Read Ninia Yali ULANGAN 21 Bible Online

ULANGAN 21 - Ninia Yali bible

ULANGAN 21

¹Airoho hweag-esebagdeg eke hweag-esauk kwit, “O At henakni TUHAN Allah en og-hesasimu etman ap eke san watsi henapeleg degman ap wareg neg yabuk men hweahalug halug,

²it henowesi melal-henepuk on inim, it wene unggum bilinggulug kong-duruk enap inim, en o ap homi horogdoho wereg ma etmano en de ap wareg on anyo wereg ma il nunggwe en yatdeg wereg ulug ilit duruk kamuhup.

³Airoho ilit durukmu it ap o horogma wereg on anyo enowesi en wam sapi ket sauwe on misig yabuk wirukwag ulug ebe wausa fug on eke eneko fohup.

⁴Airoho eneko folug, sapi anyo walug de ik firitog-am fug angge wirig atuk on aegma, ne kwenang mel yabuk wiroho yatswa fug mu walug lalug, etan wam anyo anggolobag sombo esahup.

⁵Airoho durukmu aire it Imam Lewi en oho iren wene ap enolok fam duruk on fahet de iren neg kong-duruk kamuhupmu it oho etma lauk kamuhup. Ne it aire At Allah obahet neg deheg, At unuk fam ap homi fanoap debeseheg duruk kamag ulug wereg ma.

⁶Airoho debelug it ap homi enowesi o kota horogma ai on omano wam sapi ai emberimmu en enenggik omatuk kwit,

⁷enele diroho uruk kamuhup, Ap aire san watsi aire nit de nenapeleg, ne niren ap ai watuhuk de fug.

⁸Nenakni TUHAN, ap homi Israel on hat homaliki o Mesir en loloho wilibi nenobahaik waharihin on etmano nenesiag hapelehapdoho nenobahain. Ap siag disi fugmen wareg on ai fahet iren neg dukwag ulug bouk fug we hapelehapdoho nenobahain, uruk kamuhup.

⁹At henakni TUHAN en airoho duhup boruk ale higitdoho duruk halug de ap wareg on ai fahet de iren neg dukwag bohu fug,” ulug hweag-esebag.

¹⁰Airoho hweag-esebagdeg eke hweag-esauk kwit, “Hit weim yabik lauk men At henakni TUHAN Allah en hit henalongap henobaharukmu ap homi dog ambiangma en sen eneplug halug,

¹¹it sen-enepuk on etman it homi inim sen-enepuk on etman homi enerohole mun fano on eke hit henenda naukmu hwelamin boruk halug,

¹²hwe anyo hwelalug henobam waharuk kamuhup. Airoho walug waharukmu hwe anyo aren oruk baloho[20] enggiahap kongdoho,

¹³asum amu on wan-dauk karuhu. Airoho debelug at anyo akni isinga waratuk on etmano fahet bigalem misig hunduko fong watuk kwit olma welaruhu. Airoho dil lauk em neg de hiren at ebe hwelauk kamuhup.

¹⁴Airoho hwelalug en fobik at ebe herim duruk halug de at ebe koloroho lowag ulug hweag-umuhup. Ne, at ebere hat homamne fam hinim seberuhupmu re hit henamingming angge hagdoho debeheg, onggo baleheg duk fug,” ulug hweag-esebag.

¹⁵Airoho hweag-esebagdeg eke hweag-esauk kwit, “Ap misig eke en ohwesi biren og-unusug men, homi enebe birenet enomalik ap angge neg endag-enebuhup famen de omalik keram endag-aruhu on aire at ohwe enda hundig on anyo en de fug halug,

¹⁶ap anyo en angge abinggi angge keroho at omaliki yohwan esamin bohu hayog. Ne, aren ohore abinggi angge omalik wandeba on anyo en hwela angge famen de ohwe enda hundig on en omalik ondoho on anyo fam og-uruhu hayog.

¹⁷At abinggi angge mundoho etman omalik ai at hwe enda hundig on anyo en ondoho on fug deg kweleg de, birenam eke inim dopnoroho omalik wandeba on ai fam og-uruhu. Omalik wandeba on angge ulug aire ap akni anyo en uhureg, wene melaleg fam wereg higitdoho omalik ai angge amag ulug wereg on etma abirangge abinggi angge og-uruhu,” ulug hweag-esebag.

¹⁸Airoho hweag-esebagdeg eke hweag-esauk kwit, “Henomalik ap angge eke enda omamne deg lit, akni isinga fam yeik lahaboho neg durukmu, isinga akni en unggum og-umuhup famen holduk eleg neg halug,

¹⁹it isinga akni en omalik anyo walug it ap homi enowesi o kota wereg on fam obahet wene katukdoho balukwag ulug walug waharuk kamuhup.

²⁰Walug watlug iren ap enowesi o kota wereg enap etmano fam uruk kwit de, Nit nenomalik sure enda omamne deg lit nit nenobam yeik haroho neg duruk kwit nit nenele mun holduk fug. At de uang mun elehap duruk kwit de ik siomo duruk on naukmu wenenebo duruk on neg duruk.

²¹Ulug airoho hweag-esaukmu it ap homi ap on neg o kota ai wereg on etmano en omalik anyo helep fam fohouroho waruhupmu wararuhu. Airoho duhup ai fam de hiren siag on ai elehapdoho fohupmu, it ap homi Israel on en enesanggo holuhup deg, duhup ale ai fahet enekol neg aruhu,” ulug hweag-esebag.

²²Airoho hweag-esebagdeg eke hweag-esauk kwit, “Ap eke siag duhumu unggum obam fohupmu wararuhu men ebe wareg anyo e unduhuk fam borebehup halug,

²³ ebe wareg angge aire et embesehupmu hup hundig welaruhu hayog, we nukoho anyo salim neg salik lahup. Ap wareg e fam welaruhu on ai fam At Allah en hit henobam welahepma etmano wip debehu. Anggere, o At henakni TUHAN Allah en og-hesasimu etma siahapdoho fehep ha nore ap wareg ai saliyug.