Read Ninia Yali ULANGAN 27 Bible Online

ULANGAN 27 - Ninia Yali bible

ULANGAN 27

¹Airoho hweag-esebagdeg At Musa en, it ap homi Israel on enowesi melal-enepuk on inim diroho duruk kamuhup ulug enele hweag-esebag: “Wene melaleg an den yoho hweag-hisihi on aire mundoho holoho neg duruk kamek.

² Hit henebe yoho su salim Ik Yordan baloho o kwenang At henakni TUHAN Allah en og-hesasimu etmano kwik laluhupdeg hiren helep nunggwe en hagdoho unduhuk folug hohola ware feiyug.

³Airoho ware folug de helep eta fam de wene melaleg su ele misig-misig baliyug. Hit lahe o kwenang At henakni TUHAN Allah en og-hesasimu di angge su angge wereg neg deg lit mun hesiligmu etma kwik lahupdeg halug,

⁴ai en hit henebe mundoho Ik Yordan foma fil neg aik lahupdeg de hit o Dom Ebal fam etma lakiyug. Etma lahupdeg de an den yoho hweag-hisihi ai hagdoho etma helep unduhuk folug de hohola ware feiyug.

⁵ Nikama etma At henakni TUHAN Allah fahet hiren helep ap en oho bosiemanggen fam buhundeg eleg on fam TUHAN obahet yaldukmu obale wiriyug.

⁶At henakni TUHAN Allah fahet yal-utuk mu obale aire helep amu on fahet eke wauk eleg on we wereg on fam neg duruk kamuhupmu re, wiri folug, wirig angge emberimmu aire di angge su angge TUHAN obahet yalduk angge mundoho yaliyug.

⁷Ai yalduk kwit de wam TUHAN fanoap nenobahaukwag ulug heng uruk kwit waroho yaliyug. Yale folug etman henakni TUHAN Allah il hanim nauk kwit henahayeg duruk kamuk.

⁸Helep hohola ware foruk etma fenere hiren Allah wene melaleg wereg on ai il enamoho bale feiyug,” ulug hweag-esebag.

⁹Airoho hweag-esebagdeg At Musa en nikangge it ap imam duruk on Lewi enap etmano inim wereg lit it ap homi Israel on fam hweag-esauk kwit, “Nori nerekwi inim, hiren furebelug henesanggo holiek! Yoho su salim de hit mundoho henakni TUHAN Allah omaliki ahep.

¹⁰Aireg anggere hiren henakni TUHAN ele holoho neg duruk kwit, an de diroho airoho duruk kamuk ulug yoho hweag-hisihi on ai mundoho duruk kamuk,” ulug hweag-esebag.

¹¹Airoho hweag-esebagdeg at Musa en it ap homi Israel on etmano hweag-esauk kwit,

¹² “Hit Ik Yordan mundoho baloho nindig-amuhup deg ap homi su enobam fanoap debeseruk kwit de, it ap Simeon enap mel, Lewi, Yehuda, Isakhar enap mel, Yusuf enap, Benyamin enap mel, de Dom Gerizim fam unduhuk wereg lit enele uhup.

¹³Ne, enele hururung foruk kwit de it ap Ruben, Gad enap mel, Asyer, Zebulon enap mel, Dan, Naftali enap mel, de Dom Ebal fam unduhuk kweleg enele uhup.

¹⁴Airoho unduhuk kweleg de it ap Lewi enap en de enele apma baleg ale su diroho uruk kweleg de it ap homi Israel on en onggo, Amin![24] uruk kamuhup.

¹⁵ Ap Lewi enap en enele hum fam uruk kwit: Ap en enanggembu e on fam inim, helep on fam inim logam owag on fam inim, wiri folug herag-herag apne wauk on etma; At TUHAN de kembu apne wauk ale fahet de ahummu het deg ma re, ap ai hururung deg lamag! Uruk mu, it ap homi mundoho en: Amin! uruk kamuhup.

¹⁶ Ap enaknisi enisingasi enalong bouk eleg angge hesangge we danaleg debeseruk on aire hururung deg lamag. Uruk mu, Amin! uruk kamuhup.

¹⁷ Ap ori en enanggwenangma hohobag wereg on hihilik lauk halug hururung deg welamag. Uruk mu, Amin! uruk kamuhup.

¹⁸ Ap homi inil bug on siahap debeseruk on etma hururung deg welamag. Uruk mu, Amin! uruk kamuhup.

¹⁹ Ap bohon inim, omalik wetien inim, homi sohwe inim enengge del dauk on aire hururung deg welamag. Uruk mu, Amin! uruk kamuhup.

²⁰ Ap eke en akni ohwe inim orowo duruk fam akni unuk sebeloho forukmu, ap hururung deg welamag. Uruk mu, Amin! uruk kamuhup.

²¹ Ap eke wam, mene di angge su angge inim yarohoruk on aire hururung deg welamag. Uruk mu, Amin! uruk kamuhup.

²² Ap eke en erek onggwareg amebon inim halug oho, enakni enisinga misig on en ondoho on inim halug oho inim babi lauk halug de, ap ai hururung deg welamag. Uruk mu, Amin! uruk kamuhup.

²³ Ap eke en hwe eyamal hwe inim seberuruk halug de ap hururung deg welamag. Uruk mu, Amin! uruk kamuhup.

²⁴Ap eke en ap ling-long angge binggi watuk halug de ap ai hururung deg welamag. Uruk mu, Amin! uruk kamuhup.

²⁵Ap siag duruk eleg eke warukwag ulug enggik apmane hwelauk on aire hururung deg welamag. Uruk mu, Amin! uruk kamuhup.

²⁶ Ap eke en obabut duruk fam Wene melaleg inim diroho diyug airoho diyug ulug Allah en uruk on anyo inim duruk eleg halug de hururung deg welamag. Uruk mu, Amin! uruk kamuhup,” ulug hweag-esebag.