Read Ninia Yali ULANGAN 24 Bible Online

ULANGAN 24 - Ninia Yali bible

ULANGAN 24

¹ Airoho hweag-esebagdeg eke hweag-esauk kwit, “Ap misig eke en ohwe hwele duhum on misig eke hwelalug duruk men at ebe fam nong-hong deg on eke wereg ma halug[21] erim duhu. Airoho dulug hwele anyo fam surat ebe embeseruk on fahet baloho enggikmu og-utlug lakin ulug hweag-uruhu.

²Airoho og-uruhumu lahe hwele anyo ap amu on eke en hwelahup,

³famen de hwele inim il horogdoho hag weregman erim durukmu surat ebe embeseruk on fahet baloho og-utuk kamuhup. Og-utlug hobam lakin ulug monde feseruk karuhu, ite ahun bireneg on anyo wararuhu ane.

⁴Airoho duruk halug de at hwele ai ahunsi biren deg ma, ahun atam on anyo en hwele anyo nikangge hwelahu fug. Ite hwele aire mun siahapdoho fousa on ulug il fu hauk karuhu. Ne, ap anyo en lahe nikangge hwelauk halug de aren henakni TUHAN Allah il hanim At unuk sebeloho fouk alereg anggere. Hiren siag mun along on anyo o kwenang henakni TUHAN en og-hesasimu etma wereg lit duhup hayog,” ulug hweag-esebag.

⁵Airoho hweag-esebagdeg eke hweag-esauk kwit, “Ap misig aren ket ohwe hwelauk halug de at ai tentara kukwag ulug oho, yabuk ap homi abirangge fahet humon dukwag ulug oho hweag-umuhup fug. We at ebe tahun misig fam eta yabuk we wereg lit at obam olekwe fahet hwaleheg, ohwe enda ahayehap debeheg[22] duruk karuhu.

⁶Hiren henombaleg angge hagdoho ap amu on fam og-esalug halug de fobik demdoho og-nuruhun ulug, eneg angge hagdoho ulug it ai en helep gandum sahalduk angge ai hwela fug. Haren helep ai hwelahun fam de ap ai ohwe omaliki en enebe enoluk wereg lamag ulug dobahat-dalug nauk angge del dahun.

⁷ Ap en hit henunggul unuk on eke il hwilil-esalug, ap anyo en amingming angge hagdoho debelug onggo bal dauk halug de ap ai ebe binggi mundoho wariyug. Airoho duhup ai fam de hiren siag on anyo elehapdoho fohup ai.

⁸ Ap homi fam etma ouk hwenanggo hag on humon eke wereg halug de it ap Lewi on imam wereg on etmano en wene melaleg hweag-esauk aleroho diyug; An den diroho duruk kamuhup ulug it hweag-esauihik aleroho neg duruk kamuk.

⁹ Hit o Mesir en wiliplug waharuk men At henakni TUHAN Allah en hwele Miryam fam disi ale anyo wenggel-hakiyug.

¹⁰ Hiren ap henori amu on fam amu angge eke fobik nonggwareg og-nuruhun en ulug og-esalug halug, hiren ap anyo obam olma kulug asum ebe sum wan-duruk on nangge anyo og-nuruhu en enda lisig ulug hwelag kuk fug.

¹¹We at onggwareg en neg walug og-hirik wamag ulug we dagma nangno hauk kamuk.

¹²Ap ai lahe enggik eleg on halug de at asum ai haren hup hunduko foroho lam fug,

¹³famen de at wandoho nohoukwag ulug onggwareg hup hundig-hundig og-utuk kamuk. Hiren airoho duruk halug de at anyo en hat dang-hapuk karuhu, ne At henakni TUHAN Allah en oho enda ahayeg henobam foruk karuhu.

¹⁴ Ap enenggik eleg on, enangge eleg on, we yabuk onggo fahet neg wituk on it ap homi hiron halug oho, ap homi bohon famen hit henobam kota misig etma fam wereg on halug oho henenggik omamne fam enengge hweleheg duk fug.

¹⁵Nukoho hundig-hundig at yabuk duruk on onggo mo owan obuk uruk kweleg, aren uang ai fahet nangno hauk kwit anggoloroho wereg ma folo-folo og-umuk. At yabuk duruk on fahet onggo folo-folo og-utuk eleg halug aren wene ai fahet akni TUHAN hweag-uruhumu, hat siag disi on ulug hweag-humuhup.

¹⁶ Enomaliki en siag duruk on fahet enaknisi fam onggo binggi enowaruk fug, ne enaknisi en siag duruk on fahet enomaliki fam onggo binggi enowaruk fug. We ap enemu domog enesiag duruk on fahet onggo binggi enowatuk kamuhup.

¹⁷ Ap homi bohon enobam deg ale fahet inim, omalik wetien on enobam deg ale nim del da fug, ne homi sohwe on enesum enenda lisig angge ulug hwela fug.

¹⁸Hiroho o Mesir ap homi enapma enemingming angge hagdoho weregman henakni TUHAN Allah en loloho wilibi henobahaik wahasi ale anyo wenggel-hakiyug. Ai fahet de an den wene melaleg etma hweag-hesauk kahi.

¹⁹ Hit henanggwenang famen anggen yihiruk on balduk kwit halug de gandum alinlan embeseruk on etmano nikangge henembol somban wag la fug. Hit henakni TUHAN Allah en hiren di ale su ale duruk on etmano fam fanoap henepuk kamag dohore, alinlan etma re it ap homi bohon fahet, inim, omalik wetien on inim, homi sohwe on inim, en hwelowag ulug embeseruk kamuk.

²⁰Hiren misham e anggur anggen dahanduk kwit inim, zaitun anggen e fam fuk heg dahanlug halug inim de foma owag fene embeseruk on etmano fahet henembol somban kabog-dik la fug. Etma re it ap homi bohon mel, omalik wetien on mel, homi sohwe on mel fahet embeseiyug. Hiroho atam o Mesir ap homi enamingming angge welatuhup ale anyo wenggel-hakiyug. Ai fahet de an den wene melaleg etma hweag-hesauk kahi.

²²Hit de o Mesir ap homi enamingming angge atuhupdeg welatuhup ale anyo ebet hakiyug; ai fahet de anden wene melaleg su hit og-hesauk kahi.