Read Ninia Yali ULANGAN 4 Bible Online

ULANGAN 4 - Ninia Yali bible

ULANGAN 4

¹Airoho hweag-esebagdeg at Musa en it ap homi anyo hweag-esauk kwit, “Nenakni TUHAN Allah it henombasi enakni ai en kwenang hit heneluk wereg lit og-hesahumu hwelahupdeg welamuhup en ulug de, an den wene melaleg baleg wereg on hweag-hesauk kahi on ai dipdoho neg duruk kamek.

² An den diroho duruk nu suroho duruk nu ulug hweag-hesauk kahi on aire hiren we dorangge ulug oho dopno debeheg, eke embeseheg, duk fug. Henakni TUHAN Allah awene melaleg an den hweag-hesauk kahi on ai fik-furoho neg duruk kamuk.

³ Hit henakni TUHAN Allah en Dom Peor famen disi ale anyo hit hinil mundoho hauhup anyo. Ap homi it enenggembu Baal fam apne wauk katswa on anyo Aren mundoho elehapdoho fesesi,

⁴famen hit henakni TUHAN Allah fam henenda dipdeg lit duruk kahep on anyore ketia huli henoluk welahep ai.

⁵Wene melaleg mundoho baleg wereg on aire At nenakni TUHAN Allah en an hweag-nitsi hagdoho hweag-hesauk kahi, anggere hit henobam kwik lahupmu etma kwik lahupdeg wereg lit de fik-furoho neg duruk kamuk.

⁶Wene aire mun dipdoho neg duruk kamuk. Ne, hiren airoho duruk halug de hit henebe enggat deg lahep ale anyo ap homi enenggul unuk amu on fam enameg laruhu. Ne, iren wene melaleg lisu baleg wereg on ai fahet enesanggo hol halug de iren uruk kwit, Yaho ap homi enunggul unuk hum enap ai en enenda wereg lit deg ale ai ambi! uruk kamuhup.

⁷Ap homi enunggul unuk ke on en amu on fahet allah ulug mot-duruk on etma, it enenda boruk halug nit nenakni TUHAN Allah en deg eta hagdoho horogma wereg behep? At de niren let nenebukwag ulug hwi duruk halug de nukoho kea li em oho onggo hweag-nesa alereg.

⁸Ap homi enunggul unuk ke on en enawene melaleg lisu baleg on mun katukdoho duruk on fahet, an den yoho hit hweag-hesauk kahi eiya hagdoho baleg wereg behep?

⁹Hiren hinil hehep on ai heneluk wereg lit henapeleg ahep ha no re fik-furebelug mun fano doho wenggeleg lamuk. Ebereg wereg lit henomaliki henombasi fam inim dindil-esauk nu.

¹⁰Nukoho ai salim hit Allah olohotma Dom Sinai fam unduhuk wereg kweleg, anyo salim Aren an hweag-nutuk kwit, An den wene imin on aire it ap homi etma inim enesanggo holusa nenda behi anggere ap homi ai kabog-debesein. Iren An nobam enenda dipdoho neg enoluk wereg ale mamuluhup deg iren enomaliki oho An nobam enenda dipdeg welamag ulug hweag-esauk kamuhup en, ulug, hweag-nitsi anyo.

¹¹ Dom fam hobu heik de hena salegma deg etmano hag deg kweleg, ne indok ambul-bul kulung hauk kwit bohol huli laharuk kweleg, hit dom indipmu inaik waharuhup deg duruhup ale etma it henomaliki fam dindil-esauk kamuk.

¹²Ai en indok anyo famen TUHAN ele hit hweag-hesasimu holduhup famen de obahare hinil hauhup fug.

¹³ Etano en neg Aren hit hinim abug wene hweag-hesasi on anyo hiren ebe duruk kamuhup ale fahet ulug Aren wene unduhuk fesi. Wene Melaleg numen anyo Aren helep kahaleg biren angge fam baloho fesi on aire hiren duruk kamuhup neg.

¹⁴ TUHAN en an mingming napuk kwit de hit o kwenang hwelag lahupdeg welamuhupmu ai en henenda dip debelug duruk kamuhup ale fahet hweag-hesowag ulug an hweag-nitsi anyo” ulug hweag-esebag.

¹⁵Eke hweag-esauk kwit, “Dom Sinai famen TUHAN indok ilonggoma en ele hweag-hesaukmu anyo hiren ebe obahare oho eke hauhup fug anyo, furoho wenggel-hakiyug.

¹⁶ Aireg ma re hiren kembu ilit angge hilinggi folug, ap hag on oho, homi hag on oho, ite amu angge hag on oho ilit debelug apne wauk fam siag dehep ha no re kahaleg lamuk.

¹⁷ Ne, eke ikan hag angge oho, suwe hag angge oho, kwenang kwe lobo duruk angge hag oho eke ahut hilinggehep ha no furebeiyug.

¹⁸

¹⁹Hiren mo inim, bigalem inim, sohwalanggen bohol fam wereg angge fam apne wauk kwit obahet duruk fam hit siag dehep ha no. At Henakni TUHAN Allah en de it ap homi enunggul unuk amu on neg de etma angge fam apne wauk kamag ulug embesesi ai.

²⁰ Famen de hit neg de ap homi hinunggul unuk mun anggin-fanggin anggoloroho hauk men, o Mesir en hinili oko wilibi henobahaik wahasi. O etma en og-heneplug wilibik wahasi aire henebe ketia welahep au hagdoho At obahet henunggul unuk amu on welamag ulug disi.

²¹ Famen de hit henakni TUHAN Allah en de hit siag en an nobam olok besireg, kwenang hesilig on Aren hit og-hesasimu etma, Ik Yordan baloho hat nindig aruhun fug ulug homan baloho hweag-nitsi.

²²Hit neg de we horog ketia ik baloho nindig atlug kwenang hesilig on fam og-hesasimu etma hwelag kuhup, famen de an neg de nebe dia en wararuhukmu re hininim lahuk fug.

²³Hit henakni TUHAN Allah en airoho henepuk karuhuk ulug hit henobam wene abug hweag-hesasi on ai henapeleg amuhup fug. Mun ebereg neg wereg nu! Ne, At obam henenda dipdeg lit neg duruk kamuk. Hiren kembu ilit angge amu angge ahut on fam ilit debelug apne waul en ulug duk fug.

²⁴ At henakni TUHAN Allah aire indok han weratuk on hag deg. Ma Aren amu angge inim higitap naplep ai nerim boruk.

²⁵Eke hit lahe mundoho o kwenang etma fam wereg lit henomaliki, henombasi ondoko saha uruk kwit de hiren kembu ilit angge on ahut amu angge on oho ilit debelug duruk fam siag dehep ha no. Airoho duruk on aire At henakni TUHAN Allah il hanim de mun kwasik on deg ma At olokap debehep halereg.

²⁶Yoho su salim de bohol inim kwenang inim de nele holeg lit inil kumu nusug lamag. Hit lahe an nele hweag-hesauk kahi on su fam fik-furebehup fug halug de, hit de henebe Ik Yordan baloho foma fil kwenang welamuhup on fam etma en mun fu heheg eleg amuhup. Hit de anunuroho etma welamuhup fug. Hit mundoho elehapdoho henobahakup.

²⁷ Henakni TUHAN en o ap homi enunggul unuk amu on wereg kwe buhul-bahaldoho wilibi henobahakumu we hit on en enebe dorangge neg eneluk welamuhup.

²⁸Etma lahupdeg wereg lit en, hiren amu on fahet allah hag ulug ap homi enenggik en e on fam inim, helep on fam inim, ilit debelug mot-duruk on il en mel kumu esa fug on, esanggo mel holuk fug alereg on, ambilik mel na fug alereg on, ambiang en mel amben sang-ha fug alereg on etmano fam apne wauk kamuhup.

²⁹ Airoho duruk kamuhup deg hiren henakni TUHAN Allah anyo hera dahupmen, hiren lahe henenda mundoho abirangge en hera dahup halug de At ebe hweag-dahup.

³⁰Hit henebam lahe di anggin su anggin inim di anggolo su anggolo inim aik waharuk halug, hiren henakni TUHAN Allah akit sombandoho watlug At obam henenda dipdeg lit duruk kamuhup.

³¹Hit henakni TUHAN Allah aire At mundoho enda hundig-enepuk on deg ma Aren hit henobahalug laheg, henebe elehapdoho henobahakeg, ite At onggwareg en hit hinim wene abug katukdoho wat-hesasi on anyo apeleg aheg, duhu fug.

³²Owan hit henebe endag-am fug mu indik-endam etma, nukoho At Allah en ap homi kwenangma suma waldoho febag huli etmano en indip bilinggiyug. Nik alereg on duk fug alereg on au atam etma eke atsimen ane? O kwenangma suma mundoho hera diyug. Ap homi wene su hagdoho atsi ale fahet eke enesanggo holswa ane?

³³Hit Allah ele urukmu henesanggo holduhup hagdoho ap homi enunggul unuk amu on eke iren allah ulug mot-duruk on etmano en indok sahalimu en it fam ele hweag-esaukmu, o keman eke enoluk lil atswa on wereg behep?

³⁴Amu on fahet allah hag ulug debelug apne wauk on etmano misig eke en ambong seroho ap homi enunggul unuk misig eke enunggul unuk humdoho wereg on etmano sahalimu en oko, At henakni TUHAN Allah en hit henobam o Mesir en henepsi ai hagdoho, kema en eke at omalikiap enepsi behep? Allah omamne en anggin-fanggin enobam feheg, weim yabeheg, along on humdoho deheg, di on su on duk fug alereg on deheg, duruk katsi ale anyo hiren oho hinil hauhup anyo.

³⁵ Ai mundoho At TUHAN en hit henobam duruk katsi aire henakni TUHAN Allah At amu neg wereg amu on de eke wereg fug anyo henoluk amag ulug duruk katsi.

³⁶Bohol fam en hit wene hweag-hesaroho ele wilibi feik waharuk katsi, ne kwenang suma famen de aren ahaindok kulung nauk on anyo ename fesireg, indok anyo famen hit henobam ele hweag-hesasi.

³⁷Aren it henombasi fam enda hundig enepsireg atlug de hit momal-henepsi. At enggik omamne humon fam de hit o Mesir en og-heneplug wilibik wahasi.

³⁸O hit ketia hit henobam atsi mu welahepma oma hwelowag ulug, hondoko og-heneplug wilibik waharuk kwit Ap homi enunggul unuk enomane humon deg lit esan hum enap etmano hit henolohotma en muko wilibi feseruk katsi.

³⁹Ai halug de yoho su fam henenda wenggel-hakiyug. Allah aire bohol fam oho, kwenang fam oho re we misig ai At amu neg. Ne, amu on eke wereg fug anyo henenda wenggel-hakiyug.

⁴⁰Wene melaleg an den yoho su salim hweag-hisihi on etare fik-furoho wakiyug. Ne, hiren fik-furoho wahup halug de hit henebe inim hit henambiangma en endag-amuhup on inim anggin-fanggin ha fug angge henobam mun fano angge neg welamuhup. Ne, henobam At henakni TUHAN Allah en hit henangge amag ulug og-hesasimu etma mundoho-mundoho neg welamuhup, ulug hweag-hesasi anyo,” ulug hweag-esebag.

⁴¹ Airoho hweag-esebagdeg at Musa en Ik Yordan foma fil mo lahaik waharuk fil etmano o kota henahan momaloho febag.

⁴²O along balegma etare ap homi en enenda wenggele folug fug famen we fetagdoho ap eneselei on fug famen enowatlug enahap wendat amag ulug lauk kamuhupmu ulug febag. Ap anyo en o kota misig eta eke laukmu ap en at ai watuk kamuhup fug ulug febag.

⁴³It enunggul unuk Ruben on fahet de o leimu en donggo mun leho on fam o Bezer ai febag. It enunggul unuk Gad on fahet de o Gilead en o bumbuk unuk Ramot ai febag. Ne, it Manasye on fahet de o Basan en o bumbuk unuk Golan ai febag.

⁴⁴Airoho febagdeg at Musa en Allah Wene Melaleg anyo inim, Allah en diroho diyug suroho diyug ulug melaleg wereg on anyo inim og-esebag.

⁴⁵Wene ai airoho debag aire it enebe o Mesir en mundoho wilibik watfagdeg Ik Yordan foma fil mo lahaik waharuk fil donggoma o kota Bet-Peor amig higitdoho aik watfagdeg og-esebag. O etma re atam hun Sihon it Amori on enobahet raja wereg lit atam at o kota Hesybon hwal-enepuk kwit, sebel-unusug latfag kwe. At Musa inim it ap homi Israel on inim en o Mesir en wilibik waharuk kwit enalong elehapdoho fesebag ma etmano.

⁴⁶

⁴⁷Iren o kwenang at Raja Sihon ahun en on inim, Raja Og o Basan ahun en on inim, ap raja Amori on misig amu on Ik Yordan foma fil mo lahaik waharuk fil etma welatfag on inim en on.

⁴⁸Kwenang airoho febag on aire o kota Aroer Ik Arnon aegma en de dil-dil il emberim fil Dom Siryon,[4] Dom Hermon uruk on anyo wereg ma en de,

⁴⁹Ik Yordan foma fil mo lahaik waharuk fil aire abirangge mundoho en de Dom Pisga indipmu ik Laut Mati uruk on anyo wereg huli etma febag.