Read Ninia Yali ULANGAN 25 Bible Online

ULANGAN 25 - Ninia Yali bible

ULANGAN 25

¹Ap Israel on biren en enawene misig eke atuk on fahet wene katukdoho baldukmu etmano en kong-dukwag ulug walug lauk men, ap eke at siag duruk fug, ne at eke siag duruk on esalug halug,

²it siag duruk on anyo fam de yeik warukwag ulug obam foruk karuhu. Airoho hweag-utlug at enowe wene kong-duruk on anyo en ap anyo ebe sahaun ukwag ulug hweag-utlug, wenako at siag duruk on anyo obabut deg aleroho fetnangge watuk kamuhup,

³ famen de henenggik 40 en dahandoho emberim fil de waruk fug, ne alongdoho waruhup halug de ap ai ap homi inil hanim unuk sebeloho fohup,” ulug hweag-esebag.

⁴ Wam sapi gandum anggen bereloho lol heheg belapuk on at na no ulug ambilik kwe baluk fug.

⁵ Wene eke hweag-esauk kwit, “Ap eke are inim enebe misigmu wereg lit are eke omalik ap angge eke ondoho eleg angge waratuk halug de, at waratuk ohwe sohwe anyore it amu on at eyog indip kwe fug on en de wahup fug. Ite at waruk on are anyo en neg hwelauk karuhu.

⁶At anyo hwelahumu enomalik wandeba on endag-aruhu on aire at waratsi on anyo omalik it ap homi Israel on enesahalimu omalik welamag ulug at omalik uruk kamuhup.

⁷ Ap are anyo en hwe sohwe anyo hwelamin fug uruk halug de at hwe anyo ap enowesi o kota wereg on fam lalug de it hweag-esauk kwit, An nombarik anyo en ap homi Israel on enesahalimu ap waratsi on anyo omalik ambiangma on welamag ulug duruk ale nerim eheik, ulug hweag-esauk karuhu.

⁸Airoho hweag-esaukmu it ap homi enowesi o kota wereg on etmano en ap anyo wol halug at inim enele matuk kamuhup. Enele matuk men ap anyo nerim ulug omamne atuk halug de,

⁹are ohwe sohwe anyo it ap enowesi o kota wereg on etmano inil hanim ap anyo aluluk aik lalug de eiyogmu sandal hwililipdoho wandeg angge anyo oko hwik-esalug de, olohotma wasubag sup esauk kwit, diroho uruk karuhu, Ap are en ambiangma ondoho on welamag ulug og-esauk fug halug de diroho debeseruk, uruk karuhu.

¹⁰Airoho debeserukmu, ap homi Israel on enesahalimu ap ai en ondohoma on inim de, Ap eneyog saleg angge sandal oho on uruk kamuhup,” ulug hweag-esebag.

¹¹Airoho hweag-esebagdeg eke hweag-esauk kwit, “Ap biren angge yeik yapuk men at misig eke ohwe en ahun ili oko ap eke ahun aselei on anyo ahap enggalimu on enggik en bete-esauk halug de,

¹²hwe ai elaheg bouk fug angge enggik kong esauk kamuk.

¹³ Hiren anggin ilit duruk angge fam inim seloho kwelapuk angge fam inim seialeroho duruk kwit ap homi lal-enebuhup hayog.

¹⁵Hiren anggin ilit duruk angge inim, selduk angge inim higitdoho demdoho on fam duruk halug de o henanggwenang henakni TUHAN Allah en og-hesasimu etma henoluk eke inim yatdoho welamuhup.

¹⁶At henakni TUHAN Allah re ap homi laloho duruk ale aire erim boruk,” ulug hweag-esebag.

¹⁷ Airoho hweag-esebagdeg eke hweag-esauk kwit, “Hit o Mesir en wilibik waharuhup deg kwe fam waharuk men it ap homi Amalek on ai en henepswa ale anyo wenggel-hakiyug.

¹⁸Hit henowag sa isimu henomamne eleg atsi mu waharuk kweleg, iren henakni Allah fam enekol bouk eleg angge hit henembol fil en bin waharuk kwit, it henembolim anggolo ngogdoho waharuk on etmano mundoho enowatswa anyo.

¹⁹Airoho dusama anggere, hit lahe henakni TUHAN Allah en o kwenang etma mundoho og-hesahumu, ne hit henebe it heneselei on hit welamuhupmu etma maseroho wereg on fam henekol eleg angge wereg lit halug de, it ap homi Amalek on aire mundoho enowaruhupmu ap homi en eke ebet esauk kamuhup fug. Henepel amuhup hayog i!” ulug hweag-esebag.