Read Ninia Yali ULANGAN 23 Bible Online

ULANGAN 23 - Ninia Yali bible

ULANGAN 23

¹Airoho hweag-esebagdeg eke hweag-esauk kwit, “Ap enogwali oho on nim on ebe baleg on nim, de At TUHAN omaliki on welamuhup fug.

²Ap hesangge omalik, akni isinga sebereg eleg angge en endag-atsi on halug de aren ondohoma on endag-ail lauk men numen huli endag-amuhup on aire At TUHAN omaliki on welamuhup fug.

³ Ap homi Moab on inim, Amon on inim, ne iren endohoma on endag-enepil lauk men neg numon huli endag-amuhup halug ohore TUHAN omaliki on welamuhup fug.

⁴ It aire hit o Mesir en wilibik waharuhupdeg kwe fam waharukmu iren ik mel, siburu mel og-hesausa fug. Ai duswareg en famen oho iren at hun Bileam Beor amloho obam kota Petor o Mesopotamia etma on anyo en hit henobam wip foukwag ulug onggo balswa ai fam.

⁵ Airoho duswa famen de At henakni TUHAN Allah re at Bileam ele uruk on ai esanggo holsi fug. Famen de At henakni TUHAN en hit henobam enda hundig henepuk kwit wip-henepuk on anyo ahamdoho fanoap henobaharuk katsi.

⁶Hit henoluk wereg lit inim, ne welamuhup huli etman inim ohore it ap homi ai let enebeheg, enenggik dung apdoho feseheg duk fug.

⁷It ap homi Edom on de hit henori on deg ma, hiren it ai sebeleg hag bouk fug. Ne, it ap homi Mesir on ohore atam hit o etma welatuhupmu it sebeleg hag bouk fug.

⁸It endag-atswa huli en ondohoma on henahan angge on famen onggombi fil aire it TUHAN omaliki on amuhup fano,” ulug hweag-esebag.

⁹Airoho hweag-esebagdeg eke hweag-esauk kwit, “Hit weim yapuk kwit de hit henobam emet ahep ha on fahet ahaye duruk kamuk.

¹⁰Ap eke hup angge nohoruk men ahalue mani wilibik waharuk fam ebe emet-atuk halug de at de o sabo wirigmu etmano embeselug dagma wilibik lalug welaruhu.

¹¹O hupmu atuk li aren kume wat-dalug mo obuk uruk li aren nikangge o sabo wirigmu kwik waharuk karuhu.

¹²Hiren de o sabo wirigmen dag fil etma miema laukmu obale wep debehup.

¹³Hiren etma lakoho halug de wanggun misig eke miema lalug kwenang habuloho salduk angge fahet walug lauk kamuhup.

¹⁴At henakni TUHAN Allah en hit henebe henobam sabo salegma etmano hinim wereg lit mapnu henusug laheg, it heneselei on famen henalongap henobahakeg, duruk karuhu. Anggere hit henobam sabo saloho nohoruk kamuhupmu etma mun buhundoho foroho lamuk. Hit henesahalimu etman nong-hong deg on eke wereg en At henakni TUHAN hit henobahalug lahu hayog,” ulug hweag-esebag.

¹⁵Airoho hweag-esebagdeg eke hweag-esauk kwit, “Ap enamingming angge misig eke akni obam en wilibik lalug, hit henekit heraho nobahain ulug waharuk halug de at obam lakin ulug hweag-om fug.

¹⁶At o hit henobam kota etma misig eke at onggwareg en momal dauk aleroho fano welaruhu mu hiren at fam hapereg ale neg duk fug.

¹⁷ Hit ap homi Israel on en ap halug oho, homi halug ohore kembu obam wirigmu etma hambena dul ulug la fug.

¹⁸At henakni TUHAN Allah re ap homi en kembu fam wirigmu mot-duruk on fam etmano hesangge nenebukwag ulug dil noruk on inim, hesangge dil noruk on fam saburig angge aire mun erim borukmu, uang hambena duruk on fam lalug hwelauk on aire At TUHAN Allah obam wirigmu an den diroho og-utuk karuhuk irihik deg ulug, walug waharuk kamuhup fug.

¹⁹ Ne, hiren ap bohon fam henauang baleg angge hagdoho og-esalug halug de hiren eke inim dopnoroho nonggwareg og-nimin ulug hweag-esauk kamuhup. Famen de hiren uang halug oho, sum wan-duruk on halug oho, nauk angge halug oho it henori hit henunggul unuk on fam baleg-angge hagdoho og-esalug halug, aren obalma fohuk ulug wauk on aire eke inim sebereg eleg angge onggwareg on og-utuk karuhu. Wene melaleg suroho furoho hole folug duruk kamuk. Hiren airoho duruk halug de At henakni TUHAN Allah en o hit henobam welamuhupmu etma di on su on mundoho henobam fanoap deberuk karuhu.

²¹ Ne, hiren lahe henakni TUHAN Allah il hanim diroho duhuk ulug abug hweag-utlug halug de, At henakni TUHAN Allah re hindik-hundig anyo kereg? Ulug neg hweag-hesauk karuhu anggere henele uruk on ai mun hihildil lauk kamuhup hayog. Hiren folo-folo henele dip-debehup fug halug de siag duhup.

²²Ne, hiren airoho duhuk ulug TUHAN fam abug wene hweag-umuhup fug halug de hit siag duhup fug.

²³Famen de hit henenda henahayeg fam airoho duhuk ulug abug henakni TUHAN Allah il hanim ulug halug de, hiren dipdoho neg duruk kamuhup.

²⁴Hit lahe it henori en enahan anggur a yaho kwe lauk kwit halug de enahan anggen etma hit henenda boruk aleroho nauk kamuhup fano famen, de henesum si yihig hag angge fam yohwat-da fug.

²⁵Hit lahe it henori en gandum a yaho kwe lauk kwit halug de hiren anggen henenggik en baluhup on etma nahup fano famen de, hiren karog ambol simbuk on unuk sabit anyo fam baluk fug,” ulug hweag-esebag.