Read Ninia Yali ULANGAN 29 Bible Online

ULANGAN 29 - Ninia Yali bible

ULANGAN 29

¹At TUHAN en Musa inim ap homi Israel on inim hweag-esauk kwit diroho henele sali waroho feiyug ulug hweag-esebag ma, it o Moab kwenang fam wereg lit enele sali ebag on anyo ebe su. Wene abug wene katukdoho balfag on aire wene atam o Dom Sinai fam en At TUHAN inim it ap homi Israel on inim en watfag on anyo ambiangma.

²At Musa en ap homi Israel on omano mundoho kabog-diek ulug hweag-esebag ma, it mundoho kabog-debag ma hweag-esauk kwit, “At henakni TUHAN en raja Mesir on inim, autsi eyabuk inim duruk on inim, o bumbuk abirangge inim, fam debesesi ale anyo hit henemu en mundoho hinil hauhup.

³Ne, At TUHAN en anggin-fanggin mun ha fug on debeheg, along on deheg, duk fug on deheg, duruk katsi ale anyo hiroho hauhup neg.

⁴Famen de o yoho huli sure hit airoho hauhup on anyo ebe diroho fahet atsi ulug fu-deboukwag ulug henobahauk fug alereg.

⁵Hit henebe 40 tahun hunduko ai At henakni TUHAN en o lei kwe og-heneplug waharuk katsi famen de henesum wan-duruk on inim, heneyog endangge fahet sandal wan-duruk angge nim denel heheg lauk katsi fug.

⁶Hit henasiburu nauk on fahet roti elegma, ik anggur ahaik mel, anggur asig omamne anggolo on nowag ulug eleg kweleg famen At henakni TUHAN, hiren At demdoho nenakni TUHAN Allah wereg anyo henoluk amag ulug, henenda boruk angge higitdoho neg og-hesauk katsi.

⁷ Ne, nit o suma aik waharuhukdeg duruk men Raja Sihon obam Hesybon ahun inim, Raja Og obam Basan ahun inim en waharuk kwit ninim dog yabik wahausaman niren enalong elehapdoho feseruhuk.

⁸ Airoho debeseruhuk deg it enanggwenang niren sebel dauhuk deg, it ap Ruben on mel, Gad on mel, it Manasye on foman minggiroho mel, fam yohwan esauhuk.

⁹Aireg ma hiren di duruk su duruk ambiangma fano on neg duruk kamuhup en de wene abug katukdoho wareg on su fik-furoho neg holoho duruk kamek.

¹⁰Yoho su salim de hit henebe mundoho henakni TUHAN Allah il hanim it henowesi kepala suku mel, enowesi ap log-lohon mel, it sehen foroho on enowesi leho on mel, ap on mel,

¹¹homi mel, omalik doron mel, it ap homi bohon hit henesahalimu wereg lit e wireheg, ik hwenanggeheg duruk on mel, inaik wahep ai.

¹²At henakni TUHAN Allah en de wene abug katukdoho hit hinim watmisimu hiren wene abug wene ai seberoho ware feheg, hiren diroho duruk kamuhuk ulug weheg duluhup en suma kabog-dik wahep ai.

¹³Wene abug wene ai fam de At henakni TUHAN en yoho su salim hit An nomaliki on ulug unduhuk henobahamisimu Aren it henombasi Abraham, Ishak, Yakub fam abug wene wat-esasi hagdoho At neg henakni Allah welaruhu.

¹⁴Wene abug wene inim, hiren diroho duruk kamuhup ulug henobam foruk on ai inim de At TUHAN en de hit hinim neg uruk fug,

¹⁵famen de, yoho su salim ap henemu hundomog At henakni TUHAN Allah il hanim unduhuk welahep on inim, ne it hiren ondohoma on fobik henalukwe fil welamuhup on fahet inim uruk,” ulug hweag-esebag.

¹⁶Airoho hweag-esebagdeg eke hweag-esauk kwit, “Hit henonggwareg en de mundoho henoluk deg, niren o Mesir wereg lit welatuhuk ale inim, ap homi enunggul unuk amu on wereg kwe lauk katuhuk ale inim etmano.

¹⁷It etma en amu on fahet apne wauk katswa angge helep inim, e inim, perak, emas on inim mun me nape angge etmano hiren oho hauk katuhup neg.

¹⁸ Aireg ma hit ap homi etma henesahalimu en eke ap ane, hwe ane, it o homia misig on ane, it youwa ilonggo misig on ane, dia unduhuk lahep on misig eke en nit nenakni TUHAN Allah anyo embeselug ap homi enunggul unuk amu on en amu on fahet allah-ap debelug apne wauk on etma fam apne wag-lahep ha no furoho kahaleg lamuk. Hiren airoho duhup halug de omanggen siag on ale on mel waratuk on mel wilip atuk anyo hagdoho amuhup.

¹⁹Hit henesahalimu etman wene airoho duk fug ulug haperoho hweag-hisihi on aire at eke en hole folug at fam ebe ambiangma mun fano neg atuk karuhu bouk fug, we at onggwareg enda ahe lahaku ale en dil lahu famen ohore. At duhu ai fam de ap fano on et, siag on et henebe abirangge mun elehapdoho henobahaku.

²⁰At henakni TUHAN en de ap aireg on de enesiag elehapdoho fesehu bouk fug. Ite ahamdohore TUHAN olok mun olohotma aik waharuk on ai inim, anggin-fanggin enobam fohuk ulug buku su fam baleg wereg on inim, obam aik waruhu mu, at ebe TUHAN en mun elehapdoho fohu.

²¹At TUHAN en ap ai elehapdoho fohu ai fam de it ap homi Israel amu on enoluk amag ulug de, wene abug airoho hururung debesehuk ulug buku TUHAN awene melaleg buku su fam baleg on higitdoho duhu.

²²Airoho duhumu fobik en, it hiren ondoho on en inim, ap bohon o yatma on en At TUHAN en anggin-fanggin inim, ouk-bouk inim hit wereg lamuhupmu debeik waharuk ale etma inil hauk kamuhup.

²³ Hit heneyabuk de mun lei birim urukmu re mayu inim, belerang inim en saleg laruhu. Kwenang de a yaruk fug aleroho enggelangge inim wilibuk fug aleroho deg laruhu. Hit henobam sili etma re o kota Sodom mel, Gomora mel, Adma mel, Zeboim mel, At TUHAN olok hasimeg mun han werako febag anyo hagdoho deg laruhu.

²⁴Airoho debehumu, ap homi kwenangma wereg on en uruk kwit, Nunggwelug At TUHAN en it enobam sili etma airoho debesi ahi? Nunggwelug Aren mun ahummu olok en airoho enobam fesi? uruk kamuhup.

²⁵Airoho heng og ale urukmu onggore diroho uruk kamuhup, Iren At TUHAN Allah it enombasi enakni o Mesir en og-eneplug wilibik waharuk li em, inim abug wene katukdoho wareg on anyo dahan debousa ma debesi.

²⁶Airoho dahan debousareg iren ebe enapeleg deg kweleg amu on fahet allah-ap debelug obahet duruk kwit TUHAN en apne wauk kam fug isi on anyo apne wauk katswa ma.

²⁷Ai fam de At TUHAN olok omaliki enobam fesireg de buku su fam anggin-fanggin unuk baleg wereg on anyo it enobam wereg ma feik wahasi ai.

²⁸TUHAN olok enepsi on anyo anggolo hweraniroho wilipuk kwit, olok mun humon fam de it ap homi Israel on etmano enanggwenangma en heneko o kwenang amu on enapeleg on fam hwik-enebik lasimu wereg etma, uruk kamuhup.

²⁹Wene foma At nenakni TUHAN Allah en heraho fesi on wereg famen de; awene melaleg nit fam enamoho nit inim, niren ondohoma on inim fahet hweag-nesasimu niren holoho hindik-hundig duruk kamuhuk,” ulug hweag-esebag.