Read Ninia Yali ULANGAN 32 Bible Online

ULANGAN 32 - Ninia Yali bible

ULANGAN 32

¹“Hu, an suni imin anyo hui hui, hat bohol hesanggo holiyug hu, an suni imin anyo hui hui, hat kwenang hesanggo holiyug.

²An den mamul-hitmin on aire osit hag wambik wamag nele imin on aire lil hag helelaroho wambik wamag, Osit lil-lil on higitdeg enggelangge fene wambik waharuk higitdeg, Osit lohon kwenang di angge su angge fene yaho kwe hondo-deberuk hag.

³Nenakni TUHAN an den mot-duruk katmin. Nenakni TUHAN Allah ahako wereg ale anyo hiren walug fag-duruk kamek!

⁴Henakni TUHAN omamneroho hinibil atuk on, di on su on Aren siagdoho eke duruk fug mun higitdoho neg duruk. Nenakni Allah obabut o fotog-nesauk fug, At fam hwenaroho duruk on wereg fug. At mun fano on nim demdoho on nim neg duruk.

⁵Aireg famen de hit henunggul unuk su neg dipdoho duruk kahep fug on, henebe At omaliki wereg ale henerim on siagdoho neg duruk on hit henunggul unuk su henap kwasikdoho neg duruk henap.

⁶Henakni TUHAN en fano-henepsi on fahet, hiren onggo airoho duk ale duruhup ane? Hit henobabut de morue on hag henenda fam wenggeluk ale nong-hong deg lahep on suma. Henakni At de fug no a? Aren neg wal-henepsi fug a? hit henunggul unuk de misig neg welamag ulug Aren misig apdoho henobahasi fug no a?

⁷It ap homi endam welatfag on fam enobam eberiyug, henenda eberiyug. It henombasi en hweag-hesowag ulug enobam hein og-esakiyug.

⁸ At Mun Leho wereg on en kwenang yohwan-esauk kwit ap homi enunggul unuk domog de enobam huli-huli domog og-esasi. Enunggul unuk domog fahet enomamne fam sen-enesug lamag ulug At en ilah bohol fam on akni apdoho fesesi.

⁹Aireg famen de ap homi Yakub en ondohoma on su re momal-dasi TUHAN en At onggwareg angge on welamag ulug momal-enepsi.

¹⁰It enebe o dag watil noruk men hweag-enepsi o leimu ap homi mun elegma weregman hweag-enepsi. Airoho hweag-enepsireg alele oko fahat-enusug lit, inil dokuk duk no ulug duruk hag At onggwareg il anggen hag doho hwal-enepuk katsi.

¹¹Suwe ikwesahop en omalik daroho noruk kamag ulug mamul-enepuk kwit ahwerabul langdoho noruk kwit emberimmu sahaliroho walug lauk hag,

¹²At TUHAN amu en omaliki og-eneplug melal-enepil lasi, ap bohon en allah-ap debelug duruk on eke At inim lauk katsi fug.

¹³At Allah en omaliki dom kwe sebeleg wereg lit it eneyabukmu en enasiburu nenggeg; kin ahalue e enggelama dom fene on iren ahalue hwelalug nenggeg duruk kamag ulug debeseruk katsi. E zaitun kwenang helep anggen kwe wilibig on fam en iren zaitun ahalue hwenanggulug nauk katswa.

¹⁴Enowam sapi, kambing, domba mel en ahowe humdoho hwelauk katswa; it enowam neg de we mun fano on deg latsi, gandum mel anggur mel iren on de mun finik-fano on wereg latsi.

¹⁵TUHAN omaliki on enangge enenggik wereg deg latswa, famen de wene sahalduk katswa, it enebe re enobahare hum enap ne nauk alere mun homoroho nauk katswa. Airoho nalug en Allah wal-nenepsi on embeselug lauk katswa, Allah enggik omamne wereg lit del-nenepsi on anyo domako embeseswa.

¹⁶Iren enanggembu mot-duruk men At TUHAN en erim besi, It siag duswa ai fam At ahum kwe siag-biag isi.

¹⁷ Iren enowam waroho re heime olok on Allah fug on mel, kembu ilah keron it enombawi en enakol duruk katfag fug on fam og-utuk katswa.

¹⁸Iren enakni Allah enggik omamne fam enebe del-enepuk on anyo orohole kwe duswa, It enakni Allah enebe eneluk-enepuk on anyo enapeleg atswa.

¹⁹At TUHAN en it airoho durukmu esalug, TUHAN olok atsireg it An nomaliki fug ulug embesesi.

²⁰Embesesireg Aren uruk kwit, Ap homi enunggul unuk ai on de enunggul owag helep hag deg ma Nobam dipdoho wereg fug mu it let-enepuk ale mun nerim iren airoho duruk kamuhup deg ambiangma keroho amuhup ulug nil kumu enusug laruhuk

²¹ It en duruk fam Anden Allah fug on fam nolok foruk kahi, ne it enanggembu ai fam nahummu het ferihik. Mu re Anden it nomaliki en ap homi enunggul unuk fug on fam enolok feseheg, ne ap enunggul unuk mun morue on fam enahumu het feseheg, dukwag ulug debesehuk.

²²Indok ambulbul yelelang-felelang nauk hag An nahummu ahe sebele folug nil-nil apma ap waratlug laukmu nil wambuhu. Indok ai en de kwenang mundoho han nauk kwit de di angge su angge emberimmu yaho on mundoho nahu, dom ebe han nauk kwit de indip inim mundoho nahu.

²³An den hindik-hundig siag mun anggin on enobam monde-feik neg waharuk karuhuk, An naminggin dog fam it bising-enepuk kwit neg welaruhuk.

²⁴It enebere ouk ahanhan angge en inim, siburu obok en inim waramuhup, ne eke An den ouk mun enakol on it enobam fesehuk ai en waramuhup. Maro mun olok ligireg on en enebe senggel-enepuk kamag ulug embesehuk, ne kisu ap homi senggel-enepuk on en aeg bal-enepuk kamag ulug it enebe embesehuk.

²⁵It enebe dag kwe laukmu dog yapuk kwit enowaruhup; it enebe olma wereg ma enakol humon neg atuk karuhu. Ap omalik hwelani omalik ket sauwe on enebe mundoho elehap debesehup, ai en it omalik enebe ket ondoho on mel, hwe ap sobal on mel enebe mundoho elehap debesehuk.

²⁶It ap homi foman ebet esauk kamuhup hayog de, An den enebe mundoho elehap debesehuk ulug nenda boruk kahi.

²⁷Famen de it Israel on eneselei on en de winik-wonog uhup ai An nerim deg lahi; An den duruk kweleg famen it enenda meneni we hesanggeroho boruk kwit de it Allah omaliki on aire niren enalong elehap debehe, ulug, enenda bouk no ulug duhuk, isi.

²⁸Ap homi enunggul unuk Israel on aire enenda wenggelduk ale eleg on; It de enenda fu debelug duruk on de it fam wereg fug.

²⁹It enenda enggat deg lit wenggeleg on lalepman de, diroho aruhu ulug fu debelep, ne fobik nit diroho amuhuk belep.

³⁰Ap ebe en famen de it enebe 1.000 en keroho mug-enesa ale deg, ap enebe dem biren en ap enebe 10.000 en nangginoho muko wilibi fesouk alereg? TUHAN Allah it enakni en enebe mundoho onggo mun bal-enepsi; ne Allah omamne humon anyo en enebe mun embesesi.

³¹Israel eneselei on en de nit fahat-nenusug wereg on de it ap homi Israel on fahat-enusug wereg ai hag de fug Allah ai hag on inim higit on de mun eleg ulug it enoluk deg.

³²It ap homi ai enobabut ap homi Sodom, Gomora enobabut hagdoho mun siag deg, e anggur anggen asig mun siag on ap enowatuk on hag it enobabut de aireg.

³³It enahaik anggur ahaluere kisu ap senggelduk on aeg kamol hag.

³⁴At TUHAN en de At omaliki enaselei on en duruk ale fahet ebereg, ne Aren airoho ebereg welaruhureg halug de o li mun higit aruhu mu unggum enobam fohu en wereg.

³⁵ Iren duswa onggo unggum enobam folug enowaruhu, enenggik eke inim welam-fug angge it mundoho waroho lin uhup; it mundoho luluhun amuhup salim horog aik waha.

³⁶ At TUHAN en omaliki del-eneplug de at ap homi At amingming angge enda hundig enebuhu, it enomamne eleg-atlug wereg ma, ne iren duk fug aleroho deg ma Aren il esalug it mundoho enomamne eleg-aruhu mu re enda enebuhu.

³⁷Nenakni TUHAN en At omaliki fam hein og-esauk kwit de ‘Hiren amu on fahet allah-ap debelug duruk on fahet omamne mun humdeg ulug boruk kahep on enebe o kema wereg?’ ulug, hein og-esahu.

³⁸Hiren wam waroho feseruhup on asei nenggeg, e anggur ahalue og-utuhup nenggeg dusa. Iren let-henebik wamagdoho henele hweag-esakiek iren hit henebe mapnuroho welamuhup on amag.

³⁹Furiek, Allah we misig An namu neg, Allah amu on eke mundoho eleg An den neg enowatlug, An den neg enebe enoluge feseruk kahi on, enayebil amag ulug enowatuk kahi on, fano hiling-amag ulug enepuk kahi on. An den durukmu re, it eke en an nele sebeluk fug alereg.

⁴⁰An Allah nonggwareg namu neg noluk neitog welahi, An nenggik lahabe folug nonggwareg nunuk hombuk balohore:

⁴¹An nenggarog enggat amumulit anggoloroho maho folug An den unggum enobam feil lauk karuhuk. An naselei on mundoho enowaruhuk. An enerim napuk on de mundoho unggum enobam fohuk.

⁴²It enamep de An nandog fene label-aruhu It mundoho en An nele sahale folug duruk on de nenggarog fam mundoho enowaruhuk. It An naselei on de ap sa ulug oho eke embesehuk fug; It dog wareg on mel, sabu hetdoho wereg on mel, de enoluk embesehuk fug mundoho enowaruhuk ulug isi.

⁴³ Nenakni TUHAN omaliki enowatuk on de Aren mundoho unggum enobam fohu. Famen de Aren it omaliki on en enesiag duruk on sebeloho elehap deberuk karuhu. At omaliki on enunggulmu re Aren aselei on enowaruhu. Enowaruhu ai en de hit henakni TUHAN omaliki on de ununggul unuk domog en At mot-diek.” Ulug airoho suni uruk kamag ulug mamul-esebag.

⁴⁴At Musa mel, Yosua hun Nun amloho anyo mel, inim en suni ai it ap homi Israel on mamul-esauk kweleg enesanggo holeg latfag.

⁴⁵At Musa en wene melaleg At TUHAN en hweag-esebag on anyo it ap homi enunggul unuk Israel on fam mundoho biling-esebagdeg,

⁴⁶It etmano hweag-esauk kwit, “Wene an den yoho diroho diyug suroho diyug ulug hweag-hisihi on aire mundoho henendama wakiyug. Hit henomaliki en wene At nenakni TUHAN en melaloho hweag-nesasi on ai higitdoho at obam dipdeg lit duruk kamag ulug mamul-esauk kamuk.

⁴⁷Wene komoroho hweag-nesasi on aire ebe elegma ele fahet neg de fug. We demdoho henoluk henepuk on. Anunuroho welam fug angge o kwenang Ik Yordan foma baloho nindig atlug sebelik kuhupmu etma lalug, henebe henoluk eke inim yatdoho welamuhup en de, diroho diyug suroho diyug ulug melaloho hweag-nesasi wene airoho furoho holoho duruk kamuk,” ulug hweag-esebag.

⁴⁸ Airoho hweag-esebag ma, nukoho anyo salim neg At nenakni TUHAN en Musa hweag-utuk kwit,

⁴⁹“O kota Yerikho en nindihip ha waharukmu, o Moab en Dom Abarim fam etma lakin. Etma lalug de dom unuk Nebo fam lahalug de o Kanaan An den ap homi enunggul unuk Israel on we horog ketia og-esahukmu etmano hil fu ha lakiyug.

⁵⁰Airoho fu hahunmen hat howe Harun Dom Hor fam waratsi anyo hag, hat hebe dom ai famen wararuhun.

⁵¹Hit biren en o Zin leimu en o kota Kades horogdoho ik Meriba elerukmu etano en An nele holoho duk fug angge ap homi enunggul unuk Israel on inil hanim An henakol bolug nalong boruhup fug.

⁵²Airoho duruhup ai en de hat hebe o An den ap homi enunggul unuk Israel on og-esahukmu etma kwik lahun fug. We hebe yatman neg hil fu hahun eta,” ulug hweag-etfag.