Read Ninia Yali ULANGAN 22 Bible Online

ULANGAN 22 - Ninia Yali bible

ULANGAN 22

¹ Ap homi hit henunggul unuk on enowam sapi, domba oho eke longgo uhureg wereg ma hit hinim hahupdeg halug de, henapenendoho hehe fug kanggo en duhup fug famen de wam anyo walug at onggwareg ahun fam og-irik manu.

²Ne, at anggo wareg ahun lahe obam yatdeg halug, ite hit hun onggwareg ahun obam henapeleg halug de, wam anyo walug hit henobam lakiyug. Walug lalug weregman at onggwareg ahun anyo heraril waharuk halug de onggwareg og-umuk.

³Hiren wam keledai misig hweahalug halug inim, sum wan-duruk on halug inim, ite we amu angge it ap homi hiron enengge hwehalug halug oho airoho neg duruk kamuk.

⁴Wam keledai, sapi it henori hit henunggul unuk en on kobokwema yingatuk halug, hiren hehe fug kanggo embesouk fug, ite wam ai letdoho unduhuk feiyug.

⁵It homi sum ap en wan-duruk hagdoho wan-deheg, ne it ap en sum homi en wan-duruk hagdoho wan-deheg duruk on fahet de At henakni TUHAN Allah en erim borukmu, airoho duruk kamuhup fug.

⁶Hiren suwe a e wilibig on fam oho, kwenangma oho wirigmu suwe isinga anggen fam sahaun deg halug ane, ite omalik inim wereg halug ane, suwe isinga ai wa fug.

⁷Hit henangge di angge su angge weregdoho neg wereg lit henoluk yatdoho welamuhup en de suwe omalik etma re hwelahup fano famen, suwe isinga neg de daroho lowag ulug wilibi fesehup.

⁸Hit henobam wiruhupdeg halug, o dum ambiang kwe elehet maseroho wahup. Airoho debehup men ap eke o dum en bule wambik waharuk kwit wararuhu halug de wene hit henobam aruhu fug.

⁹ E anggur yabukmu re we anggur neg yariyug amu on eke yaruk fug. Ne, hiren yaruhupmen halug ohore amu on ai anggen inim, e anggur anggen inim wahup fug.

¹⁰Wam sapi misig inim wam keledai misig inim yabuk witil lauk kwit kwenang moholdil lauk angge misig on fam ilil-enebuk fug.

¹¹Sum wan-duruk kwit, sum domba on fam yihig on inim, hekel lenan fam yihig on nim misig salim wan-duk fug.

¹² Hit henasum wan-duruk on atog kwe re hekel indip misigmu soaloho boriyug,” ulug hweag-esebag.

¹³Airoho hweag-esebagdeg eke hweag-esauk kwit, “Ap misig eke en hwele duhum on eke inim hwelauk, famen fobik en hwele anyo erim atuk mu,

¹⁴aren ele seiale obam fug mu dopno hauk kwit, Hwele sure nit owam lombo-am fug mu re ap eke inim nohouk eleg angge welatsi on de fug, uruk halug.

¹⁵It hwele isinga akni en sum kain it ket lombo atswareg mep wambisi on are deg angge anyo walug, Nit nenahalohore aren wasi li eta ap inim seberuk eleg angge welatsi on. Ulug sum kain anyo eneg angge walug it ap enowesi o kota wene katukdoho baldukmu etmano unug esa lauk kamuhup.

¹⁶Airoho unug-esa lalug, at hwele akni anyo en de diroho uruk karuhu, An de hwele nahaloho ai ap su ohweap dowag ulug og-itihik famen de ketia at erim disireg duruk.

¹⁷Airoho disireg de aren ele seiale obam fug mu dopno hauk kwit de hwele su an wauihik li re at ap inim nohousa fug on ulug eneg angge welatsi fug eheik. Famen de eneg angge an nahaloho eta li em ap inim seberuk eleg angge we wereg kweleg og-itihik anggere sum kain su hwe hwelasi salim doaloho nohousa on mep su hakiek! uruk karuhu.

¹⁸Airoho urukmu ap homi it o kota wereg on enowesi etmano en ap anyo wol dulug yeik watuk kamuhup.

¹⁹Yeik watlug de aren airoho isi on onggo ulug uang perak on 100 en forukmu, aren ap homi Israel on enunuk sebeloho fesimu ulug uang anyo at eyamal og-utuk karuhu. Airoho debelug hwele anyo re aren mundoho og-dalug lit inim minggiruk fug angge weregman neg enoluk welamuhup.

²⁰Famen de ap anyo ele dopno hauk on anyo lahe demdoho at ohwe anyo hwelauk li at fam ap inim seberuk eleg angge welatsi ulug eneg ale eleg latsi halug,

²¹hwele anyo isinga akni enobam sokolma etano walug lalug, at hwele ai ahun owan hwela fug angge akni obam wereg lit en ap inim seberisimu, aren ap homi Israel on enunuk sebeloho fesi ulug it ap on neg o kota ai wereg on en helep fam fukdoho waruhupmu wararuhu. Hiren at obam unggum fohup ai fam siag on anyo elehapdoho fohup ai.

²²Ap misig eke lahe ap amu on enohwesi inim duruk li hweaho feselug halug, it enebe birenet duhup onggo binggi wat-enebuhup. Hiren airoho duhup ai fam de siag on anyo elehapdoho fohup ai.

²³Ap misig eke en at hwele ap amu on en momaleg lit hwelahuk ulug deg on inim seberurukmu hweaho feselug halug,

²⁴airoho duhup on ai fahet de it enebe o kota dag fil og-eneplug wilibik lalug helep fam fukdoho binggi enowaruhup. Hwele aire at ebe o kota ilonggoma en ap en airoho duruk kweleg ele ngaril lauk em aben holuk famen de ngarisi fug mu ulug waruhup. Ne, at ap aire aren ap amu on en hwele ai hwelahuk ulug momaleg on fam inim seberisimu ulug waruhup. It enebe birenet airoho enowaruhup ai fam de siag on anyo elehapdoho fohup ai.

²⁵Ai famen de aroho yabukmu en hwele ap en hwelahuk ulug momaleg on fam ap enomamne fam seberuruk on aire awene amu. Ai fahet de we ap ai neg disi onggo ulug binggi waruhup.

²⁶Ne, at hwele aire aren disi onggo ulug wene obam folug waruk fug alereg ma hiren at obam diroho-suroho eke debehup fug. Wene ai obabut de ap eke en ap amu on eke fam yeik haroho bug uruk kwit binggi watuk mu duruk hag deg.

²⁷Ap en hwele ai inim seberusa ale aire yabukmu en disi, ne at hwele ai ele ngarisi famen de ap amu on eke let-dik lausa fug.

²⁸ Ap misig eke en hwele duhum on ap en momaleg fug on eke inim seberuruk halug,

²⁹Airoho disi on ai fahet de ap ai en hwele akni fam onggoma uang perak on onggo 50 en on og-uruhu. Airoho og-uruhureg de hwele ai ap omamne fam inim seberusama ulug at ohweap dahureg embesouk fug angge og dalug lit neg welaruhu.

³⁰ Ap misig eke en at akni ohwe inim nohoku fam akni unuk maben apdoho fohu hayog,” ulug hweag-esebag.