Read Ninia Yali ULANGAN 20 Bible Online

ULANGAN 20 - Ninia Yali bible

ULANGAN 20

¹At Musa en airoho hweag-esebagdeg eke hweag-esauk kwit: “Hit lahe it heneselei on inim dog yabik lauk kwit halug de it heneselei on etman enowam kuda humdoho wereg ale fahet inim, kereta ap emberimmu lahalug dog yapil lauk angge humdoho wereg ale fahet inim, it enautsi tentara sehen foroho on esan hit henebe maben deg kweleg it log deg ale ai fahet henakol enebuk fug. Hit henakni TUHAN Allah o Mesir en loloho wilibi henobahaik wahasi on anyo en neg let-henepuk karuhu.

²Ne, hit henebe dog owan yabik la fug angge wereg lit de ap nabi misig eke inaik watlug de diroho hweag-hesauk karuhu:

³Yaho nori Israel henap, henesanggo holiek! Yohore hit weim kwelabik kuluhup anggere, henenda dot aheg, henekol deheg, henenda sug-sag eheg duk fug.

⁴Hit henakni TUHAN Allah At hit hinim lauk kwit let-henepuk katmisi, ne Aren neg hit henalong amag ulug henobahaik kohoreg, ulug, hweag-hesauk karuhu.

⁵Airoho hweag-hesaukmu, it sehen foroho on enowesi leho on perwira etman en enele diroho hweag-hesauk kamuhup, Ap eke o ket witihin deg owan o il wareg eleg angge welahep on eke wereg a? Wereg halug de at dog yabik lauk men ap en watluswa ma obam ap amu on kuhupdeg welamuhup anggere at obam sombandoho lamisi fano.

⁶Ap eke heyabukmu anggur a ket yatihin deg anggen owan dahanuk eleg angge eke welahen a? Wereg halug de at dog yabik lauk men ap en watluswa ma ahan anggur ahaik ap amu on en nahup aire fug anggere at obam sombandoho lamisi fano.

⁷Ap hit henesahalimu en eke hohwe hwelahuk ulug momaleg lahen on eke welahen a? Welahen halug de, hat dog yabik lauk men howaruhupmu, ap amu on en hohwe apdoho momaleg lahen on anyo hwelahup aire fug anggere hobam lamihin fano, ulug hweag-esahup.

⁸It sehen foroho on enowesi ai en de wene diroho eke inim hweag-hesahup, Ap hit henesahalimu en sop-sop duruk on inim, henakol on inim eke welahep a? Wereg halug de at ai en it fomane koap kwelap-enebuk alereg anggere at obam sombandoho lamisi fano, ulug hweag-hesahup.

⁹It sehen foroho on enowesi anyo en airoho it enautsi tentara etmano hweag-esalug de ap esan lohwaleg etano deg aleroho enowesi melal-enepuk on ulug enenggik dum bil heg hweag-isil lahup.

¹⁰Hiren lahe o kota misig fam bin kwik laul boruk kwit halug de atam de it ap homi o etma wereg on anyo en nit hit henapma ahe ulusa a, eleg a, ulug nangno esahup.

¹¹Airoho nangno esauk men it etmano en enobam sok ele lareg on anyo husoho nit hit henapma ahe uruk halug de, it enebe mundoho hit henamingming angge atlug yabuk henele omamne fam duruk kamag ulug debesehup.

¹²Famen de ap homi o bumbuk ai wereg on etmano enabi atlug, nit it enapma amul aire nenerim, niroho dog yapul nenenda boruk halug de, hiren o kota ai walinggik lauk nu.

¹³Walinggik lauk men, hit henakni TUHAN Allah en o kota anyo sebelik kuk ale deberuk halug de, hit kulug ap homi o wereg on ap on neg mundoho enowaruhup.

¹⁴Famen de homi inim, enomalik inim, enowam inim, di angge su angge o kota ai fam wereg angge etma re hit hwelakiyug. It henaselei on en enangge mundoho etma re At henakni TUHAN Allah en hit henenggikmu og-hesaukmu hiren henenda boruk aleroho hwelauk kamuhup fano.

¹⁵O kota o hit welahepma etman yat-yat wereg on etma fam de airoho debeseruk kamuhup.

¹⁶Famen de o kota ai lahe kwenang hit henakni TUHAN Allah en og-hesasimu etma fam wereg halug de, ap homi wereg on de mun felelengdoho enowariyug.

¹⁷At henakni TUHAN Allah en melal-henepsi hagdoho, hiren ap homi Het enap inim, Amori enap inim, Kanaan, Feris, Hewi enap inim, Yebus enap inim, mun felelengdoho enowariyug.

¹⁸It ap homi etman de amu on fahet allah-ap debelug apne wauk on mun me nape on anyo fahet duruk ale mamul-henebuhupmu, hit henakni TUHAN Allah il hanim siagdoho henobahauk no enebe mundoho enowariyug.

¹⁹Hiren o kota misig walinggoho sebelik kuhupdeg etma anunu doho wereg lit halug de e anggen yihig wereg on de muruk fug. E aire hit heneselei on fug anggere anggen neg nahup fano famen de e ebe wilibig on de siahap debouk fug.

²⁰E amu on de hiren muruhupdeg de o walinggoho e belaril lahalug o kota anyo mundoho bin kuhup,” ulug hweag-esebag.