Read Ninia Yali ULANGAN 30 Bible Online

ULANGAN 30 - Ninia Yali bible

ULANGAN 30

¹At Musa en airoho hweag-esebagdeg eke hweag-esauk kwit, “Ketiare At henakni TUHAN en fanoap nenebukwag ulug momal daluhup a, hururungdoho nenobahaukwag ulug momal daluhup a, hiren momal dakiek ulug an den hweag-hesauk kahi ai. An den anggin fanggin diroho-suroho hahup ulug hweag-hisihi aire hit henakni TUHAN en buhuloho wilibi henobahakumu ap homi enunggul unuk amu on enanggelegma etma wereg lit, anggin airoho hauk kwit de, an den diroho ulug indip enamoho hweag-hisihi on eta ebet hahup lit deg.

²Hit henebe inim, hiren ondohoma on inim, henakni TUHAN akit sombandoho wamuhup halug, Aren wene melaleg diroho diyug suroho diyug ulug hweag-nesasi on an den yoho hweag-hisihi on ai henendama en holoho duruk kamuhup halug de,

³At henakni TUHAN Allah en enda hundig henepuk karuhu. Airoho enda hundig henepuk kwit de o ap homi enunggul unuk amu on enanggelegma monde-henobahakumu etman henambol sombandoho henobahaik watlug atam fano welatuhup hag fano henobahaku.

⁴Hit henebe mundoho buhuloho di obam su obam mundoho lahupdeg welamuhup famen de henakni TUHAN en henebe andog-heneplug henambol somban og-heneplug waruhu.

⁵Airoho og-heneplug waruhu mu o atam it henombasi akni ahun atlug welatswa ma etma hit akniroho welamuhup. Airoho akni amuhupmu re atam At Allah en hit henombasi we dorangge neg fano welamag ulug debesesi famen de hit neg de fano welamag ulug henobahakeg, henombasi enebe humdoho welatswa famen de, hit neg de henebe mundoho along hum-hamdoho henobahakeg duhu.

⁶Airoho henobahakureg, hit henebe inim hit henomaliki inim fam henendaman At ele hole folug duruk on og-hesahumu, hiren henenda misig atlug henakni TUHAN Allah fam henenda hundig duruk wereg lit henobam etma mundoho neg welamuhup.

⁷Airoho henobahakureg de hururung mundoho aire it ap homi henaselei on henebe enerim henesug lit sebeloho fesoul ulug di anggin su anggin henobam foruk on ai enobam fesehu.

⁸Airoho fesehumu hit henambol sombandoho henakni TUHAN ele holoho deheg, wene melaleg hweag-nesasi on an den yoho hweag-hisihi on su mundoho dil laheg duruk kamuhup.

⁹Airoho durukmu, henakni TUHAN Allah en hiren di ale su ale duruk kamuhup on etma ambiangma humdoho sabut hesauk karuhu. Airoho sabut hesauk kweleg de henomaliki humdoho endag-enebeheg, henowam humdoho aheg duhu. Airoho og-hesauk kwit heneyabukmu di angge su angge mundoho yaruhup angge mun fulularoho og-hesauk karuhu. Airoho og-hesauk kwit At henakni TUHAN endama ahayeg hauk kwit henombasi fano welamag ulug enepuk katsi ai hag hit oho fano welamag ulug henepuk karuhu.

¹⁰Aireg famen de hit de henakni TUHAN Allah ele holoho duruk kwit de, Aren diroho-suroho duruk kamuk ulug hweag-nesasimu lisu baleg wereg on su holoho fik-furoho duruk kamuk. Airoho duruk kwit henape mel, henenda mel, misig atlug At akit sombandoho waharuk kamuk.

¹¹Wene an den diroho duruk kamuk ulug hweag-hisihi on aire hiren duk ale anggin deg fug. Yatma wereg fug.

¹² Wene ebe bohol fam wereg fug. Etma wereg ma hiren nit wene ai nenesanggo holug, holoho dukwag ulug ap sa en wag lahalug og-nesa wambik wam alereg? ulug, heng uk alereg behep? Mun eleg.

¹³Wene baleg ai ik laut yenggeleg on ai foma fil etma wereg fug. Airoho wereg ma hiren de nit wene ai nenesanggo hole folug holoho higitdoho dukwag ulug ap sa en wag nindig atlug og-nesa nindig aik wam alereg behep? Mun eleg.

¹⁴Wene aire hit henobam horogma wereg ma re hiren airoho hein og uk fug alereg. We hit henendama wauhupdeg henoluk deg ma re ebe bekit neg duruk kamuhup ai neg.

¹⁵Aireg ma re henoluk wereg lit fano welamuhup on ai neg momal-daluhup a? Ite siagdoho welatlug waramuhup on ai momal-daluhup a? O yoho su salim neg katukdoho momal-dakiek.

¹⁶Hit henenggik anunuroho welam fug angge At henakni TUHAN Allah en o etma og-heneplug kwik lahureg fanoap henepuk kweleg, henebe etma wereg lit, fanoroho welaheg, henunggul unuk hum aheg, duhup en de yoho su fam neg henakni TUHAN Allah ele holoho ebe henenda hundigdoho wereg lit, Aren diroho diyug suroho diyug ulug hweag-hesasi on ai holoho higitdoho neg duruk kamuk.

¹⁷Aireg famen de wene melaleg ai duk ale henerimdoho wereg lit it ap homi eke en amu on fahet Henakni Allah obalma debelug apne wauk on etmano fahet ninim apne wakohon ulug hweag-hesaukmu, enemu duruk kamag ulug embesouk fug angge apne wahup halug, hit Ik Yordan baloho o etma lalug henenggik anunuroho welaheg, henoluk yatdoho welaheg, duk elegman henakni TUHAN en mun elehapdoho henowaruhu, ulug yoho fagdoho hweag-hisihi on etare henendama ebereg lamuk.

¹⁹Ketiare hit henoluk welamuhup on fahet momal-daluhup a? Waramuhup on fahet momal-daluhup a? Allah en fanoap nenebukwag ulug on ai momal-daluhup a? Hururung nenobahaukwag ulug on ai momal-daluhup a? Hiren neg katukdoho momal-dakiek. Hiren uruk kwit, nit de su on momal-daul urukmu, bohol mel, kwenang mel, inil kumu henesug lamag ulug wol-enebihi. Anggere hiren de, nenoluk welamuhuk nenenda ulug momal-dakiek.

²⁰ Henakni TUHAN Allah fam henenda hundig wereg lit, At obam dipdoho wereg lit ele holoho duruk kamek. Airoho duhup halug At henakni TUHAN en o henombasi Abraham mel, Ishak mel, Yakub mel, og-esahuk ulug wene abug og-esasimu etma hit henebe inim, hiren ondohoma on inim, henoluk wereg lit, henebe henoluk yatdoho eke inim welamuhup,” ulug hweag-esebag.