Read Ninia Yali ULANGAN 26 Bible Online

ULANGAN 26 - Ninia Yali bible

ULANGAN 26

¹At Musa en airoho hweag-esebagdeg eke hweag-esauk kwit, “Hit lahe o kwenang At henakni TUHAN Allah en og-hesasimu etmano mundoho kwik lahupdeg yugdoho wereg lit halug,

² hit henanggwenang famen anggen yihig baluhup on anyo kabogdoho si yihig hag angge misig fam yohware folug, walug At henakni TUHAN Allah en obale momaloho fohumu etma feik lauk kamuk.

³Airoho feik lalug hiren it ap imam duruk on etmano enekit lalug de diroho hweag-esauk kamuk, An henakni TUHAN Allah en kwenang nit og-nesaroho lit en it nenombasi fam kwenang og-hesahuk ulug abug hweag-esasimu anyo kwik wahireg ulug enameg ik waharuk kahi, ulug hweag-esauk kamuhup.

⁴Airoho urukmu it imam duruk on etmano en si yihig hit henenggikmu en walug de Allah il hanim At henakni obahet waroho yalduk angge obale wirig anyo fam foruk kamuhup.

⁵Airoho debelug, hiren henakni TUHAN Allah il hanim henele diroho uruk kamuhup, TUHAN nakni, an nombasi re o Aram on dag watil noruk katfag ahun. Aren eyog indip kwe on og-eneplug ap homi o oko lauk on hag etma welatfag. It enebe etma lebag li re enebe wenako dorangge neg lebag, famen de it enebe enunggul unuk humon atuk kwit enomamne wereg on atfag.

⁶Airoho atuk mu, it ap homi Mesir on en enelok hasimeg nenobaharuk kwit it enamingming angge atlug yabuk duruk kamag ulug nenepuk katswa.

⁷Iren airoho nenepuk ale en, niren Hat nenakni it nenombasi enakni fam heng hapuhukmu, Haren nit anggin-fanggin hauk kahe ale inim, ouk-bouk hauk kahe ale inim, anggolo ngogdoho duruk kahe ale inim, nesauihin deg nenele hweag-hutuhuk on hesanggo holdihin.

⁸Airoho holdihin deg Haren homamne humon fam halong wereg lit o Mesir en nit loloho wilibi nenobahaik waharihin. It nenaselei on fam de Haren it enekol en enowag elek duruk on deheg, along on deheg, duk fug on deheg, dirihin.

⁹Airoho dirihin deg Haren og-neneplug o kwenang mundoho hesilig lit di angge su angge mundoho neg wereg ma suma nenobahaik waharihin.

¹⁰Nenakni TUHAN, airoho nenepihin ai fahet haren kwenang an og-nitihin mu etano en anggin yihig atam on Hat hobahet walug feik wahi, ulug uruk karuhu. Airoho ulug si yihig anggen yihig yohwareg angge anyo henakni TUHAN il hanim folug, At ebe apne wauk kamuk.

¹¹At henakni TUHAN Allah en nauk angge di angge su angge hit henowesi henomaliki inim og-hesauk on fahet hundig dang duruk kamuk. Airoho duruk salim ai it ap Lewi on inim ap homi bohon hit henesahalimu wereg on inim nukoho ai hinim apne wakohon ulug hweag-esakiyug.

¹² Hiren hundig-hundig tahun henahaneg on fam de, henanggwenang famen anggen yihig balduk angge etmano soho en hit atlug numon anyo it ap imam duruk on Lewi enap etmano fahet inim, it ap bohon inim, omalik wetien on inim, homi sohwe on inim og-esaukmu, o hit welahepma kota hundomog etma it nauk on fahet ulug anggolo deg angge etmano hwelauk kamuhup. Airoho mundoho halug,

¹³hiren henakni TUHAN Allah fam diroho uruk kamuhup, TUHAN nakni, Soho en an atlug numon hat hobahet feik wamag ulug wereg on etano en de dorangge lohon olma fehimu wereg fug. Nakni TUHAN Allah haren melaloho hweag-nesauk kahen hagdohore mundoho abirangge it ap Lewi enap inim, ap bohon inim, omalik wetien on inim, homi sohwe on inim fam og-isihi. Ne, haren hawene melaleg numen on foruk ale fahet ulug melal-nenepuk kahen on anyo en de an den dorangge eke dahan debehi fug.

¹⁴An den hat hobahet ulug foruk kahi on etman de, an nebe fong watuk kwit ulug oho, lohon nauihik fug, ne an nebe emet atlug dagma wilibik lauk kwit oho walug wilibik lauihik fug, ap waratuk on fahet unuk wareg ulug oho eke feseik lauihik fug. Nakni an den haren melaloho hweag-nitihin on anyo mundoho hele hole ferihik deg dirihik ai.

¹⁵Nenakni Hat hebe hobam mun ousa eneg on fam welahenma etman de Hat homaliki Israel on fam hil fu-nesalug nenobam fanoap nenobahain. It nenombasi fam kwenang og-hesahuk ulug abug hweag-esauihin on nit og-nesauihin mu nenobam nenanggwenang di angge su angge wereg neg deg lit mun hesilig neg deg ma su haren fanoap deberuk kamin, ulug uruk kamuhup,” ulug hweag-esebag.

¹⁶Airoho hweag-esebagdeg eke hweag-esauk kwit, “Yoho su salim At henakni TUHAN Allah en diroho-airoho duruk kamuhup ulug melaloho hweag-heseheik on ai hit henenda, henebe abirangge mundoho fam abirangge dipdoho neg duruk kamuk.

¹⁷Yoho su salim At TUHAN aire nit nenakni Allah ulug enameg fag-dehep. Ne, hiren nit de At ele neg holoho duruk kwit awene melaleg hweag-neseheik on inim diroho-airoho duruk kamuk ulug hweag-neseheik on inim ai duruk kamuhuk ulug ehep.

¹⁸ Airoho ehepma yoho su salim neg At henakni TUHAN en An nomaliki ulug og-henebeheik deg At awene melaleg ai mundoho duruk kamag ulug hweag-heseheik.

¹⁹Aireg ma At henakni TUHAN Allah en de it ap homi di enunggul unuk su enunggul unuk mundoho waldoho fesesi on etmano en de hit neg hum apdoho henobahaku. Hit mot-henobahakeg, leho henobahakeg,[23] At henakni TUHAN Allah en airoho henebuhuk ulug abug wene hweag-hesasi hagdoho At omaliki on amuhup,” ulug hweag-esebag.