Read Ninia Yali ULANGAN 19 Bible Online

ULANGAN 19 - Ninia Yali bible

ULANGAN 19

¹ At Musa en airoho hweag-esebagdeg eke hweag-esauk kwit: “At henakni TUHAN Allah en ap homi enunggul unuk enap etma mundoho elehap debelug, it enobam hit og-hesahumu enobam bumbuk inim, enobam wirig inim hit hwelahupdeg etma mundoho wereg lit de,

²O kwenang etma re henahanma yohwan-debelug de o bumbuk hundomog en o sili misig ap homi en it eke enowatlug o etma lauk kamag dohore, horogdoho lale deg ma neg foruk kamuhup.

⁴Airoho forukmu ap eke en fetagdoho ap aselei on fug famen ware folug halug o sili misig etma fam eke akol en laukmu at oluk welaruhu.

⁵Wal-heheg de ap biren e ohweimu e murukoho lit lalug e mutuk men, are eke e mutuk on anyo eyaha anggen ombo famen heneko lauk kwit are eke anyo muhuk feik laukmu wararuhu. Airoho debelug at are apenen fug famen we fetagdoho muhuk foruk on aire aren siag duhu fug mu, o along baloho fohupmu etma misig fam eke at ahap wendat-amag ulug lauk karuhu. O along balegma ai lahe we misig en felep man de lauk ale yat atuk en duruk men, it wareg fil on foma etmano enolok en mutlug lalug ap siag duruk eleg on ai waruk alereg.

⁷Ai fahet de an den o kota henahan along balegma feiyug ulug hweag-hisihi ai.

⁸At henakni TUHAN Allah en it henombasi wene abug hweag-esauk kwit, hit henobam sili wiriloho og-hesahuk ulug hweag-esasi hagdoho og-hesauk halug, ne o kwenang ai mundoho hit og-hesauk halug de,

⁹o along balegma aire henahan eke inim momaloho fohup. (O kwenang aire an den wene diroho diyug-airoho diyug ulug yoho hit hweag-hisihi on ai higitdoho duruk halug inim, hit henakni TUHAN Allah henenda hundig duruk kwit At awene hweag-hesauk ale anyo higitdoho duruk kwit welamuhup halug de o kwenang ai mundoho hit og-hesahu.)

¹⁰Wene hweag-hisihi on ai duruk elegma ap siag duruk eleg on o kwenang henakni TUHAN Allah en og-hesasimu ai en wareg nohouk alereg anggere wene ai furoho diyug,” ulug hweag-esebag.

¹¹Eke uruk kwit de, “Ai famen de ap misig eke en are aselei on kobokwema kahalug, olokdoho apenen ware folug o along baloho wereg ma etma misig on fam eke herag-aik lamin ulug lahu halug,

¹²indip ai on halug de ap owesi o kota melal-enepuk on en ap anyo wol dulug, it wareg wamburuk fil on owesi-autsi en iron anyo unggulmu warukwag ulug og-esahup.

¹³At fahet elaheg bolug henenda duk fug. Hit henebe finik-fanoroho welamuhup en de hit Israel famen ap watni ai welaruhu hayog,” ulug hweag-esebag.

¹⁴ Airoho hweag-esebagdeg eke uruk kwit: “Hit lahe o kwenang At henakni TUHAN Allah en og-hesasimu etmano mundoho aik lahupdeg halug de atam et kwenang huli febag on fam it henori foma fil wereg on enanggwenang huli-huli etmano hihilik la fug,” ulug hweag-esebag.

¹⁵ At Musa en airoho hweag-esebagdeg, eke hweag-esauk kwit: “Ap eke siag durukmu at atam il hauk on en an demdoho nil hihi ulug uruk halug de at anyo fam unggum ohom fug. Ite it enebe biren en ane, it eke inim en ane, demdoho ninil hehe uruk halug neg de su demdoho uruk ulug bohup.

¹⁶Ne, it ap homi eke seyale unggum enobam fohup halug de,

¹⁷it unggum enobam atuk fil inim, it enobam foruk fil inim, it ap Allah il hanim duruk on inim, ap wene bilinggeheg, kong-deheg duruk ahun inim en biling enebeheg, kong deheg dukwag ulug enebe o At henakni TUHAN en somban uruk kamag ulug momaloho fohumu etma Allah obahet yabuk durukmu walug lauk kamuhup.

¹⁸Airoho enobam laukmu, it ap wene enobam feheg, bilinggeheg, kong-deheg, duruk enap etman wene ai fanoroho bilinggi folug ap ai ori enunuk Israel misig on degman unggum enobam eleg famen enele seyale enunuk siagdoho enobam fohupmu halug,

¹⁹ap ai ele seyale are ai fam unggum obam fohumu welaruhu on anyore oko at anyo fam fohupmu welaruhu. Hiren airoho foruk kamuhup halug siag ai on hag eke duruk kamuhup fug.

²⁰Unggum airoho enobam fohupmu, ap homi mundoho en wene ai enesanggo holeheg, enakol aheg, dulug siag ai on eke duruk kamuhup fug.

²¹ Ap homi siag ai on hag durukmu re henenda esa fug angge unggum enobam foruk kamuk. Unggum enobam foruk kamuhup ale aire diroho: Enebe enowatuk halug de enebe at enowatuk kamuhup, inil hwililduk halug inil at hwililduk kamuhup, enaeg en yaun balduk halug, enaeg en yaun balduk kamuhup, enenggik kong balduk halug, enenggik at kong balduk kamuhup, eneyog balduk halug eneyog at neg balduk kamuhup,” ulug hweag-esebag.