Read Ninia Yali ULANGAN 31 Bible Online

ULANGAN 31 - Ninia Yali bible

ULANGAN 31

¹At Musa en airoho hweag-esebagdeg eke inim diroho hweag-esebag:

² “An ketia nebe umur 120 tahun mundoho atuk kahimu re, an den hit og-heneplug la alere duk fug ale aha. Ne, ai en At TUHAN en hat Ik Yordan baloho nindig aik lahun fug ulug hweag-nitsi neg deg ma nong-hong eheik.

³At henakni TUHAN amu en neg kwe walug og-heneplug nindig-aruhureg de ap homi enunggul unuk o etma wereg on elehapdoho enowaruhu mu re it enobam etma hit hwelag kuhup. Airoho kuruk kwit At henakni TUHAN en isi hagdoho at Yosua henelohotma atlug og-heneplug nindig aruhu.

⁴ Airoho og-heneplug laukmu At henakni TUHAN en atam it ap homi Amori on enowesi Raja Sihon inim, Og inim, enalong elehapdoho feselug enobam bumbuk inim mun luluhundoho fesi hag Aren it ap homi enunggul unuk etma on mun elehapdoho fesehu.

⁵Airoho debesehureg At TUHAN en hit henalongap henobahakumu it ap homi aire an den hit hweag-hesauihik hagdoho it airoho enobam siag-biagdoho debeseiyug.

⁶At henakni TUHAN Allah amu en neg hit let-henepuk karuhu anggere, it fam henekol enebuk fug. Hit henenda hambuk atlug henambong seroho neg diyug! At de henenda hesilig ale henobahakeg, hit henobahalug laheg, duhu fug,” ulug hweag-esebag.

⁷Airoho hweag-esebagdeg, at Musa en Yosua wol-hebagdeg ap homi enunggul unuk Israel on mundoho etmano inil hanim at hweag-utuk kwit, “Yosua ahwi, At TUHAN en ap homi su enombasi fam o kwenang og-hesahuk ulug abug hweag-esebag ma etma sebelik kulug welamagdoho haren neg kwe lit-eneplug kuhun anggere, henda hambuk dalug hambong se amuk.

⁸ At hakni TUHAN amu en neg sen haplug lauk kwit let hapuk karuhu. Aren henda hesili hobahakeg, hat hobahalug laheg duhu fug. Anggere haren hakol dulug henda firoho duk fug,” ulug hweag-etfag.

⁹Airoho hweag-etfagdeg at Musa en TUHAN Allah awene melaleg anyo lisu baloho it ap Lewi on imam welatfag on etmano Allah en Abug Wene wat-esebag on baleg yohwareg welatfag angge peti anyo hwalduk katfag enap etmano mel, it ap homi Israel on enowesi melal-enepuk on mel, etmano fam og-esebag.

¹⁰ Og-esebagdeg aren it melale-feseruk kwit diroho hweag-esebag, “Hundig-hundig tahun sabit on ahae fotog atuk li, soni O Sabo fahet esetuk salim ap homi en baleg-angge omano elehapdoho foruk li em aire,

¹¹At henakni TUHAN Allah en obale momaloho forukmu etmano ap homi Israel on At apne waul ulug waharuk on etmano fam henele mun buhundoho wene melaleg diroho diyug suroho diyug ulug baleg wereg on su biling-esauk kamuk.

¹²Airoho bilingguruk li em de ap inim, homi inim, omalik doron inim, ap homi bohon hit henobam kota etmano wereg on inim, iren enakni TUHAN Allah along bolug leho feheg, At awene melaleg hweag-esauk on anyo dipdoho holoho deheg, duruk kamagdoho ulug de wene bilinggurukmu enesanggo holik wamag ulug hweag-esakiyug.

¹³Airoho duhup ai fam de horog ketia o Ik Yordan foma fil kwenang og-hesasimu kwik lahup en duruk kahepma etma kulug wereg lit, it henomaliki Allah awene melaleg ai enesanggo holswa fug on inim, enesanggo holeheg, henakni TUHAN Allah along bolug leho foruk ale mamul-deheg duhup,” ulug hweag-esebag.

¹⁴Airoho hweag-esebagman ombolim TUHAN en Musa ele hweag-utuk kwit, “Hat henggik eke inim holuk welaruhun fug ai. Anggere An den at Yosua en duruk karuhu ale fahet, diroho duruk karuhun-airoho duruk karuhun ulug milil-melal debemin anggere at ebe wol-halug de An nobam o sabo sum on fam wirigmu etmano manu.” Ulug airoho hweag-etfag ma at Musa en Yosua wol-halug o sabo sum on fam wirigmu etmano lebag.

¹⁵Airoho laukmu At TUHAN ebe hena anggulog fam o sum on fam sabo salegma etmano en sokole horogdoho etma inatfag.

¹⁶Airoho inatfagdeg At TUHAN en Musa hweag-utuk kwit, “Hat hebe wararuhun ale mun horog atuk ai. Wararuhunmu, ap homi enunggul unuk Israel on en de An nobahalug, An den abug wene waroho og-enepukmu iren uruk kwit, Nit Hat homaliki welamuhuk, ulug uswa on ai embeselug de enenggik eke inim welam fug angge o iren sebelik kuhupmu etma wereg lit, it ap homi etma on en amu on fahet allah-ap debelug apne wauk on ai apne wauk kamul ulug, An nobahalug wilibuhup.

¹⁷Iren airoho duhup halug de An nahummu het-bet uruk kwit heroho enobam sahali uhuk. Airoho duruk kwit enebe mundoho embeselug elehapdoho fesehuk. Airoho debeseruk kwit di on su on enobam debesehukmu, mundoho aire nenakni TUHAN Allah fahat-nenesug wereg hagdoho fahat-nenesug fug hehe ulug, furebehup.

¹⁸Eta li em iren siag airoho neg duruk kwit, amu on fahet allah-ap debelug apne weheg, siag on deheg, duruk kamuhup ai en An den let-enebuk ale nerim hag aruhu.

¹⁹Ketiare haren suni ket felaleg su lisu baloho fohun mu airoho duruk katuhuk ulug, ebereg wereg lit suni ai wilipuk kamuhup en de mamul-esakiyug.

²⁰An den de o kwenang mun hesiligmu, di angge su angge mun wereg ma neg etma hit henombasi og-hesahuk ulug abug wene wat-esauihik hag etma og-eneplug kuhuk. Kurukmu it o etma enenda nauk karuhu angge humdoho nauk kwit, it enebe enoluk fano welamuhup. Aireg famen de An den abug wene waroho og-enepihik mu, iren uruk kwit Nit Hat homaliki welamuhuk ulug uswa on ai embeselug, fobik en An nebe nobahalug wilibik lalug, it ap homi en amu on fahet allah-ap debelug apne wauk on ai fahet apne wauk kamuhup.

²¹Airoho duhupmu, An den di on su on mun enakol on enobam fohuk. Aireg famen de suni su neg de iren demdoho airoho duruhuk ulug wilipuk kamag. An den o it abug wene wat-esauihik mu etma og-eneplug kwik la fug angge welahi famen de, it enendama ebetuk ale aire An mundoho noluk,” ulug hweag-etfag.

²²Airoho hweag-etfag ma, etano li em at Musa en suni ket felaleg anyo lisu bale febagdeg, it ap homi Israel on mamul-esebag.

²³ Airoho mamul-esebag ma, At TUHAN en Yosua hun Nun amloho anyo hweag-utuk kwit, “Yosua ao, hat henda hambuk debelug hambong seroho welamuk. An den o ap homi Israel on og-hesahuk ulug abug wene wat-esauihik mu etma haren og-eneplug kwik laukmu An den let-heahuk,” ulug hweag-etfag.

²⁴Airoho hweag-etfag ma, at Musa Allah en diroho diyug suroho diyug ulug ebag wene anyo buku misig on fam, wene indipmen dindiloho ambiangma huli bilinggoho lisu bale febag.

²⁵Airoho bale febagdeg it ap Lewi on imam welatfag on Allah en wene abug yiko og-enepfag on ulug e wirig angge peti hwalduk kamag ulug unduhuk fesebag on etmano hweag-esauk kwit,

²⁶“Allah en ele melaleg lisu baleg on su e peti wirig At nenakni TUHAN en sali waroho og-nenepsi ulug wirig on ai aluluk eta fohupmu, etma mundoho wereg ma re ap homi inil halug demdoho an nil hanim atsi uruk hagdoho demdoho ele hweag-nesasi ulug uruk kamag dohore etma welamag.

²⁷It enenda haroreg lit nenerim ulug kwaniruruk on neg deg ale aire an noluk. An nebe noluk wereg kweleg famen ohore nenakni TUHAN nenerim ulug ele sahaloho fousa, anggere an wararuhukmu etma re ebenaheg duhup.

²⁸Ketiare ap homi enunggul unuk di on su on enowesi inim, it sehen foroho on enowesi inim, an naluluk kabog-dik wamlusa ma wene su hweag-esarohon de wol-esakiek. Wamlusa ma wene ai hweag-esaukmu enolukdoho inil welamag ulug de bohol inim, kwenang inim oho enayonggo fesehi neg.

²⁹An nebe mundoho wararuhukmu, it ap homi su enobabut mundoho siag neg atlug wene an den it hweag-isihi on ai iren nit de wene ai nenerim ulug embesehup ai an noluk. Airoho embeseruk kwit nenakni TUHAN ahummu het-amag ulug de, wene melaleg Aren duk fug. Ulug isi on etmano durukmu unggum humon enobam fohu,” ulug hweag-esebag.

³⁰Fobik at Musa en suni su it ap homi enunggul unuk Israel on enesanggo holeg kweleg indipmu en bekit ambiangma huli mamul-esaroho debagdeg, suni ebe diroho wilipfag: