Read Ninia Yali ULANGAN 28 Bible Online

ULANGAN 28 - Ninia Yali bible

ULANGAN 28

¹ Airoho hweag-esebagdeg eke hweag-esauk kwit, “Hiren henakni TUHAN Allah ele holoho duruk kwit, an den wene melaleg yoho hweag-hesauk kahi on su dipdoho neg duruk kamuhup halug de, At henakni en it ap homi enunggul unuk amu on kwenang fam wereg on oma sebeleg kweleg hit neg de koloma leho henobahaku.

²Hiren At henakni TUHAN Allah fam ele holoho neg duruk halug de Aren diroho fanoap henobaharuk karuhu:

³Henobam kota inim, heneyabukmu inim fanoap deg laruhu.

⁴Hit henobam fanoap henobaharukmu henomaliki hum aheg, henanggwenang famen anggen yihig sig aheg, henowam kambing, domba uluk bombeal aheg atuk kamuhup.

⁵Gandum anggen bal-dauk on inim, anggen baleg on ai famen nauk on fahet menenoho wirig on inim fanoap deg laruhu.

⁶Hiren di on su on mundoho duruk kamuhup on etma fanoap deg laruhu.

⁷It ap homi henaselei on en henowarik kwik waharuk halug de At henakni TUHAN en it henaselei on enalong elehapdoho feseruk karuhu. Iren buhundoho erare folug dog kwelabik waharuk kamuhup famen de meiyaleg angge del-fol uruk kamuhup.

⁸Hit henakni TUHAN Allah en hiren di on su on durukmu fanoap debeheg, henangge gandum baloho yohwat-dauk angge fam inim hopo dikdoho yohware feheg, duruk karuhu. O kwenang Aren og-hesasimu etma wereg ma henobam fanoap henobaharuk karuhu.

⁹Hiren At henakni TUHAN Allah ele holoho duruk kwit At awene melaleg anyo dipdoho neg duruk halug de, Aren airoho henebuhuk ulug abug hweag-hesasi hag hit At onggwareg omalikiap henebuhu.

¹⁰Airoho henebuhumu it ap homi enunggul unuk amu on kwenangma suma wereg on en, it sure TUHAN omaliki eneg on wereg boruk kwit inil aleng deg lamuhup.

¹¹O kwenang hit og-hesaroholit it henombasi fam airoho og-esahuk ulug abug hweag-esebag ma etmano en henomaliki humdoho og-heseheg, henowam humdoho henobahakeg, henanggwenang famen anggen yihig sig bililiroho og-heseheg duhu.

¹²At henakni TUHAN en osit boholma yenggeloho foroho on etmano li fam belap hesa waharuk karuhu. Airoho duruk kwit hiren di on su on duruk on etmano fam fanoap henobaharukmu hiren ap enunggul unuk amu on fam henangge baleg angge hag fobik obalma og-nesahup en ulug uruk anyo hagdoho og-esauk kamuhup famen de hiren it fam eke airoho deg lamuhup fug.

¹³Hit henakni TUHAN Allah en de hit ap enowesi it enunggul unuk amu on enesahalimu melal-enepuk on henobahakumu hit it enautsi on welamuhup fug. Hiren lahe an den yoho TUHAN awene diroho diyug suroho diyug ulug hweag-hesauk kahi on ai holoho dipdoho neg duruk kamuhup halug de hit fam di angge su angge wereg neg deg ma atuk kwit henembol fil eke hihiloho lauk kamuhup fug.

¹⁴Ai famen de hiren wene melaleg ai amuroho fam ulug oho eke sahaloho fouk fug. Hiren amu on fahet allah-ap debelug apne wauk on fam apne weheg, obahet deheg duk fug,” ulug hweag-esebag.

¹⁵Airoho hweag-esebagdeg eke hweag-esauk kwit, “Aireg famen de hiren henakni TUHAN Allah ele holoho duk fug angge, awene melaleg inim, diroho-suroho diyug ulug hweag-hesauk on anyo mel dipdoho duk eleg angge duruk halug de hururung de direg on su henobam aik waruhu:

¹⁶Hit henobam kota inim, heneyabuk inim hururung deg laruhu.

¹⁷Hiren gandum anggen balduk on inim, anggen balduk on ai en menenoho wirig on inim hururung deg laruhu.

¹⁸Hit henebe hururung deg ma, henomalik inim dorangge endag-enebeheg, heneyabukmu en anggen balduk angge dorangge aheg, henowam sapi, domba inim we dorangge neg deg laruhu.

¹⁹Hiren di on su on duruk kamuhup on etma hururung deg lamag.

²⁰Hiren siag on neg duruk kwit TUHAN henerimdoho embeseruk halug de Aren hiren di duruk su duruk on fam anggin-fanggin hauk kamag ulug mondorik waheg, henobam nong-hong uruk on mondorik waheg, ouk indip hag on mondorik waheg duhumu, nukoho il misig fam neg hit mundoho eleg-atil neg lahup.

²¹Ouk-bouk eke on famen eke on waheg duruk kwit henobam aik waharukmu, dil-dil ambiangma en de ap homi hiron en misig eke o kwenang suma fam eke welamuhup fug lit deg.

²²At henakni TUHAN en de hit henobam anggin on foruk kwit ouk sep hun-hun lauk on mondorik waheg, fit-fit angge on mondorik waheg, sohweik yahan mondorik waheg, duhu. Aren neg hobi welele uruk on mondorik waheg, hol mundoho ahanhan on mondorik waheg duhu mu hiren anggen baluhuk ulug deg on mundoho siag atil lahu.

²³Osit mundoho wambik waharuk elegma kwenang mundoho bosiemanggen hag kelog duhu.

²⁴At henakni TUHAN en de osit ik on belabik waruhu fug famen de, osit ul ahe inim, iliangge, belabik waruhu mu hit mundoho waroho eleg-ail lahup.

²⁵Hiren At henakni TUHAN Allah ele holoho duruk eleg halug de hit heneselei on en henalong elehapdoho foruk kamuhup. Ne, hiren fanoroho henebe erare folug dog yabik lauk famen de wilip-atuk kwit delelangdoho wilip atuk kamuhup. Hit airoho durukmu hit henobam mun siag ale neg atuk on ai fahet it enunggul unuk amu on en enamelmeldoho kumu hesauk kamuhup.

²⁶Hit waramuhup halug de henebe wareg etma re suwe mel, di angge su angge olok on mel, en nauk angge aruhu mu ap eke en siloho wilibi fesouk fug alereg laruhu.

²⁷At TUHAN en ap homi Mesir on fam bot enobam fesesi hag hit henobam oho bot anggin on henobahaku. Airoho henobahakumu henahap fam burag inim, kilip-kilip angge mun ahal-hal on inim, obat mun eleg on henobam fohu.

²⁸At henakni TUHAN en hit ap wenenebo on henobahakeg, inil bug on debeheg, ap homi enenda ininduk on henobahakeg duhu.

²⁹Airoho henobahakumu nukoho andundu deg kweleg de ap inil hupnig on en fag-fag angge duruk hag duruk kwit kobokwe hweahauk fug alereg laruhu. Hiren wal-haul ulug duruk famen de nong-hong neg uruk karuhu. Airoho neg durukmu ap homi en hit sebel neg hinisug lit henengge del-daukmu ap amu on en eke let-henepuk kamuhup fug.

³⁰Ne, hiren henakni TUHAN Allah fam holoho duruk eleg halug de indip direg on su henobam aik waruhu: Hiren henohwesi hwelahuk ulug momal-dauk kamuhup famen de ap amu on en hwelauk kamuhup. Hit henobam wituk kamuhup famen de hit henonggwareg ilonggoma welamuhup fug. Hiren e anggur a yaruhup famen de anggen hit eke nahup fug.

³¹Hit henowam sapi hinil hanim wat-dauk kamuhup famen de hit eke lenggareg nauk kamuhup fug. Hit henonggwareg hinil fureg kweleg henowam keledai lit dalug lalug nikangge og-hesa waharuk kamuhup fug. Henowam domba mundoho it heneselei on og-esaukmu ap eke en let henebuhup fug.

³²Hit henonggwareg henelohotma en henomalik ap enamingming angge enebukwag ulug ap bohon fam og-esauk kamuhup. Nukoho hindik-hundig hinil firoho henomaliki yami-enepuk kamuhup famen de enembol somban feseik wamuhup fug mu hweag-enebuk fug alereg laruhu.

³³Ap homi enunggul unuk bohon en heneyabuk henomamne elegdoho wiri folug anggen bal-dauk angge etmano hwelaukmu, hit de foma eke hwela fug angge we enomamne fam enelok en sebel-henusug lit hindik-hundig duruk kamuhup.

³⁴Airoho neg durukmu hauk kwit hit henepe moroho wenenebo on atuk kamuhup.

³⁵At henakni TUHAN Allah en heneyog fam burag ouk mun siag deg ma folo-folo hiling-am fug on debehu; heneiyogmu en bekit henunggul fam aire mundoho bot en neg hopo deg laruhu.

³⁶Hit inim hit henowe raja inim At TUHAN en o kwenang hit henepeleg deg ma, it henombasi en oho enapelegma og-heneplug lahu. It wereg lit de hiren kembu allah-ap debelug apne wauk on anyo e inim helep inim fam laleg angge apne wauk kamuhup.

³⁷O kwenang At henakni TUHAN en linggik-longgo hesahumu etman de ap homi en enamelmeldoho inil kumu hesauk kwit de bulip henebeheg, unda yag henebeheg, duruk kamuhup.

³⁸Hiren a humdoho folduk kamuhup famen de bulue en naukmu re we dorangge neg anggen yihig balduk kamuhup.

³⁹E anggur yabukmu hiren anggur yaho folug hwalduk kamuhup famen de hwesambol en e anggur omano mundoho naukmu, anggen oho eke dahanduk kamuhup fug, ne ahaik hwenanggeg oho eke nauk kamuhup fug.

⁴⁰Hit henobam henanggwenangma etma e zaitun humdoho wilipuk karuhu famen de anggen mundoho helela durukmu ahalue eke hwelauk kamuhup fug.

⁴¹Hiren henomaliki ap et hwelani en humdoho endag-enepuk kamuhup famen de dog-yabik waharuk kwit dog ambiangma angge ulug hwelalug laukmu hit henomaliki eke welamuhup fug.

⁴²E wilibig on mundoho inim di angge su angge yaho on inim dahwi hag angge en mundoho nahup.

⁴³Ap bohon hit henobam wereg on etmano it enomamne along atuk kwit hit henalong eleg-atuk kamuhup.

⁴⁴It enauang de hit henobam fobik nikangge og-nesahup en ulug og-hesauk kamuhup famen de hit henangge elegma hiren nit og-nesahup en ulug og-esa fug alereg laruhu. Airoho deg ma iren hit sebel henesug lamuhup.

⁴⁵Hiren At henakni TUHAN Allah obam holoho duk eleg angge welaheg, awene melaleg hweag-hesauk on anyo duk fug angge welaheg duruk halug de di ouk su ouk ai henobam neg aik waharuk kwit lal henepuk men neg henebe mun felelengdoho eleg amuhup.

⁴⁶Ouk-bouk henobam aik waruhu aire At TUHAN en hit inim hiren ondohoma on inim henobam unggum mundoho-mundoho foruk anyo enamegdoho howag ulug duruk karuhu.

⁴⁷Hit henakni TUHAN Allah en de di on su on fam mundoho fanoap henobahasi famen hiren At obahet henenda henahayeg fam inim, henendama hwenaroho fug famen mun dik-demdoho fam inim At obahet duruk kahep fug.

⁴⁸Ai fam de hiren it ap heneselei on At henakni TUHAN en hit hinim weim yabukwag ulug mondorik waruhu on etma enobahet duruk kamuhup. Hit henebe henesiburu obok aheg, henahaik obok aheg, henabulukwe kohouk welaheg, di angge su angge mun henangge eleg angge welaheg, duruk kwit, At henakni TUHAN en olok hasimeg sebel-henesug[25] lit weregman neg hit henebe mundoho waramuhup.

⁴⁹Ap homi enunggul unuk hiren oho enele furebehep fug ha on At henakni TUHAN en o kwenang ambiangma etman hit hinim yabukwag ulug mondorik waruhu mu, waharuk kwit suwe ikwesahop en watuk angge sebelik lauk hag sebel-henebik wamuhup.

⁵⁰It aire enobabut mun hape deg lit de ap sobal on ulug oho, omalik doron ulug oho enenda enebuhup fug.

⁵¹It airoho waharuk kwit, hiren endag-dauk kahep angge inim, henanggwenang famen anggen baleg angge inim, elehap deberuk kwit de hit fahet ulug oho gandum mel, anggur ahaik mel, zaitun ahalue mel, sapi, kambing, domba mel, mundoho hwelahupmu hit obok en mundoho waramuhup.

⁵²O kota mundoho At henakni TUHAN Allah en og-hesasimu etma iren mundoho bin kwik wamuhupmu de elehet fak lehet omamneroho mun yit-yatdoho ohoma hiren henenda obam hambuk deg welahep on etma mun meiyaloho saha uruk karuhu.

⁵³It heneselei on owan o kota hiren etmano walinggik kwik waharuk kweleg de hit henesiburu obok en ulug henomaliki At henakni TUHAN Allah en we onggoleg og-hesasi angge etmano henonggwareg en nauk kamuhup.

⁵⁴Airoho duruk kwit ap enowesi enunuk leho lit enobabut mun sako buhun enap famen ohore ap en waling enepuk li etare enenda dot atlug nauk angge amu on eke wereg eleg en de onggwareg omalik nauk karuhu. At airoho nauk kwit de aren onggwareg are famen oho, ohwe enda hundig angge famen oho, at omaliki foma enoluk welamuhup on halug oho, eke dorangge ulug og-esauk karuhu fug.

⁵⁵

⁵⁶ Homi enowesi enunuk leho wereg lit enobabut mun sako buhundeg ma enggik wereg ohwe deg en ulug eyog fam kwenang kwe oho eke lauk eleg on famen oho airoho neg duhu. It henaselei on o kota maserik kwik wamuhupmu re at hwe ai nauk on eleg en enda mun dot aruhureg, ai fam aren ling-long angge onggwareg omalik, omalik a famen ket endag-atuk angge nauk karuhu. Airoho nauk kwit aren omaliki famen oho ne ahun enda hundig angge famen oho dorangge eke og-esahu fug.

⁵⁷

⁵⁸Hiren At henakni TUHAN ele melaleg buku su fam baleg wereg on dipdoho holoho duk eleg angge deheg, At henakni TUHAN Allah mun leho wereg ma enakol duruk ahun anyo along bouk fug angge deheg, duruk kamuhup halug,

⁵⁹At henakni TUHAN en hit inim hiren ondohoma on fam inim ouk mundoho hiling-am fug on inim ouk ahe angge, kwebekit mel, hag on inim mun bal-am fug on mondorik waruhu.

⁶⁰Ouk mun henamelmel on hit o Mesir en hinil hauhup etmano on henobam aik waruhureg, henobam en oko lauk karuhu fug.

⁶¹At henakni TUHAN en neg ouk anggin on mel ouk bog laharuk on mel hag on unuk buku TUHAN awene melaleg baleg on su fam unuk wereg fug on mondorik waruhu mu hit mundoho elehap henebil lahu.

⁶²Hiren henakni TUHAN Allah fam ele holoho duruk kahep fug mu re henebe hum-hamdoho sohwalanggen bohol fam wereg hagdoho atuhup famen de, hit henesahalimu en we henebe dorangge neg henoluk welamuhup.

⁶³At henakni TUHAN en ahayeg fam hit henengge di angge su angge wereg neg deg lamag ulug og-heseheg, henebe eke inim humap henobahakeg duruk hag, Aren neg ahayeg fam hit henowaroho elehap henobahaku. O kwenang horog ketia kwik lahupdeg welamuhupmu ai en heneko henobahaku.

⁶⁴At henakni TUHAN en hit henebe mundoho o di obam su obam kwenangma suma ap homi enunggul unuk amu on enesahali kwe linggik-longgo hesahu. Airoho henebuhumu re etman amu on fahet allah-ap debelug kembu e inim helep inim fam laleg on, it henombasi en oho mun enapeleg on, ne hiren oho mun henapeleg on etma fam apne wauk kamuhup.

⁶⁵Ap homi enunggul unuk amu on enesahalimu etman de henobam hambukdoho bok welam ale eke deg laruhu fug, ne hiren obale dia re nit nenonggwareg en on ukmu eke welaruhu fug. At henakni TUHAN en de hit henobam lilipna ulug henendama siagdoho, henenda firoho, hiren henenda ebereg angge eke elegma welamag ulug henobahaku.

⁶⁶Hit henobam di on su on anggin on neg aik waharukmu, hup angge et nukoho et waratuk ale fahet henakoldoho henamelmel duruk kamuhup.

⁶⁷Hiren amu angge hauk kwit mun henakol en de henenda anggen bong duruk karuhu. Airoho duruk kwit hup anggere folo-folo hubet amag ahi eheg, ne hubet de fol-folo hup amag ahi eheg duruk kamuhup.

⁶⁸At henakni TUHAN en hit o Mesir en og-heneplug wilibik wahasireg Aren[26] uruk kwit o etma nikangge sombandoho lahup fug isi famen de Aren neg kapal fam nikangge monde-henobahaku. Etma de hiren henabiroho ap homi enamingming angge welamul en nenebe onggo bal-dowag ulug it henaselei on fam onggo hundutuk kamuhup famen de ap misig eke oho onggo baluk fug alereg laruhu,” ulug hweag-esebag.