Read Ninia Yali ULANGAN 33 Bible Online

ULANGAN 33 - Ninia Yali bible

ULANGAN 33

¹Airoho hweag-etfag ma, at Musa Allah en ayonggo febag on anyo ebe owan waram fug angge wereg lit, ap homi enunggul unuk Israel on Allah en fanoap henepuk kamag ulug ele enobam diroho fanoap debesebag:

²“Nenakni TUHAN ebe it boholma yonggo enebe 10.000 en on inim, Dom Sinai fam en waharuk. Wahareg o mo heneko lahaik waharuk hag, o Edom fil etma wahareg, mo nukoho andundu yatuk hag, At enggik bekit fil indok ambulbul duruk wereg lit, Dom Paran fam en omaliki enobam asinandi baloho mondorik waha.

³Dik demdoho nenakni TUHAN omaliki unggul unuk on[27] enda hundig wereg. Ap homi At onggwareg en on de enebe domog mundoho sen-enesug wereg. Nit At eyog indipmu nenelenggen dimi-debelug sahaun uruk kwit, mot-duruk kwit, Aren diroho duruk kamuk suroho duruk kamuk ulug hweag-nesauk ale ai holoho higitdoho neg duruk kamul.

⁴Niren de at Musa en wene melaleg diroho duruk kamuk ulug hweag-nesasi on ai higitdoho duruk kamul. Ap homi nenunggul unuk niron en nenangge di angge su angge foma re maben hag famen de mun leho on de nenawene baleg ai at wereg.

⁵Airoho urukmu hit ap homi Israel on it henowesi olohotma wereg on hinim kabog-duruhup salim, At nenakni TUHAN hit henowe Raja atsi,” ulug hweag-esebag.

⁶Airoho hweag-esebagdeg, it ap enunggul unuk Ruben on fahet Musa en wene uruk kwit, “Hit henunggul unuk Ruben on de henebe we dot deg lahep famen de, mun eleg-am fug angge welamuhup lamag,” ulug hweag-esebag.

⁷Airoho hweag-esebagdeg, ap homi enunggul unuk Yehuda on fahet aren wene uruk kwit, “Nenakni TUHAN, ap homi Yehuda on en habug balduk kamuhup ai hesanggo holiyug; it enamumu atuk halug de fobik enunggul unuk Israel on inim misigmu welamag ulug, it Yehuda on mel misigmu seberoho feseiyug. TUHAN nenakni, it enobahet enaweim on inim weim yabiyug,[28] It eneselei on en enowatul ulug durukmu, del-enepuk kamuk,” ulug ebag.

⁸ Airoho hweag-etfagdeg ap homi Lewi on fahet wene uruk kwit: “It ap Hat homaliki hamingming angge enunggul unuk Lewi on Hat hobam lomboroho wereg lit, Hat hil hanim dipdoho neg duruk. Enamigmu boruruk angge unuk Urim mel Tumim mel [29] fam Hat henda boruk kahen ale fahet hein og-hapukmu enamegdoho hweag-nesauk kahen ai. O Masa etman enobabut baldil, ik Meriba elerukmu etman hinim wene baldil, duruhup.

⁹Enobabut Hat hobam dipdeg lit wereg alere, enaknisi enesingasi mel, enori enerekwi mel, fahet on enembolmaap deberuk kwit Hat hobahet on neg de atamap debousa. Haren wene melaleg diroho diyug suroho diyug ulug hweag-nesauihin on ai iren holoho higitdoho deheg, ne Haren wene abug waroho og-henebihi, irihin mu iren nit de At omaliki ulug uswa ai.

¹⁰Anggere fobik iren Haren wene melaleg hweag-nesauihin on anyo mundoho it homaliki en dipdoho duruk kamag ulug hweag-eseheg, wam di angge su angge waroho yal-hutuk mu etmano waroho yal-hereheg duruk kamag.

¹¹TUHAN nenakni, ap homi enunggul unuk su enomamneroho amag ulug fanoroho let-enesauk nu. Iren yabuk durukmu hendama fano hauk kamuk. It enaselei on mundoho en fobik enowatul ulug weim abug uruk kam no ulug Haren neg elehap debeseiyug,” ulug ebag.

¹²Airoho hweag-etfagdeg it ap homi enunggul unuk Benyamin on fahet wene uruk kwit: “Ap homi enunggul unuk Benyamin on sure At TUHAN enda hundig on. Degma re At ebe it enanggelegma wereg[30] lit, nukoho hup angge mun fahat-enusug lit neg wereg lamin,” ulug ebag.

¹³Airoho hweag-etfagdeg it ap homi Yusuf en ondohoma on fahet wene uruk kwit: “It enanggwenang fam osit belap-esa waheg, ik ahalue kwenang famen lahabe feik waheg, duruk kamuk.

¹⁴Di angge su angge a yaho on anggen yihiruk li anggen fano on indipmu en yuhul atuk on obam fulularoho yig-atuk kamag.

¹⁵It enandom yaron Haren wal-dirihin huli en wereg on etman anggen di on su on fano on neg yihiruk kamag.

¹⁶At Yusuf ebe ori, autsi fahet enowe kain on atsi ai en de omaliki enanggwenang fam en di angge su angge yaho on famen fulularoho og-eseheg, Hat hebe e enggelangge apman indok ambulbul hag angge ulog hauk kwit Hat hele hweag-nitihin anyo, hobabut fano en fanoap debeheg duruk kamuk.

¹⁷Yusuf de wam sapi yohombuk omamne humon hag amag, wam sapi enggelama on andimuk unggulmu wereg ai hag de, ap Manasye on esan mun hum atlug ribuan hagdoho amag. Ne, ap Efraim de wam sapi yohombuk on andimuk unggulmu en dungdoho enowatuk hag, ap Yusuf en ondohoma on ap esan log on ai en ap homi eke enunggul unuk humon waroho, di obam su obam huli ambiangma etma monde-feseruk kamag,” ulug ebag.

¹⁸Airoho ebagdeg it enunggul unuk Zebulon on mel, Isakhar on mel, fahet wene eke uruk kwit: “Ap homi enunggul unuk Zebulon on en kwe noruk kwit di angge su angge mundoho saburoho hweleheg duruk kwit fanoroho welamag. Ne, it ap homi enunggul unuk Isakhar on enobam sum on fam o sabo wiroho wereg lit enobam mun finik-fanoroho welamag.

¹⁹Airoho wereg lit iren ap homi enunggul unuk amu on enayonggo folug, it Zebulon on enandom fam andog dik watlug, wam di angge su angge waroho yaleheg, durukmu en demdoho airoho duruk kamag. It Zebulon on aire di angge su angge mun fano on ik laut yenggeleg on famen hweleheg, ik inggi laut aluluk elan kwe wereg on etma hweleheg, duruk kwit inilmu hum atuk kamag,” ulug ebag.

²⁰Airoho ebagdeg it ap homi enunggul unuk Gad on fahet wene uruk kwit: “Nenakni Allah Haren it ap homi enunggul unuk Gad on enobam etma wiyale foruk kahen on ai mot-deg welamuk. It ap homi Gad on enobabut de olomene obabut siag on unuk singa di angge su angge waharukmu watmin ulug kahaleg welatlug wilipuk kwit enggik oho, ahap unggul owag famen on oho libil-labaldoho watuk ai hag welamag.

²¹Kwenang mun fanoma re it enonggwareg fahet hwelowag. Enori enunggul unuk amu on en nenowesi olohotma on de it welamag, ulug unduhuk feseruk kamag. Ap homi Israel on enori mundoho inim enebe misigmu kabog-debelug,[31] TUHAN en diroho diyug suroho diyug ulug isi wene ai mel TUHAN Awene melaleg mel iren mundoho duruk kamag,” ulug ebag.

²²Airoho ebagdeg it ap homi enunggul unuk Dan on fahet wene eke uruk kwit: “It ap homi enunggul unuk Dan on enobabut de olomene mun olok on unuk singa omalik misig hag. O Basan en hweik heheg wilibik waharuk kamag,” ulug ebag.

²³Airoho ebagdeg ap homi enunggul unuk Naftali on fahet wene eke uruk kwit: “Hit ap homi henunggul unuk Naftali on de TUHAN en enda hundig heneplug de di angge su angge mun fano on mel og-hesauk kamag. Ne, henobam de ik Galilea yenggelegman bekit de huli il apma fil erahamu welamuk,” ulug ebag.

²⁴Airoho ebagdeg it ap homi enunggul unuk Asyer on fahet wene uruk kwit: “Ap homi henunggul unuk foma re we dorangge hag fanoap henobaharuk kwit de, hit ap homi henunggul unuk Asyer on neg de mun alongdoho fanoap henepuk kamag. It henori henerekwi en de hit neg henendaroho welamag. Ne, hit heneyabukmu e zaitun hesilig fano ahalue humon wilipuk kamag.

²⁵Hit henoluk wereg lit fano henakol mel, youk mel eleg angge welamag ulug hit henobam kota mundoho elehet fak elehet fam sokole yendeg kwe re, kwe sok tembaga on mel, bosie on mel, fam oho lamag,” ulug hweag-esebag.

²⁶Airoho ebagdeg, ap homi Israel mun seberoho fahet hweag-utuk kwit, “Hit ap homi Israel on su ap homi en amu on fahet allah-ap debelug uruk on en nit nenakni Allah hag on de eke wereg fug. Aireg ma re At ebe mot-duruk kweleg anggilukdoho bohol fam waheg, hit let-hesowag ulug o hena healoho waheg, duruk kamag.

²⁷Allah en mundoho sen-henusug lit wereg lit, enggik omamne on ai fam let-henesauk kwit neg welamag. Aren hit henolohotma en it heneselei on muko wilibi feseruk kwit, hiren it mundoho elehap debeseiyek ulug hweag-hesauk kamag.

²⁸Hit hun Yakub en ondohoma on su, fobik o fanoma lalug de bohol famen ahalue liloho kwenangma belabik waharuk kweleg gandum mel, anggur anggen ahalue mel, deg ma wereg lit henobam liogdoho wereg lamuk.

²⁹Hit ap homi Israel on su henendama henahayeg hauk kamek! Nit nenakni TUHAN en del-nenepsi ai hag it ap homi enunggul unuk amu on eke del-enepsi fug. Nit nenakni TUHAN aire ebe nit nenesahalimu wereg lit, henaselei on mabenap debeselug henomamne amag ulug henobahakeg, duruk kwit ebere karog weim yapuk on ai mel, ap homi en nenowaruk no ulug sing labelduk ai hag welamag. Ap homi henaselei on aire henenda nenebiek ulug, hweag-hesa waharukmu, hiren it heneyog en[32] al bereloho feseruk kamuhup,” ulug ebag.