Read Ninia Yali ULANGAN 34 Bible Online

ULANGAN 34 - Ninia Yali bible

ULANGAN 34

¹Airoho ebagdeg at Musa anyo o Moab leimu kwenang sebelegma etma en dom unuk Nebo fam lahalug duk funu deg ma unuk Pisga, o Yerikho en nindihip haukmu o mo lahaik waharuk fil etma lebag. Lebag ma At nenakni TUHAN en de o suma mundoho il fu ha wamag ulug hweag-etfag. O suma ekere o Gilead ketia ap homi enunggul unuk Dan on enobam kota wereg higitdoho foma fil yatma etma mel,

²ap homi enunggul unuk Naftali on enobam mundoho mel, ap homi enunggul unuk Manasye on enobam mundoho mel wilayah Efraim on en mel, ap homi enunggul unuk Yehuda on enobam mo obuk uruk higitdoho ik laut bul yenggeleg on en yatdoho foma fil mel,

³suma fil de il apma fil en o Soar en kota Yerikho e kurma indip sahareg ma etma mel kwenang donggo mun ape eleg deg ma etma mel fu ha wamag ulug unug-etfag.

⁴ Airoho unug-etfagdeg At TUHAN en Musa diroho hweag-etfag: “Musa, o hil fu hehenma etma re An den Abraham, Ishak, Yakub mel, fam hweag-esauk kwit, o hiren ondohoma on og-esahuk ulug abug wene wat-esauihik mu etmanore ebe hil fu hehen etma. O etma re we hil neg fu howag ulug unug-hirihi famen de, hat hebe o etma lakin ulug de hweag-hitmin fug,” ulug hweag-etfag.

⁵Airoho hweag-etfag ma At nenakni TUHAN en amingming angge Musa owan waram fug angge wereg kweleg hweag-etfag ale higitdoho at ebe o Moab etma en waratfag.

⁶Airoho waratfag ma At nenakni TUHAN en at Musa ebe wareg, o Moab en donggo eke o kota Bet-Peor en nindiko fil etma sale febag. Airoho sale febag famen de sale febag ma etma ap homi eke en ebe demdoho dia ulug ketia huli en enoluk deg fug.

⁷At Musa ebere umur 120 tahun welatfagdeg waratfag. At ebe omamne eleg aheg, il mum aheg, mel duk fug angge en waratfag.

⁸Airoho waratfag ma ap homi enunggul unuk Israel on o Moab kwenang donggoma etma Musa fahet oba yareheg, fong wareheg duruk men neg enenggik nukoho 30 en welatfag.

⁹At Musa airoho waratfag ma At nenakni TUHAN en Yosua hun Nun amloho at Musa en obalma unduhuk fesi ai en de di angge su angge mun fulularoho og-esauk hagdoho at enda wenggeleg on deg lamag ulug debebag. Airoho debebag ma it ap homi enunggul unuk Israel on en at Yosua ele holoho wereg lit, At nenakni TUHAN en diroho diyug suroho diyug ulug at Musa hweag-etfag ma it hweag-esebag on anyo higitdoho duruk katfag.

¹⁰ Airoho duruk kweleg, ap homi Israel on en ap eke Allah ele hweag-esauk on at Musa TUHAN inim wene enorohole kwelabeg uruk katfag ai hag eke mun wereg fug.

¹¹Aireg ma At nenakni TUHAN en Musa hweag-utuk kwit, diroho dik lakiyug ulug hweag-etfag higitdoho it ap homi Mesir on mel, enowe Raja Firaun mel, at autsi mel, fureboukwag ulug inil hanim, duk fug on deheg, nik on deheg, duruk katfag ai hag duk on eke wereg fug.

¹²At Musa en ap homi Israel on mundoho inil hanim nik ale on humdoho deheg, enakol on deheg, duruk katfag on ai hag duk on eke wereg fug.