHAN en momaloho fesimu etmano watlug welatmin boruk halug de,

⁷it ori Lewi on foma etma wereg lit Allah obahet duruk anyo hagdoho at oho airoho imam en duruk aleroho duruk karuhu fano.

⁸Airoho durukmu, it imam foma nauk angge og-esaukmu hwelauk anyo hagdoho at oho airoho hwelauk karuhu. Ne, at eyog indip kwe en hweag-dauk on etma at fahet neg,” ulug hweag-esebag.

⁹Airoho hweag-esebagdeg eke hweag-esauk kwit, “Hit lahe o kwenang henakni TUHAN Allah en og-hesasimu etmano mundoho kwik lahupdeg halug de it ap homi enunggul unuk etma wereg on en enobabut naleg-halegdoho duruk ale etma hiren ilit enebuk fug.

¹⁰ Ap homi hiron en de henomaliki waroho yaldukmu etmano yalukwag ulug og-esa fug. Ne, ap misig en eke hein og-angge aheg, eneg ale heraruruk on aheg, ambol fam angge aheg, ite,

¹¹ ap homi waratuk on enaheime inim seberik laheg, hwalon aheg, duk fug.

¹²Ap homi airoho enobabut mun kwasikdoho duruk on aire At henakni TUHAN Allah en mun erim boruk kwit de, ai fam ap homi enunggul unuk wereg on ai hit henalukwema en muko wilibi feseruk ai.

¹³ Aireg ma re hit henenda abirangge fam henakni TUHAN Allah obahet neg duruk kwit apne wauk kamek,” ulug hweag-esebag.

¹⁴At Musa en airoho hweag-esebagdeg, wene eke diroho hweag-esebag: “Ap homi enunggul unuk o hit lahupdeg welamuhupmu etma wereg on enobabut de ap homi eke fobik aruhu ale fahet hein-og angge deheg, eneg ale hera deheg, duruk on wereg ma lahup. Famen de hit henakni TUHAN Allah en airoho duhup fug ulug ele huli fesi.

¹⁵ We an den Allah ele hweag-hesauk kahi hagdoho hweag-hesauk kamag ulug ap eke unggul unuk niron en eke henakit mondorik waruhu. Airoho mondorik waharuk halug de hiren at fam[17] ele holoho neg duruk kamuk.

¹⁶Atam hit henebe kabogdoho Dom Sinai fam welatuhup li etano, hit henebe waratuk ale fahet henekol en uruk kwit de, nenakni TUHAN Allah ebe indok ambulbul anggelegma wereg lit ele hweag-nesaukmu nenesanggo holeheg, ebe ninil heheg eke fobik airoho duhuk fug uruhup.

¹⁷Airoho uruhupmu At henakni TUHAN Allah en uruk kwit, Iren ehesa aire enendama en wenggele folug ehesa ulug an hweag-nitsi.

¹⁸Anggere ap iron eke haren it hweag-esauk kahen ai hag hweag-esauk kamag ulug henekit monde feik waruhuk. Monde feik watlug wene ai hweag-esauk kamag ulug An den neg hweag-uruhuk. Airoho hweag-uruhukmu, aren[18] wene diroho-suroho duruk kamuk ulug hweag-uruhuk on anyo ap homi etma hweag-esauk karuhu.

¹⁹ Aren An nunuk yiko[19] hweag-esaukmu ap sa en eke at holoho duruk eleg halug de An den unggum enobam foruk karuhuk.

²⁰Aireg famen de ap An nele hweag-hesauk on en, diroho iyug ulug hweag-om fug kweleg akol eleg angge wene endaman bolug An nunuk yiko hweag-hesauk halug de ebe mundoho wariyug. Ai hag it ap an nele hweag-esauk on en hag amu on Henakni Allah obalma debelug at unuk fam hweag-hesauk halug de enebe enowariyug, ulug isi.

²¹Aireg famen de hit henendama en at aire nenakni TUHAN en mondorik wahasi on en hweag-nesauk a, mondorik wahasi fug on en hweag-nesauk a, ulug nangginoho fubi debehe halereg ulug henendama boruk kahep ane?

²²Ap eke Allah ele hweag-esauk on en wene fobik aruhu on fahet henakni TUHAN unuk yiko hweag-hesahu famen, ebe atuk eleg halug de wene aire At TUHAN en hweag-uruhumu uhu fug. We at ai en neg onggwareg unuk yiko uhu anggere hiren at ebe fahet henakoldoho welamuhup hayog,” ulug hweag-esebag.